IBRI 13
13
Künangde Thrünpuh Asühshihba
1Keoniorübo khülangnü khülang muzhoachihde laang. 2Hanrü beyukpü dümih, tümüde jude athsükhinü khürünü mümükheahde yunirübo beyukrhaka lachoh. 3Rihyam ching arü lung lakhi nangde, rihyam ching larü lümkhitang; tüsho nüsa she arü nangde thsünükhi ruk thsünürü lümkhitang. 4Alalanü yamkhün thsükhi wüntre labeah, tüsho yamkhün thsükhi yappung amümüsüh dükamshih; tümüde Thrünpuhnü yüliyüra tüsho müzammüram mahkhapbah. 5Sho muzhokhi chingnü nü rhangdung zuzu laang, tüsho nü tümü lanü ju kheak reangkeamang; tümüde apinü tha, “Inü küyimkishe nü müdükhe yungsho nü mübahyuk.” 6Jumonü isanü mulongram lade thachoh,
“Atungpuh ju I rungrü ah, inü mütre;
mihtsürünü I ki tümü thsükhukpü?”
7Nüsa ki Thrünpuh yu tharü nüsa limberübo lümkhitang; arü rhangdung ching akuk ngükhi lümakheahang, tüsho arü akin kheahkhiang. 8Jisu Khrista ju yini, khihni tüsho lünnü rukhüh ah. 9Aphuaphu tüsho aso thsüde thsangyukhibonü dübephülapshih; sherünü tsühchonü arü ki alü mülakhi arüngako tsühyungbenü yungde amüthsümnü isa mulong düküngshihkhi ju atsü ah. 10Arüngkhimyam ching tankihrünü ju kheaknü atsühpü alim mülakhi isa kingaün sadam khülang lah. 11Tümüde achangbe amükeamrünü neak kingaün jihpü arüngakopung ching hande arükhi thiyih yo shiwüh pang binpung aleanglim takabah. 12Junangde Jisu she api thiyih hode mihtsürü tsangkhitpü thsüde chipiripit aleanglim thsünü. 13Jumonü isanü binpung aleanglim api kilim yüanü, tüsho apinü arümkheamkhi mungchih hananü. 14Tümüde ha ching isa kiuto rünkhiungbe müla, tüshe isanü arüpü lakhi kiuto yimchoh. 15Jumonü isanü Jisu hode api mung alokhikhi münnü Thrünpuh kilim mutukzhakde mungshi kingaün jihanü. 16Atsü rhimopü tüsho nü lakhi chamachihpü amümürang düthsü, tümüde hadürü shuhmülanga jihkhinü Thrünpuh asühshihchoh.
17Nüsa limberübo ki mihyuaniang tüsho arü yukhüm yanang; tümüde arünü me mütsanmüküh-a jihpü thsüde nüsa me kurungkheak aheangchoh. Arünü mulong tukthsüde yungde asühde rhimoshang, tümüde ju nüsa thsungkheak alü mülade akambah.
18Isa thsungkheak tamkhüntamnüjang, tümüde lüpdükhi ching wüntre lade arhimopü mulongde isa lümkhi müsühlah de isanü mütsanlah. 19I nüsa kilim nahde arülopü thsüde khide shuhmülanga jihde tamkhüntamnüpü inü nüsa ki tuthsukchoh.
Akheam Tamkhüntamnü
20Lün tangzüng thiyih hode namfimihnu neakrü ato, Atungpuh Jisu Khrista ashe chingnü arhang kamloshihbuh Thrünpuh mungtsünü, 21api lümkhi rhimopü atsü lüpdükhi ching nüsa ayuk lashang, tüsho apinü amulongkhi Jisu Khrista hode isa kheak rhimoshang; lünnü lün api müretahshang. Amen.
