Lu-ka 1
1
Pơơk baak
1Ơi ay Thê-ô-phi-lơ kơn hing, geh ơk bnih ja pơrkhom 'bian riêp di plơơp krơơ kơơi teq u pal kaar ja kươt lơh tênh klung bơl bơn, 2dip bei bơl bnih ja ndraanh sau u jraih kaar baak preh Brah#1:2 Asn: rn'aan baak Brah. a ptơơm n'au chhuôr kươi aan bơl bơn. 3Nei mơ, di kươi njrang mơq sơglap jôm kaar a daak bôôk, hei gênh a but tênh hưl neq baah 'bian kươi aan pang 4jah pang gưt pal ntil bơn ja riên laa ngan kaar.
Baak đôh laa u klap dơk tih Brah Jê-sus ri
(1:5 – 2:52)
Baak grnưt noor u baak đôh laa Jang Bap-tit ri
5Knông klap Hê-rôt, snđach kwaal Ju-đê,#1:5 snđach kwaal Ju-đê: Snđach Hê-rôt Rmưn kan bôôk leq sêch kwaal Pa-let-tin dơng leq kwaal Ju-đa, kwaal Sa-ma-ri, kwaal Ga-la-ti, kwaal I-đu-mê n'hai pal kwaal steh nday. geh di mbu yau thwaai thap A-bi-ja, chhak laa Sa-cha-ri; sai ur laa Ê-li-sa-bet, puich mbaang A-rôn. 6Leq baar du kot laa bnih sêch song di mat Brah Ưn, kan prap jôm baak ch'bap u ryơơng Brah ri di troong sơp grơp. 7Bu 'bưn geh koon, đươm Ê-li-sa-bet yơơi yat u leq baar du kot prêh snam.
8Baak lôh tơt khal Sa-cha-ri tênh tawai n'ak nơơm ri lơh kaar bei yau thwaai di mat Brah Ưn. 9Tơt pool tênh rnđơơih bơl yau thwaai ri, bu ja pool lluh kươt mưt nhi r'bưn#1:9 Awap lah ktôk jrah, ơn êêng aan bơl yau thwaai. Brah jah piyơ griêng chhơm. 10Knông bêl piyơ griêng chhơm, leq phung raih ơk kot gôq a gaaih r'bon dan. 11Bei au geh mbu lênh Brah ri lôh tơt teq u Sa-cha-ri, ta yoong mak ma bliêng r'bưn piyơ griêng chhơm. 12Sau lênh brah, Sa-cha-ri rhơq rpơq, n'hông n'hing. 13Dôh lênh brah maanh bu: “Au, Sa-cha-ri, khơơm n'hông! Đươm baak r'bon dan 'bei ri ja kươt chơp. Ê-li-sa-bet, sai ur 'bei, a kươi lgơơch mlơm koon klau; phrui chôôl chhak laa Jang. 14Koon klau nei a kươi lơh aan 'bei broh s'bai a hơt a rơơn, u ơk bnih a kươi a uôt tơt koon drêên đôh laa. 15Đươm koon drêên nei a kươi kươt tư đing di mat Brah, 'bưn ôn bih nho paich til daak ôn geh kenh, u a kươi kươt bêêng bơm Brah Wêêng a bơh nha knông pul mei. 16Koon klau nei a kươi liêu ơk bnih I-sra-ên plơq kươi teq u Brah laa Brah Ưn bu ri; 17koon nei a kươi pơih chưt kmlơt u dang kmheng Ê-li ri baah han bôôk mat Brah, jah liêu chưt bươp plơq siq teq u koon sau, liêu bơl 'bưn chuh đing lôh u baak jhai rpech bnih sêch song ri, u jah riêp di raih bal riêp srap aan Brah.” 18Sa-cha-ri ơh teq u lênh brah: “Lơh bei êch hei gưt kaar au a kươi lôh tơt? Đươm hei u raanh hơơi, sai ur hei kot u raanh đêêl.” 19Lênh brah ơh: “Hei laa Gap-ri-ên ta yoong yoot bôôk mat Brah Ưn. Hei kươt maanh lôh mor n'hai 'bei u tơmbơh baak broh au aan 'bei. 20Au, 'bei a kươi dol kơrlôw, 'bưn geh mor kươt, aan tơt nar pal ntil nei lôh tơt, đươm 'bei 'bưn jơ hei, laa baak a kươi kươt dip plak tơt jơl.”
21Knông plah nei, phung raih plah kơp Sa-cha-ri; bu êêng aang đươm bu gôq jook knông nhi r'bưn. 22Plah han sot, Sa-cha-ri 'bưn mor kươt teq u phung raih nei bu mhei gưt laah bu ja sau di tơrsau noor knông nhi r'bưn. Bu tơrsau têl aan bu đươm nha ơơm dol kơrlôw. 23Tơt pal nar jraih kaar tech nang, bu plơq siq nhi.
