JAKOB 3
3
Mulo Kümkangpü
1I keoniorübo, nüsa ahihkhüh thsangyurü dükam, tümüde isa sherünü thsangyuchonü atobenü müküpde thiyukhapbah de nüsanü mükheahlah. 2Tümüde isa alalanü hihde lakmihchoh, tüsho mihtsürü khülang apinü athakhi ching mülakmihsho api athülünkhi mihtsürü, pang she abümnü adanyukpü kukkhi lah. 3Isanü khorabo mün ching isa ki mihyuanishihpü thsüde münmükhipbo yukjihsho, isanü arü pang abümnü bechoh. 4Sangkungbo she kheahang; arü khide ato thsüthsü she tüsho apung amüküpnü yünyün she, abebuhnü amulongkhi yande abebe anikhühnü bechoh. 5Junangde mulo ju pang shihcham lung aninibe ah, tüshe tode kükheangchoh. Mo dübin anikhühnü künangde mütüm ato takchonü lümakheahang!
6Tüsho mulo ju mo ah. Ha isa pang shihcham bolung amütsü lomi, pang athrünkhi thsümünimjihde, thsümüchi chingnü arükhi mo kheak rhangdung athrünkhi yihkih-a takchoh. 7Tümüde shiwüh mungji aban tüsho wuhnu, keakninphuru tüsho keto loriloko dankhuklah tüsho mihtsürünü danyukdo, 8tüshe mihtsürü shenü she mulo müdankhuk. Ha mükeamramkhi amütsü, ashebe müzümnü milah. 9Hanü isanü Atungpuh jichoh tüsho Abuh shijihchoh, tüsho hanü isanü Thrünpuh kiphahkhi ching thrünkhi mihtsürü athruajichoh. 10Ju mün rukhüh chingnü mungshipü tüsho athruajipü akhiukchoh. I keoniorübo, hade müthsübeah. 11Kenü rukhüh chingnü ke aniung tüsho akhüh bukkhitpü kukla de? 12I keoniorübo, khubasodungnü olivbo, yungsho kurungasoliunü khubaso asopü kukla de? Yungsho hukenü ke tsütsü akhiukshihpü mukuk.
Akulimnü Lümlung
13Nüsa bolung shepü lümlung tüsho anikhitkhi la? Api rhangdung atsü hode azhihayih lümlung chingnü api rhimobo huhshang. 14Tüshe nü mulong ching mükthsü akhüh, tüsho mükhütmüra lasho, ju dünkheak dükükheang tüsho thiyuro düreanglo. 15Hadürü lümlung ju akulimnü arükhi yung; ha alomi yo, me-mülakhi, amünean ah. 16Tümüde küching mükthsü tüsho mükhütmüra lanü, ju ching neamneamruru tüsho amütsü rhimo labah. 17Tüshe akulimnü arükhi lümlung ju akhuhde atsangkhitkhi, jushu mungtsü, azhihayih, zhakmüzhi, mihmüthsüm tüsho sangaso atsünü mide, jakkheahkhi tüsho yiuhkhapkhi müla. 18Tüsho mungtsü-thsürünü mungtsü ching mükheankhi ju thiyuro-lungki yimlukhi lah.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.