ମାତିଉ 8
8
ଜିସୁ ମୁଟ୍ଡାଙ୍ଗ୍ ରଗୁଗାଟାଞ୍ଜିକି ନେହି କିଅନି
(ମାର୍କ ୧:୪୦–୪୫; ଲୁକ ୫:୧୨–୧୬)
1ଜିସୁ ହରୁଟି ଜାଚାନ୍ ୱାଅନେଃଏ ଏଗେଲ୍ ଦାଲ୍ଲା ତା ବେତଟ୍ ହାଚ୍ଚେରି । 2ଆଟେ ହୁଡ଼ାଟୁ, ରଃଅଞ୍ଜି କୁସ୍ଟି ରଗୁଗାଟାଞ୍ଜି ତା ରେଃଏସ୍ ୱାନାହି ଅଲ୍ଗି ଆନ୍ ଜୁହାରି କିଆନ୍ ୱେସ୍ତେଞ୍ଜି, “ଏ ଦାର୍ମୁ, ନିନୁ ଜଦି ଇଚ୍ଚା କିଦି ଇଚ୍ଚେସି, ନିନୁ ନାଙ୍ଗେ ନେହି କିଅନ୍ ମୁତାଦି ।” 3ଏମ୍ୱାଟି ଜିସୁ କାଜ୍ଜୁ କହାନ୍ ତାଙ୍ଗେ ଡିଗାନ୍ ୱେସ୍ତେଞ୍ଜି, “ନାନୁ ଇଚ୍ଚା କିମାଃଇ ନିନୁ ନେହି ଆମୁ ।” ଏଚିୱାଡ଼େ ଏୱାଞ୍ଜି ତା ମୁଟ୍ଡାଙ୍ଗ୍ ରଗୁଟି ନେହି ଆତେଞ୍ଜି । 4ଆଟେ ଜିସୁ ତାଙ୍ଗେ ୱେସ୍ତେଞ୍ଜି, “ହୁଡ଼ାମୁ ଇନ୍ଦାରିକି ୱେଃସାଆ, ମତ୍ର ହାଲ୍ମୁ, ଜାଜକନିକି ନି ଗାଣ୍ଡି ତସ୍ମୁ, ଆଟେ ମସା ଇମ୍ୱିନ୍ ନଇବେଦ୍ୟ ହିଅନ୍ତି କୁଲାଟି ୱେସାନ୍ନେଞ୍ଜି, ଏଚିଡେହେଙ୍ଗ୍ ନିନୁ ବଲି ଉଚ୍ଚର୍ଗ କିମୁ ଇହିଙ୍ଗ୍ କିତେସି ନିନୁ ନେହିଆଞ୍ଜି ଇଞ୍ଜାନ୍ ହାବେତାରି ପୁନ୍ନେରି ।”
ଜିସୁ ସେଙ୍ଗୁଡ଼ି ସିପେଙ୍ଗ୍ତି ଗାମିନାଞ୍ଜିତି କାମ୍ୱାରେଏଞ୍ଜିକି ନେହି କିଅନି
(ଲୁକ ୭:୧–୧୦)
5ଜିସୁ କପର୍ନାହୁମ ଗାଡ଼ାନାଜୁତାୱା ହଲବନେଃଏ, ରଃଅଞ୍ଜି ସେଙ୍ଗୁଡ଼ି ସିପେଙ୍ଗ୍ତି ଗାମିନାଞ୍ଜି#୮:୫ ସେଙ୍ଗୁଡ଼ି ସିପେଙ୍ଗ୍ତାୱାଟି ଗାମିନାଞ୍ଜି ଇଚ୍ଚେସି, ଉଡ଼ିଆ କାତାଟି ସତସେନାପତି ତା ଟାକ୍କେ ୱାନ୍ ଜିଗାନାହି ୱେସ୍ତେଞ୍ଜି, 6“ଏ ଦାର୍ମୁ, ନା କାମ୍ୱାରେଏଞ୍ଜି କେରିୱାଚ୍ଚାରଗୁଟି ଏଗେଲ୍ ଜୁଗାନାହି ଇଡ୍ଡୁତାୱା ରେଡ଼ମ୍ ଆନ୍ ମାନ୍ନେଞ୍ଜି ।” 