3. Mose 18
18
Ma krenn vi-ladjedo koova!
1O baro Devel penas ap o Mose: 2Pen ap i Israelitarya: Me, o baro Devel, hom t'maro Devel. 3Ma djivenn yaake har i Egiptarya, an kolengro them djivan, vitar gar har kolla an o them Kanaan, kote kay t'men anau. Ma djivenn pal lengro koova. 4Pal miro čačepen hounte djivenn, oun krenn, hoy me t'mendar kamau. Me, o baro Devel, hom t'maro Devel. 5Doleske krenn, hoy me t'mendar kamau, oun djivenn pal miro čačepen. I mensho, kay rikrell pes ap kova, koles hi čačepah o djipen. Me hom o baro Devel. 6Kek t'mendar hounte sovell i djouvyah dran peskri familya. Kova penau me, o baro Devel.
7Tou sovess gar tiri dah, te aness kek ladj ap tiro dadeste. Yoy hi tiri day.
8Tou sovess gar i vavar romyah tiro dadestar, te aness kek ladj ap tiro dadeste.
9Tou sovess gar tiri phenyah, koy čay tiro dadestar oder tiri datar; hi yek te vas li bares an tiri familya oder an i vavar familya.
10Tou sovess gar i mit i čay tiro čavestar oder tiri čatar, te aness kek ladj ap toute.
11Tou sovess gar mit i čay tiro dadeskri romyatar. Yoy hi tiri pheen.
12Tou sovess gar tiri bibyah, koy pheen tiro dadestar. Yoy hi leskro ratestar.
13Tou sovess gar tiri bibyah, koy pheen tiri datar. Yoy hi lakro ratestar.
14Tou sovess gar i romyah tiro kakestar. Yoy hi tiri bibi.
15Tou sovess gar tiro čaveskri romyah.
16Tou sovess gar tiro phraleskri romyah, te aness kek ladj ap tiro phraleste.
17Tou sovess gar i djouvyah oun ninna mit lakri čay, oder lakro čaveskri čay oder lakri čakri čay. Kalla hi lakro ratestar. Kava vals i vi-ladjedo koova.
18Tou less gar i phenyat tiri romyatar, te vell li tiri douyti romni, yaake rah har tiri romni djivell.
19Tou sovess gar i djouvyah yaake rah har lat peskri djouvyakro koova hi.
20Tou sovess gar i romyah i vavarestar, te kress tout gar pale-čiddo.
21Tou rhačress kek tire čavendar o rhorheno debleske Molok. Sau koova sikrals, te hom me, tiro Devel, touke či moldo. Me hom o baro Devel!
22Kek morsh te sovell i vavar morsheha. I baro pale-čiddo koova hi sau kova.
23Kek morsh oun kek djouvel te sovell i firheha. Koon kova krell, krell pes pale-čiddo oun anell bari ladj ap peste. 24Ma krenn t'men sau koveha pale-čiddo! Kova lauter kras kol vavar menshe pale-čiddo, kolen me glan t'mende dran o them vin tradau. 25O tselo them vas koleha pale-čiddo kerdo. Me anau lengri doosh ap lende pale, oun krau, te venn kol menshe vin tradedo dran ko them, kay le djivenn.
26Doleske krenn kova, hoy me t'mendar kamau, oun djivenn pal miro čačepen, t'mer oun ninna ko vi-themari, kay mank t'mende djivell! Krenn kek savo pale-čiddo koova, 27hoy kolla kran, kay glan t'mende kate djivan oun o them pale-čiddo kran. 28Te krenn t'mer kava them ninna pale-čiddo, venn t'mer dran kava them vin tradedo har kol vavar menshe, kay glan t'mende kay his. 29Hakeno, koon sau pale-čiddo koova krell, vell infam, oun nay djivell bouder gar mank peskre menshende.
30Doleske, djivenn yaake har me t'menge penom! Ma krenn ko pale-čiddo koova, hoy kolla kran, kay glan t'mende kate his! Ma krenn t'men savo koveha pale-čiddo! Me, o baro Devel, hom t'maro Devel.
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.