Цецн селвгүд 7
7
Цецн Ухан аля гергнәс харсчана
1Көвүн минь, келсн үгим ухал, мини зааврмуд хадһл,
келсн зааврмудым седклдән бәр.
2Мини селвг күцә, әмд бәәхич,
мини зааврмуд нүднәннь харанла әдләр хадһл,
3билцг мет зүүҗ йов,
зүркндән бичҗ ав.
4Цецн Ухандан кел: «Чи, мини эгч-дү»,
серлтә кевәр төрл-садн бол.
5Тиигҗ чи күүнә гергнәс бийән татҗ авхич,
тер җөөлн келтә залута гергнәс харсгдхич.
6Юңгад гихлә, нег дәкҗ би эврәннь терзәр шаһахла,
терзин термәр хәләхлә,
7дамшлт уга әмтн дунд,
баһчуд дунд,
нег ухан тату уйн наста көвү үзүв.
8Залута гергн бәәх уульнцин өнцг тал тер йовҗ йовна,
терүнә гер тал одна –
9нарн суухла, бүркг цагла,
харңһу сөөһәр, хар таңла.
10Терүнә өмнәс күүкд күн һарч ирнә –
тер аля гергнә хувцта, зүркндән мектә,
11цуцрлт уга болн догшн,
тер гертән сууҗ чадҗана:
12зәрмдән тер уульнцд, зәрмдән талвң деер,
булң болһнд манна.
13Көвүг тер татҗ теврәд үмснә,
ичр угаһар келнә:
14«Би эндр махар бәрцән бәрҗәнәв,
би эндр Деед Эзнд өгсн андһаран күцәвүв.
15Тегәд чамаг тосад һарув.
Чамаг хәәләв, ода олвув.
16Египетин эрәтә эдәр кесн бүтәһүләр
би кевтрән бүркв.
17Дер-девскрән сән үнртә тосар,
дорд үзгин өвснә каңкнсн үнрәр ивтрәвүв.
18Күрәд ир, өрүн күртл нег-негән таалад эңкрлхмн,
хантлан дуран эдлхмн.
19Юңгад гихлә, залум гертән уга:
хол хаалһд һарч йовба,
20мөңгтә харлдшан авба,
сар күцтл герүрн иршго».
21Көвүг зүсн-зүүл мекәр эргүлнә,
җөөлн үгәр авлна.
22Алулхар йовҗ йовсн цар мет,
көвүн тер дарунь дахад һарна,
бәрәнд бәргдх буһ-марлла әдләр йовна.
23Тенд элкинь саадг цоолх;
бәрәнд бәргдх шовунла әдләр,
әмән өгхән медҗ бәәхш.
24Тегәд намаг соңслт, күүкдм,
мини үгд оньган өгтн:
25тана зүркн терүнә хаалһд бичә тустха,
терүнә мөрәр бичә төөрч йовтн!
26Йир олн күн терүнәс көлтә үквә,
кесгинь тер алва.
27Кемр терүн тал йовхла,
үклин хаалһд һарчаснтн тер.
Тер гергн талк хаалһ – үкәрт күргх хаалһ.
© Институт перевода Библии, 2002-2023