LWIKHI 4
4
Logbo su Jezwi wu
(Ɔ́n wú Mat 4.1-11; Ɔ́n wú Mák 1.12-13)
1Lóka Jezwi chan Judɛn ndubhɛ mɛ́n élo, Nánnánmi Créncré ka nkɛ phɔ, ló ńdo nkɛ ɔ́nmɔn no ánánkhuthé. 2Lóne nɔn logbo sui wu ńcíbhí ágrebhɛ. Lócí khúnbrɛn lókɔn, Jezwi le li yíɛkɛ brɛ, lótɛ áko ehɔ́n-ɛn. 3Ló logbo krɛnmɛn sa:
– Kasé mímí nbrɛn ɛli Yankan Mi, tɛmɛ ɛchɛ́ ábhú lókɔn ojrɛn kpánhɔn.
4Lókhɛ́n Jezwi kranman nkɛ sa:
– Yankan hrɔ́ étɔlé: “Léli kpánhɔn míbrɛ nɔn áchɛ́ lephan bhá mɛpɔ́.”
5Logbo do-e ɔ́nmɔn lo ásibɛn alo tho nkhóo, ńchɛ nkɛ wu áthéji bhringbi yí khúnbrɛn abháne, 6ló ńkránman nkɛ sa:
– Mɛn mán khwɛ́n lóhrómɛn sɛ́npɛ́ le lóhrómɛn bhringbi yí ɔ́nmɔn sé hɛ: lósi akhɔ tɛ ɔn, wo khwɛn lóyí khúnbrɛn lókɔn ha mɛn mɔ́n mɛn, ló mɛɛ́n gɛ khwɛ́n sé lephan khɛ́n mɛn pɔ. 7Lóhɛ́nthé kasé ɛbhɔ ntráhɛ́nlé mɛn hɛ́nmɛn, lóyí khúnbrɛn lókɔn bha lí hɛ ékɛ.
8Khɛ́n Jezwi krɛnmɛn sa:
– Yankan hrɔ́ étɔlé: “Tɛmɛ ɛla hɛ Hwánthe Yankan, ló ɛkhwɛn mɛ́n míbrɛ pán hɛ́nmɛn nɛn.”
9Lómánji logbo do-e ɔ́nmɔn lo Jeruzalɛ́mɛn, ńhɔn nkɛ ya Yankan-nkhú mɛ́n piénpié tho, ló ńkránman nkɛ sa:
– Kasé mímí nbrɛn ɛli Yankan Mi, tɛmɛ ɛchán krɛn yó diathé, 10átɛsalé Yankan hrɔ́ étɔlé: “Yankan bha chɛ́ mɛ́n mranchɛ́mán bo hɛ.” 11Ló saji: “Wo bhá hɔ́n hɛ pɛ wo mɔ́n mɛn, ochɛ́sé ábhú brɛ olé dɔn hɛ nta.”
12Ló Jezwi kranman nkɛ sa:
– Yankan hrɔ́ étɔlé: “Ɛle sú hɛ Hwánthe Yankan wú.”
13Lóka logbo khɔ kɔ́nda dɔndɔn hromɛn su Jezwi wu phu, lótɛ ńchan nkɛ phɔ féne, ló ńchre ánbo ácí nánkhɛ.
Jezwi bhɔ mɛ́n júmán hɛ́n Galile gotho
(Ɔ́n wú Mat 4.12-17; Ɔ́n wú Mák 1.14-15)
14Jezwi saji lo Galile gotho, Nánnánmi Créncré sɛ́npɛ́ bha mɛ́n phɔ, ló ńnehɛ́n pi lóne gotho si khúnbrɛn. 15Ńnie yí hɛ́nbhúrɛ si, ló néphan khúnbrɛn lri nkɛ hwa.
Nazarɛ́thi khúbhɛ́nɛ́n le dɛn do Jezwi
(Ɔ́n wú Mat 13.53-58; Ɔ́n wú Mák 6.1-6)
16Jezwi lo Nazarɛ́thi khúbhɛ́ ali ási wo gbɛ. Saba cí, ńno hɛ́nbhúrɛ si, sa ló ńmáne antɛ́ wɔ́wɔ a. Ńchanfe ya ankán Yankan hrɔ́, 17ló wo hɔn Ezayi bhwetɔ́tréwo hrɔ́ se. Ńhrwɛn áhrɔ́ lókɔn wo gbɛ, ló áhrɔ́ phɛ́nta si ńphwan, ábhwe wo tɔ abha lóne nɔn ali salé:
18“Hwánthe Nánnánmi bha mɛn phɔ,
ńchɛ mɛn lée mɛn tɔ Ábhwe Bhwábhwá
sé gbremán.
