Chullu 6
6
1 Baŋa Wɛ ta ma ta de Moses o we:
2“Abam wolo ná tusi ye o nwoŋi Baŋa Wɛ kwaga ne de o na gane o dwoŋi tei to, kotu na jege se o ke tei to mo tento.#Kolosia 3:9 Ko wó taa ye nenɛɛne o ná pini o dwoŋi woŋo mo o ya na kwei o pa‑o se o taa nia, naa o ná yɔɔre o vere o dwoŋi wonnu, naa o ná ke swa o gane‑o, 3naa o ná nɛ woŋo kolo na jei to ye o fɔ vwa we o wo nɛ-ko, naa o ná fɔge vwa wonnu tedwonna ŋwaane pa se o tusi ne nabiina na yeini ba tusi tei maama to. 4Nɔɔno ná tusi konto dwoŋi ye o maane we o wɛleere dem wo o yuu ne, kotu jege se o jwoori o ŋwe kolo o na vere to o pa o dwoŋi wom mo. Ko ná ye wonnu telo o na pini to, naa jejegero telo o na vere to, naa wo-jiu kolo o na nɛ to, 5naa woŋo kolo o na fɔge vwa ko baŋa ne to, se o jwoori o ŋwe te maama ni ne, ye o ta woli ko sabu popɔra dedoa popɔre senu maama wone. O maa wó ke konto mo o pa te tu wom dɛ dem o na tu se o ke o wɛleere jene kaanem dem to. 6Kotu ta jege se o ja pi-bala kalo na ba jege gɛɛ ka yera ne to mo o ba o pa Baŋa Wɛ se o ma o ŋwe o wɛleere jene. O wó kwei pi-bala kam o ke Wɛ kaanem tu jeŋa ne se o ma o ke wɛleere jene kaanem dem. Ka sabu wó maŋe de kolo na ye chekke to. 7Kaanem tu wom wó tɔge chwoŋa kam konto mo se o le nɔɔno wom lwarem dem Baŋa Wɛ yiga ne. Wɛ ta wó yage wɛleera yalo maama o na ke konto dwoŋi to o ma chɛ‑o.”
Wɛ kaanem tiina bam totoŋa
Vara zwɛɛm kaanem
8 Baŋa Wɛ ta ma ta de Moses o we:
9“Ta n bere Aron de o bu-baara bam amo nia yanto we: Zwɛɛm kaanem dem jege se de ke tento mo. Ba na zwɛ varem wolo ba kaane ba pa Wɛ to jege se o maŋe kaanem dakaa kam baŋa ne mo, se o zwɛ tete dem maama wone se tega laam ba ka poore. Abam nam wó pa se kaanem dakaa kam mini dem taa di taa mo. 10Tega ná poore, kaanem tu wom wó zo o gare-bwora kam de o gare-kuri-kukua kam, ba na mɛ gare-fefale ba sɔ-te to mo. O laam maa wó pɛ tentwarem delo varem wom na zwɛ o daare kaanem dakaa kam ne to, se o ta la-de o tiŋi kaanem dakaa kam teiŋa ne. 11Kaanem tu wom laam maa wó lɔɔre o zula gwaaro tem o tiŋi o daare o zo gwaaro tedwonna, ye o kwei tentwarem dem o ja o nwoŋi ba tigisim jeiga kam o vo o yi pwola kalo ba na kwɛ Wɛ chullu tem seeni to o lwo o yage dáane.
12Kaanem dakaa kam baŋa mini dem dae se de dwei. Zezeŋa maama ne kaanem tu wom jege se o woli dɛ mo mini dem ne se de taa di. O laam maa wó tigisi zwɛɛm kaanem varem wom mini dem baŋa ne, se o daare o zwɛ varem lara kalo na ye yazura pɛɛre ka pa Wɛ to. 13Mini dem jege se de taa di mo taa, se de yé dwei kɔtaa!
