Matiyu 21
21
Yeso ka lyǝ aa Urushalima
(Mar 12:1-11; Luk 19:28-40; Yoh 12:12-19)
1Nangka Yeso kaa atoma kai ne dukǝ kapeng ka Betapaji kamea ka amara ka Urushalima, ba kulǝ oyara o mati ma Zaitun, na Yeso ka tong atoma kai a leere, 2naka beka nee na, “Lyǝ na ba kapeng kaa niini ba izi oying. Ee lyǝ eyo laka kurungzǝ baa tera, ka kabana kame. Dinggǝ na e ka ecang. 3Ondo wa pirkǝ, ying e beka wai na, Ateokora ya yeme one. Wayo kuriyǝ ee aa rabokoro.”
4A ye nyimia adorana a panza epa eeka ondo beya angmǝ ka mawo ma Ashili Zakariya beke obena,
5“Ee bekaa kagala ka Sihiyona na,
laka, Ogomo oying waya zo deya ba ying!
Ondo o nata ukpwei wai,
Waya zaa kabana kurungzǝ.”#Zak 9:9.
6Na atoma Yeso ne ale, nane ye epaaka Yeso ka bekaa ne. 7Nane de kaa kurungzǝ ka kabana kame, nane nata ne madibi aa zaa one, a ka zale. 8Na aromo ba cak ne nata madibi mane ba zaa orona, aana ondo gera marane ma mati nane eese ba zaa orona. 9A okurkǝnǝng aromo ka neya teweno ba izi ka kai kaa andaaka neya dimǝ kai, nane ara angmelo aane beya na,
“Hosana Kena ka Daoda!
Okona oleba wa itǝ
o kando ko deya ba nyimi leze le Ateokora!
Hosana o Ashili!”#Sel 118:25-26.
10Nangka Yeso ka lyǝ baa nyimi Urushalima na pate apeng me a bitǝkǝrnu, aane beya naa, “Mana waana?”
11Na aromo aaka neya tare o Yeso bekaana, “Kanna kando ka o beya angmǝ ka mawo ma Ashili Yeso kamea ka surǝa Nazarat o makeke ma Galili.”
Yeso ka tarangga ana ejamane aa akwilǝ Ashili
(Mar 11:15-19; Luk 19:45-48; Yoh 2:13-22)
12Na Yeso ka lyǝ akwilǝ Ashili naka tarangga ana o lisǝzǝ kaa ana o eesa magogoro baa nyimi me, naka bitǝkǝri pate matara mana o saara emate me, kaa matara ma o lisǝsǝ egoma e akwilǝ. 13Naka bekaa nee na, “A wele obena,
‘Ayo rara akwilǝ ang aro beya angmǝ kaa Ashili,
na ying e kuriyǝ ai aro baasaza ana o tǝǝru aromo.’ ”#Irim 7:11.
14Na arǝ kaa agǝdǝ ne deya baa kai a nyimi akwilǝ Ashili naka womza ne. 15Nangka andaamoole magame ma Ashili, kaa ana o baala angmǝ aka Ashili a nya Mosa ne laka epa o tera ukpwei eeka ka eza, aa ayana yaa saba Ashili ba nyimi akwilǝ Ashili a ne beya na, “Hosana Kena ka Daoda!” Na ne kone oburǝ maleo. 16Nane bekaa kai na, “Oya konaza epaeka andaana ya beya me sang?
Na Yeso beka ne naa, “Ma kona, azaa nyimi eta rosa obena a wele na,
“Ba nyimi ongmǝ a abana ayana kaa akaa tata a asa,
boa baa ote ka ne saboo sang?#Sel 8:2.”
17Naka arnang kaa ne, aaka suri ba nyimi apeng me, naka ale ba Betanya, aaka more saname.
Yeso ka ye uti o ulǝ angmǝ
(Mar 11:12-14,20-24)
18Nangka ara a sane a kaya kurǝ ba nyimia apeng, na ekomo moke kai. 19Nangka ka laka uti o uli ba ting orona, naka ale ba uti me naka ta cǝ eyapa o uti me ne soona marane belle. Naka beka uti me na, “Otoo ya ayana kangza ne!” Na ongmere liizi na uti me wa waka.
20Nangka atoma kai ne laka nyimi, na epame e tere ne ukpwei nane bore be pirǝ na, “Eyaka uti uli na wa waka ba saseya?”
21Na Yeso ka kabare naka beka ne naa, “Eyang dongdong bele oying maganggang maame, eeya ka o eke lenyong ba Ashili, zora madoola ma yende, epaaka e mana uti uli ona, eya eto eza belle ne, eyo ama o beka ba oyara ona, era, ka o taru ba nyimi opong ogong, a wayo itǝ nyimi. 22Eeya ka o eke lenyong ba Ashili, pate epaaka e bosa ba Ashili eyo cǝ e.”
Aya masanggo azaa o bare o Yeso
(Mar 11:27-33; Luk 20:1-8)
23Nangka Yeso ka lyǝ ba nyimi akwilǝ Ashili, kaya aza obaala naname, na andaamoole magame ma Ashili, ka magonggong ma aromo nane deya kai ka be pirǝ na, “Ka legoone le mana oya eza magogoro maana? Kangza mana wa nyau legoone le me?”
