پیدأیش ۱۹
۱۹
سدوم و عموره خرأبَ بوستن
1 هو روجٚ میأن غروب دٚمٚ رِه او وخت کی او دوتأ فٚرٚشته فأرٚسِده سدومٚ شهرٚ دروأزه‌یَ، لوط اویَه نیشته بو. هطؤ کی اوشأنَ بیدِه، خو جأ سٚر ویریشته و بوشؤ اوشأنٚ پیشوأز و سوجده بوکوده، بوگفته: 2 «اَی می آقأیأن، ایمشب بأیید می خأنه و شیمی پأیأنَ بوشؤرید و می میهمأن بیبید. فردأ صُبٚ دٚمٚ رِه هر زمأت کی بٚخأستید، تأنید بیشید.» ولی اوشأن بوگفتٚده: «شبٚ رِه شهرٚ میدأنی میأن ایسیم.»
3 ولی لوط اَندر حقٚ سعی بٚزِه کی اوشأن قوبیل بوکودٚد و بوشؤده اونی خأنه میأن. اون ایتأ فطیرٚ نأن بٚپخته و ایتأ پیله سٚفره شأم اَشأنٚ رِه تدأرک بیدِه و اَشأنَ فأدأ کی بوخوردٚد. 4 بأزون هوطؤ کی آمأدَه بوستأندوبود کی بوخوسد، سدومٚ شهرٚ مردأکأن، پیر و جوأن، شهرٚ گوشه کنأرٚ جَا، لوطٚ خأنه‌یَ دؤرَ کودٚد، 5 فریأد بٚزِده: «اَی لوط، او دوتأ مردأکَ کی ایمشب تی میهمأن ایسٚده، بأوٚر بیرون اَمی ورجأ کی اوشأنَ بشنأسیم.»
6 لوط خأنه جَا بوشؤ بیرون کی اوشأنٚ اَمرأ گب بٚزٚنه و درَ خو پوشتٚ سٚر دٚوٚسته. 7 اون اَشأنَ بوگفته: «نه، اَی می برأرأن، خأهیش کونٚم اَطؤچی زشتٚ کردٚکأر نوکونید. 8 بیدینید، من دو تأ عٚزبٚ دؤختر دأرم. اوشأنَ فأدم شٚمٚره. هرتأ کأر کی شیمی دیل خأیه اوشأنٚ اَمرأ بوکونید؛ ولی اَ دوتأ مردأکٚ اَمرأ کأر نوأدأشتنید، چونکی اوشأن می پنأه جیر ایسأده.»
9 شهرٚ مردأکأن جوأب بٚدأده: «جٚه اَمی رأ سٚر بوشو کنأر! اَمأن وئأشتیم اَمی شهرٚ میأن سأمأن بیگیری و هسأ اَمٚرَه گی چی بوکونیم چی نوکونیم. اَسه او کأرٚ جَا کی اوشأنٚ اَمرأ خأستیم بوکونیم بدتر تی اَمرأ کونیمی.» بأزون فوتورکستده لوطٚ ور، بینأ بوکودٚد اونی خأنه درَ ایشکنِن. 10 ولی او دوتأ مردأی خوشأنٚ دٚسَ رأستَ کودٚد، لوطَ فأکشأنِده خأنه دورون و درَ دٚوٚستده 11 و تومأمٚ او خأنه بیرون ایسأ بو مردأکأنٚ چومأنَ کورَ کودٚد کی نٚتأند خأنه درَ بیأفٚد.
12 او دوتأ مردأی لوطٚ جَا وأوٚرسِئده: «اَ شهرٚ میأن چنتأ فکٚ فأمیل دأری؟ پٚسرأن، دؤخترأن، زأمأیأن و هرکی‌یَ کی دأری اَ شهرٚ جَا بٚبر بیرون. 13 چونکی اَ شهرَ خأییم جٚه بین بٚبریم. فریأد اَ شهرٚ مردومٚ ظولمٚ ضد، فأرٚسِه خوداوندٚ حوضور و اون اَمٚرَه اوسه کوده کی اونَ فوگوردأنیم.»
14 پٚس لوط دفأتن بوشؤ و خو دؤخترأنٚ نأمزودأنَ بوگفته: «دٚس بٚجونبأنید! شهرٚ جَا جیویزید، چونکی خوداوند اونَ خأیه فوگوردأنٚه!» ولی اَ گب اوشأنٚ رِه مسخره بأمؤ.