Akheam Yubo
22Keoniorübo, inü tuthsukde athakhi yu arümde anipü nüsa ki mushuchoh, tümüde inü nüsa kilim akhihkhühnü thrütdo. 23Isa keoniorü Timothi dükhedo de nüsanü mükheahshihnelah. Api nahde arü khiungsho, nüsa shorupü api bebah arübah. 24Nüsa limberübo tüsho Thrünpuh mihtsürübo alala ki salüm jihang. Itali ching larünü nüsa kilim salüm mühahchoh. 25Nüsa alala lung amüthsüm laang.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
IBRI 13
13
Künangde Thrünpuh Asühshihba
1Keoniorübo khülangnü khülang muzhoachihde laang. 2Hanrü beyukpü dümih, tümüde jude athsükhinü khürünü mümükheahde yunirübo beyukrhaka lachoh. 3Rihyam ching arü lung lakhi nangde, rihyam ching larü lümkhitang; tüsho nüsa she arü nangde thsünükhi ruk thsünürü lümkhitang. 4Alalanü yamkhün thsükhi wüntre labeah, tüsho yamkhün thsükhi yappung amümüsüh dükamshih; tümüde Thrünpuhnü yüliyüra tüsho müzammüram mahkhapbah. 5Sho muzhokhi chingnü nü rhangdung zuzu laang, tüsho nü tümü lanü ju kheak reangkeamang; tümüde apinü tha, “Inü küyimkishe nü müdükhe yungsho nü mübahyuk.” 6Jumonü isanü mulongram lade thachoh,
“Atungpuh ju I rungrü ah, inü mütre;
mihtsürünü I ki tümü thsükhukpü?”
7Nüsa ki Thrünpuh yu tharü nüsa limberübo lümkhitang; arü rhangdung ching akuk ngükhi lümakheahang, tüsho arü akin kheahkhiang. 8Jisu Khrista ju yini, khihni tüsho lünnü rukhüh ah. 9Aphuaphu tüsho aso thsüde thsangyukhibonü dübephülapshih; sherünü tsühchonü arü ki alü mülakhi arüngako tsühyungbenü yungde amüthsümnü isa mulong düküngshihkhi ju atsü ah. 10Arüngkhimyam ching tankihrünü ju kheaknü atsühpü alim mülakhi isa kingaün sadam khülang lah. 11Tümüde achangbe amükeamrünü neak kingaün jihpü arüngakopung ching hande arükhi thiyih yo shiwüh pang binpung aleanglim takabah. 12Junangde Jisu she api thiyih hode mihtsürü tsangkhitpü thsüde chipiripit aleanglim thsünü. 13Jumonü isanü binpung aleanglim api kilim yüanü, tüsho apinü arümkheamkhi mungchih hananü. 14Tümüde ha ching isa kiuto rünkhiungbe müla, tüshe isanü arüpü lakhi kiuto yimchoh. 15Jumonü isanü Jisu hode api mung alokhikhi münnü Thrünpuh kilim mutukzhakde mungshi kingaün jihanü. 16Atsü rhimopü tüsho nü lakhi chamachihpü amümürang düthsü, tümüde hadürü shuhmülanga jihkhinü Thrünpuh asühshihchoh.
17Nüsa limberübo ki mihyuaniang tüsho arü yukhüm yanang; tümüde arünü me mütsanmüküh-a jihpü thsüde nüsa me kurungkheak aheangchoh. Arünü mulong tukthsüde yungde asühde rhimoshang, tümüde ju nüsa thsungkheak alü mülade akambah.
18Isa thsungkheak tamkhüntamnüjang, tümüde lüpdükhi ching wüntre lade arhimopü mulongde isa lümkhi müsühlah de isanü mütsanlah. 19I nüsa kilim nahde arülopü thsüde khide shuhmülanga jihde tamkhüntamnüpü inü nüsa ki tuthsukchoh.
Akheam Tamkhüntamnü
20Lün tangzüng thiyih hode namfimihnu neakrü ato, Atungpuh Jisu Khrista ashe chingnü arhang kamloshihbuh Thrünpuh mungtsünü, 21api lümkhi rhimopü atsü lüpdükhi ching nüsa ayuk lashang, tüsho apinü amulongkhi Jisu Khrista hode isa kheak rhimoshang; lünnü lün api müretahshang. Amen.
Akheam Yubo
22Keoniorübo, inü tuthsukde athakhi yu arümde anipü nüsa ki mushuchoh, tümüde inü nüsa kilim akhihkhühnü thrütdo. 23Isa keoniorü Timothi dükhedo de nüsanü mükheahshihnelah. Api nahde arü khiungsho, nüsa shorupü api bebah arübah. 24Nüsa limberübo tüsho Thrünpuh mihtsürübo alala ki salüm jihang. Itali ching larünü nüsa kilim salüm mühahchoh. 25Nüsa alala lung amüthsüm laang.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.