Ufaru 7
7
Iro'i i gbain
1A̱vu A̱sulazuva a damma Nuhu, <<Vu uwa a wantsu'un a̱vu na ama o u'wa a̱ wu suru; adama a na a̱vu a̱ nde'en ɗa me enei za va̱ a̱ɓula̱ a mantsa ma nda. 2A̱vu vu tafa inama i sa'ani suru, a̱na̱wun no ogono ejere re ba̱ta̱ cindere, reve waru vu tafa inama yi idaba a̱na̱wun no ogono. 3Nnunu n tsu'yan waru, vu tafa ejere re ba̱ta̱ cindere a̱na̱wun na̱ vali, adama icu'un i le i da̱na̱ lo o uvaɗi suru. 4Adama a na rana cindere ɗa buwai reve n zuwa o ro'o a̱tsuma̱ o uvaɗi, rana amunga na ayin amunga; waru ili i wuma i na suru n yuwain n ta̱ kimusa̱ le o uvaɗi.>> 5Reve Nuhu yuwan ili i na A̱sulazuva a damma niyi suru. 6A'wan a̱ Nuhu a'wan ukpakuta̱li (600) a ɗa u da̱na̱i na̱ a̱yi, ana mini ma gbain ma̱ ta̱wa̱i a̱tsuma̱ o uvaɗi. 7Nuhu na̱ ka va̱ yi oɓolo na̱ muwun n le, oɓolo na̱ a̱ma̱ci e le a ɗa a uwai a wantsu'un, tsa̱ra̱ a la'a. 8Inama i sa'ani na̱ a̱za̱ e idaba, na̱ nnunu ni ili yi ika̱ta̱pu iɗa suru, 9ejere re, a̱na̱wun no ogono ɗa a uwai a wantsu'un oɓolo na̱ Nuhu, cine A̱sula̱ a damma niyi. 10Ana a yuwain ayin e cindere ɗaɗa iro'i i gbain i cipa̱i o uvaɗi.
11A a'wan o ukpakuta̱li u wuma wa̱ Nuhu, o urana wa kupa na̱ a̱za̱ e cindere o woto we ire, o urana u ndolo u ɗa esu a̱ mini a̱ a̱ru'un a mala suru o ɓosoi, reve na̱ntsu va zuva kpa̱tu'wa̱. 12O ro'oso ta̱ o uvaɗi hali rana amunga na ayin amunga. 13O urana u ɗaɗa gan Nuhu no olobo a̱ yi, Shem na̱ Ham na̱ Jafe, na̱ ka va̱ yi, na̱ a̱ma̱ci a ta'atsu o olobo a̱ yi a uwai a wantsun. 14Waru a uwa ta̱ oɓolo na̱ cu'un vi inama yu una suru na̱ cu'un vi inama yu u'wa suru, na̱ cu'un vi inama yi ika̱ta̱pu suru, waru na̱ cu'un vu nnunu n tsu'yan suru, na̱ cu'un vi ili ye evelu suru. 15A uwa ta̱ a wantsu'un oɓolo na̱ Nuhu, ili i wuma i na i ri na̱ wivuwun ejere re. 16Aza a na gba a uwai, vali na̱ a̱na̱wun e ili i wuma suru, a uwa ta̱ cine A̱sula̱ a dammai. Reve A̱sulazuva a̱ kpa̱to le pe.
17Mini ma yuwan ta̱ rana amunga e iro'i a̱tsuma̱ o uvaɗi, reve mini'i u yuwan a̱bunda̱, reve u 'ya̱sa̱n wantsu'un zuva, reve wo o'wo ɗe zuva vu uvaɗi. 18Mini'i ma yuwan ta̱ ucira reve u yuwan a̱bunda̱ o uvaɗi; reve wantsu'un wo o'wo zuva mini'i. 19U yuwan ta̱ a̱ru'un, hali u lyuwa nsasan n na n la'ai uga'an o uvaɗi suru. 20Reve mini ma shiwan u soɗu nsasan, u ɓa̱ru le ta̱ hali u fele na ana a na a la'ai ushin. 21Ili i wuma i na i ri o uvaɗi suru a̱ kuwa̱ ta̱, nnunu ni inama yu u'wa ni inama yu una, ni ili yi ika̱ta̱pu e iɗa suru, na ama waru suru. 22Ili i na i ri na̱ wivuwun suru e iɗa yu u'yewu, u kuwa̱ ta̱. 23A̱sula̱ a̱ kimusa̱ ta̱ ili i wuma suru a̱tsuma̱ o uvaɗi u nda, ama, inama, ni ili yi ika̱ta̱pu e iɗa, na̱ nnunu, suru nle a̱ kimusa̱ le ta̱. Ili i na i la'ai goon a̱yi ɗa Nuhu na aza a na a̱ da̱na̱i oɓolo na̱ a̱yi a̱tsuma̱ a wantsu'un. 24Reve mini ma̱ ɓa̱ru uvaɗi, hali rana ukpaku na̱ kupoton (150).
Àwon tá yàn lọ́wọ́lọ́wọ́ báyìí:
Ufaru 7: TSW
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©️2025 Language Development and Translation Initiative (LDTI)