DANGYASARAO 24
24
Paul khe gajai ri bani grao
1Sain bowa ni yaohon ha, Jonthai dedao thaoyaba Anania jang khraorao gejesi, Ukil Tertulia khe labu pha hi bonsi akhai khlai bu hi, Latsap ni sagang ha Paul ni basao ha gajai ri mane phai ba. 2Paul khe long bani yaohon ha, Tertulia de boni gajai ni balam khe Felik ni sagang ha so ri kha:
Felik, man gnang, nini dara jang budu galao jini bising ha sandi dao kha, ode ning hamsisi naiso bani jini raji habo hamdao phalang du. 3Khrip hathan ha, khrip jadi habo, nini basao ha hamsi ning jing khaja du. 4Nini bubli gajain khlai ma ang nangjaoya, thikhabo grao thaisi khna mane khlai hi ang ning khe khainsu du. 5Ebo subung de subung hamyayaba se. Habsao ni khrip Judarao khe nam phnangyaba ode Nazareth nolei ni saosi hoja se thihi jing khna du. 6Madai ni bikhoh khe bo gusu khlaimabo bao du, odebani jing bokhe remba se. (Jini dara lai boni balam ni grao ha jing bisar khlai ma nangjao du; 7thikhabo, siphaiyarao ni hoja dedao thaoyaba Lusia phai hi, jini yao ni subung khe bo se lang la kha. 8Bokhe gajai riyarao khe nini sagang ha nujao manebo bo hukhum ri ba.) Ning jar ning singphla hi, khrip jing gajai riyaba khe bo ni phrang ning mithi phu nang, thihi thi ba. 9Judarao bo ebo grao de khrip gibi ning thihi bo jang gaba ba.
Paul jar khe dimkhao ba
10Latsap grao thi mane Paul khe yao sip ba jang, Paul thi ba,
Ning Madai ni phrang ebo jadi buthu khe bisar khlaiyaba thihi ang tharmai bani, khaja hi ang jarni dimkhao mani grao khe ang thima nangjao du. 11Jerusalem ha Madai jang sainlai mani khlai hi ang thangyaba basain de nokha sain jhigin thane basao ja nang niya thihi ning tharmai phuma se. 12Madaikhoh habo, sunagog habo, asaba hathan habo, saosi jangbo ang niyalaiya ode subung buthu khe nam phnang ba thihibo bonsi ang khe thiba mai nang niya; 13duha bo bonsi ang khe gajai riyaba khebo boni buju khitha nini ha thi mane musibo bonsi mithi nang niya. 14Ebo grao khe nini ha ang khuru nang, bonsi mosol thiyaba lama jang ang jini phagrarao ni Madai khe khlim du. Thikhabo, Dara ha gorasalirao ni laisi ha rebyaba khrip khe ang lon du. 15Bonsi lonba lai, angbo khrip subung, hamba ar hamyayaba baijaphin ma thihi Madai ni gede lon hi ang asa deng du. 16Odebani, Madai ni gedebo ode subung ni gedebo, khah ragaosisi dongma nalaibo ang bao re.
17Jerusalem ha maithai gabang ni yaohon ha ang phai ba, ani greng buthu ni bising ha jinis ri mane di dada, bandai yaopha mane khlai hi se ang phai ba. 18Bo bubli ha de subung buthu ode nathong giri hi Madaikhoh ha gathar khlai hi bonsi ang khe nu ba. 19Thikhabo, Asia raji ni Judarao boha dong ba, jodi ani gajai ha boni ha asaba grao dong kha la, eraha nini sagang ha phai hi ani basao ha gajai ri kha mu. 20Niyakha de, ebo buthu ning bisardarrao ni sagang ha ang songba ha ani snadi gajai dang ba, thi la thing. 21Bonsi ni gejer ha ang songhi, githi ni phrang baija phinyaba ni balam ha ebo grao thaisi thi bani, dini nisi ni sagang ha ang gajai ri jaohi dong, ang thiba khe garhi de ang musibo thiya.
22Odehe, Felik de lama ni grao khe hamsisi mithi du bani, Siphaiyarao ni hoja dedao thaoyaba Lusia phai kha ning nisi ni bisar khe khlai nang, thihi bo deng kha. 23Paul khe bonsi sadin jang deng hi, boni lugurao jarni khusi khe bonsi ne dang ri mane khlai hibo mathaoya mane siphaiyarao ni hoja khe hukhum ri ba.
Paul jang Felik ode Drusila goron ba
24Khaisa basain ni yaohon ha, Felik jarni bihih Drusila, Juda subung khe labu pha hi bo phai ba. Paul khe long riha hi Krista Jisu khe lonma ni balam ha bo thiyaba khe khna ba. 25Boha dormo ni grao, saiphuyaba ni grao, bisar sophai ginyaba ni grao buthu khe Paul thiba ha, Felik de hamsi ning khin hi grao thi ba, Thangphin la hi hajora maikha de ang ning khe long riha nang, thihi bokhe haiha kha. 26Bo Paul ni phrang rang mai nang thihi bao hi asa khlai ba, odebani bo alang alang long hibo sainlai ba.
27Thikhabo, nokha maithai gin nanglai bani yaohon ha, Porkia Festa thiyaba, Felik ni baslai ha bo phai ba. Felik de Judarao khe khaja rima nangjao bani Paul khe khahi ning galang ba.
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.