7ଜିସୁ ତାଙ୍ଗେ ୱେସ୍ତେଞ୍ଜି, “ନାନୁ ହାଜ୍ଜାନାହି ତାଙ୍ଗେ ନେହି କିଃଇ ।” 8ମତ୍ର ସେଙ୍ଗୁଡ଼ି ସିପେଙ୍ଗ୍ତି ଗାମିନାଞ୍ଜି ୱେସ୍ତେଞ୍ଜି, “ଦାର୍ମୁ ନିନୁ ଜେ, ନା ଇଡ୍ଡୁତି ଦଲାନ୍ ଲାଃଇଟ୍ କାଡୁ ଇଟ୍ଟିଦି, ଏହେଙ୍ଗିସି ନାନୁ ଜୁଗ୍ୟ ଆଃଏ; ମତ୍ର ନିନୁ ୱାର୍ରି ର ପଦ ୱେସ୍ମୁ, ନା କାମ୍ୱାରେଏଞ୍ଜି ନେହି ଆନେଞ୍ଜି । 9ଇନାକି ନାନୁ ୱାଡ଼େ ରଃଅଞ୍ଜ୍ତି ହକତ୍ତାୱା ମାଃଇ ଅଟେ ନା ହକତ୍ତାୱା ସିପେଙ୍ଗ୍ ମାନ୍ନେରି, ନାନୁ ରଃଅଞ୍ଜିକି ହାଲ୍ମୁ ଇଚ୍ଚେସି ଏୱାଞ୍ଜି ହାଜ୍ଜିନ୍ନେଞ୍ଜି; ଆଟେ ରଃଅଞ୍ଜିକି ୱାମୁ ଇଚ୍ଚେସି ଏୱାଞ୍ଜି ୱାଇନ୍ନେଞ୍ଜି; ଆଟେ ନା କାମ୍ବାରେଏଞ୍ଜିକି ଇଦା କିମୁ ଇଚ୍ଚେସି ଏୱାଞ୍ଜି ଏଦା କିନ୍ନେଞ୍ଜି ।” 10ଜିସୁ ଇଦା ୱେଞ୍ଜାନାହି ଆକ୍କାବାଡ଼ାଙ୍ଗ୍ ଆନାହି ବେତଟ୍ ୱାଇଚ୍ଚି ଦାଲ୍ଲାନିକି ୱେସ୍ତେଞ୍ଜି, ନାନୁ ମିଙ୍ଗେ ନିଜ୍ଜା ୱେସ୍ପିଞ୍ଜା, ଇସ୍ରାଏଲ ଦାଲ୍ଲା ତାୱା ୱାଡ଼େ ଇନ୍ଦାର୍ ପାଟ୍ଟି ଇହିଙ୍ଗିସି ବେର୍ ମାଞ୍ଜାଡ଼ି ହୁଡ଼ାହେଃଲ୍ଲାନୁ । 11#ଲୁକ ୧୩:୨୯ମତ୍ର ନାନୁ ମିଙ୍ଗେ ୱେସ୍ପିଞ୍ଜା, ୱେଲାରାଜି ଅଟେ ୱେଲାକ୍ଡୁପା ଇନ୍ଦେଟ୍ ଏଗେଲ୍ ଦାଲ୍ଲା ୱାନାହି ଅବ୍ରାହାମ, ଇସାକ ଅଟେ ଜାକୁବ ଡ଼ାହି ସର୍ଗ ରାଜିତାୱା ତିନ୍ବା ଉନ୍ବା କିନେରି, 12#ମାତି ୨୨:୧୩; ୨୫:୩୦; ଲୁକ ୧୩:୨୮ମତ୍ର ଏମ୍ୱେନାରିକି ଇ ରାଜିତି ବଦାଙ୍ଗ୍ ଏୱାରିକି କାଟତି କାଲକ୍ତାୱା ତୁହ୍ପନ୍ ଆନେ; ଏଦିମ୍ୱା ଏୱାରି ପାଟ୍କା ମ୍ରେଡିମ୍ରେଡି ଡ଼ିନେରି । 13ଆଟେ ଜିସୁ ସେଙ୍ଗୁଡ଼ି ସିପେଙ୍ଗ୍ତି ଗାମିନାଞ୍ଜିନିକି ୱେସ୍ତେଞ୍ଜି, ହାଲ୍ମୁ, ନିନୁ ଇନିସ୍ ମାଞ୍ଜାଡ଼ି କିଆଞ୍ଜି, ନି ପାଟ୍ଟି ଏହେଙ୍ଗିସି ଆପାକାଦି । ଏଚିୱାଡ଼େ ତା କାମ୍ୱାରେଏଞ୍ଜି ନେହିଆତେଞ୍ଜି ।
