JAKOB 4
4
Alomi lung Müyamrü Thsükhi
1Nüsa bolung thirithsü tüsho rukachih tümünü akhiukshihcho? Ju nüsa shihkünkhinü nüsa bolung thirithsü lah yung de? 2Nüsanü künlah tüshe müla; jumonü nüsanü laksahchoh. Tüsho nüsanü mürühlah tüshe müngükhuk; jumonü nüsanü rukachihchoh tüsho keochihchoh. Nüsa müla, tümütüsho nüsanü mükheang. 3Nüsanü kheangchoh tüshe müngü, tümütüsho nüsanü nüsa shihkünkhi ching bahpü amülimnü kheangchoh. 4Mulong müzamrübo! Alomi lung müyamrü thsükhi ju Thrünpuh kilim thiriri ah de nüsanü mümükheah de? Jumonü shepünü alomi lung müyamrü thsüpü lümchonü api ju Thrünpuh riri kamchoh. 5Yungsho amüsühyunü, “Thrünpuhnü isa kheak lashihkhi menü mükthsüpü künchoh,” de athakhi akeangkeang ah de nüsanü lümcho shi? 6Tüshe apinü amüthsüm alü jihchoh; jumonü apinü thachoh, “Thrünpuhnü akükheangrü yanlochoh, tüshe azhihayih kilim amüthsüm jihchoh.” 7Jumonü nüsanü Thrünpuh bukkhüp laang. Amünean yanloang tüsho api nü kheaknü atsobah. 8Thrünpuh thüninang tüsho apinü nü thüninbah. Aneakrübo, nüsa khahbo tüsho mulongbo müsühang, nüsa lümtrüp mihtsürübo. 9Mulong tukthsüang, tripang tüsho tüzhoang. Nüsa münekhi mulong rozhak tüsho nüsa asühkhi miro mitingkhi kamshang. 10Nüsanü Atungpuh miki azhihayihang tüsho apinü nüsa shuhkihbah.
Thiyukhapkhi ching Atünadopü
11Keoniorübo, khülangnü khülang azhihde amütsü düthaachih. Shepünü keoniorü azhihde amütsü asukcho yungsho keoniorü yukhapchonü yakzan azhihde amütsü asukchoh tüsho yakzan yukhapchoh. Tüshe nünü yakzan yukhapsho, nü a yakzan yande arhimorü yung tüshe thiyukhaprü ah. 12Akhümkhitpü tüsho athsümünimpü kukkhi yakzan jihrü tüsho thiyukhaprü khülang lah, tüshe nü yamhingrü yukhappü thsüde nü she a?
Kükheangkhi dünkheak Atünadopü
13Kheakü aniang, nüsa shepünü thacho, “Khihni yungsho shido isa ha ching yungsho ju kiuto ching yübah kam khülang mungde shothsümolobah tüsho sho yinbubah.” 14Nüsanü shido tümü dünjibanü mümükheah. Nüsa rhangdung ju tümü a? Tümüde nüsa ju shumuliu anükhühkheak labah kheamabahkhi nangde lah. 15Ju müthri nüsanü athabeah, “Atungpuhnü mulongsho, isa alabah tüsho ha yungsho ju rhimobah.” 16Tüshe nüsanü kheakü kükheangde lülüshishichoh. Hadürü kükheangkhi alala amütsü ah. 17Shepünü alim rhimopü mükheahbah ju rhimopü lakphahchonü, api thsungkheak ju neak ah.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.