24Kơi pal nar nei, sai ur bu laa Ê-li-sa-bet mbưn u ruk chhak knông pram khay. Mei mor laah: 25“Brah ja ươn smlaang aan hei. Knông pal nar au, Pang gmaak hei u prap teq baak prêêng mat hei ri lwah jôm bnih.”
Lênh brah tơmbơh baak Brah Jê-sus đôh laa
26Laap khay ttal prau, Brah Ưn maanh lênh brah Gap-ri-ên han teq u poh Na-sa-ret, klung kwaal Ga-li-lê, 27a mơp di mbu ur rnuônh ja keep ndrôi n'hai bnih klau chôôl chhak laa Jô-sep, klung puich snđach Đa-wit. Ur rnuônh nei chôôl chhak laa Ma-ri.#Mat 1:18. 28Lênh brah lôh a mơp dơur u ôp: “Ơi bnih kươt smlaang, chak s'bai aan ay! Brah gôq n'hai ay!” 29Dôh Ma-ri rhơq rpơq đat u pal baak au u ôp êêng nơơm baak chah nei geh rơih ơơn. 30Lênh brah ndih: “Ơi Ma-ri, khơơm n'hông đươm ay ja kươt smlaang bôôk mat Brah Ưn. 31Au, ay a kươi kươt mbưn, lgơơch mlơm koon klau u chôôl chhak laa JÊ-SUS.#Mat 1:21. 32Koon klau nei a kươi kươt tư đing, kươt khuôl laa Koon Yaang Prêh Huôih ri. Brah laa Brah Ưn a kươi ươn Pang ngguôl Đa-wit, yau yi Pang. 33Pang a kươi kan bôôk yoot yôw nhi Ja-kôp; nggoor Pang nh'ơơm yoot yôw.” 34Ma-ri ơh teq u lênh brah: “Hei ndah gôq bêch n'hai bnih klau 'bơơn ơơm nei lơh bei êch geh kươt ntil nei?” 35Lênh brah ơh: “Brah Wêêng a kươi gôq knông ay, u dang kmheng Yaang Prêh Huôih ri a kươi km'bang ay; nei mơ koon jrah đôh laa a kươi kươt chôôl laa Koon Brah Ưn. 36Tôw, Ê-li-sa-bet, mbaang gơna ay ri, kot ja geh mbưn di mbu koon klau plah knông cheh raanh. Bu nei ơơm geh lư laa yơơi yat dôh bei au na mbưn kươt prau khay hơơi. 37Đươm nei 'bưn geh kaar ơơn Brah Ưn 'bưn lơh kươt.” 38Ma-ri ơh: “Hei au laa dêch ur Brah ri. Dan ntil nei lôh tơt aan hei bei baak Ay tơmbơh!” Ja nei lênh brah lơơi rlach Ma-ri.
Ma-ri han chah nhjook Ê-li-sa-bet. Baak tapơt Ma-ri ri
39Knông pal nar nei, Ma-ri ta yoong, dil daal han siq kwaal bnơm, lôh u di poh Ju-đa ri, 40mưt u nhi Sa-cha-ri u chah Ê-li-sa-bet. 41Ê-li-sa-bet mhei ttang baak Ma-ri chah nei koon knông pul kơndaal njroh njrơn. Ê-li-sa-bet kươt bêêng bơm Brah Wêêng; 42mei pa chham laah: “Ay geh smlaang ngan knông bơl dơur, koon knông pul ay kot kươt smlaang. 43Đươm a êch hei kươt a hơt au, laa mei Brah ri han nhjook hei? 44Đươm tôw, tơt tôr hei mhei ttang baak ay chah nei koon knông pul hei njroh s'bai kơndaal. 45Smlaang aan ay ja jơ, đươm baak Brah lah teq u ay a kươi kươt dip plak!”
46Ma-ri mor:
“Wêêng yaang hei pơt wơơl Brah,
47Chưt wêêng hei a hơt a rơơn knông Brah Ưn laa Brah Đoh hei,
48Đươm Pang ja gmaak chhak jan 'bưn sơnơ dêch ur Pang ri.
Au, a bei ei teq u kươi, jôm klap a kươi tư hei laa bnih geh smlaang;
49Đươm Yaang Dang Kmheng ja lơh pal kaar ttih aan hei.
Saak Pang laa jrah,
50U Pang gmaak bơl bnih đing mbaanh Pang,
A klap au rlach klap tôw.
