Luka 2
2
Eliwulwa lia Yesu
(Mat. 1.18-25)
1Enyinga echio, ekhuwa liachula khumuchuki Kaisari Agusto, natakha avanju vosi musialo vavalwe. 2Lino njeliali evala liokhuchangira endalo chia Kwirini nali gavana wolukongo lwa Siria. 3Vosi vachia okhuvalwa wulimunju mwitookho lilie.
4Yosefu kachekukha okhuchula Galilaya, mwitookho lia Nazareti, okhuchia Yudea mwitookho lia Daudi, elilangwa Bethlehemu, sikira kali wolwiwulo lwa Daudi. 5Kachia okhuvalwa nende Maria, oyu kali nasereye, kali nenda yomwana. 6Olu vali nivaliyo evise vivie viokhwiwula viola. 7Kewula omwana wuwe owamberi omusoliri kamuwikha enguo chiendaana ne kamwalisa mulwero esikira oweyango siwanyolekha munju yavakeni tawe.
Avayi nende Engelosi
8Musialo omwo, avayi vali mumukunda nivaya eviayo viawe musiro. 9Engelosi ya Omwami yavawonekhera, ne owukhumi wa Omwami wavekhera ne vava nowuchi. 10Engelosi yavawolera, “Mucharia tawe; evalechera amakhuwa malayi akowusangafu muno, owuchia okhuva khuvanju vosi. 11Khwinywe nyingayino Omuwonia kewuywe mwitookho lia Daudi, oli Kristo Omwami. 12Sino sichiakhuva esimanyiro khwinywe. Muchia okhunyola omwana vamuwoyire munguwo chiendaana nakonire mulwero.”
13Vachulira avamahe vomwikulu nende engelosi nivafumia Nyasaye nivawola,
14“Oluyali khu Nyasaye womwikulu nomulembe khusialo muvanju avakasima!”
15Olu engelosi chiachekukha chiakoola mwikulu, avayi vawolana, “Khuchie Bethlehemu khuwone akekholekhire kano, aka Omwami achwekesise.”
16Vachekukha lwangu vachia vanyola Yosefu nende Maria nomwana nakonire mulwero. 17Olu vawona, valandia amakhuwa akavali nivawoleywe khumwana chana. 18Vosi avawulira vawuka khumakhuwa akavayi vavawolera. 19Nausa Maria kawulera nende amakhuwa kano nakakanakana mumwoyo. 20Avayi vakoola vaana oluyali nokhufumia Nyasaye, khu akavali nivawuliye nende okhuwona nga vali nivawoleywe.
Yesu Akulikhwa
21Enyinga munane nichiakhawa olu kakhewa, vamukulikha elicha mbo Yesu, elicha eli engelosi yamuwa nasiri okhuverekhwa.
Yesu Ayirwa mu Etemperi
22Olu enyinga yola eyokhwelavia nga vienyekhana mumalako ka Musa, vamulecha Yerusalemu okhumuwana khu Omwami, 23nga liaandikwa mumalako ka Omwami, “Wulimwana wamberi omusoliri achia okhulangwa omuchwenufu khu Omwami.” 24Nundi vachia okhuchusa esitiso okhulondana nelako lia Omwami, amburuku chiviri namwe amawusi kaviri amaere.
25Khanu kaliwo omusacha mu Yerusalemu, owalangwa Simoni, ne kali omulungi nundi omusuvirwa, ne kali kalindirira owunanuli wa Israeli, ne Roho Muchwenufu kali naye. 26Ne Roho Muchwenufu kali kamufunulira mbo sialifwa nachawona Kristo wa Omwami tawe. 27Ni kemiriywe nende Roho, kacha mu Etemperi; nolu avewusi va Yesu vamulecha okhumukholera ngamalako kawola, 28kamuwukula mumakhono kake kafumia Nyasaye ne kawola,
29“Omwami, khanu lekha omukhalavani wuwo achie nomulembe, okhulondana nende ekhuwa lilio.
30Sikira emoni chiange chiwene owuwonia wuwo,
31Owu ochekekhire emberi wavanju vosi,
32owulafu wokhufunula Avachali Avayahudi,
Nende owa okhulecha owukhumi khuvanju vavo Israeli.”
33Papa wuwe nende mayi wuwe vawuka khu akawolekha khumwana. 34Ne Simioni kavawa ekhavi, ne kawolera Maria mama wuwe,
“Wona, omwana ono aliwo khulwa okhukwa nende okhwinyokha khwavangi mu Israeli, ne khulwa esimanyiro esilecha okhuyingana,
35Olung'esi luchia okhukhuwuna mumwoyo kukwo wesi, mbo ove numanya enganakani chiri mumioyo kiavanju.”
36Kaliwo omunabii wesikhasi mbo Ana omukhana wa Fanueli owekholo ya Asheri, owali nachanakanire mumiaka. Omukhasi ono kamenya nomusacha wuwe emiaka Saba okhuchula muwukima wuwe, 37ne nga namulekhwa khulwemiaka amakhumi munane nakine. Sikachulakho mu Etemperi tawe, kasalanga, nikenamira Nyasaye, ni keyima esiokhulia mumasayo esiro nesiteche. 38Kenyokha esa echio kakhupira Nyasaye ochio, kawola amakhuwa khumwana oyo khuvanju vosi avalindiriranga owunanuli wa Yerusalemu.
Okhukoola Nazareti
39Olu vali nivakhakhola kosi akalondana nende amalako ka Omwami, vakoola Galilaya mutookho liawe elia Nazareti. 40Omwana kakhula kanyola amaani, kechula owukesi, ne embavasi chia Nyasaye chiali naye.
Omwana Yesu mu Etemperi
41Avewusi vave vachianga Yerusalemu wulimwaka khusao lia Pasaka. 42Olu Omwana kali emiaka ekhumi nakiviri vachia vosi okhulondana nende omulukha. 43Olu esao liawa vanja okhukoola engo, omwana Yesu katong'a Yerusalemu navewusi vave sivamanya tawe, 44vaparanga mbo ali musituma siavanju ava vali navo. Vakenda olukendo lwa olutalo, vamala vanja okhumutakha muvekho nende muvamanyikhire, 45nolu vamukhaywa, vakoola Yerusalemu nivamutakhatakha. 46Nichiakhawa endalo chitachu vamunyola mu Etemperi nikekhaye nende avekesi navachekeresa, nende okhuvacheva amacheva. 47Ne vosi avamuwulira vawuka khulwowukesi wuwe nende amachipu kake. 48Olu vamuwona vawuka, ne mayi wuwe kamuwolera, “Mwana wange, ochukholire ochio sikira sina, papa wuwo nange khukhutakhirenge olukali.” 49Kavacheva, “Mundakhirenge sikira sina? simumanyirekho mbo nenyekhana mbe munju ya Papa wange tawe?” 50Navo sivamanyirisa nga kali navawolera tawe.
51Kamala kakoola navo Nazareti, ne kava omuchekefu, naye mayi wuwe kavikha amakhuwa ako mumwoyo kukwe. 52Yesu kametekha muwukesi nende eva, ne kasimwa ni Nyasaye nende avanju.
Àwon tá yàn lọ́wọ́lọ́wọ́ báyìí:
Luka 2: LNTPP
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©The Bible Society of Kenya, 2024
