मत्‍ती 23

ढोगियन के बिरोध में चेतावनी

(मरकुस 12:38–39; लूका 11:43–46; 20:45–46)

1ईसू नें भीड और अपने चेलान ते कही, 2“सास्त्रन कूं सिखाबे बारे और फरीसिन कूं मूसा की व्‍यबस्था कूं समझाबे कौ अधिकार है। 3जामारै बे तुमते जो कछू कहिंगे बाय मानियों और बाय करियों। पर बे जो करतै बाय मत करियों, चौंकि बे जो कैहतें बाय बे खुद नांय करत। 4बे एक ऐसे भारी बोझ कूं आदमिन के ऊपर लाद दैतै, जिनकौ उठाबौ बिनके काजै कठिन है, पर बे खुद एक उगरिया कौ सहारौऊ देबौ नांय चांहत।

5 #मत्‍ती 6:1“बे अपने हात और माथे पै बांधबे बारे ताबीजन कूं, जामें बे सास्त्र रखतें, बिनें बे चौंड़ौ बनबातें, और अपने कपड़न की झालरन कूं बढ़ी भयी रखतै। बे जि सब काम लोगन कूं दिखाबे काजै करतैं। जाते के लोग बिनैं धरमातमा समझें। 6बे दाबत में आदर बाई जगैह पै और पिराथना घरन में मुख्‍य जगैन में बैठबौ चाहतैं। 7और बिनें बजारन में नमस्‍कार करबाबौ और ‘गुरू’ कैहबायबो अच्‍छौ लगतै।

8“पर तुम कबऊ अपने आप कूं काऊ ते ‘गुरू’ मत कैहबईयों। चौंकि तुमारौ गुरू तौ एकईए और तुम सब तौ भईया-बहन हो। 9और धरती पै काऊए अपनों ‘पिता’ मत कहियों। चौंकि पिता तौ एकईऐ और बू सुरग में हैं। 10और तुम अपने आपकूं कबऊ उपदेसक मत कैहलबईयों चौंकि उपदेसक तौ एकईऐ बू ‘मसीह’ है। 11#मत्‍ती 20:26,27; मर 9:35; 10:43,44; लूका 22:26जो तुम में बड़ौ होय बू तुमारौ सेबक बनैं। 12#लूका 14:11; 18:14और जो कोई अपने आप कूं बड़ौ बनाबेगौ बू छोटौ करौ जाबैगौ और जो कोई अपने आप कूं छोटौ बनाबेगौ बू अपने आपकूं बड़ौ बनाबेगौ।

ईसू नें पाखंडन की निंदा करी

(मरकुस 12:40; लूका 11:39–42,44,52; 20:47)

13“हे कपटी सास्त्रन कूं सिखाबे बारेऔ और फरीसियौ तुम पै हाय। तुम आदमिन कै काजै सुरग के राज में जायबे बारे दरबाजे कूं बन्द कर देतौ, ना तौ तुम खुद जामें और जो सुरग में जायबौ चाहते बिननेंऊ नां जान दैमें। 14-15हे कपटी सास्त्रन कूं सिखाबे बारेऔ और फरीसियौ तुम पै हाय। तुम एक आदमी कूं अपने मत में लायबे काजै दिन रात एक कर देतौ। जब बू तुमारे मत में आय जाबते तौ तुम बाय अपनी तरैह ते नरक की सन्‍तान बनांय दैतौ। तुम बिधबान की सम्पत्‍तीय खाय जातौ। और दिखावे काजै बे लम्बी-लम्बी पिराथना करते रहतौ, जाई मारें तुम लोगन कूं परमेस्‍वर ज्‍यादा दन्‍ड दैबैगौ।

16“हे अन्धे अगुवाऔ, तुम पै हाय, तुम कैहतौ, ‘अगर कोई बड़े पिराथना घर की सौगन्ध खाबै तौ कछू नांय होत, अगर कोई बड़े पिराथना घर के सौने की सौगन्ध खाबै तौ बू सौगन्ध बंध जाबैगी।’ 17हे अन्धे मूर्खो, को बड़ौऐ, सोनो यां बू बड़ौ पिराथना घर, जो सौनेऐं पबित्र करतै? 18और तुम जेऊ कहतौ, ‘अगर कोई बेदी की सौगन्ध खाबै तौ कछू नांय, पर जो भेंट बापै रखी है, अगर कोई वाकी सौगन्ध खाबै तौ बंध जाबैगौ।’ 19हे आँन्धरेऔ, को बड़ौऐ, भेंट या बेदी जाते भेंट पबित्र होत है? 20जामारै जो बेदी की सौगन्ध खाबे, बू वाकी और जो कछू बापै रखौ जाते बाऊ की सौगन्ध खातै। 21और जो बड़े पिराथना घर की सौगन्ध खाबे, बू वाकी और बामें रैहबे बारेन कीअऊ सौगन्ध खाबतुए। 22#मत्‍ती 5:34और जो सुरग की सौगन्ध खाबै, बू परमेस्‍वर के राजगद्‍दी और बापै बैठबे बारे कीऊ सौगन्ध खाबतुए।

