Luka 1
1
123 Owoluyali Theofilo: Nga avangi vacha alala amakhuwa kevinju viekholekha mwifwe. 2Vaandika aka khwawolerwa nende avo avawona evinju vino okhuchula mukhwanja nende avo averwacha ekhuwa. 3Viawonekhana owulayi khwise, ninakhalonderera evinju khulwenyinga chiavicha, khokhuandikire owulayi ewe Omukosi Theofilo. 4Khola lino khomanye owang'ali wosi okhulondana nende siawulisinju esivakhwekesa.
Eliwulwa lia Yohana Omuvatisi Lichumbulwa
5Munyinga chia Herode, omuchuki wa Yudea, kaliwo omukuhani owalangwa Sakaria, owomukanda kwa Abija. Ne kali nomukhasi, owolwiwulo lwavakhana va Aroni, nelicha mbo Elisabeti. 6Ne vombi vali avalungi emberi wa Nyasaye, ne vakendanga mumalako kosi nende muvirakiro via Omwami nivawuma esikha. 7Nausa sivali nomwana tawe esikira Elisabeti kali omukumba, ne vombi vali avakofu.
8Olu kali nakhola emilimo kiowukuhani emberi wa Nyasaye muwasio womukanda kwawe, 9okhulondana nende elako liowukuhani, Sakaria kachoolwa nekura, okhwingira mu Etemperi lia Omwami achiine owuvani. 10Esituma siavanju siali erwanyi nivasaala evise viokhuchiina owuvani. 11Engelosi ya Omwami yamuwonekhera, yema ewuleka enungi yowaali wokhuchiina owuvani. 12Olu Sakaria kayiwona, owuchi wamutira. 13Nausa engelosi yamuwolera, “Ocharia tawe, Sakaria, amasayo kako, Nyasaye awuliye ne omukhasi wuwo Elisabeti achia okhukhwiwulira omwana omusoliri, nochia okhumulanga Yohana. 14Ochia okhuva nowusangafu owukali, ne avangi vachia okhwekhoyera eliwulwa lilie. 15Achiakhuva omukhongo emberi wa Omwami. Sialinywakho edivai namwe amalwa ta, achia okhwichuswa Roho Muchwenufu nali munda mwang'ina. 16Achia okhukoosa avanju avangi Avaisraeli khu Omwami Nyasaye wawe. 17Achia okhuchangirira Omwami nikemirirwa namaani nende roho wa Elia. Achia okhukoosa emioyo kia ava papa khuvana vawe, ne avesireka vave nende emanya liavalungi, nende okhuchekekhera Omwami avanju vave.”
18Sakaria kawolera engelosi, “Manya njie lino? Esikira ndimukofu, ne omukhasi wange achianakanire mumiaka.”
19Engelosi yamuchipa, “Nise Gabrieli owemanga emberi wa Nyasaye, njumirwe nomalome nawe, ekhulechere amakhuwa malayi kano. 20Ne wona, ochia okhuva masiru okhwola ngevinju vino vichia okhwekholekha, sikira susuviye amakhuwa kange akachia okhwekholekha muvise viako tawe.”
21Avanju vali valindire Sakaria, ne vawuka khulwa okhukhinda khukhwe mu Etemperi. 22Olu kachula erwanyi, sikanyala okhuvalomalomakho tawe, ne vapara mbo awene amalola mu Etemperi. Ne kavekesa evimanyiro ne katong'a masiru.
23Olu evise vivie eviokhukhalavana viawa, kachia engo wuwe. 24Enyinga echio nichiakhavicha omukhasi wuwe Elisabeti kaera enda, ne khulwa emiesi kichanu kekisa, nawola, 25“Mbao Omwami kakholeye munyinga echi kanengeye okhunjusakho esoni muvanju.”
Eliwulwa lia Yesu Liwolwa
26Mumwesi kwa sita engelosi Gabrieli yachumwa ni Nyasaye okhuchia mwitookho lilangwa Nazareti ya Galilaya, 27khumukima owali nasereywe ni Yosefu, owenju ya Daudi; ne omukhana mukima oyo kali Maria. 28Engelosi yamwichira, yamuwolera, “Omulembe kuve nawe, ewe owekhavi, Omwami alinawe!”
29Kesindukha olukali khumakhuwa ako, kecheva achi kuno mulembe kwembia sina, ne kakanakana omulembe kuno kuvaye kuchie. 30Engelosi yamuwolera, “Ocharia tawe, Maria, onyoye embavasi emberi wa Nyasaye. 31Wona, ochia okhuera enda mana wiwule omwana omusoliri, nochia okhumulanga elicha mbo Yesu. 32Achia okhuva omukhongo, achia khulangwa Omwana wa Nyasaye Mukali, Omwami Nyasaye achia okhumuwa esisala siowuchuki sia simwana Daudi. 33Achia okhuchuka enju ya Yakopo emiaka kiosi, Owami wuwe siwuchia okhuwa tawe.”
34Maria kawolera engelosi, “Kachiakhuva kachie nese mbuma omusacha?” 35Engelosi yamuchipa, “Roho Muchwenufu achia okhukhwichira nowunyali wa Owamukulu Muno wuchia okhukhwikhira, nomwana ochiakhwiwulwa analangwa Omuchwenufu, Omwana wa Nyasaye. 36Wona, omwikho wuwo Elisabeti muwukofu wuwe aerire enda ne yiri emiesi sita, oyu avanju valanganga okhuva omukumba. 37Kho, nende Nyasaye liwumao elichanyalikha.”
