ମାତିଉ 7
7
ବିହି ଦାଲ୍ଲାନିକି ବିଚାର କିଅନ୍ତି କୁଲାଟି
(ଲୁକ ୬:୩୭–୩୮; ଲୁକ ୬:୪୧–୪୨)
1“ମିରୁ ଇନିମିଡି ବିଚାର ଆଃଏରି, ଏଦାବାଗା ବିହି ଦାଲ୍ଲାନିକି ବିଚାର କିଃଆଟୁ । 2#ମାର୍କ ୪:୨୪ଇନାକି ମିରୁ ଇନିୱାହୁ ବିଚାର କିଦେରି, ଏଚିଡେହେଙ୍ଗ୍ ମିଙ୍ଗେ ବିଚାର କିୱା ଆନେ; ଅଟେ ଇମ୍ୱିନାଦା ଡ଼ାହି ଡାଚିଦେରି, ଏଦା ଡ଼ାହି ମିଙ୍ଗେ ୱାଡ଼େ ଡାଚାଆନେ । 3ଆଟେ ନିନୁ ନି କାନ୍ନୁତାୱା ମାନ୍ନି ବେର୍ ଚିହେଲ୍ତିଦି ହୁଡ଼େଟେଃଏ, ଇନ୍ନା କିଅନ୍ ନି ଆମ୍ୱେସ୍ କାନ୍ନୁତାୱା ମାନ୍ନି ଡଟି ଚିହେଲ୍ତିଦି ହୁଡ଼େଞ୍ଜି ? 4ନି କାନ୍ନୁତାୱା ବେର୍ ଚିହେଲ୍ ମାଞ୍ଜି ମାଞ୍ଜି ନିନୁ ଇନିମିଡି ନି ଆମ୍ବେସ୍ନିକି ୱାମୁ ନାନୁ ନି କାନ୍ନୁତାୱାଟି ଡଟି ଚିହେଲ୍ ୱେଚାଦାଃଇ ଇଞ୍ଜାନ୍ ୱେସ୍ଦି ? 5ଏ କୁଟୁଗାଟାନାତି କାହେ ନି କାନ୍ନୁତାୱାଟି ବେର୍ ଚିହେଲ୍ ୱେଚାମୁ, ଏହେଙ୍ଗ୍ ଆତେସି ଡେଗ୍ଗା ନି ଆମ୍ୱେସ୍ କାନ୍ନୁତି ଡଟି ଚିହେଲ୍ ୱେଚନ୍ ବାଗା ନେହେନ୍ ହୁଡ଼ନ୍ ମୁଦି । 6ପିର୍ନି କୁଲା ନାହୁଡ଼୍କାତିଦି ହିଃଆଟୁ; ଇନାକି ଏୱା ମ୍ଲିଆନାହି ମିଙ୍ଗେ ହକାଦାନ୍ନୁ । ଆଟେ ପାଜ୍ଜିଙ୍ଗ୍ ନକେସ୍ ମୁକ୍ତା ତ୍ରକାଟୁ, ଇନାକି ଏୱା ମୁକ୍ତାତି ଦାରା ପୁନ୍ନେଟେଃଏ କାଟ୍କାଟି ନେତେ ସ୍ଡିନୁ ।”
ମି ଆବସକ କୁଲାଟି ମୁଲାପେନୁନିକି ୱ୍ରିହ୍ପନ୍
(ଲୁକ ୧୧:୯–୧୩)
7“ୱ୍ରିହ୍ଦୁ ମିଙ୍ଗେ ହିୱା ଆନେ, ଦାହ୍ଦୁ ମିରୁ ପାଁଣ୍ଡେରି; ଦାରାତାୱା ୱେଦୁ, ମି ବାଗାଟି ଦାରା ଗେର୍ପା ଆନେ । 8ଇନାକି ଏମ୍ୱେନାଞ୍ଜି ୱ୍ରିହ୍ନେଞ୍ଜି, ଏୱାଞ୍ଜିକି ହିୱା ଆନେ; ଏମ୍ୱେନାଞ୍ଜି ଦାହ୍ନେଞ୍ଜି ଏୱାଞ୍ଜି ପାଁନେଞ୍ଜି, ଆଟେ ଏମ୍ୱେନାଞ୍ଜି ଦାରାତାୱା ୱେନେଞ୍ଜି ଏୱାଞ୍ଜ୍ ବାଗାଟି ଦାରା ଗେର୍ପା ଆନେ । 9ମି ତାୱା ଇହିଙ୍ଗିସି ଏମ୍ୱେନାଞ୍ଜି ମାନ୍ନେଞ୍ଜି ଜେ, ତା ମ୍ରିଃଏଞ୍ଜି ରୁଟି ୱ୍ରିହ୍ତେସି ତାଙ୍ଗେ ୱାଲ୍ଲି ହିନେଞ୍ଜି, 10ଆଟେ ମିନୁ ୱ୍ରିହ୍ତେସି ତାଙ୍ଗେ ରାଚୁ ହିନେଞ୍ଜି ? 11ଏଦାକି ମିରୁ ଡ଼ଃଆନାତେରି ଆତେସ୍ୱାଡ଼େ ମି ବଦାଙ୍ଗ୍ନିକି ନେହି ନେହି କୁଲା ହିଅନ୍ ପୁଞ୍ଜିଞ୍ଜେରି, ଏହେଙ୍ଗ୍ ଆତେସି ମି ସର୍ଗତି ଆବା ତାଙ୍ଗେ ୱ୍ରିହ୍ପିନ୍ନାରିକି ଏଚ୍ଚେ ଗାପ୍ଚି ନେହି ନେହି କୁଲା ହିଃଏଞ୍ଜି ?”
