Jeelim 1
1
Ba jeeli Isarele tiina bam ni
1Bena yalei bene dem chane selei chana kam boboa dɛ delo Isarele tiina bam na nwoŋi Ejipti teo kom ne to mo Baŋa Wɛ ŋɔɔne de Moses Sinayi kagoa kam ne. Wara-vwei dem wone mo o déem ŋɔɔne ded‑o ye o we:
2“Nmo de Aron jege se á jeeli Isarele tiina bam ni mo. Jeeli-ba-na sɔ-yuu de sɔ-yuu, diga de diga wone se á lɔre baaro maama de o yere.#Jeelim 26:2 3Á maa wó jeeli balo bam na yi bena finlei ba daŋe ye ba yi jara keim to ni, se á pɔɔre-ba kɔgɔ de kɔgɔ. 4Ko na ye tei to, dwi maama wó le ba sɔ-yuu yiga tu dedoa mo se kotu woli abam.
5-15Baara balo na zege dwi maama ŋwaane se ba woli abam de á totoŋe dem to yera mo tento:
| Dwi dem | Yiga tu wom |
|---|---|
| Ruben | Sedura bu Elizura |
| Simeon | Zurisadayi bu Selumeli |
| Judah | Aminadabi bu Naason |
| Isakara | Zuwara bu Netaneli |
| Zebulun | Helon bu Eliabi |
| Josɛf bu Efrayim | Amihuda bu Elisama |
| Josɛf bu Manasɛ | Pedazura bu Gamaleli |
| Benjamin | Gideoni bu Abidan |
| Dan | Amisadayi bu Ahiyezera |
| Asere | Ocharan bu Pageli |
| Gad | Deweli bu Eliasafe |
| Nafitali | Enan bu Ahira” |
16Nɔɔna bam konto mo ba déem le Isarele dwia yam maama wone, se ba leiri ba kɔgɔ kom maama yuu ne ba toŋe totoŋe dem konto. Banto mo ye yiga tiina ba sɔ-yuni tem ne.
17Moses de Aron na lɔre nɔɔna bam konto yera yam to, ba déem ma seene ba ja-ba se ba woli totoŋe dem. 18Chane selei chana kam boboa dɛ ne mo ba bwoŋi Isarele tiina kɔ-fɔrɔ kom maama ba ke daane. Ba ma popone ba sɔ-yuni tem de ba di sem yera ba tiŋi. Ko ná ye baara balo maama na yi bena finlei ba daŋe to, ba déem popone nɔɔno maama de o yere. 19Ba ke se ko maŋe de Baŋa Wɛ na pɛ Moses ni se o ke tei to mo. Sinayi kagoa kam ne mo ba jeeli baara bam tento dwoŋi:
20-43Isarele dwia yam maama wone ba déem jeeli baara balo na yi bena finlei ba daŋe ye ba yi jara keim to ni. Ba ma popone ba yera ba tiŋi, nɔɔno maama de o sɔ-yuu kom de o diga kam mo.
| Dwi dem | Baara bam ni |
|---|---|
| Isarele bu-kwea Ruben | 46,500 |
| Simeon | 59,300 |
| Gad | 45,650 |
| Judah | 74,600 |
| Isakara | 54,400 |
| Zebulun | 57,400 |
| Josɛf bu Efrayim | 40,500 |
| Josɛf bu Manasɛ | 32,200 |
| Benjamin | 35,400 |
| Dan | 62,700 |
| Asere | 41,500 |
| Nafitali | 53,400 |
44Moses de Aron dedaane Isarele yiga tiina fuga-balei bam déem na jeeli nɔɔna bam ni tei to mo konto. Nɔɔno maama nam zege o pae o diga kam mo. 45Ko nam ye Isarele tiina baara balo na yi bena finlei ba daŋe ye ba yi jara keim to mo ba jeeli ba ni. 46Baara bam maama maa ye nɔɔna morro bia yaredo de tetɔ, dedaane bia yanu de finnu (603,550).
47Ba déem nam wo jeeli Levi dwi tiina bam ba woli de dwia yadwonna yam.#Jeelim 3:12-13 48Kokuri to, Baŋa Wɛ déem ya maŋe o ta de Moses mo o we:
49“Abam ná lage á jeeli Isarele tiina bam ni, se á yé jeeli Levi dwi tiina bam á woli da. 50Ko nam na ye tei to, abam wó pa se Levi tiina bam mo taa nii amo wara-jei sem, dedaane jei sem konto wo zela yam baŋa ne. Banto mo wó yeini ba zeŋe wara-vwei dem de de zela yam ba ja kɛ. Ba ta wó taa toŋe de wo totoŋa ba pa-ne, se ba daare ba chwi ba vwoa ba che wara-jei sem. 51Abam ná lage á gɔ á vwoa yam se á vo jeiga kadwoŋi, ko ye banto mo wó gɔ wara-vwei dem, se ba ja-de ba kɛ. Á ná yi jeiga kam, banto mo wó chwi vwei dem jei-doŋa kam ne. Wolo maama ná dae Levi dwi tu ye o ná tiini o yi wara-vwei dem yera, se ba go konto tu.
52Ko nam ná ye Isarele tiina bam maama, ba jege se ba chwi ba vwoa mo sɔ-yuu de sɔ-yuu, se kɔgɔ maama taa jege tuta na popone ko yere jaja to. 53Ko daare, Levi tiina bam wó chwi ba vwoa ba kaare Wɛ wara-jei sem mo. Konto wó pa se ba che se nɔɔn-nɔɔno yé yi dáane se ko pa a bane zaŋe Isarele tiina kɔgɔ kom baŋa ne ko ŋwaane. Ko ye Levi dwi tiina bam mo wó taa nii wara-vwei dem wonnu maama baŋa ne.”
54Isarele tiina bam déem ma yɔɔre ba ke ba tɔge ni delo Baŋa Wɛ na pɛ Moses se ba ke to.
Àwon tá yàn lọ́wọ́lọ́wọ́ báyìí:
Jeelim 1: KBG
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Ghana Institute of Linguistics, Literacy and Bible Translation (GILLBT)