1 CORINTH 15
15
Khris’ Thawkiana
1Tu-in sanggamte aw, note kunga kang gen, note in zong na sansa ule kiptaha na dinpisa uh lungdamna thute na phawkia ding uh ka dei hi. 2Keima in na kung vua kang gen thute note in hoitaha na tuhkip nah uleh lungdamna thu tungtawnin gupna nga na hi vua, tua ahi sihle na upna uh a mawhna ahi hi.
3Bangzieh ahei cile a thupi masa penin keima in ka sansa kang hopsawn thu in tami ahi hi: Lai Siengtho in a gen ma bangin eite’ mawna tangin Khris in sina thuoh a,#Isa 53:5-12 4ama kivui-in Lai Siengtho in a gen bangin a ni thum ni-in thokia a,#Late 16:8-10; Mat 12:40; Sawl 2:24-32 5Peter tungah kilahin tua ciengin sawm le nite kungah kilah hi.#Luk 24:34, 36; Mat 28:16-17; Mrk 16:14; Jhn 20:19 6Tua ciengin sanggam za nga sanga a tamzawte tungah thakhatin kilah a, tuate lahah pawlkhat a si#15:6 Gk “kimu zo” zo tah vangun a tamzaw in ei hinpi lai uhi. 7Tua ciengin James kungah ama kilah a, tua ciengin sawltahpite zosie kungah zong kilah hi. 8A nukhia penin a hun cing lopi-a a suoh nausen tawh a kibang keima kungah ang kilah hi.#Sawl 9:3-6 9Bangzieh ahei cile kei pen sawltahpite lahah a gina lo pen ka hi a, Pasien’ hlattuom pawlpi ka bawlsiet ziehin sawltahpi ci dingin zong a kilawm ka hi sih hi.#Sawl 8:3 10Ahi vangin Pasien’ hepina ziehin kei pen ka hi bang ka hi a, ama in kei tunga ei pieh a hepina pen a mawhna suoh lo hi. Tuale mahin amate khatpo sangin zong nasep ka hakat zaw a, - tua khu kei sep hi sih nanle - keima ei ompi Pasien’ hepina in a sep ahi hi. 11Tua ahile keima ka hi a, amate ahi zongin tua bangin thu ka hil vua, note in zong tua bang ma-in na um uhi.
Misite Thawkiana
12Tu-in sina panin Khris thokia zo hi, ci-in kihil zo ahile no pawlkhat in bangci dan a misite’ thawkiana om lo hi, ci thei na hi uh ahei? 13Misite thawkiana om lo hi leh Khris zong a kithosah lo hi ding hi; 14Khris a kithosah lo khat hi poma leh ka thugenna uh a mawhna suoh ding a, na upna uzong a mawhna ma suoh ding hi. 15Misite thokia lo hi, ci thu a man tahpi leh Pasien in Khris zong a thosah lo ahi hi. Pasien in sina panin Khris thosahkia zo hi, ci-in teci ka pan ziehun kote nangawn zong Pasien thu’ a man lopi-a genin ei kimu ding hi. 16Bangzieh ahei cile misite thokia lo hi leh Khris zong a thokia lo hi ding hi. 17Khris a thokia lo hi leh na upna uh a thawn hi ding a, na mawna sung vua omlai na hi ding uhi. 18Tua ciengin Khris sunga a sisa#15:18 Gk “kimu zo” mite zong a mangthai sieng ahi ta uhi. 19Khris sungah tami hinkhuo ading beha lametna nei i hi uleh mi zosie lahah a hepihuoi pen i hi ding uhi.
20Hinanle sina panin Khris thokia tahtah zo a, a sisa#15:20 Gk “kimu zo” mite lah panin ga masa pen ahi ta hi. 21Azieh pen mi khat ziehin sina a tun ma bangin mi khat tungtawn ma-in misite thawkiana a tung hi. 22Bangzieh ahei cile Adam sungah mi zosie a si bangin Khris sungah mi zosie kihingsah ding hi. 23Hizongle a hun ciet uh zui-in hi ding hi: Khris ahile ga masa pen hi a, ama ang peikia ciengin Khris-a’ teng a hingkia ding uhi. 24Tua zaw ciengin tawpna#15:24 Ahi sihle “tua ciengin tawlngah hun tung ding a” hun ang tung ding a, ama in vaihawmte zosie, thuneite zosie, le vanglietna zosie a suhsiet zaw ciengin Pa Pasien kungah kumpi gam a ap ding hi. 25Bangzieh ahei cile ama in a galte zosie a keng nei-ah a koi masangsie vai a hawm ding hi.#Late 110:1 26A kisusie ding gal nukhia pen sina ahi hi. 27Azieh pen, “Pasien in ama’ keng nei-ah sil bangkim koi zo hi,” kici hi. Hinanle, “Ama’ keng nei-ah sil bangkim kikoi zo hi,” a ci ciengin Khris’ nei-ah sil bangkim a koi Pasien a huom khah lo lam kitel hi.#Late 8:6 28Khris’ khut nei-ah sil bangkim a kikoi ciengin Pasien pen sil bangkim ah sil bangkim ahi thei nadingin a khut nei-a sil bangkim a koi Pasien’ khut nei-ah Tapa mama zong a om ding hi.
