ROM 8
8
Uraiŋ Mpiala mi Tijilo
1Hwuwayɛ go n-ndumwa-tụwụma mu zasaba ya iwɛ atwa na namɛ na amɛ Krast Jisus. 2Iwɛnɛ tu undwa Mpiala mu uraiŋ na namɛ na amɛ Krast Jisus u n rufwuji#8:2 u n rufwuji: Abayiburu oko hiɛŋ, u hi rufwuji, kwo kaa u tu rufwuji. nu undwa iwɛwɛ keeni una tu'wo. 3Undwa zasa ukpahiŋ, iwɛnɛ ta masha ma butugwumwa mu logwocenji uŋ, ibɛ po Agwatana tuba tumwanɛ Yɛu ibwɛ ikɛnyi ibwɛ na tu'waba tu na tu sụbɛ tu'waba tu tu ti iwɛwɛ, iwɛ iwɛwɛ kaa sasana. Ibɛ po bee peni iwɛwɛ n-ndumwa-tụwụma na amɛ tu'waba ta ata ta butugwumwa, 4iwɛ maa ugondu u tiririri Undwa ulwa na amɛ tu na njɛ shɛ iyi na masha ma butugwumwa, ama semi na Mpiala. 5Atwa na a nda iyi na masha ma butugwumwa, e shiyeni masha ma butugwumwa eshe, maa a na nda iyi nɛ masha ma butugwumwa ma jala, ama atwa na a nda iyi na Mpiala, e shiyeni iyi Mpiala eshe maa a na nda iyi nɛ Mpiala ma jala. 6Iwɛnɛ po ahaŋsa masha ma butugwumwa a shɛ tu'wo, ama ahaŋsa Mpiala a shɛ uraiŋ keeni amɛ-olom. 7Iwɛnɛ po ahaŋsa masha ma butugwumwa o imo Agwatana, iwɛnɛ ti yaa shɛ shɛ Undwa wa Agwatana 'yajɛ ụhwada ahaŋsa ata; masha ma ata kaa mi eri shi mo lubo Agwatana kwukwuŋ. 8Atwa na kaa a hwuga-unu masha ma butugwumwa, e eri shi a kwulana Agwatana kwukwuŋ.
9Ama yaa shɛ Mpiala ma Agwatana mu namɛ na amɛ hiŋ gom, asha shɛ masha ma butugwumwa mu ma hi 'yagaga ya o, asha semi Mpiala mu ma hi 'yagaga ya. Ama bụtụ be elele na zasa Mpiala mu Krast, asha bụtụ ata shɛ shɛ du bụtụ Krast o. 10Ama yaa shɛ ga Krast namɛ na amɛ hiŋ, asha okwo iwɛwɛ kwụnɛ tu'waba ti hiŋ, tiririri tuba ti zhɛ ta pana mpiala mi hiŋ uraiŋ.#8:10 tiririri tuba…pana mpiala mi hiŋ uraiŋ: Kwo kaa mpiala mi hiŋ mi zhɛ ma sha buumwa iwɛ tiririri. 11Yaa shɛ kaa Mpiala ma bụtụ na hicinjɛ Jisus no tu'wo mu namɛ na amɛ hiŋ, asha bụtụ ata na hicinjɛ Krast Jisus no tu'wo zhɛ ba pana tu'waba ti hiŋ tu na ti zhɛ to 'wo uraiŋ du tedure na Mpiala mu bwa mu na mu namɛ na amɛ hiŋ.#1 Kor 3:16
