LWIKHI 1
1
Ábhwe abhɔhɛ́n
1Teofi mɛn jɔ bhwá,
Áyí atɛ lo thethé ka abhɔhɛ́n, néphan búdúbúdú wu mɛbhí mɛn, ló wo tɛ lóphɔ hrɔ́. 2Néphan étɔ Yankan bhwe sé lo yé, khɛ́n ali néphan awu lóyí lókɔnhɔn wo mɛbhí mɛn lóka ábhɔhɛ́n, wo bhwe tɛɛ wo tɔ se lo ye ɔn, lóbhwe brɛ nɔn néphan atɛ khekhremɛn tɛ lóphɔ hrɔ́ lɔ tɔ cɛ́ɛ́. 3Lóhɛ́nthé, lóka ádi mɛn yé, mɛn lɔ mɛn chan lóthé-áan nɛn lómɛ́si khúnbrɛn simɛ́n, ló ániman mɛn salé mɛn jɔ bhwá, lóyí khúnbrɛn lókɔn atɛ, mɛn nrɛ há hrɔ́ mɛn sé hɛ. 4Mɛn tɛ, ló ochɛ́ ɔ́n yɛ́n salé áyí lo lie hɔ́n ɔn, áli ábhwe mímí.
Yankan-mranchɛ́wo bɛn bha étɔ Jan-Nduhɛ́nháwo hó phɔ bhwe
5 Erɔde cí ali khúbhɛ́ Jude gotho, ápɛ nphaháwo bɛn bháne óche Zakari, ńma Abia nphaháwo gbemán hrómɛn. Mɛ́n bhia hɛ́n li Elizabhɛ́thi achan Arɔn nphaháwo mándo hromɛn. 6Wo mɔ́nmɔn wo li néphan apriman Yankan hɛ́nmɛn, wo ji Hwánthe bidí le mɛ́n bhwetɔ́ khúnbrɛn ɔ́nmɔn símɛ́n cɛ́ɛ́. 7Khɛ́n wo le ho yípɔ brɛ, átɛsalé Elizabhɛ́thi chetran, saji wo mɔ́nmɔn wo thi.
8Cíbɛn ńphaha yítɛ́ dɔn Zakari gbemán, ló Zakari ya Yankan-khúthé elí mɛ́n júmán. 9Wo ti ngbamán, ló ádɔn Zakari sa annó Hwánthe nphaha túprán hɛ́nmɛn, ló ankhwɛ́n kprɛ́nkhuma ha npha. 10Lóka wáchɛn si, khɛ́n wo efɔ́n kprɛ́nkhuma, lóka lókɔn, ápasá khúnbrɛn bha ngbophro éla Yankan. 11Hwánthe-mranchɛ́wo bɛn thandi ya Zakari hɛ́nmɛn: ló nphaha túprán khɛ́n wo khwɛ́n kprɛ́nkhuma hátɛn ha npha lótho ɔn, ńya lóliémɔn njɛ. 12Zakari ka awu nkɛ, ansókhú, ló ńthɛ́n eli. 13Lókhɛ́n Yankan-mranchɛ́wo krɛnmɛn sa:
– Zakari, ɛle sókhú, Yankan ye hɛ la tɔ́: hɛ bhia Elizabhɛ́thi bha hó sɛ bɛn sé hɛ, ló mɛ́n hɛ́n ɛ́bha se nɔn ali Jan. 14Ábha lí phɔhá khóo sé hɛ, ló néphan búdúbúdú bha lí phɔhá mɛ́n hó hrómɛn. 15Ánman ní lephan khóo Hwánthe hɛ́nmɛn, divɛn lɔ anman nɛ́n nán, ńdɛ khrákhrá nánkhɛ lɔ anman nɛ́n nán. Mɛ́n ka tɛɛ óbha hó-e, Nánnánmi Créncré bha bhá mɛ́n phɔ. 16Ánman do Izraɛ khúbhɛ́nɛ́n búdúbúdú sáji bha gɛ wo Hwánthe Yankan. 17Mɛ́n nbrɛn ánman khɔ́ bhwetɔ́tréwo Eli nánnánmi le nkɛ sɛ́npɛ́ ɔ́nmɔn hrómɛn nɛnsi Yankan hɛ́nmɛn. Ánman chɛ́ nthemánhɔn le wo miɔn ɔ́nmɔn nrwɛn, ló ánman chɛ́ néphan ále ji bhwe ojrɛn bhweyɛ́nmán ali néphan apriman; ló ánman chɛ́ ábha pɛ aféchwe brɛ abhra ya se Hwánthe.
18Khɛ́n Zakari kranman Yankan-mranchɛ́wo sa:
– Kalósi mán khɔ́ yɛ́n salé hɛ bhwe lókɔn ɛtɔ áli ábhwe mímí e? Khɔ́ mɛn thi, saji mɛn bhia lɔ thi.
