Chullu 7
7
Wɛleere jene kaanem
1“Wɛleere jene kaanem dem jege se de ke tento mo. Kaanem dem konto tiini de ye wose mo. 2Ba wó go wɛleere jene kaanem varem wom jeiga kalo ba na yeini ba go zwɛɛm kaanem varem wom da to mo.#7:2 Jeiga kam konto wo kaanem dakaa saŋa kalo na jeeri tega-baŋa seeni to. (Chullu 1:11) Kaanem tu wom laam wó kwei varem wom jana mo o dole dole kaanem dakaa kam sɛ sena sem ne. 3Nɔɔno wom jege se o lɔɔne varem wom lara maama se ba ma ke kaanem ba pa Wɛ. Ko maa wó taa ye o nabili-bwogo kom, de lara kalo na meeli o wo-zela yam yera ne to, 4dedaane o tapwale-bia balei bam de lara kalo na meeli da to mo, ko ta woli de o chwɛ dem kuri dem seeni. 5Kaanem tu wom maa wó zwɛ wonnu tem konto maama kaanem dakaa kam baŋa ne, se te taa ye pɛɛre te pae Baŋa Wɛ. Konto ye wɛleere jene kaanem mo. 6Baaro wolo maama na nwoŋi kaanem tiina dwi dem wone to jege chwoŋa se o di varem wom nɔna yam. Ba nam jege se ba di-ya jeiga kalo na ye wose to ne mo, ya na tiini ya ye wose to ŋwaane.
7Wɛleere jene kaanem dem dedaane wɛleere saarem kaanem dem maama jege chulu dedoa mo. Kaanem tu wolo na ke-ya o ma le nɔɔno lwarem Wɛ yiga ne to mo jege chwoŋa se o di ya nɔna yam. 8Ko nam ná ye zwɛɛm pɛɛre kaanem dem, Kaanem tu wolo na kaane-de o pa Wɛ to mo tei varem wom tankɔlɔ kom. 9Ko ta ná ye muni pɛɛre delo maama ba na wɔga kura wone, naa ba na saŋe, naa ba na wó kware luu baŋa ne to, ko ye kaanem tu wolo na ke kaanem dem to nyem mo. 10Ko daare muni pɛɛra yadwonna yam yalo na ye wodi-gwei to, Aron bu-baara bam maama wó chɛ-te mo ba pa daane se ko taa mae daane, nenɛɛne nuga ná woli muni dem wone, naa ka ná wo woli da de.
Yazura pɛɛre kaanem
11Yazura pɛɛre kaanem delo nɔɔno na wó ke o pa Baŋa Wɛ to jege se de ke tento mo. 12Nɔɔno ná ke pɛɛre konto dwoŋi se o ma ke Wɛ lei, kotu jege se o kwei bworobworo o ja o ba o woli de kaanem dem varem wom. O wó gwaane muni de nuga mo o ma ke bworobworo kolo sabɔle na tere ko wone to. O ta wó kwei muni dem o ma wɔ bworobworo-memene o daare o ma nuga o taare taare de maama. O daa ta wó kwei mun-bwei mo o gwaane de nuga o ma wɔ bworobworo dwi dedwoŋi. 13Kotu ná ke yazura pɛɛre kaanem lei keim ŋwaane, o ta jege se o kwei bworobworo kolo sabɔle na woli ko wone to o ja o ba o woli da. 14Kotu laam wó le bworobworo dwia yam konto maama wone dedoa dedoa o ba o ma ke kaanem o pa Baŋa Wɛ. Bworobwooru tem konto wó taa ye kaanem tu wolo na kwei yazura kaanem varem wom jana bam o dole dole kaanem dakaa kam yera ne to nyem mo. 15Ko ná ye varem wom tete nɔna yam, ba jege se ba di ya maama dɛ delo wone ba na ke kaanem dem to mo. Ba yé pa se tega poore ye ya ta wora.
16Nɔɔno nam ná ke yazura pɛɛre kaanem ni-gwonim ŋwaane, naa ko ye o wo-ywoŋo pɛɛre mo, ba wó di varem wom nɔna yam dɛ dem ba na ke kaanem dem to wone, ba jege chwoŋa se ba tiŋi nɔna yalo ba na di ba daare to se tega ná poore, se ba di-ya. 17Kaanem dem nɔna yam konto ta ná wora ya yi da yatɔ dɛ dem ne, se á zwɛ-ya. 18Da yatɔ dɛ dem ne, yazura kaanem dem nɔna yam ná daare ye nɔɔno ná di-ya, Baŋa Wɛ bá sɛ o jwoŋi kotu pɛɛre dem. Kaanem dem bá taa jege nyɔɔre de pa wolo na ke-de to. De jigi wo-zɔɔne mo Wɛ tei ne, ye kotu maŋe se o na waarem.