15 فردأیی صُبٚ دٚم، او دوتأ فٚرٚشته لوطَ بوگفتٚده: «دٚس بٚجونبأن! تی زنأی و تی دوتأ دؤخترَ کی اَیَه ایسأده اوسأن و تأ دِئرَ نوبوسته جیویزأدن اگه نٚبه شومأنم اَ شهرٚ آدمأنٚ اَمرأ کی گونأ کونٚده هلأکَ بید.»
16 هوطؤ کی لوط معطلَ کودأندوبو او دوتأ مردأی اون و اونی زنأی و اونی دوتأ دؤخترٚ دسأنَ بیگیفتٚده، بٚبردٚده شهرٚ جَا بیرون ایتأ اَمنٚ جیگأ میأن، چونکی خوداوند اوشأنَ رحم بوکوده بو.
17 ایتأ جٚه او دوتأ مردأی لوطَ بوگفته: «شیمی جأنٚ نیجأت دٚئنٚ وأسی جیویزید و شیمی پوشتٚ سٚرم نیگأ نوکونید. بیشید کوهأنٚ میأن، چونکی اگه دشتی میأن بِئیسید حتم بٚدأرید کی میریدی.»
18 لوط جوأب بٚدأ: «اَی آقأ جأن، تٚرَه مینّت کونٚم اَطؤچی کأرَ اَمی جَا نوأخأستنید. 19 تو می حقٚ میأن خُبی بوکودی، می جأنَ نیجأت بٚدأیی و ایتأ پیله محبت مِرِه بوکودی. ولی نتأنم جیویزم کوهأنٚ میأن، چونکی ترسم پیشتر جٚه اَنکی فأرٚسٚم اویَه اَ بلأ می یقه‌یَ بیگیره و بیمیرم. 20 فأندرید اَ دیهأت چندر نیزدیک و کوچیک ایسٚه! اَطؤ نییٚه؟ پٚس وئألید بشم اویَه و اَمنیتٚ میأن بِئیسم.»
21 اون بوگفته: «خٚیلی خُب، تی خأهیشَ قوبیل کونٚم و او دیهأتَ فونگوردأنم. 22 پٚس دٚس بٚجونبأن! چونکی تأ او زمأت کی فأنرسِیی اویَه، نتأنم هیتأ کأر کودن.» هنٚ وأسی او دیهأتَ صوغر ینی «کوچیک» نأم بٚنأده.
23 آفتأب زِئندوبو کی لوط بوشؤ صوغرٚ میأن. 24 بأزون خوداوند شوأله بٚکشه گوگردَ آسمأنٚ جَا بوأرأنِه سدوم و عموره سٚر 25 و او دوتأ شهرَ تومأمٚ او دشتی میأن شهرأن و دیهأتأن و تومأم اویَه آدمأن و او جوروأجورٚ گیأیأنٚ اَمرأ همٚتأیَ جٚه بین بٚبرده. 26 ولی لوطٚ زنأی خو پوشتٚ سٚرَ فأندرسته و ایتأ سوتون جٚه نمک بوبوسته.
27 ایبرأهیم صُبٚ دٚمٚ رِه ویریشته و بوشؤ هو جیگأ ور کی اویَه خوداوند حوضور بٚپأ ایسأ بو. 28 اون سدوم و عموره شهرأن و او دشتی‌یَ فأندرسته و بیدِه کی هسأ کوره مأنستَن دود او شهرأنٚ جَا شوئؤندره بوجؤر.
29 او وخت کی خودا دشتی شهرأنَ کی لوط اونی میأن سأمأن دأشتی‌یَ جٚه بین بردأندوبو، ایبرأهیمٚ دوعأ جوأبَ بٚدأ و لوطَ مٚردنٚ وٚندٚه جَا کی او شهرأنَ خو دٚهٚنٚ میأن فأکشِندوبو، جیویزأنه.
