Matiyu 22
22
Angmǝ a gerpo azaa ozǝnggǝ o amare
(Luk 14:15-24)
1Na Yeso kang beka ne angmǝ a gerpo na, 2“A era kedeya togomo ta shili kaa ogomo yende ooka wa eze kena ka wai ozǝnggǝ amare. 3Na wa tong azara wai kane rare aromo aaka a baale ne o ozǝnggǝ me, na aromo amea a baale ne neta deya ne.
4Na wa kang tongha azara wai yende nawa beka ne na, “Alena ka e bekaa andaaka a baale ne o ozǝnggǝ na, maa goro na ma core bena be lome be mate eena, epaolya ee yengha, amara ekeeya ane de.”
5“Na andaaka a belene o amare me ta bala nee ne, na komana ale o ale awai, ondo wa ale ara awai, aa ondo ale ba ara ejamane awai. 6O dangare one moke azara ame nane ole ne, a ne wong ne. 7Ogomo me wa munggi aa cak, na wa tong ana otesa ageza aa moole awai, na ne wong aromo me, aane ese apeng ame ka ola aa pat.
8Na wa bekaa azara awai na, ‘Amara ekeeya o amare me, aa andaaka a bele ne ta gwara ne de ne. 9Tareze na marona, apate ondooka e laka ee bekaa wai na wa de ara o zǝnggǝ o amare me.’ 10Na azara me ale na ne rare apate andaaka nee laka, ana edang kaa ana odera edang, nyimia na apanza ogiishi me ka ageng.
11“Aa nangka ogomo me wa lyǝ kawa laka ageng me, na wa laka ondo zora madibi ma ozǝnggǝ. 12Na wa pirkǝ wai na, ‘Oja, aa wiinia na ba lyǝ arakaana zora o amba madibi ma ozǝnggǝ ne?’ Na oromo me ta ama obeka eyapa ne.
13“Na ogomo me bekaa azara awai na, ‘Tera na taara ka tobona te wai, e tare wai a nyimi maring maa bo, ara aka ayo ruuzi ka ononza tuuni.’
14“O bena aromo acakea aa rare, aa aromo a baate aa zaka.’ ”
Be pirǝ azaa o arsaza emate makeke aa Kaisar
(Mar 12:13-17; Luk 20:20-26)
15Na maParisa gere orona ooka neyo moke kai aa nyimi angmǝ a kai. 16Na ne tong ana otare one ka aromo a Hiridus yende, na ne beka ana, “Ondo baala, te rose beka ana bo ondo baala epengngha, o kang baala komaname orona Ashili, ota zaka ondo ne, ba jeka komaname oyende a bo. 17Na beka aa ro epa eka ba laka, wa gwara te nya Kaisar emate makeke naa, na tana te nya nea?”
18Yeso ka rose ara aburu aaka aya anyong ane, naka bekaana, “Ying ana anyong aburu! Eya ka eya kedeya ong? 19“Worenna bemate beeka a arseze oma makeke mane.” Nane ca kai be dinari be me. 20Na Yeso pirkǝ nee na ‘Mainu ka leze le mana ba azaa benna?’
21Nane kabare kai na, “Ma Kaisar.”
Na Yeso bekaa nee na, “Na nya na Kaisar epa eka e Kaisar e, ee nya Ashili epa eka a Ashili e.” 22Nangka ne kona nyimi, na epa eme tere ne ukpwei, aane ale o ale one.
Be pirǝ azaa o era malo ogwǝ
(Mar 12:18-27; Luk 20:27-40)
23A lengme leme, na maSadukiya ka ne beyaana ata eere malo ogwǝ ne, na ne pirkǝ kai, 24nane bekana, ‘Mosa wa bekaa na oromo wa gbwǝ zora ayana, orone o wai cikǝ kaa kandaye kame ka ka ngmengze wai ayana.’#Otik 25:5. 25Arone sondaare zene aa nyimi oro. Obora wa ana ondaaye, nawa gbwi zora kena, na ondaadimǝ wai cikǝ kaa ondaaye me. 26Nyimia ondaadimǝ wai o leere, kaa o taaro, nyimia epame e ale a dukǝ pate one aa sondaare. 27O maare apat, na ondaye me ma wa gbwi. 28Na nannameena, aa lengme le o era malo ogbwǝ, wayo itǝ ondaaye mana a nyimi one, ka pate one nee cikǝ kaa wai?
29Na Yeso bekaa nee na, madoola maying ta orona ne, ka eta rose angmǝ Ashili ka awela ne, kangza eta rose legoone le Ashili ne. 30Lengme le o era malo ogbwǝ, o anza ondaye ta rene ne, aa onya ondaye kaa o oteze one a todo to rene ne, aza obena neyo kurǝ na atoma Ashili odera lepung aaza shili. 31Azaa o era malo o gbwǝ, eta ee tukǝ o soola epaeka Ashili a beke aying ne na? A bekaana, 32‘Mia Ashili a Ibraheng, Ashili a Ishaku, kaa Ashili a Yakubu.’#Osur 3:6. Ashilia a pate andaaka neya ka ebeene, ana o gbwizǝ tazane.”
33Nangka aromome ne kona nyimi, na epa eme tere ne ukpwei.
Makili ma okala dengdeng
(Mar 12:28-32; Luk 10:25-28)
34Nangka maParisa ne kone ana Yeso ka toza maSadukiya, nane gwaara tukpwei, 35ondo o baala angmǝ aaka Ashili a nya Mosa aa nyimi one, wa eze Yeso be pirǝ adorana wa cǝ kawa meke kai. 36Nawa bena, “Ondo o baala, oyeme kala ogongha a nyimi makili ma Mosa?”
37Na Yeso kabare wai na, “Yeme Ateokora Ashili au kaa pate lenyong leo, kaa pate ebeene o, ka opate madoola mau.”#Otik 6:5. 38Onna obora kawa kala aa gongha apate. 39Makili o leere ome kang ya na obora, ‘Yeme ondooka waya ating o na ukpwei o.’ 40Pate o baala o Mosa ka ana o beya angmǝ ka mawo ma Ashili, ma ya azaa makili ma leere maana.”
Be pirǝ azaa Almasipu
(Mar 12:35-37; Luk 20:41-44)
41Nangka maParisa ma yende ne kurkǝnǝng ara yende, na Yeso ka pirkǝ ne na, 42“Eya madoola maying aza Almasipu? Kai kena ka manaa?”
Nane kabare kai na, ‘Kena ka Daoda kai.’
43Na Yeso bekaane na, “Na a wiinia na Daoda beya angmǝ ka mawo ma Obere o Sangsang, na wa rare kai na ‘Ateokora’? Aa wa bekana,
44‘Ateokora wa beka aa Ateokora ong na,
“Cikǝ o ara o re ong,
seeka ma eke ana o nyana o,
aa tetau te tobona teo.” ’
45Na Daoda wa rara Almasipu na ‘Ateokora’, aa wiinia aaka itǝ kena ka wai? 46Ondo ta wa ama kabare a Yeso ne. O era a lengme leme, ondo ta wa kang ama o pirkǝ okai ne.
©️2022 Luke Initiative for Scripture Translation