Паччагьлугъар-2 18
18
Давуд дявдиз гьязур хьувал
1Давудди чахъди хъайи адмийирилан ул илбицнийи ва дурариина агъзур эскриз ва варж эскриз амур апӀрудар тяйин гъапӀнийи.
2Давудди кьушмар гьаънийи – шубубдикан саб пай Юав кӀулиъ ади, шубубдикан саб пай Церуяйин бай, Юавдин чве Авишай кӀулиъ ади, ва шубубдикан саб пай Гъатдиан вуйи Иттай кӀулиъ ади. Паччагьди эскрариз гъапнийи:
– Узура учвухъди сатӀиди дявдиз гъягъидиза.
3Хъа адмийири гъапнийи:
– Мягъян; эгер учу гьергуз мажбур гъахьиш, дурари фикир тувидар. Эгер учкан гьятта гьацӀар гъийихишра, дурари фикир тувидар; хъа уву учкан йицӀуд агъзурин ккайир вува. Гьаци вуйиган, уву учуз шагьриан кюмек дапӀну ужуйи ву.
4Паччагьди жаваб тувнийи:
– Учвуз фици ужуйи рябкъюраш, гьаци апӀидиза.
Ва паччагь урнарихъ вари кьушум, варж-варж ва агъзур-агъзур кас айи дестйир, удубчӀвайиз дийигънийи.
5Паччагьди Юавдиз, Авишайиз ва Иттайиз амур гъапӀнийи:
– Йиз хатирназ йиз бай Авессаломдиз хатӀа хьуз мигъитанай.
Авессаломдин гьякьнаан паччагьди женгнан аьхюдарикан гьарсариз фици амур апӀуйиш, вари эскрариз гъеебхьнийи.
Авессалом талаф хьувал
6Кьушум, израиларихъди дяви апӀбан бадали, хутӀлиз удубчӀвнийи, ва дяви Ефраимдин ярквраъ гъабхьнийи. 7Душваъ Давуддин адмийири израиларин кьушум дагъитмиш гъапӀнийи, ва думу йигъан талаф гъахьидарин кьадар аьхюб гъабхьнийи – къад агъзур адми. 8Дяви вари аьтрафариъ гъябгъюрайи, ва думу йигъан туритӀан ярквру гизаф уьмрар талаф гъапӀнийи.
9Авессаломдиз Давуддин адмийирихъди гюрюшмиш хьуб алабхънийи. Думу чан гъятириин алийи, ва, гъятир аьхю мяхъюн гьарккантина жабгъурайиган, Авессаломдин кӀул дидин гъалин кюлеригъ гъябснийи. Думу учв гьавайиъ ккерхну гъузнийи, хъа думу алди гъабхьи гъятир душвхьан тинара гъажабгънийи. 10Давуддин адмийирикан сариз думу ляхин гъябкъиган, дугъу Юавдиз хабар дебкку:
– Узуз гьамусди мяхъюн гьарин гъалин кюлерик керхнайи Авессалом гъяркъюнзуз.
11Чаз дидкан хабар туву касдиз Юавди гъапи:
– Фу! Увуз думу гъяркъюнвуз? Уву гьадушвахь думу гьаз йивну гъакӀундарва? Узу шадвалиинди увуз арснан йицӀуб шекел#18:11 ЙицӀуб шекел: тахминан 115 грамм. ва эскрин чӀул пешкеш апӀидийза.
12Хъа думу касди жаваб туву:
– Йиз хиларизди гьятта агъзур шекел#18:12 Агъзур шекел: тахминан 11 килограмм. ивнийишра, узу паччагьдин балʼина хил за апӀидайза. Паччагьди увуз, Авишайиз ва Иттайиз «Йиз хатирназ йиз бай Авессаломдиз хатӀа хьуз мигъитанай» кӀури амур гъапӀган, учуз гъеебхьунчуз.
13Тмуну терефнаан, узу думу алчагъвалиинди йивну гъакӀнийиш, паччагьдихьан фукӀа жин апӀуз хьибдайи, хъа уву гъирагъдиъ гъузидийва.