لوط و اونی دؤخترأن
30 ولی لوط صوغرٚ میأن ایسأنٚ جَا بٚترسه. پٚس او جأیَ بٚنأ و بوشؤ، خو دوتأ دؤخترٚ اَمرأ بوشؤ کوهأنٚ میأن و ایتأ غأرٚ میأن بِئیسأ. 31 ایتأ روج لوطٚ پیله دؤختر خو خأخورَ بوگفته: «تومأمٚ اَ سأمأنٚ میأن ایتأ مردأی بیأفته نیبه کی اَمٚرَه بٚبره. اَمی پِئرم پور دِه بأقی نییٚه پیرَ بِه و دِه نٚتأنه ایتأ نتأج خو جَا بأقی بٚنه. 32 پٚس بیأ اونَ شرأب وأخورأنیم و اونی اَمرأ همخأب بیبیم و اَطؤیی اَمی پِئرٚ نتأجَ حیفظَ کونیم.» 33 پٚس هو شب اونَ مستَ کودٚد و پیله دؤختر خو پِئرٚ اَمرأ همخأب بوبوسته. ولی لوط خو دؤخترٚ خوفتن و ویرشتنٚ جَا وأخبدأرَ نوبوسته.
34 فردأیی صُبٚ دٚمٚ رِه، پیله دؤختر خو کوجه خأخورَ بوگفته: «من دیشب می پِئرٚ اَمرأ همخأب بوبوستم. بیأ کی ایمشبم ایوأردِه اونَ شرأب وأخورأنیم و اَیدفأرِه تو بوشو اونی اَمرأ همخأب بوبو کی اَطؤیی اَمی پِئرٚ جَا ایتأ نتأج بٚدأریم.» 35 پٚس او شب ایوأردِه اونَ مستَ کودٚد و کوجه‌دأنه دؤختر اونی اَمرأ بوخوفته. اَیدفأیٚم لوط اویدفأ مأنستَن هیچی نفأمسته. 36 اَطؤیی بوبوسته کی او دوتأ دؤختر خوشأنٚ پِئرٚ جَا شکم اوسأدٚد. 37 پیله دؤختر ایتأ پٚسر بٚزأ و اونَ موآب نأم بٚنأ. (موآبٚ قبیله اونی جَا سٚر بیگیفته بوبوسته.) 38 کوجه‌دأنه دؤخترم ایتأ پٚسر بٚزأ و اونی نأمَ بِن‌عمّی بٚنأ. (عمونٚ قبیله اونی جَا سٚر بیگیفته بوبوسته.)
The Gilaki Contemporary Bible is a Product of Transform Iran © 2024. All rights reserved. www.kelisayejame.org
پیدأیش ۱۹
۱۹
سدوم و عموره خرأبَ بوستن
1 هو روجٚ میأن غروب دٚمٚ رِه او وخت کی او دوتأ فٚرٚشته فأرٚسِده سدومٚ شهرٚ دروأزه‌یَ، لوط اویَه نیشته بو. هطؤ کی اوشأنَ بیدِه، خو جأ سٚر ویریشته و بوشؤ اوشأنٚ پیشوأز و سوجده بوکوده، بوگفته: 2 «اَی می آقأیأن، ایمشب بأیید می خأنه و شیمی پأیأنَ بوشؤرید و می میهمأن بیبید. فردأ صُبٚ دٚمٚ رِه هر زمأت کی بٚخأستید، تأنید بیشید.» ولی اوشأن بوگفتٚده: «شبٚ رِه شهرٚ میدأنی میأن ایسیم.»
3 ولی لوط اَندر حقٚ سعی بٚزِه کی اوشأن قوبیل بوکودٚد و بوشؤده اونی خأنه میأن. اون ایتأ فطیرٚ نأن بٚپخته و ایتأ پیله سٚفره شأم اَشأنٚ رِه تدأرک بیدِه و اَشأنَ فأدأ کی بوخوردٚد. 4 بأزون هوطؤ کی آمأدَه بوستأندوبود کی بوخوسد، سدومٚ شهرٚ مردأکأن، پیر و جوأن، شهرٚ گوشه کنأرٚ جَا، لوطٚ خأنه‌یَ دؤرَ کودٚد، 5 فریأد بٚزِده: «اَی لوط، او دوتأ مردأکَ کی ایمشب تی میهمأن ایسٚده، بأوٚر بیرون اَمی ورجأ کی اوشأنَ بشنأسیم.»
6 لوط خأنه جَا بوشؤ بیرون کی اوشأنٚ اَمرأ گب بٚزٚنه و درَ خو پوشتٚ سٚر دٚوٚسته. 7 اون اَشأنَ بوگفته: «نه، اَی می برأرأن، خأهیش کونٚم اَطؤچی زشتٚ کردٚکأر نوکونید. 8 بیدینید، من دو تأ عٚزبٚ دؤختر دأرم. اوشأنَ فأدم شٚمٚره. هرتأ کأر کی شیمی دیل خأیه اوشأنٚ اَمرأ بوکونید؛ ولی اَ دوتأ مردأکٚ اَمرأ کأر نوأدأشتنید، چونکی اوشأن می پنأه جیر ایسأده.»
