Toango 3
3
Lisala ja Edene, la bobe boki Adama okelaka
1Njwa eolekola nyama iuma yʼokili iki Nzakomba emaka la jongo. Ko njwa aokela bomoto, “Karriba Nzakomba aokela, ‘Lofaola lima wengi botamba bole nda lisala’?” 2Bomoto aokela njwa, “Iso tambʼole bamuka bʼetamba bele nda lisala; 3lolo Nzakomba aotokela, ‘Taloleke bamuka bʼotamba bole ndʼetei ea lisala, ko talofomwake, nyango lofowa.’ ” 4Lolo njwa aokelʼomoto, “Lofaowa nsosolo; 5ele Nzakomba aolea wae nda mbile eʼinyʼola bamukʼako, baiso bakinyo bifolifwa, ko lifoyalema ngole nzakomba imo, ko lifea baoyi bʼolotsi la baoyi bʼobe.” 6Ko aki bomoto enaka wae botambʼoko boki toma tʼolotsi, boki la losimo ndʼaiso, ko bokuseya loatelʼonto nkotola, aokola bamuka bʼotambʼoko, ko aola; ko aoka bome okae, ko ende aola. 7Nkako baiso bakiyʼakʼafe baolifwa, ko baolea wae baki lʼotaka: ko baotonganya nkasa ya boteli, ko baoyakeela bifufa. 8Ko baoloka lolaka ja Yawe Nzakomba, ayolande nda lisala lʼokolo. Ko Adama la waji okae baolisama ndʼetei ea betamba bia lisala limʼele Yawe Nzakomba. 9Ko Yawe Nzakomba aoleta Adama, ko aokela, “Ole nko?” 10Ko ende aokela, “Njoloka lolaka loke aki wʼolandaka nda lisala, ko njoloka bofoju, ekiʼmi botaka, ko njolisama.” 11Ko ende aolokela, “Okosangelaki wae oki lʼotaka na? Kamba oleki bamuka botamba bokiʼmʼokofekezaka wae ofaola?” 12Adama aokela, “Bomoto oki wʼonkaaka wete ayale lʼemi, ende ankaaki bamuka bʼotambʼoko, ko emi ndeki.” 13Nkako Yawe Nzakomba aokela bomoto, “Joi line liki wʼokelaka na?” Ko bomoto aokela, “Njwa aonjonga la jongo, ko ndeki.”
14Ko Yawe Nzakomba aokela njwa, “Eki we okelaka joi line, olambema la wambo wa tu bolekola nyama iuma ya mbongola la nyama yʼokonda. Wifokenda nda likunju like njakula, ko wifola wucu bembile beke beuma. 15Njiflla jino ndatsa we lʼomoto, ko ndatsʼanʼake lʼanʼakande; bona okande ifominyola botsaʼoke, ko we wifeseya limucu likae balongo.”
16Ko aokela bomoto, “Njifokofuleza eefe la limeko nda mbaota ea bana; wifoota bana la njonola ea lono mongo; ko mposa eke ifocwa ele bome oke, ko ende ifoyala nkolo ekawe.”
17Nkako aokela Adama, “La ncina eki wʼokozaka waji oke, ko oleki bamuka bʼotamba bokiʼmʼokofekezaka, Toleke limʼoko nye! o la bamoci baolambema wambo wa tu ndʼeloko eke; wifola limʼako bembile beke beuma lʼekambelo ea bolemo. 18Bako bifokomeza baeke la bafengolankoi; ko wifola njunda ya lisala. 19Wifola toma ndʼetokela ea elongi eke elaka nko oluta ndʼamoci; eki wʼokolamaka limʼako; ele wole nko wucu, ko wifuta nda wucu.” 20Ko Adama aolila waji okae lina Ewe, ekiʼnde nyango ea banto bauma bayoike. 21Ko Yawe Nzakomba aokeela Adama la waji okae benkoto bia bikoto, ko aolalotsa beko.
22Ko Yawe Nzakomba aokela, “Bala, bonto aosilʼoyalema nga omo okiso, endea ende bolotsi la bobe; ko aeyoko, nyango afosembya likata likae ko afokola bamuka ba botamba wa loiko, ko ala ko aika seko” 23Ndʼewelʼeko Yawe Nzakomba aolooza lima lisala ja Edene, wae asale bamoci bako bakiʼndʼokolamaka. 24Aolitʼonto o ngoko, ko aolila bakeluba nda wiji wa est ea lisala ja Edene, ko la ifaka ya tsa ta mpulumela indelelaki biiji beuma, wete besanya mboka ea botamba wa loiko.
La Bible en Lomongo © Societe Biblique de la R.D. Congo 1987