14Юавди гъапи:
– Увухъди вахт адапӀуб лазим дарзуз.
Дугъу хлиз шубуб жида гъадагъу ва дурарикан саб Авессаломдин кӀваъ, думу гьеле чӀивиди, мяхъюн гьарикк ккерхну имиди, убччвну. 15Юавдин яракь хьади гъюрудар вуйи йицӀур касди Авессалом кьялаъ ау, дугъаз гъиву ва думу гъакӀи.
16Хъасин Юавди кӀарчнаан сесер гъапӀу ва дугъан эскрари израиларихъ хъергувал дебкку, гьаз гъапиш Юавди чан кьушум дебкку. 17Дурари Авессалом гъадагъу, думу ярквраъ аьхю ичӀазди гатӀархьу ва дугъʼин гъванарин зурба чӀвеъ гъапӀу. Гьадму вахтна вари израилар чпин хулариз гьергу.
18Гьеле учв чӀивиди имиди Авессаломди чаз гюмбетдин гъван гъадабгънийи ва думу Паччгьарин дерейиъ чаз дивнийи, гьаз гъапиш дугъу фикир апӀуйи: «Йиз ччвур ирснаъ уьбхюз узухъ бай хътарзухъ». Дугъу гъвандиз чан ччвур тувнийи, ва гъира#18:18 Гъира: китаб гъибикӀу вахтнакан кӀура. дидиз «Авессаломдин гюмбет» кӀуру.
Давуддиз Авессаломдин аьжликан хабар хуру
19Ахимаацди, Цадукдин бали, гъапи:
– Узуз паччагьдихьна жаргъуз ва РАББИЙИ думу чан душмнарин хилккан азад апӀбакан паччагьдиз хабар тувуз ихтияр тув.
20– Гъи хабар уву тувидарва, – гъапи Юавди. – Увхьан жара ражну хабрар тувуз хьибдивухьан, хъа гъи думу ляхин мапӀан, гьаз гъапиш паччагьдин бай дукӀна.
21Юавди чан гъараваш кушʼжвуваз гъапи:
– Гъарах, увуз гъябкъюбдикан паччагьдиз кидибт.
Кушʼжвуву Юавдиз икрам гъапӀу, ва думу гъажаргъу. 22Цадукдин бай Ахимаацди хъана Юавдиз гъапи:
– Чан шлуб ибшри, узуз кушʼжвуван кьяляхъди жаргъуз ихтияр тув.
Амма Юавди жаваб туву:
– Йиз бай, увуз гъягъюз гьаз ккундувуз? Мициб хабрихъ пешкеш гъадабгъидарва.
23Дугъу гъапи:
– Чан шлуб ибшри, узуз жаргъуз ккундузуз.
Ва Юавди гъапи:
– Жаргъ!
Ахимаац Ярдан дерейин рякъюъди гъажаргънийи, ва дугъу кушʼжви хътипнийи. 24Думу вахтна Давуд шагьрин чӀатан ва айтӀан урнарин арайиъ деънайи, гъаравул урнариин цалихъинди али гъваина удучӀвнийи. Улар за гъапӀган, дугъаз ялгъузди жаргъурайи адми гъяркънийи. 25Гъаравли паччагьдиз дих гъапӀнийи ва дугъаз дидкан хабар дебккнийи. Паччагьди гъапи:
– Эгер думу сар вуш, дугъак хабар кади дубхьну ккунду.
Адми багахь, багахь шулайи. 26Хъасин гъаравлиз жагъурайи жара адмира гъяркънийи, ва дугъу гъаравашдиз чӀигъ гъапӀнийи:
– Магьа, сарсана адми жаргъура!
Паччагьди гъапи:
– Дугъура хабар хуради дубхьну ккунду.
27Гъаравли гъапнийи:
– Узуз гьибгъразузки, сарпир Ахимаацси, Цадукдин байси, жаргъура.
– Думу ужур адми ву, – гъапи паччагьди. – Думу ужуб хабар хьади гъюра.