9 شهرٚ مردأکأن جوأب بٚدأده: «جٚه اَمی رأ سٚر بوشو کنأر! اَمأن وئأشتیم اَمی شهرٚ میأن سأمأن بیگیری و هسأ اَمٚرَه گی چی بوکونیم چی نوکونیم. اَسه او کأرٚ جَا کی اوشأنٚ اَمرأ خأستیم بوکونیم بدتر تی اَمرأ کونیمی.» بأزون فوتورکستده لوطٚ ور، بینأ بوکودٚد اونی خأنه درَ ایشکنِن. 10 ولی او دوتأ مردأی خوشأنٚ دٚسَ رأستَ کودٚد، لوطَ فأکشأنِده خأنه دورون و درَ دٚوٚستده 11 و تومأمٚ او خأنه بیرون ایسأ بو مردأکأنٚ چومأنَ کورَ کودٚد کی نٚتأند خأنه درَ بیأفٚد.
12 او دوتأ مردأی لوطٚ جَا وأوٚرسِئده: «اَ شهرٚ میأن چنتأ فکٚ فأمیل دأری؟ پٚسرأن، دؤخترأن، زأمأیأن و هرکی‌یَ کی دأری اَ شهرٚ جَا بٚبر بیرون. 13 چونکی اَ شهرَ خأییم جٚه بین بٚبریم. فریأد اَ شهرٚ مردومٚ ظولمٚ ضد، فأرٚسِه خوداوندٚ حوضور و اون اَمٚرَه اوسه کوده کی اونَ فوگوردأنیم.»
14 پٚس لوط دفأتن بوشؤ و خو دؤخترأنٚ نأمزودأنَ بوگفته: «دٚس بٚجونبأنید! شهرٚ جَا جیویزید، چونکی خوداوند اونَ خأیه فوگوردأنٚه!» ولی اَ گب اوشأنٚ رِه مسخره بأمؤ.
15 فردأیی صُبٚ دٚم، او دوتأ فٚرٚشته لوطَ بوگفتٚده: «دٚس بٚجونبأن! تی زنأی و تی دوتأ دؤخترَ کی اَیَه ایسأده اوسأن و تأ دِئرَ نوبوسته جیویزأدن اگه نٚبه شومأنم اَ شهرٚ آدمأنٚ اَمرأ کی گونأ کونٚده هلأکَ بید.»
16 هوطؤ کی لوط معطلَ کودأندوبو او دوتأ مردأی اون و اونی زنأی و اونی دوتأ دؤخترٚ دسأنَ بیگیفتٚده، بٚبردٚده شهرٚ جَا بیرون ایتأ اَمنٚ جیگأ میأن، چونکی خوداوند اوشأنَ رحم بوکوده بو.
17 ایتأ جٚه او دوتأ مردأی لوطَ بوگفته: «شیمی جأنٚ نیجأت دٚئنٚ وأسی جیویزید و شیمی پوشتٚ سٚرم نیگأ نوکونید. بیشید کوهأنٚ میأن، چونکی اگه دشتی میأن بِئیسید حتم بٚدأرید کی میریدی.»
18 لوط جوأب بٚدأ: «اَی آقأ جأن، تٚرَه مینّت کونٚم اَطؤچی کأرَ اَمی جَا نوأخأستنید. 19 تو می حقٚ میأن خُبی بوکودی، می جأنَ نیجأت بٚدأیی و ایتأ پیله محبت مِرِه بوکودی. ولی نتأنم جیویزم کوهأنٚ میأن، چونکی ترسم پیشتر جٚه اَنکی فأرٚسٚم اویَه اَ بلأ می یقه‌یَ بیگیره و بیمیرم. 20 فأندرید اَ دیهأت چندر نیزدیک و کوچیک ایسٚه! اَطؤ نییٚه؟ پٚس وئألید بشم اویَه و اَمنیتٚ میأن بِئیسم.»
