DANGYASARAO 23
23
1Paul de bisardarrao khe naipha hi thi ba, Daphlungrao, ang de dini sosi bo Madai ni muh ha hamba ni gede ang tharmaiyaba si khe dang hi ning dong re. 2Jonthai dedao thaoyaba Anania, Paul ni gabasi songyarao khe boni mukhang ha bakhao lai ri mani sani ba. 3Paul boni ha thi ba, Hoi ning longthai ni badim ha suni huyaba, Madai ning khe su ma se; ning Dara ha lai subung ni bisar khlai mane khlai hi ning kham du, thikhala Dara khe baiglai hi sumjabani ang khe su ma sani ba?
4Boha, boni rogong ni subung buthu Paul khe thi ba, Madai ni Jonthai gedeba khe ning joba na?
5Paul thiphin ba, Hoi daphlungrao, Jonthai gedeba se thihi ang tharmaiya ba se, Nini greng buthu ni hoja ni basao ha hamya grao thithaoya, thihi bo reb du thi.
6Bonsi Saddukairao jang Pharisairao ni dol se thihi Paul tharmai hi, bisardarrao ni gejer ha bo jirik khao hi thi ba, Daphlungrao, ang Pharisai se, ang Pharisairao ni basabo ang ning. Asama jang subung githi thangphin bani balam ha ani bisar ja du.
7Ebo grao khe bo thiba jang, Saddukairao jang Pharisairao nam jalai hi bisardarrao degao thar kha. 8(Saddukairao de thi du, subung githi baija phinyaba musi giri, sorgo deglarao, bese buthu bo giri, bonsi thi re; thikhabo Pharisairao ebo khrip khe dong thihi bonsi mani du.) 9Bonsi hamsi ning jiu ja kha; Pharisai dol ni subung Dara slingriyaba gejesi song hi, bonsi niyalai ba, Ebo subung ni musibo hamya gajai jing maiya dou. Bese bo, degla bo bokhe thiba ni la snadi ja du? ode bonsi thi ba.
10Bonsi bak jadao hi niyalai bani, siphaiyarao ni hoja gedeba de Paul khe bonsi glithar ri ma se thihi khin ba. Odebani bonsi ni gejer ni phrang khaikho hi khorongma bising ha bokhe lang mane khlai hi siphaiyarao khe bo hukhum ri ba.
11Bo bohor ha ning Gabra, Paul ni gabasi ha songphai hi thi ba, Khitha raohi dong lah; Jerusalem ha ani grao khe ning thiba lai ning, Rom nogorma habo ning thima nang ma.
Paul khe sthai mane sainlai khao ba
12Phorong ha, Paul khe bonsi sthai mane sainlai khao hi Judarao phirik phirik bojom jahi bonsi sthaiya si de musi khebo jiya lingya mani khlai hi smai danglai ba. 13Olei sainlai khaoyaba de subung bisagin thane bangdao. 14Jonthai gedeba jang khraorao niha bonsi thanghi thi ba, Paul khe jing sthaiya si de musi khebo jiya lingya mani khlai hi jing smai dang kha. 15Odebani, duha ning melni gede jahi Rom ni hoja niha graojma hai ha, Paul khe nini ha hamsisi singso mane labu hi phai thing, boni balam ha ning hamsisi bisar khlai ma nang du; thikhabo, bo eraha sophai mani sagang ha ning jing bokhe sthai nang.
16Thikhabo, Paul ni bahandao ni basa, sthaima baohi bonsi phirik phirik jonyaba grao khe bo khna hi khorong bising ha bo hap hi, Paul khe bo thi ba. 17Boha, Paul siphaiyarao ni gedeba saosi khe longhi thi ba, Ebo naga de hoja dedao thaoyaba niha langpha, boniha smaba grao thi mani dong. 18Siphaiyarao ni hoja dedao thaoyaba niha bokhe langpha hi thi ba, Khajaoyaba Paul ang khe longha hi khainsu ba, ebo naga siphaiyarao ni hoja niha smaba grao thima nangjao du, bokhe boni ha langpha.
19Siphaiyarao ni hoja dedao thaoyaba boni yao khe remhi gibin lang dada bokhe sing ba, Aniha ning snadi grao thima nangjao ba?
20Bo thi ba, Paul ni grao gibi mithi dao mane ning baoba lai, dakhna bisardarrao ni sagang ha labu mane khlai hi Judarao bisar nangjao du; 21thikhabo, bonsi ni grao khe da mani lah. Bede thikhade, bonsi ni bising ha subung bisagin thanebo bangdao hi bonsi jonhi ning dong, bo buthu thidu, bonsi bokhe sthaiya si de musi khebo jiya lingya mane khlai hi bonsi smai dang kha. Duha nini grao khe jonhi bonsi salai blai hi ning dong.
22Siphaiyarao ni hoja dedao thaoyaba bo naga khe haiha hi, Ebo grao ning ani sainthiyaba khe saosi nihabo da thi, thi ba.
Felix hi sagang ha Paul haiha jao ba
23Hoja dedao thaoyaba, siphaiyarao ni hoja khe long hi thi ba, Hor ha thuba ni bubli ha, Kaisari sosi thang mane siphaiya rjagin ode gorai basao ha gayaba subung bisa tham jhi ode bla diyaba subung rjagin salai hi deng lah, 24Paul ga manibo gorai salai hi deng lah, Latsap Felix niha nisi hamsisi ning digar tha, bo ode thi ba. 25Hoja gedeba laijma bo reb hi edehe thi ba: 26Klaudia Lusia, Latsap man gnang Felik khe khlim ha du. 27Ebo subung khe Judarao remhi, bonsi sthaima jaba ha, siphaiyarao khe langpha hi, ang sogo ba. Bede thikhade bo Rom ni subung se. 28Bonsi sthaima baoyaba balam khe ang mithima nangjao bani bisardarrao ni sagang ha ang lang ba. 29Bonsi jarni smaba Dara ni balam ha gajai ridu thihi ang tharmai du. Thikhabo, thih mani sosi de phatho ha jebjao hi khajao mane de bo musi hamya khusi dang ba thihi ang nuya. 30Judarao bokhe sthaima bao hi bonsi buddi jablai du thihi malai aniha thiba jang, nini ha ang srap haiha kha. Bokhe gajai riyarao khebo, boni basao ha grao hamya dongyaba si khe nini sagang ha thi mani khlai hi bo ang hukhum ri ba, thihi reb du.
31Siphaiyarao bo saniba lai ning hor horha ning Paul khe bonsi langpha hi, Antipatri thiyaba nogor ha bonsi phai kha. 32Gibin basain ha, gorai basao ha gayarao se Paul khe langpha ba, thikhabo gibin siphaiyarao bonsi ni khorongma gede bonsi phaiphin la kha. 33Kaisari ha bonsi sohiba jang Latsap ne laijma khe yaopha hi, Paul khe boni ha labu kha. 34Latsap bo laijma khe phuri blai hi braha ni phrang phaiba thihi bokhe sing ba. Kiliki raji ni subung se thihi tharmai ba ha, 35bo thi ba, Ning khe gajai riyarao sophai kha ning, nini grao khe ang bisar khlai nang. Ode Praitorian ha deng hi naiso mane bo hukhum ri ba.
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.