Wodiu pɛɛre kaanem
14Wodiu pɛɛre kaanem dem jege se de ke tento mo. Aron bu-baara bam mo wó ja pɛɛre dem konto ba vo kaanem dakaa kam yiga ne se ba kwei-de ba pa Baŋa Wɛ. 15Ba wolo na zege se o toŋe kaanem totoŋa to maa wó zwɛ pɛɛre dem muni de nuga o ja-bɔŋɔ ne, o woli de talwoŋ-ywoŋa kam maama. O wó kwei pɛɛre dem popɔra kanto mo o zwɛ kaanem dakaa kam baŋa ne se ka taa ye gulim pɛɛre ka pa Wɛ. Pɛɛre dem konto lwom maa ywomma de pae Baŋa Wɛ. 16Wodiu kolo maama na daare to wó taa ye Aron de o bia bam nyem mo. Ba wó di-ko Wɛ wara-vwei dem konkɔlɔ ne mɛ na ye wose to. 17Ba jege se ba kwei muni dem ba ma ba wɔ bworobworo, ye sabɔle tere ko wone. Kokuri to, pɛɛre dem de ye wose mo, ne wɛleere saarem kaanem dem de wɛleere jene kaanem dem de na ye tei to. Baŋa Wɛ pɔɔre wodiu kom konto o wodiu pɛɛra yam wone mo o pa kaanem tiina bam. 18Aron diga kam baara maama mo jege chwoŋa se ba di-ko. Ni dem konto wó taa wora taa ko pae Aron de o kwaga kam, se ba wane ba jwoŋi ba nyem Baŋa Wɛ wodiu pɛɛra yam wone.#1 Korinti 9:13 Wolo maama nam ná dwei wodiu kom konto, kotu de pwɛ mo amo ŋwaane.”
19 Baŋa Wɛ ta ma ta Moses o we:
20“Ba ná lage ba lwo nuga Aron dwi dem nɔɔno yuu ne se ba tiŋi‑o se o ji kaanem tu, dɛ dem konto ne nɔɔno wom wó ja mun-bwei bwɛ selei se ko maŋe de wodiu pɛɛre dem na yeini de ke tei to mo o ba. O maa wó kwei muni dem bɔŋa dedoa o ma o ke kaanem zezeŋa ne, se o daare o ma bɔŋa dedoa o ma o ke kaanem dedaan-ni ne. 21O ta wó woli nuga mo muni dem ne, ye o daare o kware-de luu baŋa ne. O laam wó mumugi wodiu kom o ma ke wodiu pɛɛre o pa Baŋa Wɛ se de lwom taa ywomma de pa‑o. 22Aron bu wolo ba na lage ba tiŋi‑o se o ji Wɛ kaanem nakwe tu to tete mo wó kwɛ wodiu pɛɛre dento dwoŋi. O jege se o zwɛ pɛɛre dem maama mo o ma ke kaanem, de maama na ye Baŋa Wɛ nyem to ŋwaane. Keim dem konto wó taa wora mo wuu. 23Muni pɛɛre delo Wɛ kaanem tu na yeini o ke to, ko dae se o di wodiu kom de fenfee de. Ko fe se o zwɛ ko maama mo kula.”
Wɛleere saarem kaanem
24 Baŋa Wɛ ta ma ta Moses o we:
25“Ta de Aron de o bia bam we: Wɛleere saarem kaanem dem jege se de ke tento mo. Ba wó go wɛleere saarem varem wom ba pa Baŋa Wɛ jeiga kalo ne ba na yeini ba go zwɛɛm kaanem varem wom da to mo.#Chullu 1:11 Kokuri, kaanem dem konto tiini de ye wose mo. 26Kaanem tu wolo nam ná ke kaanem dem konto, o wó di varem wom wara-vwei dem konkɔlɔ kom ne mɛ na ye wose to mo. 27Kolo maama ná dwei varem wom konto, ko de pwɛ mo amo ŋwaane. Varem wom jana ná taŋe gɔrɔ kolo, se á maŋe jei selo na ye wose to wone á zare-ko. 28Ba ná kwei dɔgɔ kambia ba ma saŋe nɔna yam, se ba laam lɔ-ka. Ko nam ná ye channa kambia mo ba mɛ ba saŋe, se ba fɔge ba titigi-ka se ka gɔ lanyerane, ye ba daare ba seeri. 29Baaro wolo maama na nwoŋi kaanem tiina dwi dem wone to jege chwoŋa se o di wɛleere saarem varem nɔna yam mo. Ya nam tiini ya ye wose mo. 30Ko daare ko ná ye wɛleere saarem varem wolo jana ba na jaane ba zo wara-vwei dem wone se ba le lwarem Wɛ yiga ne to, á ba jege chwoŋa se á di varem wom konto. Ko ye se á zwɛ o maama á pa Baŋa Wɛ mo.”
Àwon tá yàn lọ́wọ́lọ́wọ́ báyìí:
Chullu 6: KBG
Ìsàmì-sí
Daako
Ṣe Àfiwé
Pín
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Ghana Institute of Linguistics, Literacy and Bible Translation (GILLBT)