Lu-ka 2
2
Brah Jê-sus đôh laa
(Ma-thi-ơ 1:18-25)
1Plah nei, Sê-sa Au-gut-tơ sot rmaanh waach raih bal knông jôm swich teh. 2Au laa jơl waach ptơơm kươt lơh tênh knông klap Kwi-ri-ni-u lơh yau tông kwaal Si-ri. 3Jôm bnih kot phrui plơq siq ktôk poh ơơm jah 'bian chhak teq u sm'bưt. 4Đươm Jô-sep lah mbaang nhi Đa-wit mơ kot a poh Na-sa-ret, kwaal Ga-li-lê, hao poh Đa-wit, chôôl laa Bêt-lê-hem, klung kwaal Ju-đê, 5jah 'bian chhak teq u sm'bưt chhak nơơm u chhak Ma-ri, bnih ja pơn kliêr n'hai nơơm, plah geh mbưn. 6Plah baar du gôq ktôk nei nar lgơơch đôh laa Ma-ri ri êch tơt. 7Mei lgơơch koon klau suôl, pơih kma sum koon nơơm dơih bêch knông pơng tơơm deh, đươm nhi drơm 'bưn geh sơp ktôk. 8Kot knông kwaal nei, geh pal du gwaal bưr gôq a srei, kah mang kray phung bưr. 9Mbu lênh Brah ri lôh tơt n'hai bu, a sroh a srong Brah ri a tong chrih rlum mơ bu n'hông đat. 10Dôh lênh brah maanh bu: “Khơơm n'hông! Au, hei tơmbơh aan bơl 'bei di Baak Sroong Klanh, au a kươi laa broh s'bai ttih aan jôm bnih. 11Đươm nar au tu poh Đa-wit, mbu Yaang Đoh Kwaai, lah Yaang Krist,#2:11 Chôôl laa Yaang Kơ-rít; paich nhôq saak chôôl Yaang Koon Brah. laa Brah ja kươt đôh laa aan bơl 'bei. 12Au laa chmlih chmleek jah bơl 'bei gưt laa Pang: Bơl 'bei a kươi a mơp di koon drêên sum teq u kma bêch knông pơng tơơm deh.” 13Ndrot glơn, geh rhiêng rban lênh trôôk pôl n'hai lênh brah nei pơt wơơl Brah Ưn laah:
14“Chring chraang saak Brah Ưn a lơ trôôk,
Sroong boong a teh, 'bun aan bnih!”
15Di kươi bơl lênh brah lơơi bu hao trôôk hơơi, bơl bnih gwaal bưr mor tơrnang nơơm laah: “Bơl bơn phrui han tơt poh Bêt-lê-hem mơq kaar ja lôh tơt baah Brah aan bơl bơn gưt.” 16Bei nei, bu gway kơndaal han tơt tôw, chuôp Ma-ri, Jô-sep, u sau koon drêên plah bêch knông pơng tơơm deh. 17Tơt sau bei nei, bu chhuôr kươi drơh pal baak lênh brah lah teq u koon drêên nei. 18'Bơơn iat baak bơl bnih gwaal bưr chhuôr kot lôh êêng aang. 19Nha Ma-ri nei iat chmlam jôm baak nei u gênh knông chưt. 20Bơl bnih gwaal bưr plơq siq, tư wơơl u pơt wơơl Brah Ưn teq u jôm ntil bu ja iat u sau, dip bei baak ja maanh noor n'hai bu.
21Tơt kươt sơp phaam nar, tơt jơl kat pêêk aan koon drêên, nei bu chôôl chhak laa Jê-sus, laa chhak lênh brah ja chôôl noor a bơh koon drêên kươt ur ưn knông pul mei.#Lu 1:31.
Ryơơng piyơ Brah ktôk nhi r'bưn
22Tơt pal nar kaat rao tênh ch'bap Môi-se tech nang, mei bươp liêu koon drêên hao poh Jê-ru-sa-lem jah piyơ aan Brah, 23bei ja 'bian knông ch'bap Brah ri laah: “Jôm koon klau suôl phrui doom êêng jrah aan Brah”, 24u piyơ di sơmrap chum ndrau, paich pi traap koon, bei ch'bap Brah ri ja tơmbơh.