ହାବେତାୱାଟି ଗାପ୍ଚି ନେହି ହାଜୁ
12 #
ଲୁକ ୬:୩୧
“ଏଦାବାଗା ଦାଲ୍ଲା ମିଙ୍ଗେ ଇନିୱାହୁ ବେବାର୍ କିଆକାରି ଇଞ୍ଜାନ୍ ଏଲୁ କିଞ୍ଜେରି, ମିରୁ ୱାଡ଼େ ଏୱାରିକି ଏହେଙ୍ଗିସି ବେବାର୍ କିଦୁ, ଇନାକି ଇଦିନେଃଏ ଆଇନେ ମସାତି ହାଜୁ ଅଟେ ବାବବାଦିଙ୍ଗ୍ ପୁତିତି ମୁଲନ୍ କାତା ।”
ସୁକ୍କେର୍ ଅଟେ ଅହେର୍ ଗିଜ୍ଜୁ
(ଲୁକ ୧୩:୨୪)
13“ସୁକ୍କେର୍ ଦାରା ହିଆନ୍ ହଡୁ, ଇନାକି ନାହେଡ୍ ଇନ୍ଦା ଅନ୍ତି ଦାରା ଅହେର୍, ଆଟେ ଇ ଅହେର୍ ପାହେର୍ ହିଆନ୍ ହାଲ୍ବନ୍ତି ଦାଲ୍ଲା ଏଗେଲ୍। 14ଆଟେ ପରନ୍ଇନ୍ଦା ଅପନ୍ତି ଗିଜ୍ଜୁ ସୁକ୍କେର୍ ଅଟେ ଏଗେଲ୍ କସ୍ଟ । ଆଟେ ଏ ଗିଜ୍ଜୁତାୱା ହାଲ୍ବନ୍ତାରି କକ୍ଚି ।”
ମ୍ରାନୁ ଅଟେ ଏମ୍ୱାତି କାଉ
(ଲୁକ ୬:୪୩–୪୪; ୧୩:୨୫–୨୭)
15“କଲ ବାବବାଦିଙ୍ଗ୍ ତାୱାଟି ନେହେନ୍ ବାସାଆଦୁ; ଏୱାରି ମେଁଣ୍ଡାଅଡାଙ୍ଗ୍ତି ୱାନ୍ନା ଆହାନାହି ମି ଟାକ୍କେ ୱାଇନ୍ନେରି, ମତ୍ର ହଡାଙ୍ଗ୍ନାୱା ଏୱାରି ରାଗାଗାଟି କ୍ଡାଡିଙ୍ଗ୍ ଡେହେଙ୍ଗ୍ ! 16ଏୱାର୍ତି କାମାତାୱାଟି ମିରୁ ଏୱାରିକି ପୁଞ୍ଜେରି । ଦାଲ୍ଲା ଇନ୍ନା ହାପ୍କା ମ୍ରାନୁଟି ଅଙ୍ଗୁର କି କଟଡ଼୍ ମ୍ରାନୁଟି ତଗା ଏସ୍ପିନ୍ନେର୍ମା ? 17ଏଚିଡେହେଙ୍ଗ୍ ନେହି ମ୍ରାନୁତାୱା ନେହି କାଉ ଆଗିନେ, ମତ୍ର ଡ଼ଃଆନ୍ ମ୍ରାନୁତାୱା ଡ଼ଃଆନ୍ କାଉ ଆଗିନେ । 18ନେହି ମ୍ରାନୁ ଡ଼ଃଆନ୍ କାଉ ଆଗନ୍ ମୁଃଏ, ଅଟେ ଡ଼ଃଆନ୍ ମ୍ରାନୁ ନେହି କାଉ ଆଗନ୍ ମୁଃଏ । 19#ମାତି ୩:୧୦; ଲୁକ ୩:୯ଇମ୍ୱିନ୍ ମ୍ରାନୁ ନେହି କାଉ ଆଃଗେଏ, ଏଦା କାତାନାହି ନାଡ଼ିତାୱା ତୁହ୍ପା ଆନେ । 20#ମାତି ୧୨:୩୩ଏଦାକି ଏୱାର୍ତି କାମାତାୱାଟି ମିରୁ ଏୱାରିକି ପୁଞ୍ଜେରି । 