YouVersion 標識
搜索圖示

LWIKHI 3

3
Yankan bhwe Jan-Nduhɛ́nháwo étɔ
(Ɔ́n wú Mat 3.1-12; Ɔ́n wú Mák 1.1-8; Ɔ́n wú Jan 1.19-28)
1Ákhúbhɛ́-óthe bhrɔ́khó óche Thibɛ li khúbhɛ́ áli npá áwɔ́-mwannán, lóka lókɔn nɔn Phɔ́nsu Piláthi li guvɛnɛ Jude gotho. Erɔde li khúbhɛ́ bha Galile, ló mɛ́n hɔnsɛ́n Filíphu li khúbhɛ́ bha Iture le Trakhoni ɔ́nmɔn gotho, lókhɛ́n Lysaniasi-ɛ, li khúbhɛ́ bha Abilɛnɛn gotho, 2ló Ánan le Kayífu ɔ́nmɔn-ɛ li nphahamán mrɔ́khómán. Lóka nɔn Yankan tɔ bhwe se Zakari mi Jan ánánkhuthé. 3Ló Jan lɔ lo Judɛn ndubhɛ jɛ́ njɛ khúnbrɛn éjékhali, ló ánkranmán néphan sa:
– Tɛmɛ ɔ́n jrɛn hɔ́n yítɛ́, ɔ́n chɛ́ wo há hɔ́n nduhɛ́n, ló Yankan bha yɔ́ hɔ́n ne phɔ́ hɔ́n.
4Ábhwe khɛ́n bhwetɔ́tréwo Ezayi lrɛ ha mɛ́n hrɔ́ hrómɛn ɔn, lóyí si akhɔ tɛ nɔn ali lókɔn, ló mɛ́n nkɛé:
“Lephan khɛ́n abha ánánkhuthé elúkhwɛ́,
mɛ́n tɔ́ nɔn édɛn kranmán hɔ́n salé:
Ɔ́n cɔ Hwánthe sitó tɛ́,
ɔ́n tɛ́ mɛ́n sitó khúnbrɛn oyali!
5Ɔ́n sri nɔn khúnbrɛn,
ló ńmóbhó khónkhó le lóchɛ́-nchɛ́
lɔ obhá thé;
ásitó khúnbrɛn akhraman ɔn,
tɛmɛ ɔ́n tɛ́ otiaká,
ló ásitó yányan khúnbrɛn lɔ
ɔ́n tɛ́ opriman.
6Ló néphan khúnbrɛn bha wú
Yankan si akhɔ éswa lo.”
7Ápasá bhróbhrobhé ebhá Jan yé bha há nduhɛ́n, ló ánkranmán nkɔn sa:
– Ńmɛmán hóthóbhɛ́ gbemán! Yankan kwabhɔ́ lókɔn atre hɛ́nmɛn ebhá ɔn, abɛn kránman hɔ́n lée ɔ́n gɛ chán lóhrómɛn féne ɛ? 8Tɛmɛ ɔ́n tɛ́ yí khɛ́n élie salé ɔ́n jrɛn hɔ́n yítɛ́, ló ɔ́n ne tɔ sé hɔ́n bɛn nbrɛn pán salé: “Ábrahámɛn li lo jisɛ.” Khɛ́n mɛɛ́n kranmán hɔ́n salé, Yankan gɛ khwɛ́n nmú lókɔn jrɛn Ábrahámɛn jímiɔn! 9Lóka-áan obho áhɔn ka áyá mɛ́lu thé tre: áyá khúnbrɛn tɛɛ ále sómí bhwá, óbha kɔ́ há, ló óbha hɔ́n fɔ́nká átɛn hromɛn.
10Ló ápasá ébhi nkɛ lée:
– Thénthé, ébí nɔn énɛn salé lo tɛ́ ɛ?
11Ló ńkránman nkɔn sa:
– Lephan kasé ɛpɛ ádɛgɔn mɔn, ɛbhó bɛn sé hɛ jɔ alepɛ brɛ, kasé ɛpɛ nɛn ɛlí, tɛmɛ ɛtɛ́ lóyábhɛ brɛ.
12 La-nphodómán lɔ bha ehá nduhɛ́n, ló wo ébhi Jan sa:
– Yíliéwo, ébí nɔn énɛn salé lo tɛ́ ɛ?
13Ló ńkránman nkɔn sa:
– Ási khɛ́n wo kranman hɔ́n lée ɔ́n do yí di ɔn, ɔ́n ne do yí bhuri lóne.
14Lóyábhɛ brɛ, ngbumán lɔ bha ébhi nkɛ lée:
– Yán lo-ɛ, ébí nɔn énɛn salé lo tɛ́ ɛ?
Ló ńkránman nkɔn sa:
– Ɔ́n ne khwɛ́n néphan jɛtɛn khónkhó mɛn, saji ɔ́n ne phɛ́ bhwe há néphan tho, lókhɛ́n hɔ́n pɛn kpɛɛ́ lókɔn tɛɛ wo esɔ́n hɔ́n, lótɛ nɔn ɔ́n do.
15Ńmwasrui mɛn, aféchwe khwa ébo: lósi akhɔ tɛ ɔn, wo khúnbrɛn wo ebhú salé Jan li Mesi. 16Khɛ́n Jan kranman wo khúnbrɛn sa:
– Mɛn-ɛ, ńdu nɔn mɛn mo mɛn há hɔ́n hɛ́n, khɛ́n lephan bɛn ebhá; ńpɛ sɛ́npɛ́ brɛn mɛn, mɛn nɛn ni lephan apriman khɛ́n ágɛ hrwɛn mɛ́n ngbawa bhɛ́ nwɛ́ lɔ. Mɛ́n ánman mó Nánnánmi Créncré le átɛn ɔ́nmɔn há hɔ́n hɛ́n. 17Nfa óca nbie bha mɛ́n mɔ́n mɛn, lónɔn ánman mó nca nyámí bhwá le lónbie ɔ́nmɔn tré jɛ́ njɛ. Ánmán khwɛ́n nyámí bhwá há mɛ́n kɔ mɛn, lókhɛ́n ánman khwɛ́n lónbie há átɛn atre ále nɔ́n hrómɛn.
