Паччагьлугъар-2 22
22
Давудди гъапӀу тярифнан мяъли
1Давудди РАББИЙИЗ гьаму гафар, РАББИЙИ думу чан вари душмнарин хиларихьан ва Саулин хилхьан азад гъапӀиган, мяълийиинди гъапнийи. 2Дугъу гъапнийи:
РАББИ – йиз гъарз,
ижмишин йиз
ва узу къутармиш гъапӀур;
3Заанур йиз – дагъ йиз,
Дугъахь узу жин хьуз йишв абгурза,
Думу – йиз гъалхан
ва узу уьрхрур, йиз гъала,
Думу – узу жин шлу йишв
ва узу къутармиш апӀрур;
Уву узу гуж тувбахьан гъюрхюнва.
4РАББИЙИЗ ккарагурза,
тярифназ лайикьлуриз,
ва йиз душмнарихьан
къутармиш хьидиза.
5Аьжлин лепйир илтӀикӀнийи узлан гургутум,
талафвалин селлери узуз гучӀ ккапӀнийи.
6Тму дюнʼяйин зунжрар илдижнийи узлан
ва аьжлин чулари гъидиржнийи.
7Йиз бедбахтвалиъ узу РАББИЙИЗ дих гъапӀнийза:
узу йиз Заануриз ккарагнийза.
Чан ибадатханайиан Дугъаз йиз сес гъеебхьну;
йиз гьарай Дугъан ибарихъна хъубкьну.
8ГукӀни гъабхьнийи жил, гъутӀубчӀвнийи,
заварин дибар гъиришвнийи,
ГукӀни гъахьнийи,
гьаз гъапиш Дугъак хъял кубчӀвнийи.
9Кум утӀубччвнийи
Дугъан хъюхънин ппулариан,
вариубгру цӀа – ушвниан Дугъан,
ктахьуйи Дугъкан ургру аржлар.
10Дугъу завар арццнийи, ва Думу гъафнийи,
ликарикк – кӀару амсар.
11Думу херувимдиин деънийи ва гъитӀирхнийи,
Думу микӀлан хлинццариин гьавайиъ уьрхнийи.
12МучӀували ккаънийи Учв, чарчликкси,
илтӀикӀнийи Чаллан мархьлин амсар.
13Дугъан улихь хьайи аквнакан
цӀа кайи аржлар дижи шуйи.
14РАББИЙИ хъухърумар гъапӀу заварилан;
Заанури Чан сес улупну.
15Дугъу Чан чӀимрар деетну
ва душмнар гъарагъну,
Кьюркьлин цӀа деебтну –
ва дурар дагъитмиш гъапӀну.
16Думуган гьюлин деринвал ачмиш гъахьну
ва гъяцӀал гъахьну жилин бинйир
РАББИЙИ тягьна йивувалиан,
Дугъан хъюхънин ппуларин гужли илнаан.
17Ягълишнаан Думу узухьнади алахъну;
Дугъу узу дерин штариан адагъну.
18Дугъу узу узутӀан
гизаф кьувватлу кьудратлу душмнихьан,
узу дяркънукьан даккнидарихьан
азад гъапӀну.
19Йиз бедбахтвалин йигъан
дурар узʼина алжагънийи,
Амма РАББИ йиз даягъ вуйиз.
20Дугъу узу ачухъ йишваз адаънийи,
Дугъу узу азад гъапӀнийи,
гьаз гъапиш узу
Думу рази апӀрур вуза ву.
21РАББИЙИ узуз йиз дугъривализ ва вафалувализ лигну тувну,
йиз хиларин марццивализ лигну пешкеш гъапӀну,
22узу РАББИЙИН къанундин рякъяр
уьрхюри гъахьунза,
ва, йиз Заанурихьан гьидицну,
писвал гъапӀундарза аьхир.
23Дугъан вари къанунар йиз улихь хьа;
узу Дугъан буйругъарилан улдучӀвундарза.
24Узу Дугъан улихь нукьсан ктрур вуйза
ва жвув гунагьдихьан уьрхюйза.
25РАББИЙИ узуз йиз дугъривализ ва вафалувализ,
Дугъан уларихь марццишназ лигну тувну.