ଜିସୁ ଗାପ୍ଚି ଦାଲ୍ଲାନିକି ନେହି କିଅନି
(ମାର୍କ ୧:୨୯–୩୪; ଲୁକ ୪:୩୮–୪୧)
14ଡେଗ୍ଗା ଜିସୁ ପିତରତି ଇଡ୍ଡୁଇନ୍ଦା ହାଜ୍ଜାନ୍ ତା ପଦାନିକି ନମେରିଆଟି ରେଡ଼ମ୍ ଆନ୍ ମାଚ୍ଚାଦାଃଆ ହୁଡ଼ିତେଞ୍ଜି; 15ଏମ୍ୱାଟି ଜିସୁ ଏଦାଡ଼୍ କାଜ୍ଜୁ ଡିଗନେଃଏ, ଏଦାଡ଼ିକି ନମେର୍ ପିହ୍ତେ, ଆଟେ ଏଦି ନିଙ୍ଗାନାହି ତାଙ୍ଗେ ଆଙ୍ଗୁଲ୍ ଆଅନ୍ ମ୍ରାସ୍ତେ । 16ମିଡ୍ଡଡ଼୍ ତୁକାତାୱା ଦାଲ୍ଲା ବୁତଙ୍ଗ୍ ଆହାଚ୍ଚି ଗାପ୍ଚି ଦାଲ୍ଲାନିକି ତା ଟାକ୍କେ ତାଚ୍ଚିୱାତେରି, ଏମ୍ୱାଟି ଏୱାଞ୍ଜି ର ୱେସ୍ପାଟି ବୁତଙ୍ଗ୍ ପେରିତେଞ୍ଜି ଅଟେ ହାବେତ୍ ରଗୁଗାଟି ଦାଲ୍ଲାନିକି ନେହି କିତେଞ୍ଜି, 17ଇନିମିଡି ଜିସାୟ ବାବବାଦି ତାୱାଟି ୱେସାନ୍ନି ଇ କାତା ଲେର୍ ଆନେ, ଏଦାବାଗା ଇହିଙ୍ଗିସି ଆତେ, “ଏୱାଞ୍ଜି ମା ବିହାନପୁ ଅତେଞ୍ଜି ଅଟେ ହାବେ ରଗୁଟି କୁଲ୍ତାତେଞ୍ଜି ।”
ଜିସୁତି ଗ୍ରାମ୍ୱାଗାଟାର୍ ଆଅନ୍ ଇଚ୍ଚା କିନ୍ନାରି
(ଲୁକ ୯:୫୭–୬୨)
18ଜିସୁ ତା ଗୁଞ୍ଜେର୍ ମାଚ୍ଚି ଦାଲ୍ଲାନିକି ହୁଡ଼ାନାହି ତା ଗ୍ରାମ୍ବାଗାଟାରିକି ସାମ୍ନ୍ଦେର୍ତି ଆନେଟ୍ ୱାଡୁ ହାଲ୍ବନ୍ ବାଗା ୱେସ୍ତେଞ୍ଜି । 19ଆଟେ ରଃଅଞ୍ଜି ସାସ୍ତ୍ରି ତା ରେଃଏସ୍ ୱାନାହି ୱେସ୍ତେଞ୍ଜି, “ଏ ଗ୍ରାପାଗାଟାତି, ନିନୁ ଇମ୍ୱିନ୍ ଗର୍ରିଇନ୍ଦା ହାଜ୍ଜି, ନାନୁ ଏନ୍ନେ ନି ବେତଟ୍ ୱାଃଇ ।” 20ଏମ୍ୱାଟି ଜିସୁ ତାଙ୍ଗେ ୱେସ୍ତେଞ୍ଜି, “କଲେର୍କାତି ମାନ୍ବା ଗର୍ରି ମାନ୍ନେ, ଜାଗ୍ଗୁତି ପଟ୍ଟାଙ୍ଗ୍ ବାଗା ବଡ଼ା ମାନ୍ନେ, ମତ୍ର କୁଏଞ୍ଜି ମ୍ରିଃଏଞ୍ଜିକି ତ୍ଲାଉ ଇଟ୍ଟନ୍ତି ଗର୍ରି ହେଃଲ୍ଲେ ।” 