Паччагьлугъар-2 21
21
Саулин наслариз жаза тувувал
1Давуддин паччагьвалин вахтна шубуд йисан хъади-хъади гаш абхъу, ва Давуд дидин гьякьнаан РАББИЙИХЬНА илтӀикӀу. РАББИЙИ гъапнийи:
– Му Саулиз ва ифдин шил хъайи дугъан тухумдиз лигну ву. Му дугъу Гивон шагьрин агьалйир аьжлин хлиз тувбаз лигну ву.
2Паччагьди Гивон шагьрин агьалйириз дих ва дурарихъди гафар-чӀалар гъапӀнийи. Гивон шагьрин агьалйир Израилиз дахил шулдайи, дурар аморей халкьдикан гъуздар вуйи; израилари дурариз рягьим апӀуз ху гъапӀнийи, хъа Саул, Израилихъан ва Ягьудайихъан юкӀв убгури, дурар тӀанкь апӀуз чалашмиш гъахьнийи. 3Давудди Гивон шагьрин агьалйирихьан гьерху:
– Учву бадали фу апӀуза? РАББИЙИН девлетназ, Чан халкьдиз, учву ужʼвал ккун апӀбан бадали, Саулин тухмин тахсир фтиинди илдипуза?
4Гивон шагьрин агьалйири дугъаз жаваб туву:
– Учуз Саулихьан ясана дугъан тухумдихьан я арс, я гъизил лазим дарчуз, ва учуз Израилиъ фужкӀа аьжалин хлиз тувуз ихтияр адарчуз.
– Узу учвуз фу дапӀну ккундучвуз? – гьерху Давудди.
5Дурари паччагьдиз жаваб туву:
– Учу тӀанкь апӀури гъахьи ва, учуз Израилин жилариин йишв дархьбан бадали, учу талаф апӀуз кьаст гъапӀу касдикан кӀуруш, 6гъит дугъан насларикан учухьна, РАББИЙИН улихь РАББИЙИ ктагъу Саулин Гивайиъ йивну йикӀбан ва адмийириз рякъюз керхбан бадали, ургур адми жили тяфа туври.
Ва паччагьди гъапи:
– Узу дурар учвухьна тувдиза.
7Давудди Мефи-Бошетдиз, Юнатандин бализ, Саулин хтулиз, рягьим гъапӀну. Дугъу думу ляхин чан ва Юнатандин, Саулин балин, арайиъ РАББИЙИН улихь гъабхьи ху тувувалин хатурназ лигну, гъапӀнийи. 8Амма паччагьди Айяйин риш Рицпайи Саулиз гъахи кьюр бай, Армони ва Мефи-Бошет ва Мехола шагьриан вуйи Верзиллийин бай Адриэлуйиз Саулин риш Меравди гъахи хьур бай гъадагънийи. 9Дугъу дурар Гивон шагьрин агьалйирихьна тувну, Гивондиан вуйидари дурар дагъдиин РАББИЙИН улихь йивну гъакӀнийи ва адмийириз рякъюз керхнийи. Вари ургбирра сатӀиди гъакӀнийи. Дурар аьжлин хлиз мухан иган убгуз хъюгъру садпи йигъари тувнийи.
10Айяйин риш Рицпайи ирин парча гъадабгънийи ва чаз гъарзʼин ккипнийи. Иган убгуз ккебгъхъанмина тап завариан дурарин жанариина мархь убгъайизкьан дугъу дурарик йигъну жакьвари, хъа йишвну чӀурдин гьяйванатари кучуз гъитурдайи. 11Рицпайи, Айяйин шуру, Саулин ашнайи, гъапӀубдикан Давуддиз гъапиган, 12думу гъушу, ва паччагьди Галааддин Явешдин агьалйирихьан Саулин ва дугъан бай Юнатандин кӀурбар гъадагъу. Дурари кӀурбар Гилбоайиъ филистимари Саулиз йивбан кьяляхъ адашна бай дариан гъизигу Бет-Шеандиъ майдандилан жиниди гъурхнийи. 13Давудди Саулин ва дугъан бай Юнатандин кӀурбар гъурхнийи, хъа дариан дизигнайидарин кӀурбар уч гъапӀнийи.
14Саулин ва дугъан бай Юнатандин кӀурбар Вениаминдин жилиин али Целайиъ Саулин адаш Кишдин гюмбетдиъ фаракьат гъапӀнийи, ва паччагьди амур гъапӀуб вари тамам гъапӀнийи. Дидин кьяляхъ Заанури уьлкейин гьякьнаан ккарагбар кьабул гъапнийи.
Филистимарихъди дявйир
15Ва хъана филистимарин ва Израилин арайиъ дяви гъабхьнийи. Давуд чан адмийирихъди дявдиз гъушнийи. Дурари филистимарихъди дяви гъапӀну, ва Давуд бизар гъахьнийи. 16Хъа Ишби-Беновди, рефаимарин#21:16 Рефаимар: зурба жанар хъайи инсанар гъахьну. тухмарикан сари, чан жидайин кемшрин кӀакӀнаъ шубудварж шекел#21:16 Шубудварж шекел: тахминан 3,5 килограмм. гъагъ айири ва цӀийи тур ккибтӀнайири, чав Давуд йивну йикӀурза, гъапнийи. 17Амма Авишай, Церуяйин бай, Давуддиз кюмекназ гъафнийи; думу филистимжвувʼин алархьнийи, ва дугъу думу йивну гъакӀнийи. Думуган Давуддин адмийири дугъаз ху гъапӀнийи ва гъапнийи:
– Израилин чирагъ ктӀутӀубшвбан бадали, уву гьич саб вахтнара сарун учухъди сатӀиди дявдиз гъидарва.
18Саб вахтналан филистимарихъди Гобайиъ цӀийи дяви гъабхьнийи. Думуган Хуша тухумдиан вуйи Сивхайи рефаимарин насларикан сар вуйи Саф йивну гъакӀнийи.
19Гобайиъ филистимарихъди гъабхьи жара дявдиъ Вифлеемдиан вуйи ир убхру уста Иаирин бай Элхананди Голиафдин чве йивну гъакӀнийи, Голиафдин чвуччвун жида ир убхру дуркьарин гакӀулсиб вуди гъабхьнийи.
20Гъатдиъ гъабхьи сабсана дявдин вахтна зурба жан хъайи, гьарсаб хилʼин йирхьуб тӀуб али ва гьарсаб ликриин йирхьуб муркул али фуж-вуш сар адми ади гъахьнийи. Думура рефаимарин насларикан вуди гъахьну. 21Думу Израилик кялхъруган, Давуддин чве Шимайин бай вуйи Юнатанди думу йивну гъакӀнийи.
22Дурар юкьридра Гъатдиъ рефаимарин насларикан вуйи ва Давуддин ва дугъан адмийирин хиллан гъушнийи.
© Институт перевода Библии, 2010, 2013, 2016, 2018, 2023