Esaburi 35
35
Esala Liowuyeti
Esaburi ya Daudi.
1Yingana, Ewe OMWAMI, nende avo avayingana nange;
lwana navo avalwana nange!
2Wukula engao nesivavi,
mana winyokhe wiche wunjete!
3Wukula efumo nolung'esi
wemese avanyongakho!
Wolera omwoyo kwange, “Nise owunanuli wuwo!”
4Lekha vaambwe esoni nokhuchalaala,
avo avatakhatakha owulamu wange!
Lekha vemeswe nivaambirwe esoni,
avo avakhovera amavi!
5Lekha vave ngomukhuchi kutumulwa nembeo,
engelosi ya OMWAMI ni yivatimania!
6Lekha engira yawe yimaliye nokhumiukha,
engelosi ya OMWAMI ni yivongirekho!
7Sikira vanombera emicheko nivawuma esifune;
nivawuma esifune vayava owina khulwowulamu wange.
8Lekha olumululo luvatindivikhe!
Nundi lekha emicheko eki vacheka kivaambe avene;
lekha vakwe mulumululo avene!
9Khanu omwoyo kwange kuchia okhwekhoya mu OMWAMI,
nifumia muwunanuli wuwe.
10Eva liange liosi lichia okhuwola, “Ewe OMWAMI, njanu olikho ngewe,
ewe onanulanga avatekhere,
okhuchula khuvamaani,
avatekhere navatambi okhuchula khu vanuli?”
11Avaveeri vavi vewukhanga;
vanjeveresa evinju evinjamanyire.
12Vangoosera amavi khumalayi kange;
omwoyo kwange kuwechekherera.
13Nausa ese, olu vali nivalwaye,
nafwala amakunia musiveera,
neyimana okhulia mumasayo.
Nasala nininamisie omuchwe,
14ngolirira omusale wange namwe omwana wefwe;
nakenda eyineyi ni ninamire mukhulira ngofwisise mayi.
15Ne nange olu nekumula vewungeresa nivasangaye,
vewungeresa okhunjekherera;
avanju avanjamanyire,
vanjosulachakamo nivachalua,
16vachianakana okhukholera esienyaenye,
nivanjekherera nameno kawe.
17Ewe OMWAMI, ochia okhulengerakho wusa okhwola lina?
Sikule wunjuse musikhupo siawe,
wonia owulamu wange okhuchula mumatalang'i!
18Ne njia okhukhukhupira ochio musituma esikali;
njia okhukhufumia emberi wawe vosi.
19Ochalekha vanjekhoyerakho ta,
avali avasiku vange muwuchasi wang'ali,
ochalekha vapolia emoni ta,
avo vambiyira nivawuma esifune.
20Sikira sivalomalomanga akomulembe ta,
nausa vawola akowuveyi khwavo avewolererera musialo
vapara amakhuwa kowuveyi.
21Vaasama eminwa kiawe okhunjokerera;
vawola, “Yee, yee! Emoni chiefwe chiakawene!”
22Ewe wawene kano, Ewe OMWAMI, ochawulera ta!
Ewe OMWAMI, ochava aleyi nange ta!
23Sisimukha, mana weme khulwowulungi wange,
khulweva liange, Nyasaye wange nundi Omwami wange!
24Mbonokose, Ewe OMWAMI, Nyasaye wange, okhulondana nowulungi wuwo;
mana ochalekha vanjekhoyerakho ta!
25Ochalekha vewolera avene, “Yee, khwanyoye aka khwekombanga!”
Ochalekha vawola, “Khwamumirire.”
26Lekha vaambwe esoni nokhutondovana alala
avekhoyeranga owutinyu wange!
Lekha vaambwe esoni nokhuchekhererwa,
avanjelayirangakho!
27Lekha avo avekomba okhuwona nimbonokokhire vakalakase mana vasangale,
mana vawole wuli lwosi,
“Omukhongo nje OMWAMI,
osangaliranga owukhiri womukhalavani wuwe!”
28Ne olulimi lwange luchia okhuwola khuwulungi wuwo,
nende khufuma yiyo olutalo lwosi.
Àwon tá yàn lọ́wọ́lọ́wọ́ báyìí:
Esaburi 35: LNTPP
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©The Bible Society of Kenya, 2024