51Pang ja nhôq ti Pang lơh pal kaar dang kmheng;
Lơh a brơh bơl geh gơrninh uôt nhjơơl knông chưt.
52Pang ja thoot mlơơi ngguôl bơl kan bôôk,
U kn'hao bơl bnih krich chhak kươt hao.
53Pang ja lơh aan bnih nh'hit kươt bêêng sơpa kah,
U prơh bơl khunh siq ti rơơi.
54Pang ja jraih I-sra-ên, dêch Pang,
U gênh kươi baak gmaak Pang ri,
55Bei ja lah teq u yau yi bơl bơn,
N'hai Ap-ra-ham n'hai phung mbaang bu tơt yoot yôw.”
56Ma-ri gôq n'hai Ê-li-sa-bet tơmlai pei khay, ja nei plơq siq nhi nơơm.
Jang Bap-tit đôh laa
57Bei au, tơt nar lgơơch đôh laa, Ê-li-sa-bet lgơơch mlơm koon ksei klau. 58Ttang baak Brah ja tơrsau chưt gmaak ttih mưn teq u mei, gơna poh oh bi u kot lôh broh s'bai pôl n'hai mei. 59Tơt nar ttal phaam, bu han kat pêêk aan koon drêên u chôôl chhak laa Sa-cha-ri tênh chhak bươp. 60Dôh bnih mei mor laah: “'Bưn! Phrui chôôl chhak drêên laa Jang.” 61Bu mor: “Knông mbaang ndưl ay ri 'bưn geh 'bơơn chhak nei.” 62Bơl bu sot ôp bnih bươp êch chôôl chhak koon laa 'bơơn. 63Sa-cha-ri maanh pơih kơđaar dêq u 'bian: “Chhak bu laa Jang.” Jôm bnih kot êêng aang. 64Kơndaal, wiêm bu a pơơk, lpiat rhông rhơi, bu mor u pơt wơơl Brah Ưn. 65Leq gơna poh kot n'hông, u bu nday pooch tơrnang nơơm teq u pal kaar nei jôm kwaal yôh bnơm Ju-đê. 66Jôm bnih iat kot chmlam knông chưt, u mor: “Koon drêên au u kươi a kươi sot bei êch?” Ngan đươm ti Brah ja gôq pôl koon drêên nei.
Baak tapơt Sa-cha-ri ri
67Sa-cha-ri, bươp koon drêên nei, kươt bêêng bơm Brah Wêêng jah mor grnưt noor laah:
68“Pơt tư Brah, laa Brah Ưn I-sra-ên ri,
Đươm Ay ja chah nhjook u đoh kwaai raih Ay,
69Ay ja kn'hao aan bơl bơn, knông nhi Đa-wit, dêch Ay,
Di Yaang Đoh Kwaai bêêng dang kmheng!#1:69 S'bt: kei đoh kwaai.
70Bei Pang ja nhôq wiêm bơl grnưt noor jrah
Lah pơn a bơh khal hư,
71Pang đoh bơl bơn rlach pal bơl kmang,
U rlach ti jôm bnih skiêr bơl bơn.
72Pang tơrsau chưt gmaak yau yi bơl bơn,
U gênh kươi baak pơrnơn jrah Pang ri,
73Bei baak Pang ja daai n'hai Ap-ra-ham,
Lah yau yi bơl bơn,
74Laah tơt bơl bơn ja kươt jraih doh rlach ti bơl dôih kmang,
Pang a kươi aan bơl bơn kươt lơh kaar Pang 'bưn n'hông ơơn,
75Knông baak jrah jriêp u sêch song
Di mat Pang leq klap nơơm.
76Ơi koon drêên, bu nday a kươi khuôl 'bei laa grnưt noor Yaang Prêh Huôih ri;
'Bei a kươi han noor Brah, kwaih troong aan Pang,
77Jah raih Pang chkhôm baak krôih dôih
Baah gưt baak đoh kwaai.
78Đươm chưt gmaak Brah Ưn bơl bơn ri,
Baah nar aang ôi a lơ prêh a kươi chah nhjook#1:78 a kươi chah nhjook: Knông m'baak plơơp 'bian ti laa ja chah nhjook. bơl bơn,
79Jah yơr sm'baang bơl bnih gôq a ktôk mang jơ ngôw u knông ruup gui baak chhưt,
Pôl liêu chwaat bơl bơn mưt u blet troong sroong boong.”
80Koon drêên hao ttih, chhak jan ttih raap, chưt wêêng moh dang, rêh ktôk trenh sngat aan tơt nar lôh sot di mat raih I-sra-ên.
© 2024 Bible Society Vietnam. All rights reserved.