28Ва Ахимаацди, багахь гъахьиган, паччагьдиз чӀигъ гъапӀу:
– Вари ужуйи ву!
Дугъу паччагьдиз жилиинакьан икрам гъапӀнийи ва гъапнийи:
– Шюкюр ибшри РАББИЙИЗ, яв Заануриз! Йиз агъайиина, паччагьдиина чпин хилар за гъапӀу адмийир Дугъу увуз тувну.
29Паччагьди гьерху:
– Йиз бай Авессалом хатӀасузвалиъ айин?
Ахимаацди жаваб туву:
– Паччагьдин гъараваш Юав узу, яв гъараваш, хабар хьади гьауз гьязур шулайиган, душваъ аьхю гъалабулугъ гъябкъюнзуз, амма думу гьаз вуйиш, узуз аьгъдарзуз.
30Паччагьди гъапи:
– Гъирагъдихь дийигъ ва мушвахь ккилиг.
Думу гъирагъдиз гьудучӀву ва гьадушвахь дийигъу.
31Кушʼжви гъафи ва гъапи:
– Йиз агъа вуйи паччагь! Хъебехъ ужуб хабрихъ! РАББИЙИ гъи уву увуз къаршуди удучӀвдарихьан варидихьан азад гъапӀну.
32Паччагьди кушʼжвувхьан гьерху:
– Йиз бай Авессалом хатӀасузвалиъ айин?
Кушʼжвуву жаваб туву:
– Йиз агъа вуйи паччагьдин душмнариз ва увуз къаршуди удучӀвдариз варидиз гьадму живандиз гъабхьиб ибшри.
33Паччагь гъаркӀ гъахьнийи. Думу урнариин али хулаз гъушу ва гъишу. Гъягъруган, дугъу кӀуйи:
– Агь, йиз бай Авессалом! Йиз бай, йиз бай Авессалом! Узхьан яв ерина йикӀуз шуйиш, агь, Авессалом, йиз бай, йиз бай!
© Институт перевода Библии, 2010, 2013, 2016, 2018, 2023
Паччагьлугъар-2 18
18
Давуд дявдиз гьязур хьувал
1Давудди чахъди хъайи адмийирилан ул илбицнийи ва дурариина агъзур эскриз ва варж эскриз амур апӀрудар тяйин гъапӀнийи.
2Давудди кьушмар гьаънийи – шубубдикан саб пай Юав кӀулиъ ади, шубубдикан саб пай Церуяйин бай, Юавдин чве Авишай кӀулиъ ади, ва шубубдикан саб пай Гъатдиан вуйи Иттай кӀулиъ ади. Паччагьди эскрариз гъапнийи:
– Узура учвухъди сатӀиди дявдиз гъягъидиза.
3Хъа адмийири гъапнийи:
– Мягъян; эгер учу гьергуз мажбур гъахьиш, дурари фикир тувидар. Эгер учкан гьятта гьацӀар гъийихишра, дурари фикир тувидар; хъа уву учкан йицӀуд агъзурин ккайир вува. Гьаци вуйиган, уву учуз шагьриан кюмек дапӀну ужуйи ву.
4Паччагьди жаваб тувнийи:
– Учвуз фици ужуйи рябкъюраш, гьаци апӀидиза.
Ва паччагь урнарихъ вари кьушум, варж-варж ва агъзур-агъзур кас айи дестйир, удубчӀвайиз дийигънийи.
5Паччагьди Юавдиз, Авишайиз ва Иттайиз амур гъапӀнийи:
– Йиз хатирназ йиз бай Авессаломдиз хатӀа хьуз мигъитанай.
Авессаломдин гьякьнаан паччагьди женгнан аьхюдарикан гьарсариз фици амур апӀуйиш, вари эскрариз гъеебхьнийи.
Авессалом талаф хьувал
6Кьушум, израиларихъди дяви апӀбан бадали, хутӀлиз удубчӀвнийи, ва дяви Ефраимдин ярквраъ гъабхьнийи. 7Душваъ Давуддин адмийири израиларин кьушум дагъитмиш гъапӀнийи, ва думу йигъан талаф гъахьидарин кьадар аьхюб гъабхьнийи – къад агъзур адми. 8Дяви вари аьтрафариъ гъябгъюрайи, ва думу йигъан туритӀан ярквру гизаф уьмрар талаф гъапӀнийи.