19Ló Yankan-mranchɛ́wo krɛnmɛn sa:
– Mɛn nɔn mɛn ni Gabriɛ, mɛn nɔn mɛn ni lephan aya Yankan hɛ́nmɛn ékhwɛn mɛ́n hɛ́nmɛn nɛn. Ńchɛ mɛn salé mɛn man tɔ bhwe sé hɛ, ló mɛn tɔ ábhwe bhwábhwá lókɔn sé hɛ. 20Khɛ́n ɛle bhu mɛn bhwe mímí. Ápɛ cí, ábhwe lókɔn mɛɛ́n tɔ ɔn, lóyí bha tɛ́ símɛ́n. Lóhɛ́nthé hɛ mɛ́n bha phúsi, ló ɛbha lé gɛ tɔ bhwe, kábrɛ kábrɛ lóyí lókɔnhɔn bha tɛ́ khɛ́n.
21Lóka lókɔn, aféchwe khúnbrɛn khwa ngbophro ébo Zakari tɛɛ, ló nkɛ bhá nkɛ bha ńphaha túprán hɛ́nmɛn khɛ́n emɔ́n, lóbhwe etán wo hɛ́nmɛn. 22Mɛ́n ka ńthándi, ánnɛn gɛ tɔ bhwe, ló néphan lɔ yɛn salé ńwu ńmɛlrɛ yíbɛn ńphaha túprán hɛ́nmɛn. Lótɛ ńsi nkɔn mɔ́n, mɛ́n mɛ́n phusi tre lóne.
23Mɛ́n júmán anní Yankan-khúthé, lóka áphu, ló ńsáji no mɛ́n hwan. 24Áli ncíbhí kpɛ́bɛn pán, mɛ́n bhia Elizabhɛ́thi ethí lábhɛ, khɛ́n nkɛ le thandi kábrɛ kábrɛ áli pɛ mwannán. Ló Elizabhɛ́thi tɔ mɛ́n hrómɛn mɛn sa: 25“Nɛn Hwánthe yí atɛ se mɛn o, lónɔn ali salé: áyí khɛ́n lócí etɛ́ mɛn hɛ́ndɛ néphan hɛ́nmɛn ɔn, thénthé ńdɛn swa mɛn yɛn lóhrómɛn.”
Yankan-mranchɛ́wo bɛn bha étɔ Jezwi hó phɔ bhwe
26Elizabhɛ́thi thi lábhɛ. Lópɛ khwá hrómɛn, Yankan chɛ Yankan-mranchɛ́wo Gabriɛ lo Nazarɛ́thi khúbhɛ́ abha Galile gotho. 27Ńno bhiebhri bɛn yé. Bhiebhri lókɔn hɛ́n li Mari khɛ́n agɛ sɛ bɛn ɔ́nmɔn sri bhwe tre salé wo bhá phɛ́n. Sɛ lókɔn hɛ́n li Jozɛfu achan bhringbi Davi mándo hromɛn. 28Yankan-mranchɛ́wo lɛ nkɛ hwan, ńmɔ nkɛ yí, ló ńtɔ sa:
– Mari tɛmɛ ɛlí phɔhá. Hɛ khɛ́n Hwánthe bho mɛ́n phɔlíman ká njɛ sé hɛ ɔn, ńma hɛ phɔ.
29Ábhwetɔ́ lókɔn égbɔn Mari phɔ, ló ánnɛn áyíbhɔ́ yábhɛ lókɔn thé anyé. 30Lótɛ Yankan-mranchɛ́wo krɛnmɛn sa:
– Mari ɛle sókhú, ɛgɛ Yankan phɔlíman. 31Ɛ́bha thí lábhɛ, ɛ́bha hó sɛ bɛn, ló mɛ́n hɛ́n ɛ́bha se nɔn ali Jezwi. 32Ánman tɛ́ nkhóo, wo bhá che nkɛ Yankan abha tho-áan mɛ́n Bhi. Hwánthe Yankan bha chɛ ánman ní bhringbi sa mɛ́n jisɛ Davi, 33ánman tré Izraɛ khúbhɛ́nɛ́n lé ácí khúnbrɛn, ló mɛ́n tré ánman tré nkɔn lé, abha le phú bhrɔ́ɔ́.
34Ló Mari bhi Yankan-mranchɛ́wo sa:
– Khɔ́ mɛn nɛn yɛn sɛ a, ńthé kalósi lóyí bha khɔ́ tɛ́ e?
35Ló Yankan-mranchɛ́wo krɛnmɛn sa:
– Nánnánmi Créncré bha ká hɛ phɔ, ló Yankan abha átho-áan sɛ́npɛ́ bha mrwɛn hɛ sa ńnánphɔ a. Lóhɛ́nthé nɔn yípɔ khɛ́n ɛ́bha hó, óbha che nkɛ Créncré Yankan Mi. 36Hɛ mándo bhie thíthi ali Elizabhɛ́thi lɔ khakpɛɛ́ ebhá hó sɛ. Néphan nkɛé, nkɛ bha le hó, lókhɛ́n ńthi lábhɛ ɔɔ, mɛ́n pɛ khwá nɔn ali lókɔn. 37Átɛsalé álepɛ yíɛkɛ akhɔnman se Yankan.
