Цецн селвгүд 8
8
Цецн Ухан әмтнлә күүндҗәнә
1Эннь Цецн Ухан дуудҗ бәәвзә?
Терүнә серлтә дун соңсгдҗ бәәвзә?
2Довуна орад бәәсн хаалһин хаҗуд
әмтнә хаалһин саллтд тер зогсҗана.
3Олна нүүрт дуудҗана,
балһснд орҗ ирхлә, хәәкрнә:
4– Әмтн, тадниг би дуудҗанав,
мини дуудвр күүнә үрдүдт!
5Дамшлт уга әмтн, тоолврта болдг дастн,
һәргүд, ухата болтн!
6Мини ик чинртә үг соңстн,
үнн мини келснд бәәнә,
7мини келн чикәр келҗәнә,
хар санан амнасм һаршго.
8Мини келсн мел үнн,
терүнд мек чигн, худл чигн уга;
9цугтан тедн серлтә әмтнд иләр медгдҗәнә,
медрл хәәснднь медхд амр.
10Мини сурһмҗиг цаһан мөңгнәс деегшән үнлтн,
медрлиг – улавр өңгтә алтнас деегшән үнлтн.
11Юңгад гихлә, цецн ухан герлтә чолунас берк сәәхн,
нег чигн седкл тусх юмн терүнлә әдлцшго.
12Би – Цецн Ухан, би тоолвртав,
болв медрл болн мергн ухан нанд бәәнә.
13Деед Эзниг күндлхин төлә хар сананд дурго болх кергтә.
Деерлкснд, караглснд, хорта йовдлд,
худлч келнд би дургов.
14Нанд цецн селвг бәәнә, нанд күцәмҗ бәәнә,
би ухатав, нанд чидл бәәнә,
15би эзргх хаадудт дөң болҗанав,
тегәд йосна һардачнр чик неквр тогтана.
16Нанар толһачнр, нойдуд болн ахлачнр
заллтан тогтана.
17Нанд дурта болснд, би терүнд дурлнав,
намаг хәәснь – олҗ чадх.
18Байн бәәдл болн туурмҗ нанла,
чилшго цецгәрлт болн үнн бәәдл нанла.
19Мини күцәмҗ улавр цевр алтнас даву,
би шүүҗ авсн цаһан мөңгнәс үнтәв.
20Би чик хаалһд орҗанав,
үннә мөрд орҗанав,
21дурта әмтнд ирлцх ачлвр өгхәр,
теднә зөөринь дүүргхәр.
22Деед Эзн эврәннь кергүдәсн эрт намаг үүдәҗ,
намаг хаалһиннь эклцд, кезәнә һарһв.
23Кезәнәһә, делкә үүдҗәхд,
би цагин эклцд төрләв.
24Йорал уга гүн уснас түрүлҗ,
дүүрң уста булгас түрүлҗ би һарув.
25Намаг һархин өмн уулмуд чигн тогтад уга бәәҗ,
довуд чигн уга бәәҗ,
26Деед Эзн тиигхд һазрин аһу, түрүн атх шора
тогтаһад уга бәәҗ!
27Теңгр тогтаҗах цагт – би тенд биләв,
йорал уга аһуд төөнг зурҗахд би тенд биләв,
28теңгрт үүлд тәвҗәхт,
йорал уга тамин булгуд тогтаҗахт,
29терүг усн деврәд асхрдгоһар теңгсин меҗә зуралҗахт,
һазрин ул тогтаҗахт,
30терүнә хаҗуд би зурач биләв,
өдр болһна җирһлтә байрнь боллав.
Терүнә өмннь цуцрлт угаһар байрллав,
31делкән бәәдлин үүдәлтд байрллав,
күүнә төлә җирһлтәһәр цаган давуллав.
Җирһлин хаалһ болн зөргин хаалһ
32Ода намаг соңстн, күүкдм:
мини мөрәр йовсн күн кишгтә!
33Сурһмҗим соңстн – цецн болхт,
бичә мергн уха бурушатн.
34Намаг соңссн күн кишгтә,
мини үүднә өмн өдр-сөөһәр бәәдгнь,
мини үүднә мөр хәләҗ нүдән аньдгонь кишгтә.
35Намаг олҗ авснь – җирһлән олснла әдл.
Тиим күн Деед Эзнд тааста.
36Мини өмнәс сөрснь – бийән барх:
нанд дурго болснь – үклд дурта.
© Институт перевода Библии, 2002-2023