9Авессаломдиз Давуддин адмийирихъди гюрюшмиш хьуб алабхънийи. Думу чан гъятириин алийи, ва, гъятир аьхю мяхъюн гьарккантина жабгъурайиган, Авессаломдин кӀул дидин гъалин кюлеригъ гъябснийи. Думу учв гьавайиъ ккерхну гъузнийи, хъа думу алди гъабхьи гъятир душвхьан тинара гъажабгънийи. 10Давуддин адмийирикан сариз думу ляхин гъябкъиган, дугъу Юавдиз хабар дебкку:
– Узуз гьамусди мяхъюн гьарин гъалин кюлерик керхнайи Авессалом гъяркъюнзуз.
11Чаз дидкан хабар туву касдиз Юавди гъапи:
– Фу! Увуз думу гъяркъюнвуз? Уву гьадушвахь думу гьаз йивну гъакӀундарва? Узу шадвалиинди увуз арснан йицӀуб шекел#18:11 ЙицӀуб шекел: тахминан 115 грамм. ва эскрин чӀул пешкеш апӀидийза.
12Хъа думу касди жаваб туву:
– Йиз хиларизди гьятта агъзур шекел#18:12 Агъзур шекел: тахминан 11 килограмм. ивнийишра, узу паччагьдин балʼина хил за апӀидайза. Паччагьди увуз, Авишайиз ва Иттайиз «Йиз хатирназ йиз бай Авессаломдиз хатӀа хьуз мигъитанай» кӀури амур гъапӀган, учуз гъеебхьунчуз.
13Тмуну терефнаан, узу думу алчагъвалиинди йивну гъакӀнийиш, паччагьдихьан фукӀа жин апӀуз хьибдайи, хъа уву гъирагъдиъ гъузидийва.
14Юавди гъапи:
– Увухъди вахт адапӀуб лазим дарзуз.
Дугъу хлиз шубуб жида гъадагъу ва дурарикан саб Авессаломдин кӀваъ, думу гьеле чӀивиди, мяхъюн гьарикк ккерхну имиди, убччвну. 15Юавдин яракь хьади гъюрудар вуйи йицӀур касди Авессалом кьялаъ ау, дугъаз гъиву ва думу гъакӀи.
16Хъасин Юавди кӀарчнаан сесер гъапӀу ва дугъан эскрари израиларихъ хъергувал дебкку, гьаз гъапиш Юавди чан кьушум дебкку. 17Дурари Авессалом гъадагъу, думу ярквраъ аьхю ичӀазди гатӀархьу ва дугъʼин гъванарин зурба чӀвеъ гъапӀу. Гьадму вахтна вари израилар чпин хулариз гьергу.
18Гьеле учв чӀивиди имиди Авессаломди чаз гюмбетдин гъван гъадабгънийи ва думу Паччгьарин дерейиъ чаз дивнийи, гьаз гъапиш дугъу фикир апӀуйи: «Йиз ччвур ирснаъ уьбхюз узухъ бай хътарзухъ». Дугъу гъвандиз чан ччвур тувнийи, ва гъира#18:18 Гъира: китаб гъибикӀу вахтнакан кӀура. дидиз «Авессаломдин гюмбет» кӀуру.
Давуддиз Авессаломдин аьжликан хабар хуру
19Ахимаацди, Цадукдин бали, гъапи:
– Узуз паччагьдихьна жаргъуз ва РАББИЙИ думу чан душмнарин хилккан азад апӀбакан паччагьдиз хабар тувуз ихтияр тув.
20– Гъи хабар уву тувидарва, – гъапи Юавди. – Увхьан жара ражну хабрар тувуз хьибдивухьан, хъа гъи думу ляхин мапӀан, гьаз гъапиш паччагьдин бай дукӀна.