38Lótɛ Mari tɔ sa:
– Mɛn ni Hwánthe nɛnkhwɛ́nya, ló hɛ bhwe ɛtɔ ɔn, tɛmɛ lóyí otɛ́ sé mɛn.
Ló Yankan-mranchɛ́wo yɔ nkɛ ka lé lo.
Mari lo ewú Elizabhɛ́thi
39Lóka brɛ hromɛn nɔn Mari bho sitó, ló hɛ́nmɛn hɛ́nmɛn, ńno ákhúbhɛ́ bɛn abha Jude gotho móbhó tho. 40Ńno Zakari hwan ló ńmɔ Elizabhɛ́thi yí. 41Lóka Elizabhɛ́thi ye Mari yí abhɔ-ɛ, lópán yípɔ éfe mɛ́n hrómɛn. Nánnánmi Créncré ka Elizabhɛ́thi phɔ, 42ńnukhwɛ́ átɔ́ khrákhrá mɛn sa:
– Yankan bhɔ hɛ ndu brɛn ńmie khúnbrɛn, ló yípɔ ɛ́bha hó, mɛ́n ndubhɔ́ bhá nkɛ phɔ! 43Wú mɛn lɔ okan mɛn lephan, khɛ́n mɛn Hwánthe mɛ́n man lɛ́ mɛn hwan? 44Wu a, lóka tɛɛ mɛn ye hɛ yí bhɔ́ tɔ́, lópán áphɔhá mɛn, yípɔ éfe mɛn hromɛn. 45Áphɔ khwa hɛ lé, hɛ khɛ́n ɛbhu mímí salé Hwánthe bhwe wo tɔ se hɛ ɔn, lóyí khúnbrɛn bha tɛ́ símɛ́n!
Mari lri Yankan hwa
46Ló Mari tɔ sa:
– Mɛn hɛ́nfan élri Hwánthe lephan khóo ali hwa,
47ló áphɔhá si mɛn thɛ́n hrómɛn,
Yankan ali mɛn Dókáwo hɛ́nthé,
48átɛsa ńdɛn gbɛnɛn wu mɛn,
mɛn lókɔn khɛ́n mɛn ni nfɛkhuya, mɛ́n nɛnkhwɛ́nya wrɛ́.
Ee, achan ncɛ́n élo, ápá khúnbrɛn hrómɛn,
néphan bha tɔlé
áphɔ khwa mɛn lé;
49átɛsalé Yankan sɛ́npɛ́wo khóo
tɛ yíbhwá sé mɛn.
Mɛ́n hɛ́n tɛ Créncré,
50ló ápá khúnbrɛn hrómɛn,
néphan khɛ́n eso-e ájí hrómɛn ɔn,
ánman wú nkɔn nfɛkhu.
51Ńmo mɛ́n sɛ́npɛ́ mɔ́n
tɛ́ áyí khónkhó:
ló néphan édi mɔ́n thɛ́n,
ńchránman nkɔn lé.
52Ankhwɛ́n mringbilímán yɛn nkɔn yákhru tho
ló ankhwɛ́n nfɛkhumán
hɛ́n jetho.
53Néphan áko ehɔ́n,
ansé nkɔn nɛnlí búdúbúdú,
ló anyɔ́ mringbilímán khwá
bhó mɔ́nbhíwrɛ́ ɔ́nmɔn lo.
54Izraɛ khúbhɛ́nɛ́n ali mɛ́n nɛnkhwɛ́nmán
ńdɔnman nkɔn mɔ́n:
ló ácí khúnbrɛn, mɛ́n yíbhwá khɛ́n
55ánman tɛ́ sé Ábrahámɛn le nkɛ jímiɔn,
sa lósi ńkhɔ tɔ lóbhwe tre lo jisɛmánhɔn lé ɔn,
abha le liɛli bhrɔ́ɔ́.
56Mari gɛ Elizabhɛ́thi ɔ́nmɔn chre áli pɛ mwannán nbrɛn-áan, khɛ́n ńsáji no mɛ́n hwan.
Jan-Nduhɛ́nháwo hó phɔ bhwe
57Lóka Elizabhɛ́thi hó cí si, ńho sɛbhri bɛn. 58Mɛ́n chrégbamán le wo mándonɛ́n ɔ́nmɔn ye sa Hwánthe tɛ mɛ́n nfɛkhuwú yí sé nkɛ, ló wo bha wo égɛ nkɛ ɔ́nmɔn lí phɔhá. 59Lóka ácí si ńcíbhí bhia, wo bha wo éjan yípɔ khɛn. Ló ńhɛ́n wo énɛn wo sé nkɛ nɔn ali Zakari, khɔ́ mɛ́n the hɛ́n ali é. 60Khɛ́n mɛ́n man le dɛn, ló ńkránman nkɔn sa:
– Mɛ́n hɛ́n ánman ní nɔn ali Jan.
