Ntendwa 5
5
Utiizi wa Anania na Safila
1Nekuwa na mntu yumwe etangwae Anania na mkaziwe Safila wakataga mnda wao inga wezwao. 2Akini Anania na mkaziwe nee wevana kufisa hantu ha hea, na hea yekusigaayo wakayegaa kwa waagiiwa. 3Nee Petulo akamuuza, “Anania, kwambwai kumuekea Ibiisi kakwengia mwe moyo wako na kumtiiya Muye wa Muungu kwa kufisa hantu ha hea wekupatazo kwa kuutaga uda mnda? 4Kisingi khuzati kutaga nediwa mai yako na wekutagaho hea nee nzako na uzigosoe ukundavyo, kwa mbwai kweamwiia mwe moyo wako kugosoa mbui inga inu? Kwekumtiiya mntu iya kumtiiya Muungu!” 5Ahoaho Anania ekutegeezaho ayo, akagwa asi akauya na nyuma wantu wose wekutegeezaho mbui iyo wakaogoha muno. 6Wabwanga wakeza wakauzengeteza sanda mwii wakwe na kuwegaa chongoi na kuugea mwe mbia.
7Yekwembokaho masaa matatu ivi, mkaziwe akengia mda nyumbani kwesiho kumanya dodose dekulawiado. 8Petulo akamwamba, “Nambia iki nee kima cha hea mwekupatacho kwa kutaga uda mnda?”
Yee akatambaisa, “Nee ichoicho.”
9Nae Petulo akamuuza, “Kwambwai kwevana na muumeo kumgeeza Muye wa Zumbe? Tegeeza wada wantu wekuitao kumgea mwe mbia muumeo, isasa waaho he uvi na wendawakudoe wee nawe!” 10Ahoaho Safila akagwa hemeso ya miundi ya Petulo akauya na nyuma. Wada wabwanga wekwengiaho wakambwiiya kasia kae kuuya na nyuma, ivyo wakamlavya chongoi wakamgea mwe mbia hehi na muumewe. 11Zumwezumwe da wantu wamzumiiyao Klistu na wantu watuhu wakengiwa ni maatu wekutegeezaho mbui iyo.
Waagiiwa wahonya wantu wangi
12Naho waagiiwa wa Yesu nee wagosoa utangio na viozo vingi gatigati ya wantu. Wantu wamzumiao Yesu newawa wakakintana hamwe mwe ukumbi da Seemani. 13Wantu ambao khawekumzumia Yesu newawa wakawatogoa muno. Hata ivyo khahana ambaye kageeza kuwatongea kwaajii ya kuogoha. 14Akini wantu wekumzumiiyao Zumbe Yesu wakagenyea muno wagosi kwa wavyee. 15Kuawana na yada wekugosoayo waagiiwa, wantu wakawegaa watamu baabaani na kuwagoneza uwanga ya sazi na javi, ili Petulo akemboka walau kizui chakwe kiwabwiie wamwe wao kiwahonye. 16Wantu wangi wakabua kulawa mwe mizi ya khandakhanda ya Yelusalemu wakawaeta watamu wao na wada wekuwaho na mazaiko nawo wose wakahonywa.
Waagiiwa wasuumizwa
17Naho Mviki Mkuu na wenziwe wekuwao wa zumwezumwe da Masadukayo wa hantu hada wakawaonea kinyuu waagiiwa wa Yesu. 18Wakawagwia waagiiwa na wakawengiza mwe geeza. 19Akini kio kiakia mndima wa uwanga kwa Muungu akeza akavugua nyuvi kuu za geeza, akawalavya chongoi akawamba, 20“Hitani mkagooke he Nyumba ya Muungu mkawambe wantu mbui zose za ugima unu.” 21Naho waagiiwa wa Yesu wakaita he Nyumba ya Muungu keokeo da mtungaihu, wakavoka kuhinya wantu. Mviki mkuu na weziwe wekubuaho waketanga mkonga mkuu wa wadaa wa Isilaeli, wakawagiiya wagoji wa geeza wawaete wagiiwa. 22Akini wada wagoji wekuagiiwao wekubuaho uko khawokuwabwiia waagiiwa mda mwe geeza, wakauya na kuwamba ida mbui. 23Wakamba, “Tibwiiya geeza divugalwa kia phande na wagoji wainda he nyuvi. Akini tekuvuguaho nyuvi khatekumbwiiya mntu yoyose mda ndani!” 24Waviki wakuu na mkuu wa wagoji wa Nyumba ya Muungu wekusikiaho mbui iyo, newawa na matumatu wakauzana ni viivihi mbui izi zendavyoziwe. 25Mntu yumwe akabua na kuwamba wada wantu mwekuwageao mwe geeza, “Isasa waumo he Nyumba ya Muungu wawahinya wantu!” 26Aho mkuu wa wagoji wa Nyumba ya Muungu hamwe na wantu wakwe wakaita he Nyumba ya Muungu kuwaeta waagiiwa. Akini wakawadoa phahoe kwaviya wawaogoha wantu wasekweza wakawatambikia maiwe.
