Walawi 2
2
Kulaviya tambiku za viboga
1Muntu yoseri pakajega tambiku za viboga kwa Mtuwa Mlungu, tambiku ayi iweri ya ubumu unama. Yomberi hakautuliri lipaki lya mizyetuni pamuhera na ubani, 2shakapanu hakawajegeli wana wa mtambika Aruni. Mtambika hakatoli liwoku limu lya viboga vya ubumu unama awu yauwera na lipaki lya mizyetuni pamuhera na ubani na kuwulunguziya pashitalawanda sha kutambikira, su iweri handa seemuu ya liholu mushitalawanda sha kutambikira. Na tambiku ayi hayimuherepeziyi Mtuwa Mlungu. 3Viboga vya tambiku vyavisigaliti haviweri vya Aruni pamuhera na wana wakuyi. Ayi hayiweri seemuu nanagala nentu ya tambiku yakalavilirwa Mtuwa Mlungu kwa motu.
4Handa muntu kankulavilira Mlungu tambiku ya viboga yawaibanika mushifinja, tambiku ayi hayiweri ya mabumunda yawalekera ndiri simika ya ubumu yayihanganywa na lipaki lya mizyetuni, ama maandazi yagalekerwa ndiri simika ama kutulirwa lipaki. 5Payiwera tambiku yagulaviya iwera ya mabumunda gawabanika mushiwiga, ayi hayiweri ya ubumu unama yauhanganyikitwi na lipaki lya mizyetuni pota kulekera simika. 6Mabumunda aga hawagamegi vipandi vipandi na kuvitulira lipaki mushiwiga, ayi hayiweri tambiku ya viboga.
Ntambu yingi ya tambiku ya mabumunda
7Handa tambiku yaku yagulaviya iwera ya viboga vyavitelekitwi mushiwiga, ayi hayiweri ya ubumu unama yaulekerwa lipaki. 8Hagujegi tambiku ya viboga yainyawitwi kwa vintu avi kulongolu kwa Mtuwa Mlungu, su mtambika hakaijegi kushitalawanda sha kutambikira. 9Mtambika hakatoli seemu ya tambiku ayi payiwera ndo tambiku ya liholu na kuyilunguziya pashitalawanda sha kutambikira na kununkira kwakuyi hakumuherepeziyi Mtuwa Mlungu. 10Seemu ya viboga vya tambiku vyavisigariti haviweri vya Aruni pamuhera na wana wakuyi, viboga avi haviweri vinanagala nentu ya tambiku yawamlavilira Mtuwa Mlungu kwa motu.
11Tambiku yoseri ya viboga yagumjegera Mtuwa Mlungu, ifiruwa iweri inyawiwi pota simika, tembera kwahera ulekeziwu nakamu kulekera simika ama lwashi mutambiku yawamlavilira Mtuwa Mlungu kwa motu. 12Guweza kumjegera Mtuwa Mlungu viboga vyaku vya kwanja kukamala kuwera tambiku. Kumbiti nagulavilira mushitalawanda sha kutambikira handa ununkira wa kuherepeziya. 13Gutuli munu mutambiku zaku zoseri za viboga. Nakamu naguleka kutula munu mutambiku zaku za viboga, toziya munu guwera lilangaliru lya lipatanu lyakatenditi Mlungu pamuhera na mwenga. 14Pagumlavilira Mtuwa Mlungu tambiku ya mikunguwi ya viboga vyaku vya kwanja kulera, hagulaviyi ayi payiwera wailunguziya nakamu mumotu, payiwera mumikunguyi yakuyi, ama hagugalaviyi mabumunda yagabanikitwi na yawayinyawiti kwa nganu yawasyagiti. 15Hagutuli lipaki lya mizyetuni na kutula ubani, ayi iwera tambiku ya viboga. 16Mtambika hakayilunguziyi nakamu seemu ya tambiku ayi ya viboga yayiponditwi pamuhera na lipaki na ubani wakuyi woseri, viweri tambiku ya kulihola, ayi iwera tambiku yawamlavilira Mtuwa Mlungu kwa motu.
Àwon tá yàn lọ́wọ́lọ́wọ́ báyìí:
Walawi 2: PBV
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
The Bible version in the Pogoro Language. @The Word for The World International and Pogoro Language translation. All rights reserved.