61Ló wo kranman nkɛ lée:
– Hɛ mándo hromɛn, khɔ́ álepɛ lephan ali ńhɛ́n yábhɛ lókɔn a.
62Ló wo bho mɔ́n mɛn wo ébhi nkɛ the, ńhɛ́n yípɔ bha lí. 63Zakari chɛ nkɔn bho agbophɛ́n bɛn se, ló ńnrɛ lée: “Mɛ́n hɛ́n li Jan.” Ló lóbhwe etán wo khúnbrɛn hɛ́nmɛn. 64Lóyámɛ́n, mɛ́n mɛ́n phwan, mɛ́n lɛ́thé lɔ hrwɛn, ló átɔ́ khrákhrá mɛn, ánnri Yankan hwa. 65Ákhúsó ka mɛ́n chrégbamán khúnbrɛn hrómɛn, ló lóyí lókɔn atɛ, néphan étɔ lóphɔ bhwe, ágotho si khúnbrɛn abha Jude móbhó hrómɛn. 66Néphan khúnbrɛn aye lóbhwe, etɛ́ hɛ́nphebhú sé wo, ló wo étɔ sa:
– Ébí lephan yábhɛ yípɔ lókɔn bha lí ɛ?
Átɛsa Hwánthe sɛ́npɛ́ bha mɛ́n phɔ mímí nbrɛn.
Zakari lri Yankan hwa
67Nánnánmi Créncré ka Jan nthe Zakari phɔ; ló ńchɛ Zakari étɔ Yankan phɔ bhwe sa:
68– Tɛmɛ áhwalri ogɛ Hwánthe,
ali Izraɛ khúbhɛ́nɛ́n Yankan,
átɛsalé ánman kpra mɛ́n féchwe,
ló ánman swa nkɛ.
69Ńse lo Adókáwo sɛ́npɛ́wo bɛn,
abha ka mɛ́n nɛnkhwɛ́nwo
Davi jímiɔn thethé.
70Lócí-áan, Yankan bhwe akhɔ
mɛ́n bhwetɔ́trémán créncré phɔ tɔtre
nɔn ali lókɔn:
71Yankan nkɛé mɛ́n man swa lo
yɛn lo mɛsamán le néphan asa lo mɛ
ɔ́nmɔn mɔ́n mɛn,
72Yankan nkɛé mɛ́n man wú lo
jisɛmánhɔn nfɛkhu
ló akprɔbha créncré khɛ́n ńsi tre ɔn,
lóbhwe bha di mwanhɛ́n.
73Átɛsalé Yankan bhɔli mɛ́n phɔ,
kranman lo jisɛ Ábrahámɛn tre salé,
74mɛ́n man swa lo yɛn lo mɛsamán
mɔ́n mɛn
ló lo bhá khwɛn mɛ́n hɛ́nmɛn nɛn
lo bha le sókhú;
75ochɛ́sé lo mɛpɔ́bhá cí khúnbrɛn hrómɛn,
lo lí néphan atɛ créncré le néphan apriman
mɛ́n hɛ́nmɛn.
76Ló hɛ mɛn bhi, wo bhá che hɛ
Yankan abha tho-áan mɛ́n bhwetɔ́tréwo,
átɛsalé ɛ́bha nɛnsi Hwánthe hɛ́nmɛn
ló ɛ́bha cɔ mɛ́n sitó tɛ́,
77lóthé nɔn ali salé ɛ́bha chɛ́ mɛ́n gbemán
yɛ́n salé Hwánthe bha swa wo
ló nkɛ bhá yɔ́ wo ne phɔ́ wo.
78Lo Yankan li lephan apɛ ápɔ́ khóo
ló ńyɔn se lo:
ánman chɛ́ átho yéfí bha fí ká lo phɔ,
áyéfí atɛsa ńjuju fítaan yéfí,
79lóyéfí lókɔn bha fí
sé néphan abha dubhlékhu hromɛn,
le néphan abha ákhú nánphɔ thé,
ló ábha yalí lo nta khɔ́
ńthɛ́nkhwálé sitó hrómɛn.
80Yípɔ etɛ́ nkhóo, ló mɛ́n bhweyɛ́n lɔ ethúbhɔ Yankan sɛ́npɛ́ hrómɛn. Ńchre ánánkhuthé kábrɛ kábrɛ ádi mɛ́n ka ńthándi Izraɛ khúbhɛ́nɛ́n pasá hɛ́nmɛn.
Ebrié New Testament © Bible Society of Côte D'Ivoire, 1996.
