1 Tim 2
2
Bhibhieli 'la cɩa wɔlɩ
1Na, n 'clalɩ ‑bɛɛ lebhe ma 'clalɩ Laagɔ, ma bhibhieo, ma zɩzlalɩɔ wlɩɩn ɩya ma bhɔlʋɔ ncɛlɩa 'fɩan 'la da. 2Ɩ ‑fata lebhe ma bhibhie nyɩbhɛlɩa ɩya ‑kwletocɩa 'fɩan 'la da ɩya ‑a ka pupueen kʋ ɩya -a 'ka Laagɔ gɩlɩ, -acɩ 'la zʋlɩɛ nɩkplaan. 3'Lɩka ‑anɩa ‑ɩ nanɩ 'lɛ 'nyɩ ‑ɩ ka 'lɛ Laagɔ ‑ala gbʋʋnsanyɔa 'tʋ na. 4Ɔ ‑wa lebhe ncɛlɩa 'fɩan 'lɩ gbʋʋnsalɩɛ ɩya ma cibhlili ‑nʋawlɛa.
5Sa Laagɔ ‑glɩ bhlo,
'nyɩ cɩzʋlʋnyɔ bhlogbɩɩ ‑kʋ 'lɛ ɔya ncɛlɩ ‑gbaaglɩɩn,
ɔmɔ ‑ɔ ‑glɩ 'lɛ Zozi Klisi,
6nclɔɔa ‑ɔ ‑sa 'lɛ ɔcɩ ncɛlɩa 'fɩan 'la nɩkplaankplɩlɩɛ 'la gbʋ na.
'Lɩka ‑danʋfʋɛa ɔ li 'lɛ daa clɩɩa ‑ɩ ‑zʋɔ 'lɛ na, ɩ ŋeni 'lɛ na. 7Ɩmɩ ‑naa 'la gbʋ, dɛ Laagɔ pleen le lobhulobhunyɔ* ɩya Dɩnanɩa* 'la ‑sanyɔ le n solu maa ‑ɔ 'ta 'lɛ Zifʋnya* ‑glɩ na, pɔɔtɛtɛ ɩya ‑nʋawlɛ 'la cɩa wɔlɩa. N zʋ 'ta yodi, ‑ma ‑nʋawlɛ n nyɩtɛ 'lɛ.
Ɩmɩa n 'clalɩ 'lɛ 'ŋwlɛ ɩya ŋodie na
8Na, n ‑wa lebhe ŋodiea bhibhieli daa 'fɩan, ma ‑tla sɩ ‑laagɔɔn, ma kalɩ ‑kplɔkplɔpɔlɛ ɩya ma 'la kalɩa dɔgbɛ ɩya 'slaagbʋwugo. 9‑Ɔ ‑glɩ 'lɛ 'ŋwlɛa na, n ‑wa lebhe ma falɩ mala nɩkplaanplalɩɛ ɩya mala cɩzʋzʋlɩɩa pɔlɛ cɩ. Ma 'la 'matɩlɩa mala nanɔa yooyo nyɩ 'la bhlalɩɛ, ‑asɩkɛ ɩya ‑blaazɩ ‑mizimizi nɩkplaan ɩya ma 'la plaa 'pɛlʋtɛtʋloku nɩkplaan, 10‑ma nʋnʋgbɩ 'nyɩ ‑ɩ 'plɩ mala cɩzʋzʋlɩɩ, saa ɩ ‑fata 'lɛ lebhe 'ŋwlɛa ‑ɔ gɩlɩ 'lɛ Laagɔ na, nʋ na. 11Ma -ka Laagɔ 'la wɔlɩa nyɩtɛda ‑kʋ na, ɩ nanɩ lebhe 'ŋwlɛa kʋ 'cɩɩ ɩya ma ‑la macɩ ‑dʋdʋ 'kʋ. 12N 'nyɩ 'ta 'ŋlɔ ‑jioli lebhe ɔ ca, n 'nyɩ 'ta ‑awlɛɔ ‑jioli lebhe ɔ ‑kwle ŋodi. 'Naa ɔ kʋ 'cɩɩ. 13Sa Adaan Laagɔ nʋnʋ 'lɛ ‑bɛɛ 'fɩɔn ɔ ya 'lɛ Ɛvʋ nʋ. 14'Nyɩ ‑n 'ta Adaan tlɛa 'ta 'lɛ 'nyiglili, ‑ma 'ŋlɔa ɛ 'nyiglili 'lɛ 'nyɩ ɔ ya 'lɛ nyinyiin bhlili. 15'Bhlɩmɔɔn 'ŋlɔ cɩ 'ka gbʋʋnsalɩɛ 'lɩ ɔla 'civalʋ nɩkplaan, ɩ ‑ka ‑kʋ lebhe ɔ ‑ka pɔɔtɛtɛ, walʋ, ‑kplɔlɩɛ ɩya ‑ncɩpɔlɛcɩfalɩɛ nɩkplaan namʋnʋ na.
Àwon tá yàn lọ́wọ́lọ́wọ́ báyìí:
1 Tim 2: NTLD13
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.