18Ábhwe búdúbúdú yábhɛ lókɔn phɔ nɔn Jan khɔ tɔ Ábhwe Bhwábhwá se aféchwe khúnbrɛn ye. 19Lótɛ khɛ́n Jan gbrɛ guvɛnɛ Erɔde, nkɛ hɔnsɛ́n mia Herodiade nkɛ phɛn le áyí phromɛn phromɛn nankhɛ búdúbúdú nkɛ tɛ hɛ́nthé. 20Erɔde cu tɛ yí phromɛn bɛn npɔ, lónɔn ali salé: ńchɛ wo hɔn Jan ka khúthé.
Wo ha Jezwi nduhɛ́n
(Ɔ́n wú Mat 3.13-17; Ɔ́n wú Mák 1.9-11)
21Lóka oha aféchwe khúnbrɛn nduhɛ́n, ló oha Jezwi lɔ nduhɛ́n. Lóka ánna Yankan, lótɛ átho phwan, 22ló Nánnánmi Créncré bho lephanmi phɔ chantho bha ya mɛ́n tho, sa bhwebhwe a. Ló átɔ́ bɛn chantho édɛn tɔlé:
– Hɛ nɔn ɛli mɛn Mi khɛ́n mɛn pɔ, ló hɛ tho nɔn mɛn mo mɛn phɔhá khúnbrɛn tre.
Jezwi hóthóbhɛ́mánhɔn
(Ɔ́n wú Mat 1.1-17)
23Jezwi gɛ npá áphɛn le áwɔ́ khɛ́n ńmɔ mɛ́n júmán hɛ́n anní. Néphan ebhú salé ńni Jozɛfu mi. Jozɛfu li Heli mi, 24Heli li Matathi mi, Matathi li Levi mi, Levi li Mɛlchi mi, Mɛlchi li Janayi mi, Janayi li Jozɛfu mi, 25Jozɛfu li Matathiasi mi, Matathiasi li Amɔ́su mi, Amɔ́su li Nahumɛn mi, Nahumɛn li Ɛsili mi, Ɛsili li Nagayi mi, 26Nagayi li Maathi mi, Maathi li Matathiasi mi, Matathiasi li Semeɛn mi, Semeɛn li Jozɛchi mi, Jozɛchi li Joda mi, 27Joda li Johana mi, Johana li Reza mi, Reza li Zorobabɛ mi, Zorobabɛ li Salathiɛ mi, Salathiɛ li Neri mi, 28Neri li Mɛlchi mi, Mɛlchi li Addi mi, Addi li Kosamɛn mi, Kosamɛn li Ɛlmadami mi, Ɛlmadami li Ɛri mi, 29Ɛri li Jezwi mi, Jezwi li Eliezɛ mi, Eliezɛ li Jorimɛn mi, Jorimɛn li Matathi mi, Matathi li Levi mi, 30Levi li Simeɔn mi, Simeɔn li Juda mi, Juda li Jozɛfu mi, Jozɛfu li Jonamɛn mi, Jonamɛn li Eliakhimɛn mi, Eliakhimɛn li 31Melea mi, Melea li Mena mi, Mena li Matatha mi, Matatha li Natan mi, Natan li Davi mi, 32Davi li Izayi mi, Izayi li Jobɛde mi, Jobɛde li Bozu mi, Bozu li Sala mi, Sala li Naasɔn mi, 33Naasɔn li Aminadabe mi, Aminadabe li Adimɛn mi, Adimɛn li Arni mi, Arni li Ɛsirɔn mi, Ɛsirɔn li Farɛsi mi, Farɛsi li Juda mi, 34Juda li Jakɔ́phu mi, Jakɔ́phu li Izakhi mi, Izakhi li Ábrahámɛn mi, Ábrahámɛn li Tara mi, Tara li Nachɔ mi, 35Nachɔ li Seruchi mi, Seruchi li Rago mi, Rago li Falɛkhi mi, Falɛkhi li Ebɛ mi, Ebɛ li Sala mi, 36Sala li Kɛnamɛn mi, Kɛnamɛn li Afazadi mi, Afazadi li Sɛmɛn mi, Sɛmɛn li Noe mi, Noe li Lamɛkhi mi, 37Lamɛkhi li Mathusala mi, Mathusala li Enɔ́khi mi, Enɔkhi li Jarɛdi mi, Jarɛdi li Malelɛ mi, Malelɛ li Kɛnan mi, Kɛnan li 38Enɔsu mi, Enɔsu li Sɛthi mi, Sɛthi li Ádan mi, ló Yankan tɛ Ádan.

目前選定:

LWIKHI 3: ENT96

醒目顯示

分享

複製

None

想要在所有設備上保存你的醒目顯示嗎? 註冊或登入