1 Kauleethaus 15
15
Khetos Kev Sawv Huv Qhovtuag Rovqaab Lug
1Zagnua, cov kwvtij, kuv xaav rov has kuas mej ncuntsoov txug Txuj Moo Zoo kws kuv tub qha rua mej, kws mej tau txais yuav hab tau ua rua mej txuj kev ntseeg sawv khovkho. 2Yog mej tuav rawv Txuj Moo Zoo kws kuv tau qha rua mej lawm, mej yeej yuav dlim mej lub txim, ntshe tsuas yog mej tsi ntseeg tag xwb.
3Tej lug kws kuv tau txais lug, kuv muab cev rua mej, tej ntawd yog tej kws tseemceeb tshaajplawg, kws has tas: Khetos tau tuag theej peb suavdlawg lub txhoj lawvle Vaajtswv tej Lug tau sau tseg, #Yaxaya 53:5-12 4Nwg tau raug muab log hab peb nub tomqaab ntawd Nwg tau sawv huv qhovtuag rovqaab lug lawvle Vaajtswv tej Lug tau sau tseg; #Nnkauj 16:8-10; Math 12:40; Tegnum 2:24-32 5Nwg tau lug tshwm rua Petus pum hab tomqaab ntawd Nwg lug tshwm rua kaum-ob tug timthawj pum. #Lukas 24:34; Math 28:16-17; Malak 16:14; Lukas 24:36; Yauh 20:19 6Dlhau ntawd, muaj ib zag, Nwg tau lug tshwm rua cov kwvtij ntseeg kws muaj 500 tawm leej pum rua tuablub sijhawm; feem ntau ntawm puab cov ntawd tseem muaj sa nyob, tsuas yog qeeleej txhaj tuag lawm xwb. 7Dlhau ntawd tes Nwg lug tshwm rua Yakaunpaus pum, hab tomqaab ntawd Nwg lug rua cov timthawj suavdlawg pum.
8Zag tomqaab kawg nkaus, Nwg tau lug tshwm rua kuv, tug kws zoole tug mivnyuas kws yug tsi puv sijhawm#15:8: yug tsi puv sijhawm; lossis yug rua thaus kws tsi yog caij yug., #Tegnum 9:3-6 9Ruaqhov kuv yog tug kws qeg tshaajplawg ntawm cov timthawj huv tuabsi, hab tub tsi tsimnyog kws lwmtug yuav hu kuv ua ib tug timthawj, vim kuv tau tsimtxom Vaajtswv pawg ntseeg lug lawm. #Tegnum 8:3 10Tabsis vim Vaajtswv txuj moovhlub es kuv txhaj muaj nyob zoole nuav, hab txuj moovhlub kws Vaajtswv tau muab pub rua kuv ntawd tsi yog taag dlawb taag dlo. Tabsis kuv tseem ua num nyaav dlua taagnrho cov timthawj huv tuabsi, tseeb tag, tsi yog kuv ua ntawm kuv tugkheej, tabsis yog Vaajtswv txuj moovhlub kws nyob rua huv kuv ua tug ua. 11Yogle ntawd, txawm yog kuv qha lossis puab qha los, tej nuav puavleej yog tej kws peb qha hab puavleej yog tej kws mej tub ntseeg lawm.
