Johanes 18
18
Jesus woat faustjenomen
1Aus Jesus dit jesajcht haud, jinkj hee met siene Jinja rut äwa däm Bach (Riefa) Kidron, wua een Goaden wia, en däm hee un siene Jinja nenn jinjen. 2Oba uk Judas, dee am verod, wist de Städ, wiels Jesus sikj doa foaken met siene Jinja vesaumeld. 3Aus Judas daut Schoowa (Soldoten un Tempelwajchta) un vonne Huagapriesta un Farisäa Deena jekjräajen haud, kjemt hee doa han met Latoarns un Fachlen un Jewäaren. 4Oba Jesus, dee aules wist, waut äwa am komen wudd (sull), jinkj rut (an entjäajen) un säd to an: Wäm sieekj jie? 5See auntwuaden am: Jesus, dän Nazarena. Jesus säd to an: Ekj sie et! Oba uk Judas, dee am verod, stunt bie an. 6Aus hee to an säd: Ekj sie et, trocken see sikj trigj un follen oppe Ieed. 7Donn fruach hee an noch emol: Wäm sieekj jie? Oba see säden: Jesus, dän Nazarena. 8Jesus auntwuad: Ekj ha junt jesajcht, daut ekj daut sie; wan jie mie sieekjen, soo lot dise gonen; 9om dautet Wuat erfelt wort, daut hee säd: Von dee, dee du mie jejäft hast, ha ekj kjeenem veloaren. 10Simon Petrus oba, dee een Schwieet haud, trock daut rut un schluach dän Huagapriesta sien Kjnajcht un heiwd am daut rajchte Ua auf. Däm Kjnajcht sien Nomen wia Malchus. 11Donn säd Jesus to Petrus: Stäakj daut Schwieet enne Schajcht. Dän Drunk, däm mie mien Voda jejäft haft, sull ekj dän nich drinkjen?
Jesus woat von Anas utjefroacht - Petrus velicht daut, daut hee Jesus kjant
12Daut Schoowa (eene groote Schoa Mana / Soldoten un Tempelwajchta) un de Bowaschta un de Juden äare Deena naumen Jesus un bungen am; 13un leiden am ieescht no Anas, dan hee wia Kaifas sien Schwiavoda, dee daut Joa Huagapriesta wia. 14Daut wia Kaifas, dee, de Juden däm Rot jeef, dautet bäta wia, daut een Mensch fa daut Volkj stoawen sull.
15Oba Simon Petrus foljd Jesus un de aundra Jinja. Dis Jinja wia däm Huagenpriesta bekaunt un jinkj met Jesus nenn em Huagenpriesta sien Hoff. 16Oba Petrus stunt buten aune Däa. Donn jinkj de aundra Jinja, dee däm Huagenpriesta bekaunt wia, rut un räd met de Däarenwajchtarin un brocht Petrus nenn. 17Donn säd de Deenarin, de Däarenwajchtarin, to Petrus: Best du nich uk eena von disem Mensch siene Jinja? Hee säd: Ekj sie et nich. 18Oba doa stunden de Kjnajchts un de Deena, dee een Kolenfia jemoakt hauden, wiels et kolt wia, un woamden sikj; oba Petrus stunt uk bie an un woamd sikj.
19De Huagapriesta fruach Jesus no (äwa) siene Jinja, un no (äwa) siene Lia. 20Jesus auntwuad am: Ekj ha openboa to de Welt jerät; ekj ha emma enne Sienagogen un em Tempel jelieet, wua aule Juden toopkomen, un em Jeheemen ha ekj nuscht jerät; 21waut frajchst du mie? Froag dee, dee doa jehieet, waut ekj to an jerät ha; kjikj, dise weeten, waut ekj jesajcht ha. 22Oba aus hee dit säd, jeef eena von de Deena, dee doabie stunt, Jesus eent oppe Bak un säd: Soo auntwuatst du däm Huagenpriesta? 23Jesus auntwuad am: Wan ekj orrajcht jerät ha, soo jeff Zeichnis von däm Iebel (Orrajcht doonen); oba wan rajcht, wuarom schleist du mie? 24Anas haud am jebungen no Kaifas, dän Huagenpriesta, jeschekjt.
25Oba Simon Petrus stunt un woamd sikj. Doa säden see to am: Best du nich uk eena von siene Jinja? Hee luach un säd: Ekj sie et nich. 26Eena von däm Huagapriesta siene Kjnajchts säd, dee een Vewaunta aun däm wia, däm Petrus daut Ua aufjeheift haud: Sach ekj die nich bie am em Goaden? 27Doa luach Petrus wada; un plazlich kjreid de Hon.
Jesus woat von Pilatus utjefroacht
28See leiden Jesus von Kaifas nom Aumthus (Rechthus); oba daut wia tiedich zemorjes. See jinjen nich nenn em Aumthus, om daut see sikj nich veonreinjen, oba daut Passamol äten kunnen. 29Donn kaum Pilatus rut no an un säd: waut fa eene Aunkloag brinj (ha) jie jäajen disem Mensch? 30See auntwuaden un säden to am: Wan disa nich een Vebräakja wia, wudd wie am die nich jebrocht haben. 31Doa säd Pilatus to an: Nämt jie am un recht am no junem Jesaz. De Juden säden to am: Daut es ons nich erlaubt, wäm doot to moaken; 32om dautet Wuat Jesus erfelt wudd, daut hee säd, handiedent, waut fa eenen Doot hee stoawen sull.
33Pilatus jinkj donn wada em Aumthus nenn un roopt Jesus un säd to am: Best du de Kjennich äwa de Juden? 34Jesus auntwuad [am]: Sajchst du dit ut die selfst, ooda ha die aundre von mie jesajcht? 35Pilatus auntwuad: Sie ekj dan een Jud? Diene Nazion un de Huagapriesta ha die mie äwajäft; waut hast du jedonen? 36Jesus auntwuad: Mien Rikj es nich von dise Welt; wan mien Rikj von dise Welt wia, dan hauden miene Deena jekjamft, om daut ekj nich aune Juden utjeleewat wort; nu oba es mien Rikj nich von hia (dise Welt). 37Donn säd Pilatus to am: Aulsoo du best een Kjennich? Jesus auntwuad: Du sajchst et, daut ekj een Kjennich sie. Ekj sie doatoo jebuaren un doatoo enne Welt jekomen, om daut ekj de Woarheit Zeichnis jäw. Jiedra dee ute Woarheit es, hieet miene Stemm. 38Pilatus säd to am: Waut es Woarheit? Aus hee daut jesajcht haud, jinkj hee wada rut no de Juden un säd to an: Ekj finj kjeene Schult aun am; 39oba jie ha eene Jewanheit, daut ekj junt aum Passa eenen loos jäw. Well jie nu, daut ekj junt dän Kjennich äwa de Juden loos jäw? 40Donn schrieejen see wada un säden: Nich disem, oba Barabas! Barabas oba wia een Reiba.
© SW-Radio e.V.