26Уву вафалу вуйирихъди
вафалу вува,
Нукьсан ктрурихъди
Уву нукьсан ктарди гъахурва,
27марццирихъди –
марцциди,
Фендигар вуйирихъди –
дугъан аьмалдарвализ лигну.
28Уву бахтсузар къутармиш апӀурва,
Хъа Яв лигуб дамагъ кайидариин ал,
дурар асккан апӀбан бадали.
29Уву – йиз чирагъ,
РАББИЙИ йиз мучӀувал аку апӀуру.
30Яв кюмекниинди
узу кьушум дагъитмиш апӀурза,
йиз Заанурихъди
душмандин шагьрин цалʼина за шулза.
31Заанурин рякъ тягьна ктруб ву,
Худайин гаф ву марцциб.
Дугъахь жин хьуз йишв абгруриз
гьарсариз гъалхан ву Думу.
32Фуж ву Заанур, РАББИТӀАН?
Ва фуж ву гъарз, ихь ЗаануртӀан?
33Заанур – йиз жин шлу мюгькам йишв,
ва Дугъу йиз рякъ дюз вуйиб апӀуру.
34Дугъу йиз ликар диши миршран ликарси апӀуру
ва узуз гъалибвалар тувру.
35Дугъу йиз хилариз дяви апӀуз улупуру,
гьаци вуйиган дурари кемшрин чӀимир биржуру.
36Уву узуз Яв къутармишʼвалин гъалхан тувунва,
Яв рягьимди йиз ад за апӀуру.
37Уву узу азадди лицуз гъитурва,
йиз ликар хътрарсбан бадали.
38Узу йиз душмнарихъ хъчӀарккунза
ва дурар терг гъапӀунза,
узу кьяляхъ илдицундарза,
дурар тӀанкь дарапӀдикьан гагьди.
39Узу гъивунза дурариз, гъачархьунза дурар,
ва дурарихьан сарун гъудужвуз хьибдар;
йиз ликарикк дахьну дурар.
40Уву узуз дяви апӀуз кьувват тувунва;
узуз аьксиди удучӀвдар йиз ликарикк ккирчунва.
41Душмнар Уву узухьинди кьялди илтӀикӀунва,
ва узу дяркънукьан даккнидар тӀанкь гъапӀунза.
42Дурари за апӀуйи чпин лигуб,
амма фужкӀа адайи дурар къутармиш апӀуз –
РАББИЙИЗ ккарагуйи,
амма Дугъу дурариз жаваб тувундайи.
43Узу дурар биширугси гъаркӀунза;
узу дурар, кючейин батӀурси, хътӀиршунза.
44Уву йиз халкь аьксиди удучӀвбахьан
узу азад гъапӀунва;
Уву узу жара халкьаринра
аьхюрди гъюрхюнва.
Узуз муганайиз аьгъдру халкьари
узуз гъуллугъ апӀура.
45Жара юрдарин адмийири
йиз улихь лукӀʼвал улупуру;
узкан анжагъ гъеебхьубси,
дурар мютӀюгъ шулу.
46Дурарин варидин рюгь гъюбгъну,
ва дурар, гукӀунди,
чпин гъалйириан удучӀвуру.
47Гьарган чӀиви РАББИ!
Шюкюр ибшри йиз гъарзуз!
Адлу ишри йиз Заанур,
йиз къутармишʼвалин гъарз!
48Думу – узхъанди кьисас алдабгъру Заанур,
узуз халкьар мютӀюгъ апӀрур
49ва узу йиз душмнарихьан азад апӀрур.
Уву узуз къаршу вуйидариин узу за гъапӀунва,
пис адмийирихьан узу къутармиш гъапӀунва.
50Гьаддиз лигну жара халкьарин арайиъ
яв ад апӀидиза, РАББИ;
Яв ччвурнан тяриф
мяълийиинди пидиза.
Чан паччагьдиз Дугъу
аьхю гъалибвалар пешкеш апӀуру
51ва Чав ччим кадатнайи Давуддиз
ва дугъан тухумдиз
аьсрариъ ужʼвал гьапӀру.
© Институт перевода Библии, 2010, 2013, 2016, 2018, 2023