Ńchɛ mɛn man kranmán khúthékámán lée
óbha dimán wo,
mɛn kranmán mɛphumán lée wo mɛbhí bha phwan,
ló mɛn swa néphan wo élri gbre ká,
19ló ápá khɛ́n Hwánthe phɔlíman bha thándi ɔn,
mɛn tɔ lóbhwe sé néphan oyé.”
20Ńhɔn hrɔ́ gbɛ, ńhɔn se nɛnkhwɛ́nwo, ló ńchethé. Néphan khúnbrɛn khɛ́n abha hɛ́nbhúrɛ si, sa hɛ́nmɛn tre enɛ́n nkɛ kɔ́nkɔ́nkɔ́n, 21lótɛ ánkranmán nkɔn sa:
– Ábhwe abha Yankan hrɔ́ phɛ́nta lókɔn hromɛn, ncɛ́n lókɔn khɛ́n wo étɔ lóbhwe sé hɔ́n yé ɔn, lóyí tɛ kábrɛ.
22Jezwi bhwe ekhwá wo khúnbrɛn hɛ́nmɛnlé, ló ábhwe bhwábhwá khúnbrɛn khɛ́n ántɔ, lólɔ etán wo hɛ́nmɛn, ló wo étɔ sa:
– Wú léli Jozɛfu mi sɛ li lókɔn?
23Ló Jezwi kranman nkɔn sa:
– Ka hɔ́n ebhú yandran lókɔn sé mɛn lée: “Gowo e, tɛmɛ ɛmɔ́n hɛ nbrɛn go phú khɛ́n.” Ka ɔ́n cu hɔ́n ékranmán mɛn lée: “Hɛ yí khúnbrɛn khɛ́n ɛtɛ Kapɛnaúmɛn khúbhɛ́ ɔn, lo ye lóbhwe, ńthé tɛmɛ ɛcu tɛ́ lóyí yábhɛ brɛ sé lo wú krɛ́nne si ali hɛ nbrɛn khúbhɛ́.”
24Ló ńcu tɔ sa:
– Mímí mɛɛ́n kranmán hɔ́n: álepɛ bhwetɔ́tréwo brɛ khɛ́n, mɛ́n nbrɛn khúbhɛ́ wo bhá do-e mwámwá. 25Mɛn mɔ́ hɔ́n phɔ salé, Eli cí tho, mímí nbrɛn, ápɛ grwanyá búdúbúdú Izraɛ khúbhɛ́. Lóka lókɔn átho ndu le khwalé ńpá bhwaliá le lókhu nbrɛn-áan, ló áko lɔ di ákhúbhɛ́ hrómɛn si khúnbrɛn. 26Lótɛ khɛ́n Yankan le chɛ Eli lo grwanya brɛ yé bhrɔ́ɔ́, kasé áleli grwanya bɛn abha Sarɛpta Sidɔn gotho hwan pán ńchɛ nkɛ lo. 27Bhwetɔ́tréwo Elize cí tho lɔ, ápɛ khokhóbhé-phɔmán búdúbúdú bha Izraɛ khúbhɛ́, khɛ́n wo hromɛn, brɛ phɔ le jan bhrɔ́ɔ́, kasé áleli Naman Siri khúbhɛ́ sɛ brɛ pán.
28Néphan khúnbrɛn khɛ́n abha hɛ́nbhúrɛ si ka aye bhwe lókɔn, ńthɛ́nyan ka wo hromɛn. 29Wo chanfe tho, ló wo ti nkɛ chan ákhúbhɛ́ hrómɛn thandi lo ábhóbhó tho si khɛ́n wo lɛ khúbhɛ́ tre, sa wo da nkɛ chán lóne bha hálé.
30Khɛ́n ńmúrikhɔ wo thethé mósi no.