19Nɔna yam ná dwei woŋo kolo maama na jege digiru Wɛ chullu tem seeni to, ko dae se á di-ya. Á jege se á zwɛ nɔna yam konto mo. Ko daare ko ná ye nɔna yadwonna yam, wolo maama na kwɛ o tete Wɛ ŋwaane to jege chwoŋa se o di-ya. 20Wolo nam na wo kwɛ o tete de o digiru to ná tɔge o di yazura kaanem dem nɔna yalo na ye Baŋa Wɛ nyem to, ba wó le kotu se o daa yé tɔge o woli Isarele dwi dem wone mo. 21Ko ta woli da, nɔɔno wolo ná dwei woŋo kolo na jege digiru Wɛ chullu tem seeni to, ko ná maŋe ko ye nabiinu wo-digiru, naa varem wo-digiru, naa wo-zɔɔne delo Wɛ na chuli to, ye o ná tɔge o di kaanem dem nɔna yam, ba jege se ba le kotu de se o daa yé tɔge o woli Isarele dwi dem wone mo.”
Wɛ chuli se Isarele tiina bam di jana dedaane lara
22 Baŋa Wɛ ta ma ta de Moses o we:
23“Ta n bere Isarele tiina bam we: Yé di-na lara kalo na wo naane yera ne to, naa pei yera ne to, naa bone yera ne to. 24Á vara bam dedoa ná tege o tete toone, naa kago-vara ná tore‑o, á jege chwoŋa se á kwei o lara kam á ke kolo maama á na lage to, se á nam yé di-ka. 25Wolo ná di vara balo dwi na maŋe se ba ma ba ke wodiu pɛɛre ba pa Baŋa Wɛ to lara, ba jege se ba le kotu se o daa yé tɔge o woli Isarele dwi dem wone mo. 26Abam ná vei á zoore jei selo maama ne, yé fɔge á di-na varem jana, naa zuna jana. 27Abam wone wolo ná di jana, ba jege se ba le kotu se o daa yé tɔge o woli Isarele dwi dem wone mo.”
Kaanem tiina na wó jwoŋi kolo kaanem dem ne to
28 Baŋa Wɛ ta ma ta de Moses o we:
29“Ta de Isarele tiina bam we: Wolo maama ná boŋe se o ja yazura pɛɛre o ba o ke kaanem o pa Baŋa Wɛ, se o pɔɔre de wone kolo na wó taa ye Baŋa Wɛ tete nyem to. 30Kotu nam wó ja-de de o tete je mo o ba o ke wodiu pɛɛre o pa Baŋa Wɛ. O wó kwei varem wom lara kam de o nyɔɔne seeni nɔna yam, o zeiŋi-te wɛɛne se te taa ye pɛɛre te pa Baŋa Wɛ. 31Kaanem tu wom maa wó zwɛ varem wom lara kam kaanem dakaa kam baŋa ne o pa Wɛ, se ko ná ye varem wom nyɔɔne dem, de ye Aron de o bia bam nyem mo. 32Abam ná ke yazura pɛɛre kaanem maama, se á kwei varem wom jazem chwei dem á pa kaanem tu wom se de taa ye o nyem. 33Ko ye kaanem tu wolo na kwei varem wom lara de o jana bam o ma o ke yazura kaanem dem to mo wó jwoŋi-de. 34Ko ná ye yazura pɛɛre kaanem delo Isarele tiina bam na yeini ba ke to, amo Baŋa Wɛ mo jwoŋi varem wom nyɔɔne dem, de o jazem chwei dem mo ba tei ne a daare a kwei-ya a pa Aron dwi dem kaanem tiina bam. Amo ni dem konto wó taa wora mo taa wuu.”
35 Baŋa Wɛ wodiu pɛɛra yam wone popɔra kam konto mo pɔɔre ka pa Aron de o bia bam, ko zege dɛ dem ba na tiŋi-ba se ba ji Baŋa Wɛ kaanem tiina to. 36Ko maa ye dɛ delo ne ba na lwogi nuga ba yuni ne se ba ji Wɛ kaanem tiina to, mo Baŋa Wɛ pɛ Isarele tiina bam ni se ba taa jaane pɛɛra yam konto ba tui ba pa ba de ba dwi dem. O nam ke se ni dem konto taa wora wuu mo.
37Chullu tem konto mo wora kaanem dwi dwi ŋwaane. Ko maa ye zwɛɛm pɛɛre kaanem dem, de wodiu pɛɛre kaanem dem, de wɛleere saarem kaanem dem, de wɛleere jene kaanem dem, de kaanem tiina tiŋim kaanem dem, dedaane yazura pɛɛre kaanem dem. 38Baŋa Wɛ déem na kwei nia yanto o pa Moses se Isarele tiina bam taa tɔge-ya ba ma kwei ba pɛɛra yam ba ke kaanem ba pa‑o to, de ba déem wo Sinayi Peo kom teiŋa ne mo kagoa kam yuu ne.
Àwon tá yàn lọ́wọ́lọ́wọ́ báyìí:
Chullu 7: KBG
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Ghana Institute of Linguistics, Literacy and Bible Translation (GILLBT)