ROME-TE 6
6
Sina le Jesu tawh Thawna
1Tua ahile bang i gen ding vuoi? Hepina a khan thei nadingin mawna bawlbawl ding i hi uh amah? 2Bawlbawl buong lo e! Mawna thu-a a sisa eite in bangci bangin tua mawna sungah hing thei lai ding i hi uh ahei? 3Khris Jesu sungah a ki-baptize sa eite zosie pen ama’ sina sungah zong a ki-baptize sa i hi lamtah thei lo na hi uh amah? 4Tua ahi ziehin sina-ah i ki-baptize ziehin ama tawh a kivuiton i hi vua, tuaci’n Pa’ vanglietna tawh misite lah panin Khris ang thawkia ma bangin eite zong hinna tha-ah i hin thei nading uh ahi hi.#Col 2:12
5Azieh pen a sina sungah ama tawh pum khat i suo leh, a thawkiana sungah zong ama tawh pum khat i suoh tahtah ding hi. 6Eite in mawna pumpi kisusie-in mawna sungah sal tanga i op nawn lo nadingin Khris tawh singlamte tungah i milui uh kikhailia zo hi, ci thu i thei uhi. 7Bangzieh ahei cile a sisa mi khat popo pen mawna pana a suohta zo ahi ta hi. 8Ahi vangin Jesu tawh i siton zo uleh ama tawh zong i hington ding hi, ci thu i um uhi. 9Bangzieh ahei cile misite lah pana a thokia Khris pen si ngai nawn lo ding hi, ci thu i thei hi; sina in zong ama tungah thu a nei thei nawn sih ding hi. 10Ama’ thuoh sina pen mawna thu-ah a kimang den ding khatvei sina hi a, ahi vangin ama’ hinna pen Pasien adinga hing ahi hi. 11Tuaci’n noma mama zong mawna lamah si-in Pasien lamah Jesu Khris ziehin a hinga na kingaisut ding uh ahi hi.
12Tua ahi ziehin a si thei na pumpi sung vuah na tahsa uh’ deina ang zuisah thei ahi mawna in thu neisah sih un. 13Na pumpi nate uh gitlona vanzah#6:13 Ahi sihle “galhiemte” dingin mawna-ah na pie nawn sih unlen, sina pan tho-in hinna a ngasa mite bangin dihna vanzah#6:13 Ahi sihle “galhiemte “ dingin Pasien tungah na pumpi uh’ nate na piezaw un. 14Bangzieh ahei cile thukham nei-ah na om nawn sih vua, hepina nei-ah om zo ta na hi ziehun note tungah mawna in thu a nei nawn sih ding hi.
Dihna’ Silate
15Tua ahile bang himawh ahei? Thukham nei-ah om nawn loin hepina nei-ah om ta i hi ziehin eite in mawna i bawl nading vuoi mah? Bawl nawn buong lo e! 16Sila thumangte bangin mi khatpo kungah noma mama na kipieh uleh tua a thu na man pa uh’ sila na hi pai ta vua, sina ang tut mawna sila ahi a, dihna ang tut thumanna sila ahi zongin, khat zawzaw’ sila na hi lam thei lo na hi uh amah? 17Ahi vangin nidang lai-in mawna sila ahi ngai note in lungsim tahpi tawh na tung vua ang ki-apsa thuhilnate na man zo tah ziehun Pasien kungah nuom thu i tut uhi. 18Note pen mawna panin suohta-in dihna’ sila na hi ta uhi. 19Na tahsa hindan uh a zawngkhal ziehin mihing’ ham banga kang gen ahi hi. Bangzieh ahei cile nidang lai-in siengtho lona le gitlona a bawl semsem dingin na pumpi nate na pieh bang lien ma-un, tuaci’n tu-in a siengtho hinkhuo adingin dihtanna lamah sal bangin na pumpi nate na pie un.
20Mawna’ sila na hi lai-un dihna tawh kisai thu-ah a suohta na hi uhi. 21Tua ahile tulai taha na zumpi uh nate panin bang phattuomna nga na hi uh ahei? Tua nate’ tawpna lampi khu sina ahi hi. 22Hizongle tu-in ahile mawna panin suohta-in Pasien’ sila na hi ta uhi. Note in na nga uh phattuomna in sienthona hi a, lam tawpna khu kumtawn hinna ahi hi. 23Azieh pen mawna’ thaman in sina hi a, ahi vangin Pasien ei’ hlawnpieh letsong ahile Topa Jesu Khris sunga a om kumtawn hinna ahi hi.
Zo Bible © Bible Society of Myanmar, 2018.