Johanes 17
17
Jesus bät fa siene Jinja daut Huagenpriestaliche Jebäd
1Dit räd Jesus un hoof siene Uagen opp nom Himmel un säd: Voda, de Stund es jekomen; veharlich dienen Sän, om daut dien Sän die veharlicht. 2Soo aus du am Vollmacht jejäft hast äwa aulet Fleesch, om daut hee aulem, dee du am jejäft hast, eewjet Läwen jeft. 3Oba dit es daut eewje Läwen, daut see die, dän auleen woaren Gott, un däm du jeschekjt hast, Jesus Christus erkjanen. 4Ekj ha die oppe Ieed veharlicht; daut Woakj ha ekj vollbrocht, daut du mie jejäft hast, daut ekj daut doonen sull. 5Un nu veharlich du, Voda, mie bie die selfst met dee Harlichkjeit, dee ekj bie die haud, ea de Welt wia.
6Ekj ha dien Nomen jeopenboat de Menschen, dee du mie ute Welt jeefst. Dee wieren diene, un mie hast du dee jejäft, un see ha dien Wuat jehoolen (bewoat). 7Nu ha see erkjant, daut aules, waut du mie jejäft hast, von die es (kjemt); 8dan de Wieed, dee du mie jejäft hast, hab ekj an jejäft, un see ha dee aunjenomen un woarhauft erkjant, daut ekj von die utjegonen sie, un ha jejleeft, daut du mie jeschekjt hast.
9Ekj bedd fa an; ekj bedd nich fa de Welt, oba fa dee, dee du mie jejäft hast, dan see sent diene. 10(Un aules, waut mient es, es dient, un waut dient es, es mient) un ekj sie en an veharlicht. 11Un ekj sie nich mea enne Welt, un dise sent enne Welt, un ekj kom no die. Heilja Voda! Bewoa dee en dienen Nomen, dee du mie jejäft hast, om daut see eent sent, soo aus wie (eent sent). 12Aus ekj bie an wia, bewoad ekj an en dienen Nomen, dee du mie jejäft hast; un ekj ha dee bewoat (Sechaheit jeschenkjt), un kjeena von an es veloaren, buta de Sän de Vedoawnis, om daut de Schreft erfelt woat. 13Oba nu kom ekj no die; un dit räd ekj enne Welt, om daut see miene Freid vollkomen en sikj haben. 14Ekj ha an dien Wuat jejäft, un de Welt haft an jehaust, wiels see nich vonne Welt sent, soo aus uk ekj nich vonne Welt sie. 15Ekj bedd nich, daut du an ute Welt wajchnemst, oba daut du an bewoascht ver däm Beesen (Soton, Diewel, beesa Find). 16See sent nich vonne Welt, soo aus uk ekj nich vonne Welt sie. 17Heilj an enne Woarheit; dien Wuat es Woarheit. 18Soo aus du mie enne Welt jeschekjt hast, soo ha uk ekj an enne Welt jeschekjt; 19un ekj heilj mie selfst fa an, om daut uk see Jeheilichte sent enne (derch) Woarheit.
20Oba ekj bedd nich auleen fa dise, oba uk fa dee, dee doa derch äa Wuat aun mie jleewen; 21om daut see aula eent sent, soo aus du, Voda, en mie un ekj en die, om daut uk see en ons eent sent, doamet de Welt jleeft, daut du mie jeschekjt hast. 22Un de Harlichkjeit, dee du mie jejäft hast, ha ekj an jejäft, om daut see eent sent, soo aus wie eent sent; 23ekj en an un du en mie, om daut see en eent vollstendich (volkomen) sent, [un] daut de Welt erkjant, daut du mie jeschekjt un an leef hast, soo aus du mie leef hast.
24Voda, ekj well, daut dee, dee du mie jejäft hast, uk bie mie sent, wua ekj sie, doamet see miene Harlichkjeit seenen, dee du mie jejäft hast, dan du hast mie jeleeft ea de Weltgrunt jelajcht wia. 25Jerajchta Voda! De Welt haft die nich erkjant; oba ekj ha die erkjant, un dise ha erkjant, daut du mie jeschekjt hast. 26Un ekj ha an met dienem Nomen bekaunt jemoakt, un woa am bekaunt moaken, om daut de Leew, met dee du mie jeleeft hast, en an es un ekj en an.
© SW-Radio e.V.