Peb Kev Sawv Huv Qhovtuag Rovqaab Lug
12Peb tub qha rua mej lawm has tas Khetos tub raug tsaa sawv huv qhovtuag rovqaab lug lawm, ua lecaag mej qeeleej tseem has tas cov tuabneeg kws tuag lawm yuav sawv tsi tau huv qhovtuag rovqaab lug? 13Yog muaj tseeb le ntawd tag, tes txhais tau has tas Khetos yeej tseem tsi tau sawv huv qhovtuag rovqaab lug; 14hab yog tas Khetos tsi tau raug tsaa sawv huv qhovtuag rovqaab lug tag, tes tej kws peb qha yeej tsi muaj qaabhau dlaabtsi le, hab mej txuj kev ntseeg los yeej tsi muaj qaabhau dlaabtsi le hab. 15Tsi taag le ntawd xwb, suavdlawg yuav pum tas peb ua timkhawv tsi tseeb txug Vaajtswv, ruaqhov peb tau qha has tas Khetos tau sawv huv qhovtuag rovqaab lug lawm. Yog tas cov tuabneeg kws tuag lawm yeej tsi sawv huv qhovtuag rovqaab lug tag, tes Vaajtswv kuj tsi tau tsaa Khetos sawv huv qhovtuag rovqaab lug. 16Ruaqhov yog tas cov tuabneeg kws tuag lawm tsi sawv huv qhovtuag rovqaab lug, tes Khetos los yeej tsi tau sawv huv qhovtuag rovqaab lug hab. 17Yog Khetos tsi tau raug tsaa sawv huv qhovtuag rovqaab lug, tes mej txuj kev ntseeg yeej tsi muaj qaabhau dlaabtsi le, hab mej tseem nyob huv mej lub txim le qub. 18Yogle ntawd, txhais tau has tas cov kws tau tuag rua huv Khetos, puab puavleej pluj taag lawm. 19Yog tas peb txuj kev casab rua Khetos tsuas zoo rua peb lub neej nwgnuav xwb,#15:19: Yog tas peb txuj kev casab rua Khetos tsuas zoo rua peb lub neej nwgnuav xwb; lossis Yog tas yaam zoo tshaajplawg kws peb muaj thaus peb tseem ua neej nyob nuav tes yog peb txuj kev casab rua Khetos xwb. tes peb yog cov kws ntxim hlub tshaaj txhua tug tuabneeg huv nplajteb nuav.
20Tabsis qhov tseeb yog Khetos tub raug tsaa sawv huv qhovtuag rovqaab lug lawm, Nwg yog thawj-thawj tug ntawm cov tuabneeg tuag kws tau sawv lug. 21Vim txuj kev tuag tau tshwm lug ntawm ib tug tuabneeg lug lecaag, txuj kev sawv huv qhovtuag rovqaab lug, kuj yuav tshwm lug ntawm ib tug tuabneeg ib yaam le ntawd hab. 22Txhua tug raug kev pluj kev tuag vim koom nrug Adaas lecaag, txhua tug yuav sawv huv qhovtuag rovqaab lug vim koom nrug Khetos ib yaam le ntawd hab. 23Tabsis txhua tug nyag yuav sawv lawvle nyag lub sijhawm: Khetos yog thawjtug kws xub sawv; tomqaab ntawd thaus txug lub sijhawm kws Nwg rovqaab lug, txhua tug kws yog Nwg le maamle sawv.
24Thaus ntawd lub sijhawm kawg yuav lug txug; Khetos yuav muab txhua tug kws tswjfwm saab ntsujplig, txhua lub meejmom, hab txhua lub fwjchim rhuav kuas puamtsuaj taag, hab Nwg yuav muab lub tebchaws cob rua Vaajtswv tug kws yog Leejtxiv. 25Ruaqhov Khetos yuavtsum kaav moog txug thaus Vaajtswv muab txhua tug yeebncuab tso rua huv Nwg qaab xibtaws. 26Tug yeebncuab kawg kws Vaajtswv yuav muab rhuav kuas puamtsuaj moog yog txuj kev tuag. 27Vaajtswv Txujlug has tas, “Vaajtswv muab txhua yaam tso rua huv Nwg qaab xibtaws.” Lulug kws has tas, “txhua yaam” ntawd tsi tau has txug Vaajtswv tug kws muab txhua yaam tso rua huv Khetos qaab xibtaws. 28Tabsis thaus Vaajtswv muab txhua yaam rua Khetos kaav lawm, tes Khetos kws yog Leejtub yuav lug nyob huvqaab Vaajtswv, tug kws muab txhua yaam rua Nwg kaav, sub Vaajtswv txhaj yog tug kaav taagnrho ibpuas tsaavyaam huv tuabsi.