21ଏମ୍ୱାଟି ଗ୍ରାମ୍ୱାଗାଟାରି ତାୱାଟି ଆଟେ ରଃଅଞ୍ଜି ତାଙ୍ଗେ ୱେସ୍ତେଞ୍ଜି, “ଏ ଦାର୍ମୁ, ନାଙ୍ଗେ କାହେ ନା ଆବାନିକି ଗ୍ରିପନ୍ ବାଗା ଅନୁମତି ହିଆମୁ ।” 22ମତ୍ର ଜିସୁ ତାଙ୍ଗେ ୱେସ୍ତେଞ୍ଜି, “ନିନୁ ନା ବେତଟ୍ ୱାମୁ, ହାନ୍ନି ଗାଣ୍ଡିତିଦି ହାନ୍ନି ଦାଲ୍ଲାନିକି ଗ୍ରିପନ୍ ବାଗା ପିହାହିମୁ।”
ଜିସୁ ୱ୍ଲିକାପିସ୍କାତିଦି ଲତୁ କିଅନି
(ମାର୍କ ୪:୩୫–୪୧; ଲୁକ ୮:୨୨–୨୫)
23ରନେସି ଜିସୁ ଡଙ୍ଗାତାୱା ଏଙ୍ଗନେଃଏ ତା ଗ୍ରାମ୍ୱାଗାଟାରି ୱାଡ଼େ ତା ବେତଟ୍ ହାଜ୍ଜାନ୍ ଡଙ୍ଗାତାୱା ଏଙ୍ଗିତେରି । 24ଆଟେ ହୁଡ଼ାଟୁ, ସାମ୍ନ୍ଦେର୍ତାୱା ଇହିଙ୍ଗିସି ବେର୍ ୱ୍ଲିକା ପିସ୍କା ଆତୁ ଜେ, ଲହଡ଼ା ଏଜୁ ଡ଼ାହି ଡଙ୍ଗା ମୁଞ୍ଜନ୍ ମ୍ରାସ୍ତେ, ମତ୍ର ଜିସୁ ହୁଞ୍ଜାଚ୍ଚେଞ୍ଜି । 25ଆଟେ ଏୱାରି ଜିସୁ ଟାକ୍କେ ୱାନାହି ତାଙ୍ଗେ ନିକ୍ଚାନ୍ ୱେସ୍ତେରି, “ଏ ଦାର୍ମୁ, ମାଙ୍ଗେ ନିପ୍ତାମୁ, ମାମୁ ହାଇନାମୁ ।” 26ଏୱାଞ୍ଜି ଏୱାରିକି ୱେସ୍ତେଞ୍ଜି, ଏ ହିତେ ମାଞ୍ଜାଡ଼ି କିଅନ୍ତାତେରି, ମିରୁ ଇନ୍ନା ବାଗା ଇଚେ ଆଜ୍ଜେଞ୍ଜେରି ? ଏମ୍ବାଟି ଏୱାଞ୍ଜି ନିଙ୍ଗାନାହି ୱ୍ଲିକା ଅଟେ ସାମ୍ନ୍ଦେର୍ତିଦି ଆଦେସ୍ ହିତେଞ୍ଜି, ଆଟେ ହାବେ ଲତୁ ଇଚ୍ଚୁ । 27ଏମ୍ୱାଟି ଗ୍ରାମ୍ବାଗାଟାରି ଆଜ୍ଜାନାହି ୱେସ୍ତେରି, ଇୱାଞ୍ଜି ଇନିମିଡିତି କୁଏଞ୍ଜି ଜେ ୱ୍ଲିକା ଅଟେ ସାମ୍ନ୍ଦେର୍ ୱାଡ଼େ ତା କାତା ମାନି ଆଇନେ ।
ବୁତଙ୍ଗ୍ ଆହାଚ୍ଚି ରିଃଆରିକି ନେହି କିଅନି
(ମାର୍କ ୫:୧–୨୦; ଲୁକ ୮:୨୬–୩୯)