Sɛ khɛ́n nánnánmi phromɛn bha phɔ
(Ɔ́n wú Mák 1.21-28)
31Jezwi lo Kapɛnaúmɛn khúbhɛ́, abha Galile gotho. Ńnie néphan yí saba cí. 32Mɛ́n si ankhɔ́ nie yí, átán wo hɛ́nmɛn, átɛsalé ántɔ bhwe sɛ́npɛ́ mɛn. 33Sɛ bɛn khɛ́n nánnánmi phromɛn bha mɛ́n phɔ lɔ bha hɛ́nbhúrɛ si. Annúkhwɛ́ khrákhrá ló ántɔ sa:
34– Weya! Jezwi Nazarɛ́thi sɛ e, bí bhwe bha lo le hɛ ɔ́nmɔn thethé ɛ? Wú bhá ɛbha ɛ́lɔ lo? Mɛn yɛn hɛ lephan ɛli: hɛ nɔn ɛli Créncré Yankan chɛ bha!
35Jezwi tɔ bhwe mɛ́n khrákhrá mɛn se nánnánmi, ńkhan nkɛ lé, ló ńkránman nkɛ sa:
– Temélé, chan lephan lókɔn phɔ thandi!
Néphan khúnbrɛn hɛ́nmɛn, nánnánmi phromɛn da sɛ lókɔn halé, ló ńchan nkɛ phɔ thandi, khɛ́n áyíɛkɛ le tɛ nkɛ bhrɔ́ɔ́. 36Lóbhwe etán wo khúnbrɛn hɛ́nmɛn, ló wo étɔ sé wo bɛn nbrɛn sa:
– Bí bhwetɔ́ yábhɛ li lókɔn ɛ? Lephan lókɔn chɛ́ nánnánmi phromɛnhɔn yí sɛ́npɛ́ mɛn, ló wo lɔ wo thándi!
37Áchɛ Jezwi lehɛ́n pi lóne gotho si khúnbrɛn.
Jezwi tɛ lɔ́phɔmán búdúbúdú phɔ jan
(Ɔ́n wú Mat 8.14-17; Ɔ́n wú Mák 1.29-34)
38Jezwi chan hɛ́nbhúrɛ si thandi, ló ńno Simɔn hwan. Ágbalɔ́ khrákhrá ka Simɔn ngrobhie phɔ, ló wo chɛ Jezwi lée antɛ́ nkɛ phɔ jan. 39Jezwi silé bha thé, ńkhan ágbalɔ́ lé sɛ́npɛ́ mɛn, ágbalɔ́ chan mɛ́n phɔ féne, ló ńchánfe ánkhwɛn nkɔn hɛ́nmɛn nɛn.
40Lóka ácɛ́nmɛ sɔha, néphan apɛ lɔ́phɔmán dɔndɔn, khwɛn nkɔn bha se Jezwi. Ńmo mɔ́n tre wo brɛ brɛ tho, ló ńtɛ wo phɔ jan. 41Nánnánmi phromɛn phromɛnhɔn lɔ chan lɔ́phɔmán búdúbúdú phɔ thandi, ló wo elúkhwɛ́ tɔ sa: “Ɛli Yankan Mi!” Khɛ́n Jezwi tɔ bhwe mɛ́n khrákhrá mɛn se wo, ló ánnɛn dɛn nkɔn tɔ bhwe, lósi akhɔ tɛ ɔn, wo lókɔn wo yɛn salé Jezwi li Mesi.
Jezwi étɔ Yankan bhwe Jude gotho
(Ɔ́n wú Mák 1.35-39)
42Lóka ácí ci, Jezwi chan khúbhɛ́ hrómɛn thandi lo ásibɛn ajanbu ká njɛ. Ápasá búdúbúdú énɛn. Lóka wo gɛ nkɛ, wo énɛn wo do nkɛ pɛ, ló ánnɛn wúsi khɔ́ yɔ́ wo kálé no. 43Khɛ́n Jezwi kranman nkɔn sa:
– Áyɔn se mɛn no tɔ Ábhwe Bhwábhwá ali Yankan Bhringbi khúbhɛ́ bhwe ákhúbhɛ́ nánkhɛhɔn hromɛn lɔ sé néphan oyé, átɛsalé lóhɛ́nthé nɔn Yankan chɛ mɛn ma.
44Ló ńtɔ Yankan bhwe hɛ́nbhúrɛ si dɔndɔn abha Jude gotho.
Ebrié New Testament © Bible Society of Côte D'Ivoire, 1996.