29Yog tsi muaj le ntawd, cov tuabneeg kws ua kevcai rausdlej pub rua cov tuabneeg kws tuag lawm, puab ho yuav ua lecaag? Yog tas cov tuabneeg kws tuag yeej sawv tsi tau rovqaab lug le lawm, vim lecaag puab tseem ua kevcai rausdlej pub rua cov tuabneeg ntawd hab? 30Rua peb neb, vim lecaag peb ho yuav pheejsav tuag txhua lub sijhawm? 31Cov kwvtij, kuv yeej ntsib kev tuag txhua-txhua nub le! Kuv txaussab rua mej heev, qhov kws kuv has tau le nuav tub yog kuv txaussab rua lub neej kws peb muaj nyob rua huv peb tug Tswv Yexus Khetos. 32Yog kuv tawmtsaam tej tsaj nyaum huv lub nroog Efexus lawvle tuabneeg lub sab xaav xwb, kuv yuav tau dlaabtsi? Yog tas cov tuabneeg kws tuag lawm tsi sawv rovqaab lug, tes “Peb cale noj hab haus, ruaqhov pigkig xwb peb tub yuav tuag.”
33Tsi xob pub leejtwg ntxag tau mej: “Kev nrug tej tuabneeg phem, yuav ua rua puag tug cwjpwm kws zoo.” 34Cale rovqaab lug ua qhov zoo hab tseg tsi xob ua kev txhum ntxiv lawm; kuv has le nuav kuas mej paub txaajmuag vim mej qeeleej tseem tsi tau paub Vaajtswv le.
Lub Cev Kws Sawv Rovqaab Lug
35Tabsis muaj qeeleej yuav nug has tas, “Cov tuabneeg kws tuag lawm yuav ua lecaag sawv tau rovqaab lug? Thaus puab sawv rovqaab lug, puab yuav muaj lub cev zoo lecaag?” 36Uacaag yuav ruag ualuaj le! Thaus koj muab ib lub noob cog rua huv aav, yog lub noob ntawd tsi tuag tes yeej yuav tuaj tsi taug kaug ib zag le. 37Lub noob kws koj cog ntawd, txawm yog noob nplej lossis lwmyaam noob los xij, koj yeej tsi muab hlo ib tsob kws tub luj lawm moog cog, tabsis koj tsuas muab lub noob moog cog xwb. 38Vaajtswv pub lub noob ntawd muaj nplooj muaj kaav lawvle Nwg pumzoo; hab Vaajtswv pub txhua yaam noob nyag muaj nyag nplooj nyag kaav lawvle nyag yaam noob.
39Txhua yaam nqaj kws muaj sa yeej zoo tsi sisthooj; nqaj tuabneeg zoo lawm ib yaam, nqaj tsajtxhu zoo lawm ib yaam, nqaj noog zoo lawm ib yaam, hab nqaj ntseg zoo lawm ib yaam.
40Lub cev qaumntuj hab lub cev nplajteb los kuj muaj; lub cev qaumntuj nwg zoonkauj lawm nwg ib yaam, hab lub cev nplajteb nwg kuj zoonkauj lawm nwg ib yaam. 41Lub nub nwg muaj nwg ib txuj kev zoonkauj, lub hli nwg muaj nwg ib txuj kev zoonkauj, hab tej nubqub nyag muaj nyag txuj kev zoonkauj; txawm yog tej nubqub los nyag zoonkauj txawv lawm nyag ib yaam.
42Yogle ntawd, thaus cov tuabneeg tuag sawv rovqaab lug tes yuav zoole ntawd ntaag. Lub cev kws muab log yog lub kws txawj tuag; lub cev kws sawv rovqaab lug yog lub kws tsi txawj tuag. 43Lub cev kws muab log yog lub kws tsi zoonkauj hab tsi muajzug, tabsis lub cev kws sawv rovqaab lug yog lub kws ci ntsaa-ab hab khovkho. 44Lub cev kws muab log yog lub cev nqajtawv, tabsis lub cev kws sawv rovqaab lug yog lub cev ntsujplig. Yog tub muaj lub cev nqajtawv tes yeej yuav muaj lub cev ntsujplig xwb.