LWIKHI 1
1
Ábhwe abhɔhɛ́n
1Teofi mɛn jɔ bhwá,
Áyí atɛ lo thethé ka abhɔhɛ́n, néphan búdúbúdú wu mɛbhí mɛn, ló wo tɛ lóphɔ hrɔ́. 2Néphan étɔ Yankan bhwe sé lo yé, khɛ́n ali néphan awu lóyí lókɔnhɔn wo mɛbhí mɛn lóka ábhɔhɛ́n, wo bhwe tɛɛ wo tɔ se lo ye ɔn, lóbhwe brɛ nɔn néphan atɛ khekhremɛn tɛ lóphɔ hrɔ́ lɔ tɔ cɛ́ɛ́. 3Lóhɛ́nthé, lóka ádi mɛn yé, mɛn lɔ mɛn chan lóthé-áan nɛn lómɛ́si khúnbrɛn simɛ́n, ló ániman mɛn salé mɛn jɔ bhwá, lóyí khúnbrɛn lókɔn atɛ, mɛn nrɛ há hrɔ́ mɛn sé hɛ. 4Mɛn tɛ, ló ochɛ́ ɔ́n yɛ́n salé áyí lo lie hɔ́n ɔn, áli ábhwe mímí.
Yankan-mranchɛ́wo bɛn bha étɔ Jan-Nduhɛ́nháwo hó phɔ bhwe
5 Erɔde cí ali khúbhɛ́ Jude gotho, ápɛ nphaháwo bɛn bháne óche Zakari, ńma Abia nphaháwo gbemán hrómɛn. Mɛ́n bhia hɛ́n li Elizabhɛ́thi achan Arɔn nphaháwo mándo hromɛn. 6Wo mɔ́nmɔn wo li néphan apriman Yankan hɛ́nmɛn, wo ji Hwánthe bidí le mɛ́n bhwetɔ́ khúnbrɛn ɔ́nmɔn símɛ́n cɛ́ɛ́. 7Khɛ́n wo le ho yípɔ brɛ, átɛsalé Elizabhɛ́thi chetran, saji wo mɔ́nmɔn wo thi.
8Cíbɛn ńphaha yítɛ́ dɔn Zakari gbemán, ló Zakari ya Yankan-khúthé elí mɛ́n júmán. 9Wo ti ngbamán, ló ádɔn Zakari sa annó Hwánthe nphaha túprán hɛ́nmɛn, ló ankhwɛ́n kprɛ́nkhuma ha npha. 10Lóka wáchɛn si, khɛ́n wo efɔ́n kprɛ́nkhuma, lóka lókɔn, ápasá khúnbrɛn bha ngbophro éla Yankan. 11Hwánthe-mranchɛ́wo bɛn thandi ya Zakari hɛ́nmɛn: ló nphaha túprán khɛ́n wo khwɛ́n kprɛ́nkhuma hátɛn ha npha lótho ɔn, ńya lóliémɔn njɛ. 12Zakari ka awu nkɛ, ansókhú, ló ńthɛ́n eli. 13Lókhɛ́n Yankan-mranchɛ́wo krɛnmɛn sa:
– Zakari, ɛle sókhú, Yankan ye hɛ la tɔ́: hɛ bhia Elizabhɛ́thi bha hó sɛ bɛn sé hɛ, ló mɛ́n hɛ́n ɛ́bha se nɔn ali Jan. 14Ábha lí phɔhá khóo sé hɛ, ló néphan búdúbúdú bha lí phɔhá mɛ́n hó hrómɛn. 15Ánman ní lephan khóo Hwánthe hɛ́nmɛn, divɛn lɔ anman nɛ́n nán, ńdɛ khrákhrá nánkhɛ lɔ anman nɛ́n nán. Mɛ́n ka tɛɛ óbha hó-e, Nánnánmi Créncré bha bhá mɛ́n phɔ. 16Ánman do Izraɛ khúbhɛ́nɛ́n búdúbúdú sáji bha gɛ wo Hwánthe Yankan. 17Mɛ́n nbrɛn ánman khɔ́ bhwetɔ́tréwo Eli nánnánmi le nkɛ sɛ́npɛ́ ɔ́nmɔn hrómɛn nɛnsi Yankan hɛ́nmɛn. Ánman chɛ́ nthemánhɔn le wo miɔn ɔ́nmɔn nrwɛn, ló ánman chɛ́ néphan ále ji bhwe ojrɛn bhweyɛ́nmán ali néphan apriman; ló ánman chɛ́ ábha pɛ aféchwe brɛ abhra ya se Hwánthe.
18Khɛ́n Zakari kranman Yankan-mranchɛ́wo sa:
– Kalósi mán khɔ́ yɛ́n salé hɛ bhwe lókɔn ɛtɔ áli ábhwe mímí e? Khɔ́ mɛn thi, saji mɛn bhia lɔ thi.