21ନାଙ୍ଗେ ଦାର୍ମୁ ଦାର୍ମୁ ଇଞ୍ଜାନାହି ଆର୍ପିଞ୍ଜାନାରି ହାବେ ସର୍ଗ ରାଜିତାୱା ହାଃଲ୍ଲେରି, ମତ୍ର ମୁଲାପେନୁତି ଇଚ୍ଚା ପାଲ୍ନି ଆଇନାଞ୍ଜି ହାଲ୍ବନ୍ ମୁନେଞ୍ଜି । 22ଏ ଦିନାତାୱା ଦାଲ୍ଲା ନାଙ୍ଗେ ୱେସ୍ତାନେରି, ଏ ଦାର୍ମୁ ଏ ଦାର୍ମୁ ମାମୁ ଇନ୍ନା ନି ପାରୁଟି ବାବବାନି ୱେଃସାତାମୁ ? ଆଟେ ନି ପାରୁଟି ଇନ୍ନା ବୁତଙ୍ଗ୍ ପେଃରାତାମୁ ? ଆଟେ ନି ପାରୁଟି ଇନ୍ନା ଆକ୍କାବାଡ଼ାଙ୍ଗ୍ତି କାମା କିଃଆତାମୁ ? 23ଏଚିତୁକାତାୱା ନାନୁ ଏୱାରିକି ନେହେନ୍ ୱେସିଃଇ, ନାନୁ ମିଙ୍ଗେ ଏଚ୍ଚେକ୍ୱାଡ଼େ ପୁଞ୍ଜାହେଲ୍ଲାଦାଃଏନୁ । ଏ ଡ଼ଃଆନାତେରି ନା ତାୱାଟି ଦେହା ଆଦୁ ।”
ରିଃଆରି ଇଡ୍ଡୁ କ୍ଲେହନ୍ତାରି
(ଲୁକ ୬:୪୭–୪୯)
24“ଏଦାକି ଏମ୍ୱେନାଞ୍ଜିକି ନା ଇ ହାବେ କାତା ୱେନେଞ୍ଜି ଅଟେ ପାଲ୍ନି ଆନେଞ୍ଜି, ଏୱାଞ୍ଜି ୱାଲ୍ଲି କୁଃଏଟି ଇଡ୍ଡୁ କ୍ଲେହନ୍ତି ରଃଅଞ୍ଜି ବୁଦ୍ଦିଗାଟି କୁଏଞ୍ଜି ଡେହେଙ୍ଗ୍ ଆନେଞ୍ଜି । 25ପିଜ୍ଜୁ ୱାତେ, ୱାରୁ ୱାତେ, ଅଟେ ୱ୍ଲିକା ପିସ୍କା ୱାତୁ ଏ ଇଡ୍ଡୁତିଦି ନାଚ୍ଚିତୁ, ଆଟେ ଏଦି ବ୍ଡିଃଆତେ, ଇନାକି ୱାଲ୍ଲି କୁଃଏଟି ତା ପୁନ୍ନାଦି ମାଚ୍ଚେ । 26ଆଟେ ଏମ୍ୱେନାଞ୍ଜିକି ନା ଇ ହାବେ କାତା ୱେଞ୍ଜାନାହି ପାଲ୍ନି ଆଃଏଞ୍ଜି ଏୱାଞ୍ଜି ବାଲୁ କୁଃଏଟି ଇଡ୍ଡୁ କ୍ଲେହାନ୍ନି ରଃଅଞ୍ଜି ମୁର୍କଗାଟାଞ୍ଜି ଡେହେଙ୍ଗ୍ ଆନେଞ୍ଜି । 27ପିଜ୍ଜୁ ୱାତେ, ୱାରୁ ୱାତେ, ଆଟେ ୱ୍ଲିକା ପିସ୍କା ୱାତୁ, ଏ ଇଡ୍ଡୁତିଦି ନାଚ୍ଚିତୁ, ଆଟେ ଏ ଇଡ୍ଡୁ ବ୍ଡିଆନାହି ନାହେଡ୍ ଆତେ ।”
28 #
ମାର୍କ ୧:୨୨; ଲୁକ ୪:୩୨ “ଜିସୁ ଇ ହାବେତ୍ କାତା ୱିହିକିଅନେଃଏ ଦାଲ୍ଲା ହାବେ ତା ଗ୍ରାପନ୍ତାୱା ଆକ୍କାବାଡ଼ାଙ୍ଗ୍ ଆତେରି, 29ଇନାକି ଏୱାଞ୍ଜି ସାସ୍ତ୍ରିଙ୍ଗ୍ ଡେହେଙ୍ଗ୍ ଗ୍ରାପେଟେଃଏ ହକତ୍ ପାଁଣ୍ଡାନ୍ନି କୁଏଞ୍ଜି ଡେହେଙ୍ଗ୍ ଏୱାରିକି ଗ୍ରାପେଚ୍ଚେଞ୍ଜି ।”
