Ufaru 8
8
Ukosu wi iro'i i gbain
1Agba A̱sula̱ a cuwan ta̱ na̱ Nuhu oɓolo ni inama yu una ni inama yu u'wa i na i da̱na̱i oɓolo na̱ a̱yi a̱tsuma̱ a wantsu'un. Reve u zuwa upepu u lapa o uvaɗi, ɗaɗa mini me temei a̱ sa̱da̱sa̱. 2Reve a̱ ɓa̱ru esu a̱ mini a̱ a̱ru'un a mala na̱ na̱ntsu mini va zuva, a̱vu a lyawa iro'i. 3Reve mini ma̱ sa̱da̱sa̱ ben o uvaɗi. Ana a yuwain rana ukpaku na̱ kupoton reve mini ma jiba. 4Reve o urana wa kupa na̱ a̱za̱ e cindere o woto we cindere wantsu'un u da̱nu a masasan ma Ararat. 5Reve mini me reme mejebe hali a̱ tyo woto wa kupa. O urana wa nyan o woto'o, ɗaɗa icombo yi nsasan yu uta̱i a alanga.
6O ukosu wu urana wa amunga, reve Nuhu kpa̱tu'wa̱ usowoto wu upepu u na u yuwain a wantsu'un. 7A̱vu u lyawa aakakan, reve u da̱na̱ a agara hali she ana mini mo ukwain o uvaɗi. 8Reve u lyungu muɗa, we ene ko mini ma jiba ta̱ e iɗa. 9Agba muɗa'a ma̱ tsura̱ uba̱ta̱ u na wee tele shi, reve u ka̱mba̱ uba̱ta̱ wa̱ yi a wantsun, adama a na mini ma̱ shi ta̱ ma buwa o uvaɗi suru. Reve u canana ukere wa̱ yi a alanga a̱vu u reme yi u ka̱mbuwa̱ yi pe a wantsun uba̱ta̱ wa̱ yi. 10Reve u da̱shi piri ayin e cindere, ɗaɗa u lyunguwisa̱i muɗa'a waru diga pe a wantsu'un. 11Reve muɗa'a ma̱ ka̱mba̱ nu ulivu, o una̱ wa̱ yi gba na̱ a̱a̱vu'un a̱ zetun o uta̱nu a na u kasai gogo. Ɗaɗa Nuhu revei mini ma jiba ta̱ o uvaɗi. 12Reve u da̱shi piri ayin e cindere waru, reve u lyunguwisa̱ muɗa'a, agba u ka̱mbisa̱ uba̱ta̱ wa̱ yi waru shi.
13O urana wu ufaru, o woto wu ufaru, ana Nuhu rawai a'wan ukpakuta̱li na̱ za ta̱ (601), reve mini mo ukwan. A̱vu Nuhu kpa̱tu'wa̱ ikpa̱ta̱tsu i wantsu'un, a̱vu u ka̱lyuwa̱, reve we ene iɗa e 'yewushe. 14O urana wu ushin na̱ a̱za̱ e cindere o woto we ire, reve iɗa i 'yewe suru suru.
15A̱vu A̱sula̱ a damma Nuhu, 16<<Uta̱ a̱tsuma̱ a wantsu'un, a̱vu na̱ ka va̱ wu, oɓolo no olobo a̱ wu na̱ a̱ma̱ci e le. 17Uta̱a̱ waru ili i wuma i na i ri oɓolo na̱ a̱vu: nnunu, ni inama, ni ili i na i tsu ka̱ta̱pa̱ e iɗa. Uta̱a̱ le tsa̱ra̱ a matsan a yuwan a̱bunda̱ lon a bala a̱tsuma̱ o uvaɗi.>> 18Ɗaɗa Nuhu uta̱i oɓolo na̱ ka va̱ yi no olobo a̱ yi na̱ a̱ma̱ci a̱ muwun ma̱ yi. 19Inama suru, ni ili yi ika̱ta̱pu suru, na̱ nnunu suru, ili i na i ri e ijinga̱ɗu o uvaɗi suru, o uta̱ ta̱ a wantsu'un ili biti ni icu'un i le.
20Reve Nuhu suwaa A̱sulazuva masa'a, reve u tara a̱tsuma̱ e inama i sa'ani suru icu'un icu'un, na̱ nnunu n sa'ani, reve u kula̱to le suru, tsa̱ra̱ wo o'wo kucci. 21Reve ana A̱sulazuva a uwwai ma̱guru, a̱vu u damma o okolo a̱ yi, <<M buwa a̱ da̱shi yuwaan iɗa una̱ adama a vaɗilima̱ shi. Ko na wo o'woi majiyan mo okolo ma̱ yi iwuya i ɗa diga a̱ tsulobo tsa̱ yi. Agba waru ma̱a̱ da̱shi kototo ili i wuma suru cine n yuwain ɗe shi.
22<<Hali uvaɗi u koto, mantsa ma̱ ca̱'a̱n na̱ mantsa mo ugasa, uta̱nu nu usuɗuwu, lyushi ni irana, urana na ayin, oo koto shi.>>
Àwon tá yàn lọ́wọ́lọ́wọ́ báyìí:
Ufaru 8: TSW
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©️2025 Language Development and Translation Initiative (LDTI)