19Ló Yankan-mranchɛ́wo krɛnmɛn sa:
– Mɛn nɔn mɛn ni Gabriɛ, mɛn nɔn mɛn ni lephan aya Yankan hɛ́nmɛn ékhwɛn mɛ́n hɛ́nmɛn nɛn. Ńchɛ mɛn salé mɛn man tɔ bhwe sé hɛ, ló mɛn tɔ ábhwe bhwábhwá lókɔn sé hɛ. 20Khɛ́n ɛle bhu mɛn bhwe mímí. Ápɛ cí, ábhwe lókɔn mɛɛ́n tɔ ɔn, lóyí bha tɛ́ símɛ́n. Lóhɛ́nthé hɛ mɛ́n bha phúsi, ló ɛbha lé gɛ tɔ bhwe, kábrɛ kábrɛ lóyí lókɔnhɔn bha tɛ́ khɛ́n.
21Lóka lókɔn, aféchwe khúnbrɛn khwa ngbophro ébo Zakari tɛɛ, ló nkɛ bhá nkɛ bha ńphaha túprán hɛ́nmɛn khɛ́n emɔ́n, lóbhwe etán wo hɛ́nmɛn. 22Mɛ́n ka ńthándi, ánnɛn gɛ tɔ bhwe, ló néphan lɔ yɛn salé ńwu ńmɛlrɛ yíbɛn ńphaha túprán hɛ́nmɛn. Lótɛ ńsi nkɔn mɔ́n, mɛ́n mɛ́n phusi tre lóne.
23Mɛ́n júmán anní Yankan-khúthé, lóka áphu, ló ńsáji no mɛ́n hwan. 24Áli ncíbhí kpɛ́bɛn pán, mɛ́n bhia Elizabhɛ́thi ethí lábhɛ, khɛ́n nkɛ le thandi kábrɛ kábrɛ áli pɛ mwannán. Ló Elizabhɛ́thi tɔ mɛ́n hrómɛn mɛn sa: 25“Nɛn Hwánthe yí atɛ se mɛn o, lónɔn ali salé: áyí khɛ́n lócí etɛ́ mɛn hɛ́ndɛ néphan hɛ́nmɛn ɔn, thénthé ńdɛn swa mɛn yɛn lóhrómɛn.”
Yankan-mranchɛ́wo bɛn bha étɔ Jezwi hó phɔ bhwe
26Elizabhɛ́thi thi lábhɛ. Lópɛ khwá hrómɛn, Yankan chɛ Yankan-mranchɛ́wo Gabriɛ lo Nazarɛ́thi khúbhɛ́ abha Galile gotho. 27Ńno bhiebhri bɛn yé. Bhiebhri lókɔn hɛ́n li Mari khɛ́n agɛ sɛ bɛn ɔ́nmɔn sri bhwe tre salé wo bhá phɛ́n. Sɛ lókɔn hɛ́n li Jozɛfu achan bhringbi Davi mándo hromɛn. 28Yankan-mranchɛ́wo lɛ nkɛ hwan, ńmɔ nkɛ yí, ló ńtɔ sa:
– Mari tɛmɛ ɛlí phɔhá. Hɛ khɛ́n Hwánthe bho mɛ́n phɔlíman ká njɛ sé hɛ ɔn, ńma hɛ phɔ.
29Ábhwetɔ́ lókɔn égbɔn Mari phɔ, ló ánnɛn áyíbhɔ́ yábhɛ lókɔn thé anyé. 30Lótɛ Yankan-mranchɛ́wo krɛnmɛn sa:
– Mari ɛle sókhú, ɛgɛ Yankan phɔlíman. 31Ɛ́bha thí lábhɛ, ɛ́bha hó sɛ bɛn, ló mɛ́n hɛ́n ɛ́bha se nɔn ali Jezwi. 32Ánman tɛ́ nkhóo, wo bhá che nkɛ Yankan abha tho-áan mɛ́n Bhi. Hwánthe Yankan bha chɛ ánman ní bhringbi sa mɛ́n jisɛ Davi, 33ánman tré Izraɛ khúbhɛ́nɛ́n lé ácí khúnbrɛn, ló mɛ́n tré ánman tré nkɔn lé, abha le phú bhrɔ́ɔ́.
34Ló Mari bhi Yankan-mranchɛ́wo sa:
– Khɔ́ mɛn nɛn yɛn sɛ a, ńthé kalósi lóyí bha khɔ́ tɛ́ e?
35Ló Yankan-mranchɛ́wo krɛnmɛn sa:
– Nánnánmi Créncré bha ká hɛ phɔ, ló Yankan abha átho-áan sɛ́npɛ́ bha mrwɛn hɛ sa ńnánphɔ a. Lóhɛ́nthé nɔn yípɔ khɛ́n ɛ́bha hó, óbha che nkɛ Créncré Yankan Mi. 36Hɛ mándo bhie thíthi ali Elizabhɛ́thi lɔ khakpɛɛ́ ebhá hó sɛ. Néphan nkɛé, nkɛ bha le hó, lókhɛ́n ńthi lábhɛ ɔɔ, mɛ́n pɛ khwá nɔn ali lókɔn. 37Átɛsalé álepɛ yíɛkɛ akhɔnman se Yankan.
