1 Kauleethaus 13
13
Kev Hlub
1Txawm yog kuv has tau tuabneeg tej lug hab timtswv ceebtsheej tej lug los, yog kuv tsi muaj kev hlub, tes tej kws kuv has ntawd zoole tej suab tswb tooj tswb hlau kws nrov-nrov xwb. 2Txawm yog kuv tau qhov khoomplig kws muaj cuabkaav cev Vaajtswv lug, hab muaj txhua yaam kev txawjntse hab totaub txug txhua yaam kws tsi muaj tuabneeg paub; hab txawm yog kuv muaj txuj kev ntseeg kws muab tau tej tojroob hauvpeg txaav moog rua lwmqhov los, yog kuv tsi muaj kev hlub, tes kuv yeej tsi muajnqes dlaabtsi hlo le. #Math 17:20; 21:21; Malak 11:23 3Txawm yog kuv yuav muab txhua yaam kws kuv muaj pub rua lwmtug, hab tuamyeem muab kuv lub cev rua luas hlawv#13:3: rua luas hlawv; tej phoo ntawv qub kws xuas teg sau, muaj kuas muaj chaw khaavtheeb tau. los, yog kuv tsi muaj kev hlub, tes tej nuav yeej tsi muajnqes dlaabtsi rua kuv hlo le.
4Kev hlub yog kev ua sabntev hab muaj lub sabzoo; kev hlub tsi muaj khib, tsi khaavtheeb lossis tsi muabhlub; 5kev hlub tsi yog kev uanruj uatsiv, tsi yog xaam pum yug tugkheej xwb, tsi laam npautawg yoojyim; tsi cimntsoov luas tej kev txhum; 6kev hlub yeej tsi zoosab rua txuj kev phem, tabsis zoosab rua txuj kev tseeb. 7Kev hlub yeej tiv taag moog le, ntseeg taag moog le, casab taag moog le, hab sabntev taag moog le.
8Kev hlub yuav nyob moog ibtxhis. Tabsis kev cev Vaajtswv Txujlug yuav txawj xaus moog; kev haslug txawv-txawv yuav txawj tsum tsi has ntxiv lawm; hab tej kev txawjntse yuav txawj pluj moog. 9Ruaqhov peb txuj kev paub hab kev cev Vaajtswv Txujlug los yeej cev tsi txhij-txhua, 10tabsis thaus yaam kws zoo kawg nkaus lug txug lawm, tes tej kws zoo tsi txhij-txhua ntawd yuav pluj moog.
11Thaus kuv tseem yog ib tug mivnyuas yau, kuv tej kev haslug, kev xaav, hab kev coj tseem zoole mivnyuas yau; tabsis thaus kuv hlub tav txiv lawm, kuv tsi ua le mivnyuas yau ua lawm. 12Tej kws nwgnuav peb pum, tes tsuas pum zemzuag le huv dlaim av xwb; tabsis muaj ib nub peb yuav pum timntsej timmuag. Tej kws nwgnuav kuv paub yeej paub tsi txhij-txhua, tabsis muaj ib nub kuv yuav paub txhij-txhua; ib yaam le Vaajtswv paub kuv txhij-txhua.
13Nwgnuav muaj peb yaam kws tseem muaj nyob: kev ntseeg, kev casab, hab kev hlub; tabsis yaam kws luj tshaajplawg huv tuabsi yog kev hlub.
© 2022 United Bible Societies. All rights reserved.