ROM 7
7
Ụsụbwa ụ Tụmbụla
1A-miaụŋ-mo-bino mi na amɛ Krast, Ma duma iwɛ gɛ na atwa na mepi Undwa, hi mepi shi suu maa Undwa ubwa 'yajɛ ụhwada bụtụ na aka na tu baa ta shɛ Buumwa? 2Iwɛnɛ po Undwa umpi biyikwo na cɛnɛ no bwolo bwa, na aka na ta a ta shɛ Buumwa; ama yaa shɛ bwolo bwa 'wi, asha bu tufwurungwo nu ụhwada bwolo bwa. 3Yaa shɛ baa cɛnɛ binya bụtụ to bwolo bwa ta namɛ, ɛ zhɛ ɛ hiɛŋ bụ bɛnjɛ-bu-tuwɛle; ama yaa shɛ bwolo bwa 'wi, asha bu tufwurungwo nu ụhwada bwolo ata bwa, okwo baa cɛnɛ ya binya bụtụ, asha bɛ shɛ shɛ ya buwɛle o. 4A-miaụŋ-mo-bino mi na amɛ Krast, gana ata du, aa hiɛ njɛ maa hi 'weni Undwa iwɛnɛ ahi namɛ ya na amɛ tu'waba tu Krast. Hiɛ cɛnɛ ya binya bụtụ, ubwa shɛ bụtụ ata ɛɛ hicinjɛ no tu'wo, iwɛ maa ta ndana ya Agwatana uhwara. 5Aka na atu ta namɛ na masha ma butugwumwa, ukwedeyi ụwɛ iwɛwɛ unaa na dure Undwa ụ njɛ ugondu ni itwɛ tu'waba tu tu hwɛɛ, maa ta ndana tu'wo uhwara. 6Ama e tu rufwuji ya hwuwayɛ nu Undwa, iwɛnɛ te ti 'weni iyi nɛ ga tu untanganɛ la dimi, iwɛ maa ta nda ya iyi nu uraiŋ ufwo na shɛ una Mpiala, ama shɛ nu uraiŋ ụngwụshɛ na shɛ una ti'nyeci tu Undwa ụngwụshɛ o.
Undwa ni Iwɛwɛ
7Asha imbe ɛti tɛ zhɛ tɛ hiɛŋ yaa? Asha Undwa shɛ iyi iwɛwɛ suu? Awo. Shɛ gana ata kwukwuŋ! Ama yaa ga shɛ shɛ iwɛ Undwa, N nge mepi shi iyi nɛ shɛ iwɛwɛ o. Yaa shɛ Undwa ga jɛmɛ shɛ maa, Ta nda isɛbwɛngwɛ o, N nge mepi shi yebe maa isɛbwɛngwɛ i shɛ iyi iwɛ o.#Ụban 20:17; Undwa 5:21 8Ama aka na ti iwɛwɛ gwushiji ya ohwolu tedure unu-tupana, ibɛ po yɛɛ ishicinjɛ ya iyiri isɛbwɛngwɛ ganɛgɛnɛ na amɛ mi. Yaa shɛ Undwa ga zasaba, iwɛwɛ gɛ zhɛ ya sha iyi nɛ 'wi. 9Ama aka oko namba la Ngaa shɛ Buumwa uzawa Undwa, ama aka na tu unu-tupana zhajɛ ya, ibɛ po iwɛwɛ hiananɛ, Ngee 'wi ya tuba. 10Unu-tupana we ebe ga shɛ wa 'waŋnɛ uraiŋ, Ngoo to ya ugbe maa ubwa 'waŋnɛ ya tu'wo. 11Ama gana na ti iwɛwɛ gwushiji ohwolu tedure nu unu-tupana, ibɛ po wee n helekeci, waa n kwụnɛ ya.#Umoz 3:13
12Okwo ti yaa shɛ gana ata, Undwa shɛ iyi tijilo, unu-tupana kaa du ụ shɛ iyi tijilo sasana, u teni cɛŋ, waa zhɛmɛ kaa. 13Asha iyi ebe ibiye ibɛ suu i n shapɛrɛganɛ ya tu'wo? Awo. Shɛ gana ata kwukwuŋ! Ama iwɛwɛ njɛ iŋ, i banɛ kaa caakwụ maa iwɛwɛ njɛ iŋ, gana na ti yaa n ndanɛ ya uhwaŋna tu'wo tedure ni ijebe ibiye, ibɛ tuba iwɛwɛ dure ya unu-tupana yaa shɛ ya iwɛwɛ nɛ hwuleji ugombo.
Undwa Iwɛwɛ nu Undwa wa Agwatana wa Twa Ifelu na Shɛmɛ sha Atɛtanɛ-rishe
14Ti mepi maa Undwa shɛ iyi mpiala, Ngaa shɛ tuba inɛ butugwumwa na ee sengeni tijama ti iwɛwɛ. 15Iwɛbɛ po Ngee eshiciji shi ya iyi nɛ Ama nda, shɛ iyi nɛ n kwụlanɛ Ama nda o, ama iyi nɛ Ngee imi ibɛ Ama nda ya.#Gala 5:17 16Ama yaa shɛ Ama nda iyi nɛ n kwụlanɛ shɛ, asha N leni maa Undwa shɛ iyi ibiye. 17Ama hwuwayɛ, shɛ Gamba ma nda iŋ o, ama iwɛwɛ nɛ jɛjɛ na amɛ mi ibɛ ya nda iŋ. 18M mepi maa iyi ibiye okwo ike zasaba na amɛ mi na shɛ amɛ butugwumwa o. Iwɛnɛ po i n kwụlanɛ na amɛ mi maa Ma nda iyi ibiye, ama maa ma nda ya ijɛ ɛtɛ ibiye i zasa eshe o. 19Iyi ibiye nɛ i n kwụlanɛ maa ma nda, shɛ ibɛ Ama nda ya o, ama iyi iwɛ nɛ n kwụlanɛ shɛ tɛnda ibɛ Ama nda ya. 20Yaa shɛ Ama nda iyi nɛ n kwụlanɛ shɛ, asha shɛ Gamba ma nda iŋ o, asha iwɛwɛ ɛtɛ namɛ na amɛ mi ibɛ ya nda iŋ.
21N to ya ugbe maa undwa ubwa wa nda iŋ, maa aka na Ama jala maa ma nda iyi ibiye, iyi iwɛ ibɛ mo n tono ya ni i'ɛlɛ. 22Ma nda unyasa nu Undwa wa Agwatana tebiye tebiye tutu uce amɛ mi hwɛɛ. 23Ama N kwụbɛ ya tuba undwa unya ni itwɛ tu'waba ti mi hwɛɛ, unaa na wa jasa ujasa nu undwa wa ahaŋsa mi, na kaa ma n zarɛga gana bụtụ na undwa iwɛwɛ nɛ namɛ ni itwɛ tu'waba ti mi hwɛɛ 'imɛ gana bụtụ na ee shiyeni nu umwono-tishi. 24Oo Bụtụ ba amɛ-tụhaŋtụ Ngaa shɛ o! Gaaba zhɛ ma n la na tu'waba tu ga to tu'woo? 25Agwatana ubwa shɛ ba a'walụ tedure ni izeci Jisus Krast Agwangwama tu! Gamba ni ikɛnyi mi Ma ndana Undwa wa Agwatana iyi na ahaŋsa mi, ama masha mi ma butugwumwa tuba ma ndana undwa iwɛwɛ iyi.
Rubassa Bible © Bible Society of Nigeria, 2008