27Wakawegaa wada waagiiwa na kuwagoosa hemeso ya mkonga, na Mviki Mkuu akawauza, 28“Tiwaemeza muno msekuhinya wantu kwa zina da Yesu, isasa mahinyo yenu myaambaza hose mwe mzi wa Yelusalemu na mwakunda mtietee phome ya mntu uyu uwanga yetu!”
29Petulo na waagiiwa watuhu wakatambaisa, “Yakudigwa timtegeeze Muungu na khio wantu. 30Muungu wa baba zetu nee kamyuyusa Yesu mwekumkomae kwa kumgong'ondea he mhamba. 31Muungu nee kamtogoa na kumtunya muno, kuwa mgookezi na mwohozi ili awambize wantu wa Isilaeli wahituke waeke mavigaviga yao. 32Swie ni wavuhuzi wa mbui izo kwa meso yetu wenye hamwe na Muye wa Muungu ambae Muungu kawekha wada wamtegeezao.”
33Wada wantu wa uda mkonga wekusikiaho ayo. Wakakimwa muno hata wakakunda kuwakoma wada waagiiwa. 34Akini Falisayo yumwe, etangwae Gamalieli ambae nee ni mhinya wa miko nae atunywa muno hemeso ya wantu wose, akagooka hemeso ya uda mkonga, akakunda wada waagiiwa wa Yesu walavigwe chongoi, 35naho ne awamba wada wantu wa mkonga, “Nywie Waisilaeli wezwangu, mamakhanyeni mwendavyo muwagosoee wantu awa. 36Kwaviya kisingi chekwembokacho nee kulawia mntu yumwe zina dakwe Teuda, akawamba kuwa yee ni mntu mkuu na wantu mia nne wakawa hamwe nae. Akini nee akomwa naho wandima wakwe wose wekumzumiiyao wakabadana na ndima yakwe yose ikaheea aho. 37Vituhu kisingi kia cha kutaaziwa wantu, akalawiya Yuda wa mzi wa Galilaya uyu nae kawasongeza wantu wakambasa na kumzumiiya, akini nae pia nee akomwa na wandima wakwe, nao wakabadana. 38Isasa nawamba mwe mbui inu mwesekuwagosoa dodose wantu awa wabadeni, inga idi wagosoacho chalawa kwa mntu chendachage, 39akini inga chalawa kwa Muungu khamna mdahe kuwakindia, naho mwenda mwebwiie khazumiiya na mwahigana ni Muungu!”
Wantu wose wa mkonga wakevana na mbui ya Gamalieli. 40Naho wakawetanga waagiiwa wa Yesu wakaamuiwa watoigwe ngoda na kuwaemeza wesekuhinya kwa zina da Yesu wekubindaho wakawabada waite. 41Wada waagiiwa wakaawa chongoi ya uda mkonga, wakawa na nyemi kwaajii newawa wataaziwa kuwa yakundigwa kusuumizwa kwaajii ya zina da Yesu. 42Khawekubada kuhinya wantu na kuwabiikia Mbui Yedi kuwa Yesu nee Klistu. Nee waendeea kuhinya na kubiikia kia msi he Nyumba ya Muungu na mwe nyumba za wantu.
Àwon tá yàn lọ́wọ́lọ́wọ́ báyìí:
Ntendwa 5: NTBBL2025
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
The New Testament in Bondei @The Word for The World International and Bondei Language translation, 2025. All rights reserved.