Цецн селвгүд 5
5
Цалдң йовдлас яһҗ гетлх болн залу гергн хойрин итклин туск
1Көвүн минь, мини цецн үг соңсич,
мини сурһмҗд оньган өг –
2хурц ухаһан үзүлдгәр,
чини медрлиг келснчнь хадһлдгар.
3Күүнә гергнә келн бал мет әмтәхн болдг,
келсн үгнь тосн мет һооҗад бәәдг –
4тернь шарлҗна һашун амтта болх,
үлдин үзүр мет хурц болх.
5Терүнә хаалһнь үклин һазр тал көтлҗәнә,
терүнә ишкдлнь үклин һазр тал һарчана.
6Җирһлин хаалһин тускар тер ухалҗ бәәхш,
хаалһнь тогтун бишинь бийнь медҗәхш,
7тегәд намаг соңслт, күүкдм,
мини үгд оньган өгтн.
8Тиим гергнәс холд йовтн,
үүдн талнь бичә өөрдтн,
9эс гихлә, чини зөөр күүнә әмтнд күртх,
өр-өвч биш күүнә төлә эврә җирһлән барулхич;
10чини күчиг талдан әмтн эдлх,
чини килмҗ күүнә герт тусх.
11Чини цогц-махмуд урсад хагсхлаг,
җирһлиннь чилгчд чи түңшхич:
12«Яһад би сурһмҗ һолсмби, – гиҗ тиигхләрн келхич, –
шоодсиг зүркм бурушадг бәәсмби?
13Яһад би багшнран эс соңссмби,
сурһмҗлачнрин келснд оньган өглго бәәсмби?
14Бас нег ишкдл кехлә, намаг
олн-әмтнә хурсн һазрт, цуг келн-улсин нүүрт ичәх».
15Эврә нуурас ус у,
эврәннь худгас ус ав.
16Яһад чини усн һаза асхрхмби,
талвң деерәһәр гүүхмби?
17Терүгән һанцхн бийдән үлдә,
күүнә әмтнлә бичә хувалц.
18Чини булг өлзәтә болтха,
чини баахн цага гергн байр үүдәтхә.
19Буһин өңгтә адусн мет болн
хәәртә хурһн болсн, ке сәәхн иньг –
тер чамаг кезә чигн үсәрн цадхх.
Терүнд туссн дурн тасрлт уга чамаг авлна.
20Көвүн минь, ю хәәҗ күүнә гергнд седклән тәвхмби,
залута гергнә цогц теврхмби?
Нег цөөкн саглвр
21Бийән бәрх күүнә бәәдл Деед Эзнд кевтән темдгтә,
күүнә хаалһсиг цугтаһинь Тер меднә.
22Ичр уга күн эврәннь хар саната гөлмдән бәргднә,
эврәннь килнцдән орагдна.
23Сурһмҗан авлго тер үкх,
давҗ һәрглсн йовдлдан хаалһасн хаҗих.
© Институт перевода Библии, 2002-2023