12A-miaụŋ-mo-bino mi na amɛ Krast, tɛ yɛ utashɛ, ama shɛ masha ma butugwumwa atɛ yɛ utashɛ ata maa tu na nda iyi nɛ masha ma ata ma butugwumwa ma jala o. 13Yaa shɛ tunama ti hiŋ ta nda iyi nɛ masha ma butugwumwa ma jala, asha hi zhɛ hio 'wo tilɛɛ. Ama yaa shɛ ahia kwụna ugondu na masha ma butugwumwa ma nda tedure nu Mpiala, asha nazhɛ ɛhi zhɛ hia 'yaga uraiŋ. 14Atwa elele na Mpiala ma Agwatana ma 'yagaga, aba shɛ miaụŋ ma Agwatana. 15Iwɛnɛ po shɛ mpiala mu na mi zhɛ ma hi pananana inyɛsɛ ehi leshiji o, semi Mpiala mu na mɛ tɛ njɛ miaụŋ, muba mi ti leneni maa tu na ugaga, maa ti nɛ hiɛŋ, Aba!#8:15 Aba Bishi! Tɛjɛshɛrɛga tu ko ti hiɛŋ, Aba. Egini Aba i shɛ Ada, nɛ yo mbisono ụmatụ u tikpɛm kpɛm na miaụŋ mi 'yajɛ ne bishi ba aba. Bishi! Muba ehi leshiji.#Mak 14:36; Gala 4:5-7 16Mpiala ma Agwatana ni ikɛnyi ibwɛ momo lonu tiseyida na mpiala mu tu maa tɛ shɛ miaụŋ ma Agwatana. 17Gana na atɛ shɛ miaụŋ ma Agwatana, asha atuba tɛ shɛ ayɛ-ogwu Agwatana na Krast. Yaa shɛ ata nda ụbaụta nu bwa gom, asha atuba du ti zhɛ ta 'yaga hwuŋ ụjɛrụma nu bwa.
Ụjɛrụma na Ɛɛ Zhɛ Ma Ti Kapɛshɛngana Hwuŋ
18N heŋshi maa ụbaụta na ata nda hwuwayɛ na aka ga, u te teni shi cɛŋ maa e menji uŋ nụ ụjɛrụma na ɛɛ zhɛ ma tu kapɛshɛngana hwuŋ o. 19Iyi elele nɛ Agwatana karɛ ya nda ashɛlatụ tugom iwɛ aka na Agwatana zhɛ a kapɛshɛnga hwuŋ miaụŋ mu bwa. 20Iyi elele nɛ kaa Agwatana karɛ, bi shileni iŋ tusukwutogwu, ama shɛ nu ukwulana ibɛ o, ama nu ukwulana bụtụ na shiri iŋ apata maa i na nda ashɛlatụ, #Umoz 3:17-19 21maa iyi elele nɛ Agwatana karɛ ni ikɛnyi ibɛ benengeni tijama to tufwoso, maa i teni tumama 'yaga tu ụjɛrụma miaụŋ ma Agwatana. 22Ti mepi maa iyi elele nɛ Agwatana karɛ yo ngwulo, yaa hwuga-ụngwụ gana ụngwụ tumata tutu taa hwayɛ. 23Shɛ gi iyi nɛ Agwatana karɛ kiri yo ngwulo, ta atuba na du ti 'yajɛ Mpiala gana upwaŋ uhiiŋ na Agwatana ti peni, to ngwulo du ni ikɛnyi tu, gana na ati 'yacɛ maa a tɛ njɛ miaụŋ#8:23 a tɛ njɛ miaụŋ mu bwa: Abayiburu oko zasa n-ndumwa ma ata o. mu bwa, ibɛ shɛ gana na maa e bicinji tu'waba tu tu.#2 Kor 5:2-4 24E ti bicinji tedure na ashɛlatụ, ama shɛ iyi nɛ atu kwubwa ata nda ya ashɛlatụ ibɛ o, gaaba ba nda hwuŋ ashɛlatụ iyi nɛ baa 'yagawaa? 25Ama yaa shɛ ata shɛlana iyi nɛ atu ta kwụbɛ shɛ, asha ti zhɛ ta ima-isɛbwɛ maa ta 'yaka iŋ.