29Tua hi sih mawh leh misite tanga ki-baptize mite in bang a bawl ta ding vuoi? Misite a thokia lo hi leh amate tangin bang dingin mite ki-baptize uh ahei?
30Tuale bang dingin ko le ko a nai simin kizausah den uh ka hei? 31Sanggamte aw, note ziehin i Topa Jesu Khris sungah ka kisahthei zakhat ma bangin nisimin sina a thuohthuoh ka hi hi! 32Mihing lametna maimai tawh hi leh Ephesus khuo-a gamsate tawh ka kibawna bang phattuompi leltah ding ka hei? Misite kithosah lo hi leh,
“Zing cienga si ding i hi tah ziehun
kineh kidawn va vui,” i ci lel ding uhi.#Isa 22:13
33Mi kisolsah sih un:
“Kigoppi hoi lo in opdan hoite siesah hi.”
34Hoitahin thu ngaisun pha unlen na maw nawn sih un; bangzieh ahei cile mi kimkhat in Pasien thu a thei sih uhi. Keima in na maizum nading vua kang gen ahi hi.
A Thokia Pumpi
35Ahi vangin mi pawlkhatte in, “Misite bangci danin ang thokia ding uh ahei? Bangci pumpi tawh ang tho ding uh ahei?” ci-in ang dong ding uhi. 36Mimaw pa! Na khaici tu pen a si phot sih leh a hing thei sih hi. 37Tua na tu khaici khu ang po ding pen ahi sih a, mangbu hile, adang khatpo hile a tang tahtah na tuzaw hi. 38Ahi vangin ama’ teelsa bangin Pasien in a kung posah a, khaici namciet ah ama’ kung ciet a pie hi. 39Sa zosie zong a kibangkim sih a, mihing sa, ganhing sa, va sa, nga sa, ci bangin a nam tuomtuom a om hi. 40Van pumpite om a, lei pumpite zong a om hi, ahi vangin van pumpite’ thupina nam khat hi a, lei’ pumpite’ thupina a tuom khat ahi hi. 41Ni in thupina nam khat nei a, hlapi in thupina a tuom khat nei-in, aasite in zong a tuom khat ma nei uhi; a tahtahin ci leih aasi khat le khat zong a thupina kilamdang hi.
42Misite thawkiana zong tua ma bang ahi hi. A kitu pen a sie thei hi a, a thokia pen a sie thei lo ahi hi. 43A melsie-in kitu a, a mel hoi-in ang thokia hi. A thanemin kitu a, a vanglienin ang thokia hi. 44Tahsa pumpi kitu a, hla pumpi-in ang thokia hi. Tahsa pumpi om ahile hla pumpi zong a om hi. 45Tua ahi ciengin, “Mi masa Adam pen hinna a nei mi khat ang suoh hi,” ci-in kigiel hi; hizongle a nukhia Adam pen hinna a pie hlagau a suoh hi.#Pien 2:7 46Ahi vangin hla pumpi om masa lo a, tahsa pumpi om masa-in tua ciengin hla pumpi a om ahi na bo hi. 47Mi masapen pa leitung pan ahi a, leivui tawh kibawl mi ahi hi; a nina pa pen vantung pan#15:47 Adang tang laibute ah “Topa” kibelap hi. ahi hi. 48Leivui-a kisiem mite pen leivui pana kisiem pa ma tawh kibang a, van mite pen vantung pana ang peipa ma tawh kibang hi. 49Eite in leivui-a kibawl mihing mel i puoh ma bangin vanmi mel zong i puo ding uhi.
50Sanggamte aw, na kung vua kang gennop pen tami thu ahi hi: Tahsa le sisan in Pasien’ manggam a luo thei sih a, a kisie theite in a kisie thei lote a luo thei sih hi.
51Ngai un, thuthuh khat kang gen ding hi! Eite zosie a si#15:51 Gk “kimu” sieng ding i hi sih vua, 52pengkul nukhia pen ang gin ciengin mitphet kal bano khat sungin i unpi-un i kikhel sieng ding uhi. Azieh pen pengkul ang ging ding a, a sisa mite a sie thei nawn lo dingin ang tho ding a, eite i kikhel ding uhi.#1Thes 4:15-17 53Bangzieh ahei cile tami a sie thei pumpi in siet thei lona sil ta ding a, tami a si thei pumpi in zong si thei lona sil ta ding hi. 54Tami a sie thei pumpi in siet thei lona silin, tami a si thei pumpi in si thei lona a sil ciengin,
“Guol zawna sungah sina kival tum zo hi,”#Isa 25:8
55“Sina aw, na gu hei-ah a om ta a,
sina aw, na guolzawna hei-ah a om ta ahei?”
ci-a a kigielsa thu ang tangtung ding hi.#Hos 13:14
56Sina gu in mawna hi a, mawna’ vanglietna in thukham ahi hi. 57Ahi vangin i Topa Jesu Khris tungtawna guolzawna ei pie Pasien tungah lungdam i ko hi.
58Tua ahi ziehin kang itte aw,#15:58 Gk “kang it sanggamte aw” kiptahin dingin kilawh sih unlen, note in Topa sunga na nasepna uh a mawhna a hi lo lam thei na hi ziehun Topa’ nasepna ah a hoi thei penin ma na pang zing un.
Zo Bible © Bible Society of Myanmar, 2018.