38Lótɛ Mari tɔ sa:
– Mɛn ni Hwánthe nɛnkhwɛ́nya, ló hɛ bhwe ɛtɔ ɔn, tɛmɛ lóyí otɛ́ sé mɛn.
Ló Yankan-mranchɛ́wo yɔ nkɛ ka lé lo.
Mari lo ewú Elizabhɛ́thi
39Lóka brɛ hromɛn nɔn Mari bho sitó, ló hɛ́nmɛn hɛ́nmɛn, ńno ákhúbhɛ́ bɛn abha Jude gotho móbhó tho. 40Ńno Zakari hwan ló ńmɔ Elizabhɛ́thi yí. 41Lóka Elizabhɛ́thi ye Mari yí abhɔ-ɛ, lópán yípɔ éfe mɛ́n hrómɛn. Nánnánmi Créncré ka Elizabhɛ́thi phɔ, 42ńnukhwɛ́ átɔ́ khrákhrá mɛn sa:
– Yankan bhɔ hɛ ndu brɛn ńmie khúnbrɛn, ló yípɔ ɛ́bha hó, mɛ́n ndubhɔ́ bhá nkɛ phɔ! 43Wú mɛn lɔ okan mɛn lephan, khɛ́n mɛn Hwánthe mɛ́n man lɛ́ mɛn hwan? 44Wu a, lóka tɛɛ mɛn ye hɛ yí bhɔ́ tɔ́, lópán áphɔhá mɛn, yípɔ éfe mɛn hromɛn. 45Áphɔ khwa hɛ lé, hɛ khɛ́n ɛbhu mímí salé Hwánthe bhwe wo tɔ se hɛ ɔn, lóyí khúnbrɛn bha tɛ́ símɛ́n!
Mari lri Yankan hwa
46Ló Mari tɔ sa:
– Mɛn hɛ́nfan élri Hwánthe lephan khóo ali hwa,
47ló áphɔhá si mɛn thɛ́n hrómɛn,
Yankan ali mɛn Dókáwo hɛ́nthé,
48átɛsa ńdɛn gbɛnɛn wu mɛn,
mɛn lókɔn khɛ́n mɛn ni nfɛkhuya, mɛ́n nɛnkhwɛ́nya wrɛ́.
Ee, achan ncɛ́n élo, ápá khúnbrɛn hrómɛn,
néphan bha tɔlé
áphɔ khwa mɛn lé;
49átɛsalé Yankan sɛ́npɛ́wo khóo
tɛ yíbhwá sé mɛn.
Mɛ́n hɛ́n tɛ Créncré,
50ló ápá khúnbrɛn hrómɛn,
néphan khɛ́n eso-e ájí hrómɛn ɔn,
ánman wú nkɔn nfɛkhu.
51Ńmo mɛ́n sɛ́npɛ́ mɔ́n
tɛ́ áyí khónkhó:
ló néphan édi mɔ́n thɛ́n,
ńchránman nkɔn lé.
52Ankhwɛ́n mringbilímán yɛn nkɔn yákhru tho
ló ankhwɛ́n nfɛkhumán
hɛ́n jetho.
53Néphan áko ehɔ́n,
ansé nkɔn nɛnlí búdúbúdú,
ló anyɔ́ mringbilímán khwá
bhó mɔ́nbhíwrɛ́ ɔ́nmɔn lo.
54Izraɛ khúbhɛ́nɛ́n ali mɛ́n nɛnkhwɛ́nmán
ńdɔnman nkɔn mɔ́n:
ló ácí khúnbrɛn, mɛ́n yíbhwá khɛ́n
55ánman tɛ́ sé Ábrahámɛn le nkɛ jímiɔn,
sa lósi ńkhɔ tɔ lóbhwe tre lo jisɛmánhɔn lé ɔn,
abha le liɛli bhrɔ́ɔ́.
56Mari gɛ Elizabhɛ́thi ɔ́nmɔn chre áli pɛ mwannán nbrɛn-áan, khɛ́n ńsáji no mɛ́n hwan.
Jan-Nduhɛ́nháwo hó phɔ bhwe
57Lóka Elizabhɛ́thi hó cí si, ńho sɛbhri bɛn. 58Mɛ́n chrégbamán le wo mándonɛ́n ɔ́nmɔn ye sa Hwánthe tɛ mɛ́n nfɛkhuwú yí sé nkɛ, ló wo bha wo égɛ nkɛ ɔ́nmɔn lí phɔhá. 59Lóka ácí si ńcíbhí bhia, wo bha wo éjan yípɔ khɛn. Ló ńhɛ́n wo énɛn wo sé nkɛ nɔn ali Zakari, khɔ́ mɛ́n the hɛ́n ali é. 60Khɛ́n mɛ́n man le dɛn, ló ńkránman nkɔn sa:
– Mɛ́n hɛ́n ánman ní nɔn ali Jan.