45Vaajtswv Txujlug has tas, “Thawjtug Adaas, yog tug kws Vaajtswv tsim hab Vaajtswv rau sav rau paa kuas cajsa,” tabsis tug Adaas kawg, yog tug Ntsujplig kws pub tau txujsa rua tuabneeg. #Chiv 2:7 46Tsi yog xub-xub muaj lub cev ntsujplig uantej, tabsis yog xub muaj lub cev nqajtawv uantej, tomqaab ntawd maamle muaj lub cev ntsujplig. 47Thawjtug Adaas yog lug huv nplajteb nuav lug hab yog Vaajtswv muab aav puab; tabsis tug Adaas thib ob, yog lug sau ntuj lug. 48Tug kws Vaajtswv muab aav puab lug zoo lecaag, tes tuabneeg nplajteb zoo ib yaam le ntawd; tug kws lug sau ntuj lug zoo lecaag, tes cov tuabneeg sau ntuj zoo ib yaam le ntawd hab. 49Peb muaj tug yaamntxwv zoole tug kws Vaajtswv muab aav puab lug lecaag, tes peb yeej yuav muaj tug yaamntxwv#15:49: peb yeej yuav muaj tug yaamntxwv; tej phoo ntawv qub kws xuas teg sau, muaj ca peb muaj tug yaamntxwv. zoo ib yaam le tug kws lug sau ntuj lug hab.
50Cov kwvtij, qhov kws kuv has ntawd yogle nuav: lub cev kws muaj roj muaj ntshaav yuav tsi muaj feem rua huv Vaajtswv lub Tebchaws, hab yaam kws txawj pluj txawj tuag yuav tsi muaj feem tau txais yaam kws tsi txawj pluj tsi txawj tuag ib zag le.
51-52Mej cale ua tuabzoo noog, kuv yuav qha ib zaaj kws muab npug ca lawm rua mej paub: Peb txhua tug yuav tsi tuag huv tuabsi, tabsis thaus lub raajxyu nrov ua zag kawg, tuab ntsais muag xwb peb yuav hloov dlua tshab. Ruaqhov thaus lub raajxyu ntawd nrov, tes cov kws tuag lawm yuav sawv rovqaab lug, yuav tsi tuag ib zag ntxiv le lawm, hab peb txhua tug yuav hloov dlua tshab. #1Thex 4:15-17 53Ruaqhov lub cev kws txawj lwj yuav hloov ua lub kws tsi txawj lwj; lub cev kws txawj tuag yuav hloov ua lub kws tsi txawj tuag. 54Yogle ntawd, thaus lub cev kws txawj lwj hloov ua lub cev kws tsi txawj lwj lawm, lub cev kws txawj tuag hloov ua lub cev kws tsi txawj tuag lawm, tes thaus ntawd yuav tav lawvle Vaajtswv Txujlug kws has tas, “Txuj kev tuag tau raug rhuav puamtsuaj lawm lau; txuj kev muajyeej tavlog lawm lau!” #Yaxaya 25:8
55“Txuj kev tuag, koj txuj kev muajyeej nyob qhovtwg?
Txuj kev tuag, koj tej taug nyob qhovtwg?” #Hauxe 13:14
56Tej taug ntawm txuj kev tuag yog kev txhum, hab lub fwjchim ntawm txuj kev txhum yog tej kevcai. 57Tabsis ua Vaajtswv tsaug, vim Nwg tau pub txuj kev muajyeej rua peb lug ntawm peb tug Tswv Yexus Khetos!
58Yogle ntawd cov kwvtij kws kuv hlub, mej yuavtsum sawv khovkho hab ruaj nreeg. Rausab ntso ua tug Tswv tegnum, ruaqhov mej tub paub lawm has tas, tej dlejnum kws mej ua nyob rua huv tug Tswv yeej yuav tsi nkim mej lub zug le.
© 2022 United Bible Societies. All rights reserved.