2 Timothy 2
2
1A gèƌ nenga'a, kra ga, nzala va ngaya, a pombi te Yèsu Kristi! 2Skwi man ka tsena a sam ga, a sam malwuƌihi kumba, njè ta ndohi nlèɓèslèa ngiƌè, man ta slaha ta slebda ta ndohi ngiƌè za'a. 3Mbokoy a matakwan, ara ndohi var Yèsu Kristi man amba. 4Aman ndo var man amba, a hér gèƋ ngwi na azɓai, aman a hér skwi man ambaba ndo nkworo.
5Aman ko wawa man a hi te dal nhai, ta da va na skwi ntulè azɓai, sèi man a hu zura'a. 6Ndo mpizhè man a pizhè gi dau, da ndau nyi skwi gi dau nsnelekura'a. 7Hur ma ga haha! Bi Zhiklè a da va ka maya te skwi tèlèba. 8Hur Yèsu Kristi, man a slambaƌkaƌauda te ndev ndohi m'metsa'a, te verzi David, ara man ma mbela'a man i njè haha, a gaƌa.
9A géƌ nenga'a i si matak wan, ba ta dzwayè ara ndo ambaɓia'a; aman ma Zhiklè ndzawa ɓai. 10Gar haha i zuɓ skwi tèlè, a géƋ ndohi man Zhiklè a mpar ta, aman tenga'a ba ta ndikè a sam mbela'a a n'njèlè man a ndivè azɓai a mèdèp, te Yèsu Kristi.
11Ma haha zura'a: Aman nga mets nga a nda nenga'a ma, nga da nzi a nshèffè a nda nenga'a. 12Aman nga zhèr skwi a ma ma, nga da gi bai a'nda nenga'a. Aman nga gaƋa: nga sun nenga'a ɓai, nenga'a ba a di a gaƋa: i sen kinè ɓai. 13Aman nga lèɓèslè ɓai, nenga'a a nzi lèɓèslèa genè, a slaha a ngwèdè va na azɓai.
14Ma haha gaƋa ta za'a, ngra ta a sam di Zhiklè, aman ta vérsl ma a géƋ ma ambali azɓai; ambaɓai, a jèkèbè ndav ndo genè. 15Gu maya maya, ngreda va ngaya auda a sam Bi Zhiklè ara ndo mizlinè nzura'a, ma az a gèƋ ngaya ɓai, aman ka njè ma zura'a tsaraya'a. 16Kazla ngay auda a sam tsaval herkeda man ambalai. Ndohi man ta gèƌè'a, ta dè a ma ma holholè'a te skwi man ambaba Zhiklè ɓai,
17a ma tenga'a a zlèzèmè hathata'a ara mblè gurdzo. 18Te ndev tenga'a Hymènèe a Philète, man ta jèkeda ma nzura'a, ta zlak ta, a ta gaƋa, nslambaƋkaƋauda te m'metsai, n'nga ma, a ta gedassa ncè-a-ndav ndohi tsaƋ tsaƋ. 19Aman Bi Zhiklè a fu verzi man wuƋi na zhè, ma haha mwindèa a pa: Bai Yèsu a sun ndohi na, a ndo man a baba na nzlembaƋ Bai Yèsu, do do auda a sam skwi ambaɓia'a.
20Te gi mbia'a, shiƋèfhi guro a verzhègenè genè ka ɓai. Skwi man ta gu a wof a zhè, skwi man ta gu a rɓasl a zhè, ngiƋè skwi mbela'a, ngiƋè skwi ambalai. 21Ndo man a shkè auda te ndev skwi ambaɓia'a aranta, a pènè ndav na, nenga'a a ndi a shiƋèf mbela'a, nkezia'a, man babgi a slaha a ngi mizlinè a vna, ntila a mizlinè man amba tèlèba.
22Hu ngaya auda a sam ntétékè man golahi a dalahi ta gia'a! Aman hu a verzi ngizura'a, ncè-a-ndav, mwoy-ndo a ndav, gumai a nda ndohi tèlèba, man ta baba na Bi Zhiklè a ndav mpana'a. 23Ma ambalai, ma nrzlè, kwola'a, aman ka suna, a de ka a sam mpi gèƋ ndo a va. 24Aman ndo mizlinè Yèsu da woy ma ɓai, da goƋ ma amba amba a sam ndohi tèlèba. Da gau a ndo njèngè man amba, man a slaha a nzhüɓ skwi tèlèba ko ma wuƋitpa,
25a ngatsa ta maya a ndav nlüɓekwa'a a ndohi man ta sala na va a dai. A zhèrè te ndav, wa ngiƋè ba Zhiklè a takaha ta a ta ngwèdè ndav ta genè, a ta shin ma nzura'a; 26a tenga'a man bi madzagai a dzaw ta, a ta gu skwi man a woya'a, ta da shkè auda te ri teɓa nenga'a, a ta hér skwi nzura'a.
Mofa New Testament © The Bible Society of Cameroun, 1989