61Ló wo kranman nkɛ lée:
– Hɛ mándo hromɛn, khɔ́ álepɛ lephan ali ńhɛ́n yábhɛ lókɔn a.
62Ló wo bho mɔ́n mɛn wo ébhi nkɛ the, ńhɛ́n yípɔ bha lí. 63Zakari chɛ nkɔn bho agbophɛ́n bɛn se, ló ńnrɛ lée: “Mɛ́n hɛ́n li Jan.” Ló lóbhwe etán wo khúnbrɛn hɛ́nmɛn. 64Lóyámɛ́n, mɛ́n mɛ́n phwan, mɛ́n lɛ́thé lɔ hrwɛn, ló átɔ́ khrákhrá mɛn, ánnri Yankan hwa. 65Ákhúsó ka mɛ́n chrégbamán khúnbrɛn hrómɛn, ló lóyí lókɔn atɛ, néphan étɔ lóphɔ bhwe, ágotho si khúnbrɛn abha Jude móbhó hrómɛn. 66Néphan khúnbrɛn aye lóbhwe, etɛ́ hɛ́nphebhú sé wo, ló wo étɔ sa:
– Ébí lephan yábhɛ yípɔ lókɔn bha lí ɛ?
Átɛsa Hwánthe sɛ́npɛ́ bha mɛ́n phɔ mímí nbrɛn.
Zakari lri Yankan hwa
67Nánnánmi Créncré ka Jan nthe Zakari phɔ; ló ńchɛ Zakari étɔ Yankan phɔ bhwe sa:
68– Tɛmɛ áhwalri ogɛ Hwánthe,
ali Izraɛ khúbhɛ́nɛ́n Yankan,
átɛsalé ánman kpra mɛ́n féchwe,
ló ánman swa nkɛ.
69Ńse lo Adókáwo sɛ́npɛ́wo bɛn,
abha ka mɛ́n nɛnkhwɛ́nwo
Davi jímiɔn thethé.
70Lócí-áan, Yankan bhwe akhɔ
mɛ́n bhwetɔ́trémán créncré phɔ tɔtre
nɔn ali lókɔn:
71Yankan nkɛé mɛ́n man swa lo
yɛn lo mɛsamán le néphan asa lo mɛ
ɔ́nmɔn mɔ́n mɛn,
72Yankan nkɛé mɛ́n man wú lo
jisɛmánhɔn nfɛkhu
ló akprɔbha créncré khɛ́n ńsi tre ɔn,
lóbhwe bha di mwanhɛ́n.
73Átɛsalé Yankan bhɔli mɛ́n phɔ,
kranman lo jisɛ Ábrahámɛn tre salé,
74mɛ́n man swa lo yɛn lo mɛsamán
mɔ́n mɛn
ló lo bhá khwɛn mɛ́n hɛ́nmɛn nɛn
lo bha le sókhú;
75ochɛ́sé lo mɛpɔ́bhá cí khúnbrɛn hrómɛn,
lo lí néphan atɛ créncré le néphan apriman
mɛ́n hɛ́nmɛn.
76Ló hɛ mɛn bhi, wo bhá che hɛ
Yankan abha tho-áan mɛ́n bhwetɔ́tréwo,
átɛsalé ɛ́bha nɛnsi Hwánthe hɛ́nmɛn
ló ɛ́bha cɔ mɛ́n sitó tɛ́,
77lóthé nɔn ali salé ɛ́bha chɛ́ mɛ́n gbemán
yɛ́n salé Hwánthe bha swa wo
ló nkɛ bhá yɔ́ wo ne phɔ́ wo.
78Lo Yankan li lephan apɛ ápɔ́ khóo
ló ńyɔn se lo:
ánman chɛ́ átho yéfí bha fí ká lo phɔ,
áyéfí atɛsa ńjuju fítaan yéfí,
79lóyéfí lókɔn bha fí
sé néphan abha dubhlékhu hromɛn,
le néphan abha ákhú nánphɔ thé,
ló ábha yalí lo nta khɔ́
ńthɛ́nkhwálé sitó hrómɛn.
80Yípɔ etɛ́ nkhóo, ló mɛ́n bhweyɛ́n lɔ ethúbhɔ Yankan sɛ́npɛ́ hrómɛn. Ńchre ánánkhuthé kábrɛ kábrɛ ádi mɛ́n ka ńthándi Izraɛ khúbhɛ́nɛ́n pasá hɛ́nmɛn.
Ebrié New Testament © Bible Society of Côte D'Ivoire, 1996.