26Gobwonu du Mpiala mo mbiyono tulwogogo tu tu. Ti mepi shi gana na i shɛ tilɛɛ maa ta nda adua o, ama Mpiala ni ikɛnyi ibwɛ ubwa ba 'walatagwụ Agwatana no ti'nyongongo tu na eti eri shi ta duma. 27Ama Agwatana na ba yalaga shɛmɛ sha atwa, ubwa mepi ahaŋsa Mpiala, ubwa kaa du ba 'walatagwụ Agwatana iwɛ atwa tijilo Agwatana, gana na teneni Agwatana cɛŋ. 28Ti mepi maa iyi elele ya nda ugondu zhiaaŋ maa i zhɛmanɛ atwa na o lubo Agwatana,#8:28 iyi elele ya nda ugondu zhiaaŋ maa i zhɛmanɛ atwa na o lubo Agwatana: Kwo kaa Agwatana a nda ugondu ni iyi elele maa i zhɛmanɛ atwa na o lubo bu, kwo kaa iyi elele ya nda ugondu zhiaaŋ na atwa na o lubo bu, iwɛ maa i shapɛ iyi nɛ zhɛ ya zhɛmana aŋ… aba shɛ atwa na baa suyanɛ gana na ta ahaŋsa na bee heŋshi namɛ. 29Atwa na Agwatana mwopwo cebe, aba du bee tileni swooŋ cebe, maa a njɛ aŋ ụsụbwa Yɛu ibwɛ, iwɛ maa tuba yɛu ɛtɛ ibwɛ i shɛ tumata ti hiiŋ na ashashɛ miaụŋ-mo-bino mu ofwugwo. 30Ama atwa na boo tulwonuo swooŋ cebe, aba du baa suyanɛ, atwa na baa suyanɛ, aba du bee peni n-ndumwa-zhɛ, atwa na kaa bee peni n-ndumwa-zhɛ, aba du bee peni ụjɛrụma.
Tulubo ta Agwatana tu na tu Namɛ na Amɛ Krast Jisus
31Asha imbe ɛti zhɛ ta duma ya iwɛ ijɛ kpaaaŋ? Yaa shɛ Agwatana namɛ no tu, asha gaaba eri ma tu sukakanaa? 32Agwatana na hebi shi Yɛu ibwɛ ikɛnyi ibwɛ, ama bi shepi bu bee peni iwe tu kpaaŋ, bi zha shɛ suu ma tu pana ya iyi elele arahaŋ nu bwa? 33Gaaba zhɛ ba suyana atwa na Agwatana teri ụshɛrɛyaa? Agwatana ubwa kaa zhɛ ba pana aŋ n-ndumwa-zhɛ. 34Gaaba zhɛ ba pana aŋ n-ndumwa-tụwụmaa? Ga Krast ubwa shɛ bụtụ na 'wi, shɛ inɛ ɛtɛ kiri o, ubwa du shɛ bụtụ na hiɛ, ubwa du kaa namɛ nu u'ala ubiye wa Agwatana baa 'walatagwụ bụ iwe tu. 35Asha gaaba zhɛ mo tu bogwu no tulubo tu Krastii? Ụbaụta suu, kwo ụngwụ-tụhwụga, kwo tɛshɛka, kwo imunɛ-tiya, kwo mohondo, kwo Abara-ne-ebe, kwo kaa utokwobi? 36Gana na te e 'nyeci, ɛɛ hiɛŋ.
Iwɛ bu aa ma tu kwụna taa ti iyi ge heri hwayɛ, aa tɛ rɛcɛ kaa gana agwụdụ na ɛɛ zhɛ a shɛla.#Shɛzu 44:22 37Awo! Tu lasụ ijɛ kpaaŋ tedure nu ukpahiŋ ụ bụtụ na utu lubi. 38Iwɛnɛ po ohwulu mi namɛ oko maa, okwo tu'wo, okwo uraiŋ, okwo atumwa-azuba, okwo egwominetu,#8:38 okwo egwominetu: Abayiburu oko hiɛŋ, okwo ehiu azuba, kwo kaa atumwa Ibiri, ono oko hiɛŋ, mpiala. okwo iyi nɛ namɛ hwuwayɛ, okwo iyi nɛ tee ci, okwo akpahiŋ, 39okwo ụnjɛswa, okwo me'ilwo, okwo inyɛ iyi nɛ aa karɛ, eri shi mo tu bogwu no tulubo ta Agwatana tu na tu namɛ na amɛ Krast Jisus Agwangwama tu o.
Rubassa Bible © Bible Society of Nigeria, 2008