28ଏଚ୍ଚିକିଃଆ ସାମ୍ନ୍ଦେର୍ତି ଆନେଟ୍ ୱାଡୁ ଗାଦରିୟ ରାଜିଇନ୍ଦା ଏୱାଞ୍ଜି ଏପନେଃଏ, ବୁତଙ୍ଗ୍ ଆହାଚ୍ଚି ରିଃଆରି ୱିଚାଙ୍ଗାଜୁଟି ହଚାନାହି ତାଙ୍ଗେ ପୁଁଣ୍ଡିତେରି । ଏୱାରି ଇହିଙ୍ଗିସି ଆଚ୍ଚି ଆଚ୍ଚିନ୍ ତଞ୍ଜେଚ୍ଚେରି ଜେ, ଏ ଗିଜ୍ଜୁ ଏସେନ୍ ଏମ୍ୱେ ୱାଡ଼େ ହାଲ୍ବନ୍ ୱାଅନ୍ କିଅନ୍ ମୁପେହେଃଲ୍ଲାତେରି । 29ଆଟେ ଏୱାରି ଏଗେଲ୍ ଗଲି ଆନାହି ୱେସ୍ତେରି, ଏ ମୁଲାପେନୁତି ମ୍ରିଃଏଞ୍ଜି, ନି ଡ଼ାହି ମାଙ୍ଗେ ଇନ୍ନି ବିଡ଼ା ମାନ୍ନେ ? ତୁକା ଏତାଦାଃଏଟେଃଏ ନିନୁ କି ମାଙ୍ଗେ କସ୍ଟ ହିଅନ୍ ବାଗା ଇନ୍ନେ ୱାଞ୍ଜି ? 30ଆଟେ ଏୱାର୍ତାୱାଟି ହିତେ ଦେହା ପାଜ୍ଜିଙ୍ଗ୍ ଗୁଟ୍ଟୁ ଆନ୍ ତିଞ୍ଜିଚ୍ଚୁ । 31ଏମ୍ୱାଟି ବୁତଙ୍ଗ୍ ତାଙ୍ଗେ ଜିଗାନାହି ୱେସ୍ପନ୍ ମ୍ରାସ୍ତୁ, “ଜଦି ନିନୁ ମାଙ୍ଗେ ପେରନ୍ ବାଗା ଇଚ୍ଚା କିଞ୍ଜାଦି, ଏହେଙ୍ଗ୍ ଆତେସି ଏ ପାଜ୍ଜିଙ୍ଗ୍ ଗୁଟ୍ଟୁ ଲାଃଇ ପାଣ୍ଡିଦାମୁ ।” 32ଜିସୁ ଏୱାର୍ ଲାଃଇ ମାଚ୍ଚି ବୁତଙ୍ଗ୍ନିକି ୱେସ୍ତେଞ୍ଜି, ହାଜ୍ଜୁ । ଏମ୍ୱାଟି ଏୱା ହଚାନ୍ ପାଜ୍ଜିଙ୍ଗ୍ ଲାଃଇ ହଟୁ, ଆଟେ ହୁଡ଼ାଟୁ, ଏ ପାଜ୍ଜିଙ୍ଗ୍ ଗୁଟ୍ଟୁ ହାବେ ଡେହି ଡେହି ହାଜ୍ଜାନ୍ ପ୍ଡିତି ଗର୍ରିଟି ସାମ୍ନ୍ଦେର୍ତାୱା ଦିଆନ୍ ମୁଞ୍ଜାନ୍ ହାତୁ । 33ଆଟେ ପାଜ୍ଜିଙ୍ଗ୍ କପେଚ୍ଚି ଦାଲ୍ଲା ଡେହାନ୍ ହାଚ୍ଚେରି, ଆଟେ ଗାଡ଼ାନାଜୁଇନ୍ଦା ହାଜ୍ଜାନାହି ବୁତଙ୍ଗ୍ ଆହାଚ୍ଚି ଦାଲ୍ଲାନିକି ଇନ୍ନା ଇନ୍ନା ଆଚ୍ଚେ, ଏ ହାବେ ଦାଲ୍ଲାନିକି ୱେସ୍ତେରି । 34ଆଟେ ହୁଡ଼ାଟୁ, ଗାଡ଼ାନାଜୁତି ହାବେ ଦାଲ୍ଲା ଜିସୁନିକି ହୁଡ଼ନ୍ ବାଗା ହଚାନ୍ ୱାତେରି, ଆଟେ ଏୱାରି ତାଙ୍ଗେ ହୁଡ଼ାନାହି “ନିନୁ ଇ ରାଜିତାୱାଟି ହଚାନ୍ ହାଲ୍ମୁ ଇଞ୍ଜାନ୍ ଜିଗିତେରି ।”
