Цецн селвгүд 6
6
1Көвүн минь! Кемр чи талдан күүнә төлә даалһвр авсн болхла,
күүнә күүг эврә дааврт авсн болхла –
2тиигхлә, чи бийиннь үгд бәргдвч,
бийиннь үгд авлгдвч.
3Көвүн минь, ю болвчн кеһәд сулдҗ ав,
юңгад гихлә, ода чи күүнә үлмәд бәәнәч.
Көлднь унад сур, дахлдад йов,
4нөөрән тат,
нүдән бичә ань,
5гөрәсн мет көөлдснәс зул,
шовуд мет бәрлһнәс зул.
6Хуурмг көвүн, шорһлҗн тал од,
терүнәс уха ав:
7терүн деер ахлач чигн уга,
харул чигн, һардач чигн уга,
8шорһлҗн хотан зунас авн белднә,
тәрә хадхла, кергтә тоотан белднә.
9Хуурмг күн, кедүдән кевтхмч,
нөөрәсн серх цаг ирсн болвза?
10Невчк унтҗахла, үрглҗәхлә,
невчк элкән теврәд суухла,
11тиигхлә, түрү бәәдл чам тал елдң күн кевтә ирх,
угатя бәәдл хулхач кевтә генткн ирх.
12Му күүнә болн хар саната күүнә
худлнь келнәснь тасршго:
13зәрмдән тер чирмнә, зәрмдән көләрн тавшна,
зәрмдән хурһарн докъя өгнә.
14Терүнә зүркнд хар санан бәәнә,
терүнә седкл хорар дүүрң,
керүл-цүүгә тер татна.
15Терүнәс көлтә бийднь зовлң буух,
генткн алх, дәкҗ әмдршго.
16Деед Эзн зурһан юмнд дурго,
доладгчнь терүнд җигшүртә:
17деерлклһн, худл келлһн,
килнц уга күүнә цуснд будгдсн һар,
18хар сана зүүҗәх зүркн,
хорта йовдл һарһхар гүүҗәх көл,
19худл келҗәх худл герч,
ах-дүүнр дунд керүл-цүүгә цацдг күн.
20Көвүм! Эцкиннь заавр соңс,
экиннь ном бичә һол.
21Тедниг эврәннь зүркнд бәр,
күзүндән кеерүл мет зү.
22Йовхлачн, тер сурһмҗ чамаг дахулх,
унтхлачн, чамаг хәләх,
серхләчн, чамта күүндх.
23Юңгад гихлә, заавр – герлин гегән,
ном – герл,
чаңһ сурһмҗ – җирһлин хаалһ.
Цалдң йовдлин әәмшгин тускар
24Тедн чамаг му гергнәс татҗ авх,
күүнә гергнә зуһу келнәс харсх.
25Терүнә сәәхнд зүркән бичә бәрүл,
нүдән чирмснд бичә авлгд.
26Аля күүкд күүнә үннь – зүсм өдмг,
зуг күүнә гергнә төлә әмәрн шордхч.
27Шатҗах һал өвртән бултулад,
хувцан шаталго бәәҗ болхий?
28Шатҗах нүүрс ишкхләрн,
көлән шаталго йовҗ болхий?
29Тиим юмн залута гергн тал оддг күүнд үзгдхмн:
терүг көндәсн күн засгла харһх.
30Харһнхларн, хот идхәр седәд,
хулха кесн хулхачиг шүрүнәр шооддго:
31болв кемр бәргдхлә, цугтаһинь хәрүлх,
бәәсән цугтаһинь өгх.
32Күүнә гергнлә аля һарһсн күн, ухан тату болсар,
эврән бийдән үкл хәәҗәнә.
33Күүнәс цокулх, ичрән барх болҗана,
һутасн нерән цеврлҗ чадшго.
34Юңгад гихлә, терүнә залу харлсндан һалзурна,
өшәһән авхларн, тер күүг хармншго,
35ямаран чигн мөңг өгәд тер сурхар седвчн, зөв өгшго,
кедү юм өгхәр седвчн,
терүнә залуһин седклнь җөөлдшго.
© Институт перевода Библии, 2002-2023