LWIKHI 4
4
Logbo su Jezwi wu
(Ɔ́n wú Mat 4.1-11; Ɔ́n wú Mák 1.12-13)
1Lóka Jezwi chan Judɛn ndubhɛ mɛ́n élo, Nánnánmi Créncré ka nkɛ phɔ, ló ńdo nkɛ ɔ́nmɔn no ánánkhuthé. 2Lóne nɔn logbo sui wu ńcíbhí ágrebhɛ. Lócí khúnbrɛn lókɔn, Jezwi le li yíɛkɛ brɛ, lótɛ áko ehɔ́n-ɛn. 3Ló logbo krɛnmɛn sa:
– Kasé mímí nbrɛn ɛli Yankan Mi, tɛmɛ ɛchɛ́ ábhú lókɔn ojrɛn kpánhɔn.
4Lókhɛ́n Jezwi kranman nkɛ sa:
– Yankan hrɔ́ étɔlé: “Léli kpánhɔn míbrɛ nɔn áchɛ́ lephan bhá mɛpɔ́.”
5Logbo do-e ɔ́nmɔn lo ásibɛn alo tho nkhóo, ńchɛ nkɛ wu áthéji bhringbi yí khúnbrɛn abháne, 6ló ńkránman nkɛ sa:
– Mɛn mán khwɛ́n lóhrómɛn sɛ́npɛ́ le lóhrómɛn bhringbi yí ɔ́nmɔn sé hɛ: lósi akhɔ tɛ ɔn, wo khwɛn lóyí khúnbrɛn lókɔn ha mɛn mɔ́n mɛn, ló mɛɛ́n gɛ khwɛ́n sé lephan khɛ́n mɛn pɔ. 7Lóhɛ́nthé kasé ɛbhɔ ntráhɛ́nlé mɛn hɛ́nmɛn, lóyí khúnbrɛn lókɔn bha lí hɛ ékɛ.
8Khɛ́n Jezwi krɛnmɛn sa:
– Yankan hrɔ́ étɔlé: “Tɛmɛ ɛla hɛ Hwánthe Yankan, ló ɛkhwɛn mɛ́n míbrɛ pán hɛ́nmɛn nɛn.”
9Lómánji logbo do-e ɔ́nmɔn lo Jeruzalɛ́mɛn, ńhɔn nkɛ ya Yankan-nkhú mɛ́n piénpié tho, ló ńkránman nkɛ sa:
– Kasé mímí nbrɛn ɛli Yankan Mi, tɛmɛ ɛchán krɛn yó diathé, 10átɛsalé Yankan hrɔ́ étɔlé: “Yankan bha chɛ́ mɛ́n mranchɛ́mán bo hɛ.” 11Ló saji: “Wo bhá hɔ́n hɛ pɛ wo mɔ́n mɛn, ochɛ́sé ábhú brɛ olé dɔn hɛ nta.”
12Ló Jezwi kranman nkɛ sa:
– Yankan hrɔ́ étɔlé: “Ɛle sú hɛ Hwánthe Yankan wú.”
13Lóka logbo khɔ kɔ́nda dɔndɔn hromɛn su Jezwi wu phu, lótɛ ńchan nkɛ phɔ féne, ló ńchre ánbo ácí nánkhɛ.
Jezwi bhɔ mɛ́n júmán hɛ́n Galile gotho
(Ɔ́n wú Mat 4.12-17; Ɔ́n wú Mák 1.14-15)
14Jezwi saji lo Galile gotho, Nánnánmi Créncré sɛ́npɛ́ bha mɛ́n phɔ, ló ńnehɛ́n pi lóne gotho si khúnbrɛn. 15Ńnie yí hɛ́nbhúrɛ si, ló néphan khúnbrɛn lri nkɛ hwa.
Nazarɛ́thi khúbhɛ́nɛ́n le dɛn do Jezwi
(Ɔ́n wú Mat 13.53-58; Ɔ́n wú Mák 6.1-6)
16Jezwi lo Nazarɛ́thi khúbhɛ́ ali ási wo gbɛ. Saba cí, ńno hɛ́nbhúrɛ si, sa ló ńmáne antɛ́ wɔ́wɔ a. Ńchanfe ya ankán Yankan hrɔ́, 17ló wo hɔn Ezayi bhwetɔ́tréwo hrɔ́ se. Ńhrwɛn áhrɔ́ lókɔn wo gbɛ, ló áhrɔ́ phɛ́nta si ńphwan, ábhwe wo tɔ abha lóne nɔn ali salé:
18“Hwánthe Nánnánmi bha mɛn phɔ,
ńchɛ mɛn lée mɛn tɔ Ábhwe Bhwábhwá
sé gbremán.