24Na Yeso ka kabare naka bekaa na, “Mima eyang eza o ying be pirǝ. E kabareng, mima eyang bele oying ka legoone le mana ang eze magogoro maana. 25O batisma o Yohana, wa surǝ babaa? Ba zaa shili naa, ba aromoi?”
Nane dambaraza a tukpwei tone obena, “Te bekaana, wa surǝ shili, kayo bekaa aro na, na eyaka eta e kabare kaa kai ne?” 26Kangza te bekaana, “Wa surǝ ba aromo, teya kona boome be aromo, obena komana wa rose obena Yohana ondo beya angmǝ ka mawo ma Ashili wai.”
27Nane kabare Yeso na, “Teta rosa ne.”
Na Yeso beka ne naa, “Nyimia mima anta a bele oying ka legoone le mana ang ezeze magogoro maana ne.”
Angmǝ a gerpo azaa ayana leere
28“E laka nannia? Oromo yende wa zene kaa ayana leere andaleme. Nawa ale baa ka o bora, nawa beka kai na, “Kena kang ale ka o eza ogole ba ara o inabi. 29Na kena kame beka na, “Anta ale ne.” Nangka a rabokoro naka sara madoola, aaka ale. 30Na ate ame wa ale baa ka o leere kame, nawa beka kai epaaka wa beka a ka o bora. Na ka o leere bekaana, “Ma kona ate, eyang ale,” na kata ale ne.
31Ba nyimi ayana leere me mana wa ye epaeka ate me wa yeme?
Nane bekaana, “Ka o bora.”
Na Yeso bekaa nee na, “Eyang bele o ying epeng eme, ana o eesa emate e makeke kaa andaaye o lisǝzǝ apung ane neya kaana oying o lyǝ ba togomo ta Ashili. 32Obena Yohana o batisma wa de nawa wore ying orona o rere, neeta kabare ka wai ne. Ba zaa nyimi na ana o eesa emate makeke kaa andaaye o lisǝzǝ apung ane ne kabare ka wai, aa ying pate ka o laka enna, malo nyimi na eta kabare a pisǝ madinǝ maying ne.”
Angmǝ aa gerpo azaa ana ogole ara ka neye kaa araa buru
(Mar 12:1-12; Luk 20:9-19)
33“Angmǝ aa gerpo yendea aana kangza. Oromo yende wa zene ka waye kaa ara o inabi, nawa ringǝri ara me ka odarne, nawa kau le'o le noke ayana inabi a ara me, a kangza wa so odankee ona soola ara me. Malo nyimi nawa nya ana ogole yende lebose le ara me, a wa ale begere. 34Nangka awere o sende e inabi me wa ye, nawa tong azara wai baa ana ogole me kane embe epaaka e itǝ e wai baa ne.
35Na andaaka a bose ne ara me, ne meke azara me, nane ole o yende, aa ne wong o yende, aa ne teeze o taaro me. 36Nawa kang tongha azara yende, amea ne kala obora, na andaaka a bose ne ara me, nane ye ne epaeka ne ye ana obora name. 37Malo nyimi nawa tong kena ka wai baa ne, a wa eke obena, ‘Neyo laka o gongha kena kang.’
38Nangka andaaka a bose ne ara ame ne laka kena ka oromo me, nane bekaa tukpwei tone na, “Aha, kando kaana ekeeya ara me aya itǝ a kai. A te wongha kai adorana ara me itǝ a aro.” 39Na ne moke kai, aane tare kai ba malo o darne, nane wongha kai.
40O ara aana wa deya, eya wayo ya kaa andaaka a bose ne ara ogole me?”
41Nane beka kai na, “Wayo wongza ana anyong a buru me, awa bose ana ondo a ara me, andaaka neyo nyaza wai epaaka e itǝ e wai aa nyimi epa eeka ne cǝ.”
42Na Yeso beka ne naa, “Eta tukǝ kona epaaka a wele ba nyimi angmǝ Ashili sang? O bena,
“Lecale leeka ondo sowa wa nyana,
leya lee itǝ le o kala ee dang o sowa odo.
Onna o eza Ashilia wai,
Epa o tera ukpwei aa yizi aro.”#Sel 118:22-23.
43“Ba zaa nyimi eyang bele oying, ayo emba togomo ta Ashili ba ying, ka nya a aromo makeke ma yende amea neyo wore o cikǝ o rere. 44Ondooka wa rizi aza le cale leena, wayo poso. Aa ondooka le cale leme le taru ba zaa wai leyo nyanta wai naa ma'ena.”
45Nangka ana magame ma moole kaa maParisa ne kone angmǝ me, nane rose obena, kaya beya baa za onea. 46Na ne gere o moke okai, na boome ba aromo nara ne, obena pate aromo ne jeka kai ondo beya angmǝ kama mawo ma Ashili kai.
©️2022 Luke Initiative for Scripture Translation