Baak tapơt Si-mê-ôn ri. Dơur grnưt noor An-ne
25Plah nei, tu poh Jê-ru-sa-lem geh mbu bnih sêch song u chưt ndap, chhak laa Si-mê-ôn. Bu cham baak nđum nđiêng raih I-sra-ên ri, u Brah Wêêng gôq knông bu. 26Brah Wêêng ja aan bu grnưt noor laah bu a kươi 'bưn geh chhưt noor tơt sau Yaang Krist Brah ri. 27Kươt Brah Wêêng trôih, bu mưt u nhi r'bưn plah dip mei bươp liêu koon drêên laa Jê-sus lôh jah lơh aan Pang pal rkhach tênh ch'bap. 28Bu baq pư koon drêên u pơt wơơl Brah Ưn laah:
29“Brah ơi, bei au dan Brah aan dêch Brah han kươt sroong boong,
Tênh bei baak Ay;
30Đươm mat hei ja sau baak đoh kwaai Pang ri,
31Pa Ay ja riêp ơơm di mat bơl raih,
32Lah rơn aang yơr troong aan bơl raih agaih,
U laa chring chraang I-sra-ên ri, nei laa raih Ay.”
33Mei bươp koon drêên êêng aang teq u pal baak Si-mê-ôn mor teq u koon drêên. 34Si-mê-ôn chak smlaang aan baar du ur sai u mor n'hai Ma-ri, mei koon drêên laah: “Koon drêên au ja kươt chong chôôl jah lơh aan ơk bnih knông I-sra-ên a bôông paich kah kơơt, u laa di chmlih chmleek but root baak ta wal. 35Nha ay, di pla đao kot a kươi tap uôl wêêng chưt ay, teq gơrninh jru ndơp ơk bnih ri phrui klach sot.”
36Kot geh dơur grnưt noor An-ne, koon ur Pha-nu-ên ri, teq u mbaang bnih A-se, prêh snam hơơi. Di kươi ta sai, bu ja rêh n'hai sai klau kươt poh snam, 37ja nei gôq pndrau, tơt bei au ja phaam jơt puôn snam.#2:37 tơt bei au ja phaam jơt puôn snam: Paich laa tơt au u phaam jơt puôn snam. Bu 'bưn lơơi rlach nhi r'bưn, mang nar khang jraih kaar Brah, ơt jrơng u r'bon dan. 38Laap bêl nei, mei kot lôh nei, pơt wơơl Brah Ưn u mor teq u koon drêên aan jôm bnih plah cham baak doh rlach poh Jê-ru-sa-lem.
39Tơt ja lơh sơp jôm kaar tênh ch'bap Brah ri, Jô-sep u Ma-ri plơq siq poh nơơm ri laa Na-sa-ret klung kwaal Ga-li-lê.#Mat 2:23. 40Koon drêên hao ttih u moh dang; bêêng bơm baak jhai rpech, u brêêng smlaang#2:40 Asn: ươn 'bun. Brah Ưn ri a lơ Pang.
Brah Jê-sus plah jmơt baar snam
41Rêêng snam tơt jơl ryơơng Chloong Rlach, mei bươp Brah Jê-sus rnđơơih han hao poh Jê-ru-sa-lem. 42Tơt kươt jmơt baar snam, Pang pôl mei bươp han lơ nei joq ryơơng tênh ơp ndơq. 43Tơt pal nar ryơơng rlach hơơi, mei bươp plơq siq, dôh drêên klau Jê-sus gôq lơơi a kươi poh Jê-ru-sa-lem pa mei bươp Pang khah 'bưn gưt. 44Bu khang kơn ơơn laa Pang han n'hai knông phung ơk, mơ kươi di nar troong mơ wơng joi Pang knông nak mbaang u bơl bnih ta ơih. 45Tơt 'bưn sau Pang, baar du plơq kươi poh Jê-ru-sa-lem jah wơng. 46Pei nar kươi, bu a mơp Pang knông nhi r'bưn plah gôq klung bơl yau tơr ni baak jơ Jo-thai, đah iat đah ôp. 47Leq sêch bơl bnih iat Pang kot êêng aang teq u baak gưt jhai u pal baak rn'ơh Pang ri. 48Tơt mei bươp sau Pang, nei êêng aang u mei Pang mor n'hai Pang: “Ơi koon, a hay koon lơh aan baar du hei lôh bool hưl bei au? Bươp koon n'hai mei lhit lhaat wơng koon!” 49Pang ơh: “A hay mei bươp leet wơng joi koon? Mei bươp 'bưn gưt laah koon phrui ei kaar Bươp koon laang?”#2:49 koon phrui ei kaar Bươp koon laang?: Paich laa koon phrui gôq knông nhi Bươp koon ri laang? 50Dôh baar du 'bưn gưt baak Pang mhei mor. 51Pang han tênh mei bươp plơq siq Na-sa-ret u chôh bu. Mei Pang gênh chmlam baak nei knông chưt.
52Brah Jê-sus jhai blau huôih dươn, chhak jan tih dươn, dươn kươt klanh chưt Brah Ưn u bu nday.
© 2024 Bible Society Vietnam. All rights reserved.