Ńchɛ mɛn man kranmán khúthékámán lée
óbha dimán wo,
mɛn kranmán mɛphumán lée wo mɛbhí bha phwan,
ló mɛn swa néphan wo élri gbre ká,
19ló ápá khɛ́n Hwánthe phɔlíman bha thándi ɔn,
mɛn tɔ lóbhwe sé néphan oyé.”
20Ńhɔn hrɔ́ gbɛ, ńhɔn se nɛnkhwɛ́nwo, ló ńchethé. Néphan khúnbrɛn khɛ́n abha hɛ́nbhúrɛ si, sa hɛ́nmɛn tre enɛ́n nkɛ kɔ́nkɔ́nkɔ́n, 21lótɛ ánkranmán nkɔn sa:
– Ábhwe abha Yankan hrɔ́ phɛ́nta lókɔn hromɛn, ncɛ́n lókɔn khɛ́n wo étɔ lóbhwe sé hɔ́n yé ɔn, lóyí tɛ kábrɛ.
22Jezwi bhwe ekhwá wo khúnbrɛn hɛ́nmɛnlé, ló ábhwe bhwábhwá khúnbrɛn khɛ́n ántɔ, lólɔ etán wo hɛ́nmɛn, ló wo étɔ sa:
– Wú léli Jozɛfu mi sɛ li lókɔn?
23Ló Jezwi kranman nkɔn sa:
– Ka hɔ́n ebhú yandran lókɔn sé mɛn lée: “Gowo e, tɛmɛ ɛmɔ́n hɛ nbrɛn go phú khɛ́n.” Ka ɔ́n cu hɔ́n ékranmán mɛn lée: “Hɛ yí khúnbrɛn khɛ́n ɛtɛ Kapɛnaúmɛn khúbhɛ́ ɔn, lo ye lóbhwe, ńthé tɛmɛ ɛcu tɛ́ lóyí yábhɛ brɛ sé lo wú krɛ́nne si ali hɛ nbrɛn khúbhɛ́.”
24Ló ńcu tɔ sa:
– Mímí mɛɛ́n kranmán hɔ́n: álepɛ bhwetɔ́tréwo brɛ khɛ́n, mɛ́n nbrɛn khúbhɛ́ wo bhá do-e mwámwá. 25Mɛn mɔ́ hɔ́n phɔ salé, Eli cí tho, mímí nbrɛn, ápɛ grwanyá búdúbúdú Izraɛ khúbhɛ́. Lóka lókɔn átho ndu le khwalé ńpá bhwaliá le lókhu nbrɛn-áan, ló áko lɔ di ákhúbhɛ́ hrómɛn si khúnbrɛn. 26Lótɛ khɛ́n Yankan le chɛ Eli lo grwanya brɛ yé bhrɔ́ɔ́, kasé áleli grwanya bɛn abha Sarɛpta Sidɔn gotho hwan pán ńchɛ nkɛ lo. 27Bhwetɔ́tréwo Elize cí tho lɔ, ápɛ khokhóbhé-phɔmán búdúbúdú bha Izraɛ khúbhɛ́, khɛ́n wo hromɛn, brɛ phɔ le jan bhrɔ́ɔ́, kasé áleli Naman Siri khúbhɛ́ sɛ brɛ pán.
28Néphan khúnbrɛn khɛ́n abha hɛ́nbhúrɛ si ka aye bhwe lókɔn, ńthɛ́nyan ka wo hromɛn. 29Wo chanfe tho, ló wo ti nkɛ chan ákhúbhɛ́ hrómɛn thandi lo ábhóbhó tho si khɛ́n wo lɛ khúbhɛ́ tre, sa wo da nkɛ chán lóne bha hálé.
30Khɛ́n ńmúrikhɔ wo thethé mósi no.