38Maria kawola, “Wona, ndimukhalavani wa Omwami, lekha kekholekhe khwise ngowoye.” Ne engelosi yawao.
Maria Akeniya Elisabeti
39Munyinga echio, Maria kecheresa lwangu kachia okhukeniya Elisabeti omwikho wuwe musialo sievikulu mwitookho lia Yuda, 40ne kengira munju ya Sakaria, ne kakhesa Elisabeti 41Ne Elisabeti olu kawulira omulembe kwa Maria, omwana kefulukunya munda wuwe ne kechuswa Roho Muchwenufu. 42Kawola nomwoyo mukali, “Oli nekhavi muvakhasi, nomwana oli munda wuwo wekhavi! 43Nise anu mbo ng'ina ya Omwami wange kache ewange? 44Wona, olu mbuliye omulembe kukwo, omwana munda wange afulukunyire nowusangafu. 45Ali nekhavi, oyo owasuvira mbo aka Omwami kawola khuniye kachia okhwekholekha.”
Olwembo lwa Maria olwa Efuma
46Maria kawola,
“Omwoyo kwange kufumia Omwami,
47eroho yange yisangala mu Nyasaye Omuwonia wange,
48esikira amuweneye embavasi omukhalavani wuwe owokhwetutuya.
Okhuchulira akhanu enjiwulo chiosi chichia okhunanga owekhavi,
49okhuvera oyo oli wowunyali kakholeye evinju evikali,
elicha lilie echwenufu.
50Esisa sisie siri khwavo avamuria okhuchula khulwiwulo okhuchia khulwiwulo lundi.
51Kekesise owunyali nomukhono kukwe,
asalanisie avesireka munganakani chiemioyo kiawe,
52kesise avamaani okhuchula khuvisala viawe viowami, ne akinguye avetutuya.
53Kekuchia avenjala nende evinju vilayi,
avayinda avalekhire makhono merere.
54Kayeta omukhalavani wuwe Israeli, nakhewuliranga esisa sisie.
55Nga kalomaloma khu avakuka vefwe,
khu Abrahamu nende khulwiwulo lulwe lwa wuli lwosi.”
56Maria kamenya naye emiesi kitachu kho kamala kakoola engo wuwe.
Eliwulwa lia Yohana Omuvatisi
57Khanu evise viola evia Elisabeti okhwiwula, kewula omwana omusoliri 58Ne avamenywa nende avekholo yiye olu vawulira mbo Omwami amuweneye esisa esikali, vekhoya naye.
59Olutalo lwa munane vacha okhukheva omwana, ne vakhamukulikhire elicha lia papa wuwe mbo Sakaria. 60Ne ng'ina kakania “Tawe, mulange mbo Yohana.” 61Vamuwolera, “Awumao omunju mumbia yino nelicha elio ta.” 62Khanu vekesa papa wuwe nevimanyiro, nivamucheva awole elicha eli kenya omwana alangwe.
63Kasava etakula liokhuandikakho, ne kaandika “Elicha lilie nje Yohana.” Vosi vawuka. 64Awene nawene omunwa nolulimi viakangulukha, ne kalomaloma nafumia Nyasaye. 65Owuchi watira avamenywa vosi. Amakhuwa kano kawolwa musialo sievikulu esia Yudea. 66Vosi avawulira amakhuwa ako, vakapara mumioyo kiawe nivawola: “Omwana ono achiakhuva wembia sina?” Esikira omukhono kwa Omwami kwali naye.
Owunabi wa Sakaria
67Sakaria papa wa omwana nikechuye Roho Muchwenufu, kachusa owunabii nawola,
68“Ali nekhavi Omwami Nyasaye wa Israeli,
akendereye nokhunanula avanju vave.
69Akinguye olwika lwowuwonia khwifwe
munju yomukhalavani wuwe Daudi,
70Nga kawola nomunwa kwavanabii vachwenufu
vave okhuchula khale,
71Mbo khuwoniwe okhuchula khuvasiku vefwe,
nende mumukhono kwavo vosi avachuviyira, 72okhuana embavasi echi kalaka khu avakuka vefwe, nende okhwichulira endakaano yiye enjwenufu.
73Esiechuvo esikechuvira papa wefwe Abrahamu,
74achuwa mbo nikhuva avakangulule okhuchula mumakhono ka avasiku vefwe kho khunyale okhumukhalavanira nikhuwuma owuchi,
75muwuchwenufu nende muwulungi emberi wuwe enyinga chiosi echiowulamu wefwe.
76Ewe, mwanewe, ochia okhulangwa omunabii wa Nyasaye Mukali.
Esikira ochia okhuchangirira Omwami okhumucheresera engira chichie,
77okhuana emanya liowuwonia khuvanju vave
khukhulekhera khwowoni wawe.
78Okhuvichira khusisa sia Nyasaye wefwe,
olu olutalo lunakhachwanukhire okhuchula amukulu,
79okhukhosera avo avekhala musirima nende musisiko siefwa,
okhwimirira ekenda liefwe mungira yomulembe.”
80Omwana kakhula kanyola amaani muroho, ne kava musichimi okhwola olutalo olu kawonekhera Israeli.
Àwon tá yàn lọ́wọ́lọ́wọ́ báyìí:
Luka 1: LNTPP
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©The Bible Society of Kenya, 2024