23“हे कपटी सास्त्रन कूं सिखाबे बारेऔ और फरीसियों हाय है तुम पै। तुम पुदीना और सौफ जीरे कौ तौ दसमांस देतौ। पर सबनते बड़ी बात परमेस्‍वर की व्‍यबस्था कूं मानबो भूल जातौ। जैसे न्याय, दया, भरोसा भलौ तौ जि होतौ कै तुम इन्‍नेंऊ बिनके संग और इनकूं अऊं मानते। 24हे अन्धे नेताऔ तुम मच्‍छरन्‍नें तौ छान डारतौ पर ऊँठ के ऊँठ निगल जातौ।

25“हे कपटी सास्त्रन कूं सिखाबे बारेऔ और फरीसियों, तुम पै हाय तुम उन थारी और कटोरन की तरैह हो ऊपर ते मांजे जाते चौंकि तुमारे मन में लालच और अन्याय भरौ भयौ है। 26हे अन्धे फरीसियों, जैसे पैहले कटोरा और थारीन कूं भीतर ते मांजो जाते तौ बे बाहरऊ साफ है जातै।

27 # प्रेरि 23:3 “हे कपटी सास्त्रन कूं सिखाबे बारेऔ और फरीसियों, तुम पै हाय। तुम चूना फिरी भई कबरन के समान हो जो ऊपर ते तौ सुन्दर दिखाई देतीं हैं, परन्तु भीतर मुरदेन की हड्‍डियन और सब प्रकार की गन्दगी ते भरी हैं। 28जाई तरैह ते तुमऊ ऊपर ते आदमिन कूं धरमी दिखाई दैतौ, पर भीतर ते कपट और अधर्म ते भरे भए हो।

ईसू नें दण्ड की भविस्‍यबानी करी

(लूका 11:47–51)

29“हे कपटी सास्त्रन कूं सिखाबे बारेऔ और फरीसियों, तुम पै हाय। तुम परमेस्‍वर की ओर ते बात बतायबे बारेन की कब्रन्‍नें खोदते हो और धरमियन की कबरन कूं सबांरते हो। 30और कैहतौ, ‘अगर हम अपने बाप-दादन के दिनान में होते तौ परमेस्‍वर की ओर ते बात बतायबे बारेन की हत्‍या में बिनके साझी न होते।’ 31जाते तौ तुम अपनी गबाही खुदई देतौ, कै तुम परमेस्‍वर की ओर ते बात बतायबे बारेन के मारबे बारेन की सन्तान हो। 32जामारै तुम अपने बाप-दादन के पाप कौ घड़ा भर रये हो।

33 # मत्‍ती 3:7; 12:34; लूका 3:7 “हे सांपो, और सांप के सपोलाओ। तुम नरक की सजा ते कैसे बचौगे? 34जामारै देखौ कै, मैं तुम्हारे जौरै परमेस्‍वर की ओर ते बात बतायबे बारे और बुद्धिमान और सिखाबे बारेन कूं भेजरौऊं और तुम बिनमें ते कछुन नें मार डारिंगे और कछुन नें क्रूस पै चढ़ाऔगे और कछुन नें अपने पिराथना घरन में कौडे मारौगे, और कछुन नें एक नगर ते दूसरे नगर में खदेड़ते फिरिंगे। 35जामारै धरमी हाबिल ते लैकें बिरिक्याह कै बेटा जकरयाह तक, जाकूं तुमने बड़े पिराथना घर और बेदी के बीच में मार डारौ हतो और जितने धरमियन कौ खून धरती पै बहायौ गयोऐ, बू सब तुमारे सिर पै परैगौ। 36मैं तुमते सच कैहतूं, जे सब बातें जा समै के लोगन पै आय परैगी।

येरूसलेम के काजै ईसू कौ पिरेम

(लूका 13:34–35)

37“हे येरूसलेम, हे येरूसलेम, तू जो परमेस्‍वर की ओर ते बात बतायबे बारेन कूं मार डालतै, और जिनें परमेस्‍वर ने तेरे जौरै भेजौए, बिनपै पत्‍थर बरसाबतै, मैंनें कितनीऊं बेर तेरे लोगन कूं बैसेई आपस में इकठ्‌ठौ करबौ चाहौए जैसे एक मुरगी अपने बच्‍चन कूं अपने पंखन के नीचे समैट लेतै। पर तैने नांय चाहौ। 38देखौ, तुमारौ घर तुमारे काजै उजाड़ छोड़ दियौ जाबेगौ। 39चौंकि मैं तुमते कहतूं, ‘अब ते जब तक तुम न कहोगे, कै धन्य है बू जो पिरभू के नाम ते आबे। तब तक तुम मोय फिर कबऊ नांय देखेगौ।’”

Àwon tá yàn lọ́wọ́lọ́wọ́ báyìí:

मत्‍ती 23: BRAJ

Ìsàmì-sí

Pín

Daako