Jeelim 2
2
Ba na chwi ba vwoa yera yera tei to
1 Baŋa Wɛ déem ta ma ta de Moses de Aron o we:
2“Isarele tiina bam maama jege se ba chwi ba vwoa yam mo dwi de dwi na ye dáa dáa ba kaare wara-jei sem. Nɔɔno maama maa wó taa jege o kɔgɔ gwɛɛm yere de o sɔ-yuu kom yere na gweere ya bere jaja to.
3-9Ko ná ye wara-jei sem wɛ-puli seeni daa kam, dwia yanto mo wó jeini se Judah dwi dem taa wo ba yiga ne. Dwi maama wó jeini de ba yiga tu tento dwoŋi mo:
| Dwi dem | Yiga tu wom | Baara bam ni |
|---|---|---|
| Judah | Aminadabi bu Naason | 74,600 |
| Isakara | Zuwara bu Netaneli | 54,400 |
| Zebulun | Helon bu Eliabi | 57,400 |
| Ba maama: | 186,400 |
Judah kɔgɔ kom mo wó to Isarele tiina kɔ-fɔrɔ kom yiga ne se ba taa via.
10-16Ko ná ye wara-jei sem tega-kuri seeni daa kam, dwia yanto mo wó jeini se Ruben dwi dem taa wo ba yiga ne. Dwi maama wó jeini de ba yiga tu tento dwoŋi mo:
| Dwi dem | Yiga tu wom | Baara bam ni |
|---|---|---|
| Ruben | Sedura bu Elizura | 46,500 |
| Simeon | Zurisadayi bu Selumeli | 59,300 |
| Gad | Deweli bu Eliasafe | 45,650 |
| Ba maama: | 151,450 |
Ruben kɔgɔ kom konto mo wó saŋe Judah kɔgɔ kom se Isarele tiina kɔ-fɔrɔ kom taa via.
17Levi tiina bam nam mo wó zeŋe wara-vwei dem ba taa via kɔ-fɔrɔ kom tetare laŋa ne. Kɔgɔ maama wó taa via nenɛɛne ba na yeini ba chwi ba vwoa yam jei selo ne to mo, se nɔɔno maama taa vei de o kɔgɔ kom gwɛɛm yere na gweere de bere jaja to.
18-24Ko ná ye wara-jei sem wɛ-zoore seeni daa kam, dwia yanto mo wó jeini se Efrayim dwi dem taa wo ba yiga ne. Dwi maama wó jeini de ba yiga tu tento dwoŋi mo:
| Dwi dem | Yiga tu wom | Baara bam ni |
|---|---|---|
| Efrayim | Amihuda bu Elisama | 40,500 |
| Manasɛ | Pedazura bu Gamaleli | 32,200 |
| Benjamin | Gideoni bu Abidan | 35,400 |
| Ba maama: | 108,100 |
Efrayim kɔgɔ kom konto mo wó saŋe ba ke batɔ tu se Isarele tiina kɔ-fɔrɔ kom taa via.
25-31Ko ná ye wara-jei sem baŋa seeni daa kam, dwia yanto mo wó jeini se Dan dwi dem taa wo ba yiga ne. Dwi maama wó jeini de ba yiga tu tento dwoŋi mo:
| Dwi dem | Yiga tu wom | Baara bam ni |
|---|---|---|
| Dan | Amisadayi bu Ahiyezera | 62,700 |
| Asere | Ocharan bu Pageli | 41,500 |
| Nafitali | Enan bu Ahira | 53,400 |
| Ba maama: | 157,600 |
Dan kɔgɔ kom konto mo wó kweeli Isarele tiina kɔ-fɔrɔ kom maama wone ba taa via. Ba maama wó taa vei de ba kɔgɔ kom gwɛɛm yere na gweere de bere jaja to mo.”
32Ba déem na jeeli Isarele tiina kɔ-fɔrɔ kom sɔ-yuu de sɔ-yuu to, ba kɔgɔ kom maama na ke daane to ye baara morro bia yaredo de tetɔ, de bia yanu de finnu (603,550). 33Ko daare, ba déem wo jeeli Levi dwi dem ni ba woli Isarele kɔ-fɔrɔ kom ne. Ko maa ye se ko tɔge de Baŋa Wɛ na pɛ Moses ni se o ke tei to mo.
34Isarele tiina bam déem ma yɔɔre ba ke ba tɔge ni delo Baŋa Wɛ na pɛ Moses se ba ke to. Ba déem yeini ba chwi ba vwoa konto dwoŋi mo, sɔ-yuu de sɔ-yuu, kɔgɔ de kɔgɔ. Ba déem ta na gwɛ ba maa kɛ to, nɔɔno maama tɔge de o sɔ-yuu tiina mo o via.
Àwon tá yàn lọ́wọ́lọ́wọ́ báyìí:
Jeelim 2: KBG
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Ghana Institute of Linguistics, Literacy and Bible Translation (GILLBT)