3. Mose 17
17
Koy platsa, kay i firhe maredo venn
1O baro Devel penas ap o Mose: 2Pen ap o Aron oun leskre morsh čavende oun ap i tsele Israelitarya: Kava hi, hoy o baro Devel t'menge penell: 3-4Hako morsh dran o kheer Israel, kay kamell i gouroum, i bakro oder i bouzni te marell, hounte krell kova glan o voudar o Debleskro plarhteno kherestar, te vell ko firho o baro Debleske dino. Yob hounte krell kova gar ap i platsa, kay i menshe djivenn, vitar gar glan koy platsa. Te rikrell lo pes gar ap kova, anell lo rat ap peste har yek, kay i menshes marell. Savo mensho vell pale-čiddo oun nay djivell bouder gar mank peskre menshende.
5Bis kanna maran i Israelitarya pengre firhen vin ap o them. Kanna hounte anenn le len o baro Debleske glan o voudar leskro plarhteno kherestar pash o rashayeste. Oun kote venn le maredo, te rhan le len khetne glan o baro Debleste. 6O rashay lell ko rat oun vitsrell čomone lestar ap o baro Debleskri rhačepaskri, hoy glan o voudar leskro plarhteno kherestar tardo hi. Oun rhačrell o thulepen ko firhestar koy pre. Oun o lačo soungepen, hoy vell vin, soungell mishto o baro Debleste. 7I Israelitarya hounte marenn bouder kek firhen i bengenge, kolenge yon kanna gomme palla nashenn. Ap kova hounte rikrenn le pen, ninna lengre čavenge oun kolengre čavenge oun yaake doureder hako tsireske.
8Tou peness lenge: Hako morsh dran o kheer Israel, ninna hako vi-themari, kay mank t'mende djivell, kay kamell i firhes o baro Debleske te marell, sau firho, koleskro tselo mass rhačedo vell, oder sau firho, hoy rhan le khetne glan o baro Debleste, 9kova hounte anell les glan o voudar o Debleskro plarhteno kherestar, te vell lo kote o baro Debleske maredo. Koon kova gar krell, vell pale-čiddo oun nay djivell bouder gar mank peskre menshende.
Ma rhan rat!
10Hako Israelitari, ninna hako vi-themari, kay mank t'mende djivell, kay rat rhal, havo ninna hi, koleske sikrau miro doumo, oun krau, te djivell lo bouder gar mank mire menshende. 11An o rat hi o djipen. Oun me kamau, te vell lo ap i rhačepaskri anlo, te vell i doosh oun o pale-čiddo koova t'mendar krik lino. An o rat hi o djipen. Doleske lau leha i doosh oun o pale-čiddo krik. 12Doleske penom me ap i Israelitarya: Kek t'mendar rhal rat. Vitar kek vi-themari, kay mank t'mende djivell, rhal rat.
13Hako Israelitari oun hako vi-themari, kay taprell penge i divyo firho oder i čirklo, hoy yek nay rhal, hounte moukell leskro rat vin nashell ap i phoub oun čakrell čik koy pre. 14An o rat hi o djipen. Doleske penom me ap i Israelitarya: Ma rhan rat! Koon les rhal, vell pale-čiddo oun nay djivell bouder gar mank peskre menshende!
15Hakeno, kay rhal i firho, hoy meras oder moulo dandedo vas, kova hounte thovell pes oun peskre koola, oun ačell pale-čiddo, bis te vell rati. Koy pal hi lo pale erligo. Hi yek, te hi kova i Israelitari oder i vi-themari. 16Te thovell lo pes gar, vitar gar peskre koola, hounte hidjrell lo peskri phagi.
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.