Ntendwa 6
6
Waambizi mfungate wa wagiiwa
1Mwe misi izo ndima ya taazia ya wahina wa Yesu nee ikagenyea, kukalawiiya minung'uno gati ya Wayahudi watamwiao kigiiki na wada watamwiao Kiebulania. Wada watamwiao Kigiiki nee wanung'unika kuwa wavyee wao wekufiwao ni wagosi wajaigwa mwe upangaji wa khande ya kia msi. 2Kwaivyo waagiiwa kumi dimwe na mbii ne wawetanga wahina wose na kuwamba, “Khio vitana swie tibade ndima ya kubiikia mbui ya Muungu ili tiangadike na upanganyi wa khande. 3Ivyo wandugu, saguani wantu mfungate mwekuvuhuziwao kuwa ni wedi, wekuongoewao na Muye wa Muungu na umanyi, aho nee tendaotiwaike mwe ndima iyo ya upangaji wa khande. 4Akini, swie tendatiwe na ndima ya kumvikia Muungu na kubiikia Mbui ya Muungu.”
5Mbui iyo ikawatamia wantu wa zumwezumwe dose dekumzumiado Klistu, wakawasagua Sitefano mntu mwenye uzumizi mkuu na kuongoewa na Muye wa Muungu na Filipo na Polokolo na Nikanoni na Timoni na Palamena na Nikolao wa Antiokia ambae kisingi kimwe ne kengia mwe dini ya Kiyahudi. 6Wakaetwa hemeso ya waagiiwa, nao wakawaikia mikono na kuwavikia.
7Nee Mbui ya Muungu ikatendesa kweambazwa na wekumzumiao Yesu uko mwe mzi wa Yelusalemu wakagenyea muno na waviki wangi wakazumia.
Sitefano agwiwa
8Sitefano kajaiwa muno na Muungu, akamwekha udaho hata akagosoa vihii na viozo gatigati ya wantu. 9Akini wantu watuhu wakalawia ili wahigane na Sitefano. Wamwe wao ne ni wantu wa Nyumba ya kuvikia Wayahudi yetangwayo, “Nyumba ya wantu hulu” Wayahudi awo nee wakalawia Kilene na Alekizandilia na watuhu nee wakalawia Kilikia na Asia. 10Akini khawekudaha kumvota Stefano kwaajii ya umanyi wakwe na kwaajii ya uda Muye ekumuongoeae kisingi ekuwaho akatamwiiya. 11Kwaiyo wakawekha hea wamwe wa wantu wambe uhokho, “Timtegeeza akamba mbui ya kuhigana na Musa na kuhigana na Muungu!” 12Kwaajii iyo wakawasongeeza wantu na wadaa na wahinyi wa miko, naho wakamwezea Sitefano na kumgwia na kumueta hemeso ya wantu wa mkonga mkuu wa Wayahudi. 13Wakawaeta he mkonga wekugombekaho uhokho wakamba, “Mntu uyu khaeka katu kugombeka mbui za ufyaimu wa Nyumba ng'azi ya Muungu na miko ya Musa. 14Kwaviya timtegeeza akagombeka uyo Yesu wa Nazaleti endaabanange Nyumba ya Muungu na kuhitua mazweeya tekuyahokeayo kuawa kwa Musa!” 15Wose wekuwaho mwe kia chekao cha uda mkonga wakamfuia meso Sitefano, wakoona cheni chakwe king'aa inga mndima wa uwanga kwa Muungu.
Àwon tá yàn lọ́wọ́lọ́wọ́ báyìí:
Ntendwa 6: NTBBL2025
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
The New Testament in Bondei @The Word for The World International and Bondei Language translation, 2025. All rights reserved.