Toango 2
2
Emelo ea jende lʼomoto
1Elengʼeko emelo ea mbola lʼokili eosila, ko la belemo beuma biʼeko. 2Ko nda mbile ea nsambo Nzakomba aosiza bolemo bokande bokiʼndʼokambaka, ko aoloma nda mbile ea nsambo limʼelemo bekande beuma bekiʼndʼokambaka. 3Ko Nzakomba aosakela mbile ea nsambo bokako wa swa, ko aekyaki eko ndʼoeko, eki ende omaka nda mbilʼeko lima belemo beuma beki Nzakomba emaka.
4Ine wete iango ya mbola lʼokili aki bako emamaka, nda mbile eki Nzakomba emaka bokili la mbola. 5Ekeke eko beyau betamele ndʼokili, ko njunda yʼasala itafomela; la ncina wae Nzakomba atafojweya mbula ndʼokili, ko bonto ntaki eko wae asale bamoci. 6Lolonde emomonge eounda limʼokili, ko eoatela bokili bouma basi. 7Nkako Yawe Nzakomba aoonda bonto mbaonda lima biucu biʼokili, ko aolula loe ja loiko ndʼaolo bakae, ko bonto aoyalema bonto oyoike. 8Ko Yawe Nzakomba onaki lisala nda Edene, wiji wa est, ko aolilʼonto okiʼndʼoondaka nda lisala liko. 9Ko Yawe Nzakomba aomeza limʼamoci wengi botamba bosimama ndʼaiso, ko la bolʼolotsi la ndala, ko la botamba wa loiko ndʼetei ea lisala, ko lʼotamba wa njea ea baoyi bʼolotsi lʼea baoyiʼobe. 10Ko ntando eolola lima Edene, eatelaka lisala basi, ko limʼeko eokafwana biambi benei. 11Lina ja wambi wa joso wete Pisona; boko bolingola ese ea Afila euma. Wolo bole nda wijʼoko; 12ko wolo wʼesʼeko bolʼolotsi; ko bdellium la ekenje ea onyx balʼeko. 13Ko lina ja ntando eʼife wae Ngiona: eko eolingola ese ea Etiopia euma. 14Ko lina ja ntando eʼisato wete Yidikele; eko eleka nda est ea Asulia. Ko ntando eʼinei wae Pelata. 15Ko Yawe Nzakomba aokolʼontʼoko, ko aoloila nda lisala ja Edene, wae asale ko afonge liko. 16Ko Yawe Nzakomba aosisʼontʼoko, aokela, “Wambʼole bamuka ba wengi botamba bole nda lisala; 17lolo botamba wa njea ea baoyi bʼolotsi la njea ea baoyiʼobe, toleke nye, ele mbile ee wʼola bamuka bʼotambʼoko wifowa mbawa.”
18Ko Yawe Nzakomba aokela, “Afʼolotsi wae bonto ayale nkʼende kika; njifemelʼende bokambyi oonga lʼende.” 19Ko Yawe Nzakomba emaki wengi nyama yʼokili limʼamoci, ko la wengi ifulu yʼaliko: ko aolayela ele Adama wae ene baina ba ende otangʼako: ko lina liki Adama otangaka nyama loswele, liko joyalema lina ja nyamʼeko. 20Ko Adama aolila nyama ya mbongola baina, ko la tofulu tʼaliko, ko la nyama yʼokonda iuma. Lolonde nkʼokambyi otanemaki oonga la Adama. 21Ko Yawe Nzakomba aoatela Adama baisʼilo bo, ko etamaki. Akiʼndʼ etamaka, Yawe aokola bokangoʼokae bomoko, ko aokomba itenela iki boko la wunyu. 22Ko Yawe Nzakomba aolema bomoto lima bokango bokiʼndʼokolaka limʼele Adama, ko aoloyela ele Adama. 23Ko Adama aokela,
“One ale wese wa biese bekami,
ko la wunyu lima wunyu bokami.
Ende ifotangema bomoto,
ekiʼndʼokolamaka limʼele jende.”
24Ndʼewelʼeko jende ifocika ise la nyango ekae, ko ifoamana la waji okae, ko iyʼakʼafe bifoyalema jonge limoko. 25Ko iyʼate baki lʼotaka, la jende la waji okae, lolo ntaboka nsoi.
La Bible en Lomongo © Societe Biblique de la R.D. Congo 1987