21Юавди чан гъараваш кушʼжвуваз гъапи:
– Гъарах, увуз гъябкъюбдикан паччагьдиз кидибт.
Кушʼжвуву Юавдиз икрам гъапӀу, ва думу гъажаргъу. 22Цадукдин бай Ахимаацди хъана Юавдиз гъапи:
– Чан шлуб ибшри, узуз кушʼжвуван кьяляхъди жаргъуз ихтияр тув.
Амма Юавди жаваб туву:
– Йиз бай, увуз гъягъюз гьаз ккундувуз? Мициб хабрихъ пешкеш гъадабгъидарва.
23Дугъу гъапи:
– Чан шлуб ибшри, узуз жаргъуз ккундузуз.
Ва Юавди гъапи:
– Жаргъ!
Ахимаац Ярдан дерейин рякъюъди гъажаргънийи, ва дугъу кушʼжви хътипнийи. 24Думу вахтна Давуд шагьрин чӀатан ва айтӀан урнарин арайиъ деънайи, гъаравул урнариин цалихъинди али гъваина удучӀвнийи. Улар за гъапӀган, дугъаз ялгъузди жаргъурайи адми гъяркънийи. 25Гъаравли паччагьдиз дих гъапӀнийи ва дугъаз дидкан хабар дебккнийи. Паччагьди гъапи:
– Эгер думу сар вуш, дугъак хабар кади дубхьну ккунду.
Адми багахь, багахь шулайи. 26Хъасин гъаравлиз жагъурайи жара адмира гъяркънийи, ва дугъу гъаравашдиз чӀигъ гъапӀнийи:
– Магьа, сарсана адми жаргъура!
Паччагьди гъапи:
– Дугъура хабар хуради дубхьну ккунду.
27Гъаравли гъапнийи:
– Узуз гьибгъразузки, сарпир Ахимаацси, Цадукдин байси, жаргъура.
– Думу ужур адми ву, – гъапи паччагьди. – Думу ужуб хабар хьади гъюра.
28Ва Ахимаацди, багахь гъахьиган, паччагьдиз чӀигъ гъапӀу:
– Вари ужуйи ву!
Дугъу паччагьдиз жилиинакьан икрам гъапӀнийи ва гъапнийи:
– Шюкюр ибшри РАББИЙИЗ, яв Заануриз! Йиз агъайиина, паччагьдиина чпин хилар за гъапӀу адмийир Дугъу увуз тувну.
29Паччагьди гьерху:
– Йиз бай Авессалом хатӀасузвалиъ айин?
Ахимаацди жаваб туву:
– Паччагьдин гъараваш Юав узу, яв гъараваш, хабар хьади гьауз гьязур шулайиган, душваъ аьхю гъалабулугъ гъябкъюнзуз, амма думу гьаз вуйиш, узуз аьгъдарзуз.
30Паччагьди гъапи:
– Гъирагъдихь дийигъ ва мушвахь ккилиг.
Думу гъирагъдиз гьудучӀву ва гьадушвахь дийигъу.
31Кушʼжви гъафи ва гъапи:
– Йиз агъа вуйи паччагь! Хъебехъ ужуб хабрихъ! РАББИЙИ гъи уву увуз къаршуди удучӀвдарихьан варидихьан азад гъапӀну.
32Паччагьди кушʼжвувхьан гьерху:
– Йиз бай Авессалом хатӀасузвалиъ айин?
Кушʼжвуву жаваб туву:
– Йиз агъа вуйи паччагьдин душмнариз ва увуз къаршуди удучӀвдариз варидиз гьадму живандиз гъабхьиб ибшри.
33Паччагь гъаркӀ гъахьнийи. Думу урнариин али хулаз гъушу ва гъишу. Гъягъруган, дугъу кӀуйи:
– Агь, йиз бай Авессалом! Йиз бай, йиз бай Авессалом! Узхьан яв ерина йикӀуз шуйиш, агь, Авессалом, йиз бай, йиз бай!
© Институт перевода Библии, 2010, 2013, 2016, 2018, 2023