Esaburi 36
36
Owuvi Wavanju
Khu omwembesi. Esaburi ya Daudi omukhalavani wa OMWAMI.
1Owoni wulomalomanga khumunju mwoni,
mumwoyo kukwe mukachi;
okhuchichikana Nyasaye Sikhulikho mumwoyo kukwe ta.
2Sikira keveyanga mumoni chichie omwene,
achi owoni wuwe siwunyala wamanyikha mana waviyirwa ta.
3Amakhuwa komunwa kukwe kalimo owuvacha nowuveyi,
kalekha okhwekhonyera emanya nende okhukhola amalayi.
4Achekekhanga amavi nakonire khusitanda sisie;
kechanga mungira yichasi endayi,
sialekhanangakho namavi ta.
Owulayi wa Nyasaye
5Owusimi wuwo owa wuli lwosi, Ewe OMWAMI, wavalaa okhwola mwikulu,
owusuvirwa wuwo nawo wola khumaleesi.
6Owulungi wuwo wuli ngevikulu via Nyasaye,
owukhalaki wuwo wuli ngolusiva lukali;
ewe owonianga avanju nesolo, Ewe OMWAMI.
7Owusimi wuwo owa wuli lwosi wulayi muno, Ewe Nyasaye!
Avana vavanju vekisanga musisiko siembaa chichio.
8Valianga khuwungi weviokhulia viri munju yiyo,
nawe ovanywesanga mumwalo kwowulayi wuwo.
9Sikira ewe oli nefututusi yowulamu;
muwulafu wuwo khuwonangamo owulafu.
10Ewe chianakana okhuana owusimi wuwo owa wuli lwosi khwavo avakhumanya,
nokhuana owuwonia khuvalungi mumwoyo!
11Ochalekha avesireka vasecha ta,
namwe avamayanu vandimania ta.
12Wona eyi avamayanu vakwiye,
vakhupirwe aasi omunyikha, vakhayiswe okhwinyokha.
Àwon tá yàn lọ́wọ́lọ́wọ́ báyìí:
Esaburi 36: LNTPP
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©The Bible Society of Kenya, 2024