Sɛ khɛ́n nánnánmi phromɛn bha phɔ
(Ɔ́n wú Mák 1.21-28)
31Jezwi lo Kapɛnaúmɛn khúbhɛ́, abha Galile gotho. Ńnie néphan yí saba cí. 32Mɛ́n si ankhɔ́ nie yí, átán wo hɛ́nmɛn, átɛsalé ántɔ bhwe sɛ́npɛ́ mɛn. 33Sɛ bɛn khɛ́n nánnánmi phromɛn bha mɛ́n phɔ lɔ bha hɛ́nbhúrɛ si. Annúkhwɛ́ khrákhrá ló ántɔ sa:
34– Weya! Jezwi Nazarɛ́thi sɛ e, bí bhwe bha lo le hɛ ɔ́nmɔn thethé ɛ? Wú bhá ɛbha ɛ́lɔ lo? Mɛn yɛn hɛ lephan ɛli: hɛ nɔn ɛli Créncré Yankan chɛ bha!
35Jezwi tɔ bhwe mɛ́n khrákhrá mɛn se nánnánmi, ńkhan nkɛ lé, ló ńkránman nkɛ sa:
– Temélé, chan lephan lókɔn phɔ thandi!
Néphan khúnbrɛn hɛ́nmɛn, nánnánmi phromɛn da sɛ lókɔn halé, ló ńchan nkɛ phɔ thandi, khɛ́n áyíɛkɛ le tɛ nkɛ bhrɔ́ɔ́. 36Lóbhwe etán wo khúnbrɛn hɛ́nmɛn, ló wo étɔ sé wo bɛn nbrɛn sa:
– Bí bhwetɔ́ yábhɛ li lókɔn ɛ? Lephan lókɔn chɛ́ nánnánmi phromɛnhɔn yí sɛ́npɛ́ mɛn, ló wo lɔ wo thándi!
37Áchɛ Jezwi lehɛ́n pi lóne gotho si khúnbrɛn.
Jezwi tɛ lɔ́phɔmán búdúbúdú phɔ jan
(Ɔ́n wú Mat 8.14-17; Ɔ́n wú Mák 1.29-34)
38Jezwi chan hɛ́nbhúrɛ si thandi, ló ńno Simɔn hwan. Ágbalɔ́ khrákhrá ka Simɔn ngrobhie phɔ, ló wo chɛ Jezwi lée antɛ́ nkɛ phɔ jan. 39Jezwi silé bha thé, ńkhan ágbalɔ́ lé sɛ́npɛ́ mɛn, ágbalɔ́ chan mɛ́n phɔ féne, ló ńchánfe ánkhwɛn nkɔn hɛ́nmɛn nɛn.
40Lóka ácɛ́nmɛ sɔha, néphan apɛ lɔ́phɔmán dɔndɔn, khwɛn nkɔn bha se Jezwi. Ńmo mɔ́n tre wo brɛ brɛ tho, ló ńtɛ wo phɔ jan. 41Nánnánmi phromɛn phromɛnhɔn lɔ chan lɔ́phɔmán búdúbúdú phɔ thandi, ló wo elúkhwɛ́ tɔ sa: “Ɛli Yankan Mi!” Khɛ́n Jezwi tɔ bhwe mɛ́n khrákhrá mɛn se wo, ló ánnɛn dɛn nkɔn tɔ bhwe, lósi akhɔ tɛ ɔn, wo lókɔn wo yɛn salé Jezwi li Mesi.
Jezwi étɔ Yankan bhwe Jude gotho
(Ɔ́n wú Mák 1.35-39)
42Lóka ácí ci, Jezwi chan khúbhɛ́ hrómɛn thandi lo ásibɛn ajanbu ká njɛ. Ápasá búdúbúdú énɛn. Lóka wo gɛ nkɛ, wo énɛn wo do nkɛ pɛ, ló ánnɛn wúsi khɔ́ yɔ́ wo kálé no. 43Khɛ́n Jezwi kranman nkɔn sa:
– Áyɔn se mɛn no tɔ Ábhwe Bhwábhwá ali Yankan Bhringbi khúbhɛ́ bhwe ákhúbhɛ́ nánkhɛhɔn hromɛn lɔ sé néphan oyé, átɛsalé lóhɛ́nthé nɔn Yankan chɛ mɛn ma.
44Ló ńtɔ Yankan bhwe hɛ́nbhúrɛ si dɔndɔn abha Jude gotho.
Ebrié New Testament © Bible Society of Côte D'Ivoire, 1996.