21 اون بوگفته: «خٚیلی خُب، تی خأهیشَ قوبیل کونٚم و او دیهأتَ فونگوردأنم. 22 پٚس دٚس بٚجونبأن! چونکی تأ او زمأت کی فأنرسِیی اویَه، نتأنم هیتأ کأر کودن.» هنٚ وأسی او دیهأتَ صوغر ینی «کوچیک» نأم بٚنأده.
23 آفتأب زِئندوبو کی لوط بوشؤ صوغرٚ میأن. 24 بأزون خوداوند شوأله بٚکشه گوگردَ آسمأنٚ جَا بوأرأنِه سدوم و عموره سٚر 25 و او دوتأ شهرَ تومأمٚ او دشتی میأن شهرأن و دیهأتأن و تومأم اویَه آدمأن و او جوروأجورٚ گیأیأنٚ اَمرأ همٚتأیَ جٚه بین بٚبرده. 26 ولی لوطٚ زنأی خو پوشتٚ سٚرَ فأندرسته و ایتأ سوتون جٚه نمک بوبوسته.
27 ایبرأهیم صُبٚ دٚمٚ رِه ویریشته و بوشؤ هو جیگأ ور کی اویَه خوداوند حوضور بٚپأ ایسأ بو. 28 اون سدوم و عموره شهرأن و او دشتی‌یَ فأندرسته و بیدِه کی هسأ کوره مأنستَن دود او شهرأنٚ جَا شوئؤندره بوجؤر.
29 او وخت کی خودا دشتی شهرأنَ کی لوط اونی میأن سأمأن دأشتی‌یَ جٚه بین بردأندوبو، ایبرأهیمٚ دوعأ جوأبَ بٚدأ و لوطَ مٚردنٚ وٚندٚه جَا کی او شهرأنَ خو دٚهٚنٚ میأن فأکشِندوبو، جیویزأنه.
لوط و اونی دؤخترأن
30 ولی لوط صوغرٚ میأن ایسأنٚ جَا بٚترسه. پٚس او جأیَ بٚنأ و بوشؤ، خو دوتأ دؤخترٚ اَمرأ بوشؤ کوهأنٚ میأن و ایتأ غأرٚ میأن بِئیسأ. 31 ایتأ روج لوطٚ پیله دؤختر خو خأخورَ بوگفته: «تومأمٚ اَ سأمأنٚ میأن ایتأ مردأی بیأفته نیبه کی اَمٚرَه بٚبره. اَمی پِئرم پور دِه بأقی نییٚه پیرَ بِه و دِه نٚتأنه ایتأ نتأج خو جَا بأقی بٚنه. 32 پٚس بیأ اونَ شرأب وأخورأنیم و اونی اَمرأ همخأب بیبیم و اَطؤیی اَمی پِئرٚ نتأجَ حیفظَ کونیم.» 33 پٚس هو شب اونَ مستَ کودٚد و پیله دؤختر خو پِئرٚ اَمرأ همخأب بوبوسته. ولی لوط خو دؤخترٚ خوفتن و ویرشتنٚ جَا وأخبدأرَ نوبوسته.
34 فردأیی صُبٚ دٚمٚ رِه، پیله دؤختر خو کوجه خأخورَ بوگفته: «من دیشب می پِئرٚ اَمرأ همخأب بوبوستم. بیأ کی ایمشبم ایوأردِه اونَ شرأب وأخورأنیم و اَیدفأرِه تو بوشو اونی اَمرأ همخأب بوبو کی اَطؤیی اَمی پِئرٚ جَا ایتأ نتأج بٚدأریم.» 35 پٚس او شب ایوأردِه اونَ مستَ کودٚد و کوجه‌دأنه دؤختر اونی اَمرأ بوخوفته. اَیدفأیٚم لوط اویدفأ مأنستَن هیچی نفأمسته. 36 اَطؤیی بوبوسته کی او دوتأ دؤختر خوشأنٚ پِئرٚ جَا شکم اوسأدٚد. 37 پیله دؤختر ایتأ پٚسر بٚزأ و اونَ موآب نأم بٚنأ. (موآبٚ قبیله اونی جَا سٚر بیگیفته بوبوسته.) 38 کوجه‌دأنه دؤخترم ایتأ پٚسر بٚزأ و اونی نأمَ بِن‌عمّی بٚنأ. (عمونٚ قبیله اونی جَا سٚر بیگیفته بوبوسته.)
The Gilaki Contemporary Bible is a Product of Transform Iran © 2024. All rights reserved. www.kelisayejame.org